Author: عابد خان

لاہور: ہائی کورٹ نے محکمہ وائلڈ لائف سے کالے ہرن کی نسل کے تحفظ کے لیے کیے جانے والے اقدامات کی تفصیلات طلب کرلیں۔

تفصیلات کے مطابق لاہور ہائی کورٹ میں کالے ہرن کی معدوم ہوتی نسل اور اس کے تحفظ کے لیے دائر درخواست کی سماعت چیف جسٹس لاہور ہائی کورٹ منصور علی شاہ نے کی۔

درخواست میں مؤقف اختیار کیا گیا ہے کہ کالے ہرن کی نسل بہت تیزی سے ختم ہورہی ہے اور خطرناک حد تک اس کی نسل میں کمی ہوئی رہے، اس تمام تر صورتحال کے باوجود حکومت ہرن کو تحفظ دینے کے لیے کوئی اقدامات نہیں کررہی۔

درخواست گزار نے مؤقف اختیار کیا کہ بہاولپور میں کالے ہرن چوری ہوئے مگر حکومت اور شعبہ وائلڈ لائف نے اُن کی برآمدگی کے حوالے سے کوئی اقدامات نہیں کیے جبکہ جانوروں کے تحفظ کے لیے 2015 میں پالیسی مرتب کی گئی تاہم شعبہ وائلڈ لائف اس پر کوئی عمل درآمد نہیں کررہا۔

درخواست گزار نے لاہور ہائی کورٹ کو بتایا کہ بھارت میں کالے ہرن کے شکار پر مکمل پابندی عائد ہے اور اس ضمن میں معروف بالی ووڈ اداکار سلمان خان کو مقدمے کا سامنا کرنا پڑا تھا۔

چیف جسٹس لاہور ہائی کورٹ نے محکمہ وائلڈ لائف سے کالے ہرن کے تحفظ سے متعلق تمام تر تفصیلات طلب کرلیں اور ہدایت کی کہ محکمے کی جانب سے جو بھی اقدامات کیے گئے اُن کی تصاویر بھی پیش کی جائیں، درخواست پر مزید کارروائی 20 ستمبر کو ہوگی۔

لاہور: ڈی آئی جی پیٹرولنگ غلام محمد ڈوگر کے بیٹوں کی حوالگی سے متعلق کیس کی سماعت ہوئی، بچوں اور ماں کی ملاقات میں رقت آمیز مناظر دیکھنے میں آئے۔

تفصیلات کے مطابق لاہور ہائی کورٹ میں جسٹس عالیہ نیلم کی سربراہی میں کیس کی سماعت ہوئی، گزشتہ سماعت پر عدالتی حکم کے مطابق ڈی آئی جی نے دونوں بچوں کو عدالت میں پیش کیا۔

اس موقع پر ماں اور بچے ایک دوسرے کو دیکھ کر جذباتی ہوگئے اور ماں بچوں سے لپٹ کر روتی رہی جس کے بعد کمرہ عدالت میں جذباتی مناظر دیکھنے میں آئے، صحافیوں نے اس منظر کو عکس بند کرنے کی کوشش کی تو ڈی آئی جی اسکواڈ کے اہلکاروں نے میڈیا کے نمائندوں سے بدتمیزی کی اور رپورٹرز کے موبائل چھین کر فوٹیج ڈیلیٹ کردیں جبکہ ماں نے بچوں سے ملنے کی کوشش کی تو اہلکاروں نے دھکے بھی دیے۔

کینیڈا کی خاتون شہری مرجان نے عدالت میں مؤقف اختیار کیا کہ غلام محمد ڈوگر نے شادی کے بعد طلاق دی اور دونوں بیٹوں کو زبردستی چھین کر اپنے ہمراہ لے گیا۔ ماں نے عدالت سے استدعا کی کہ غلام قاسم اور غلام جعفر کو اب اُن کا باپ ملنے سے زبردستی روکتا ہےلہذا فوری طور پر بچے واپس دلائے جائیں۔

قبل ازیں عدالتی احکامات کے باوجود پولیس نے بچوں کو سماعت کے وقت پیش نہیں کیا اور ہر بار کوئی نہ کوئی بہانہ بنایا جس پر جج نے برہمی کا اظہار کرتے ہوئے آئندہ سماعت پر ہرصورت بچے پیش کرنے کا حکم دیا تھا۔

سخت عدالتی حکم ملنے کے بعد ڈی آئی جی مجبور ہوئے اور انہوں نے بچوں کو پیش کردیا جس کے بعد کمرہ عدالت میں جذباتی مناظر میں دیکھنے میں آئے۔ عدالت نے سماعت 15 اگست تک ملتوی کرتے ہوئے بچوں کو دوبارہ پیش کرنے کا حکم جاری کردیا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔