لاہور: شریف خاندان کی شوگر ملز میں چینی کی خریداری سکینڈل کے خلاف نیب انکوائری کو لاہور ہائی کورٹ میں چیلنج کر دیا گیا۔
تفصیلات کے مطابق ہائی کورٹ میں درخواست حسیب وقاص اور عبداللہ شوگر ملز نے دائر کی جس میں نیب کے نوٹسز کو چیلنج کیا گیا ہے ۔
درخواست گزار کمپنیوں نے موقف اختیار کیا کہ نیب نے دونوں شوگر ملز سے 2007 کی چینی خریداری کا ریکارڈ مانگا گیا ہے جبکہ 2007 میں ٹریڈنگ کارپوریشن سے ٹینڈرز اور قانونی تقاضوں کے مطابق چینی خریدی گئی اوراس حوالے سے تمام تر قانونی تقاضے پورے کیے گئے۔
درخواست میں کہا گیا ہے کہ نیب کو 10 برس پرانی چینی خریداری کی تحقیقات کا اختیار ہی نہیں ہے جبکہ اس حوالے سے عدالت کی جانب سے حکم امتناعی بھی موجود ہے مگر اس کے باوجود دوبارہ نوٹس بھجوائے گئے ہیں۔
شریف خاندان شوگرملزکیس*
عدالت میں درخواست گزاروں نے استدعا کی عدالت شوگر ملز کے خلاف چینی خریداری کی انکوائری کے لیے بھجوائے گئے نیب کے نوٹسز کو کالعدم قرار دے۔
یاد رہے کہ رواں سال مارچ میں لاہور ہائی کورٹ نے شریف فیملی کی حسیب وقاص اور چوہدری شوگر ملز کو سیل کرنے کا حکم دیا تھا جبکہ اس سے قبل لاہور ہائیکورٹ نے شریف خاندان کی تینوں شوگر ملزکو کرشنگ سے روک دیا تھا، چیف جسٹس لاہور ہائی کورٹ نے وکیل کو وارننگ دیتے ہوئے کہا تھا کہ اگر کرشنگ ہوئی تو ذمے داری آپ پر عائد ہوگی۔
واضح رہے وزیراعلیٰ پنجاب شہباز شریف پر الزام ہے کہ انہوں نے قوائد کی خلاف ورزی کرتے ہوئے نئی شوگر ملوں کے قیام پر پابندی کے باوجود تین نئی شوگر ملز قائم کی تھیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
