Author: عابد خان

لاہور : قصور میں مبینہ ڈانس پارٹی سے گرفتار ملزمان کی ویڈیو بنانے اور وائرل کرنے والے اہلکاروں کو نوکری سے برخاست کردیا گیا۔

تفصیلات کے مطابق لاہور ہائیکورٹ کے جسٹس علی ضیا باجوہ نے شہری وشال شاکر کی توہین عدالت کی درخواست پر سماعت کی۔

ڈی پی او قصور عیسی سکھیرا عدالتی حکم پر پیش ہوئے، عدالت نے ڈی پی او سے استفسار کیا کہ ویڈیو وائرل کی گئی تو انہوں نے اس حوالے سے کیا کیا۔

انہوں نے پوچھا کہ پولیس اہلکار کی جرات کیسے ہوئی لڑکیوں کے بال کھینچ کر ویڈیو بنانے کی، ڈی پی او قصور نے آگاہ کیا کہ متعلقہ پولیس اہلکاروں کو نوکری سے برخاست کر دیا ہے۔

ڈی پی او قصور کا کہنا تھا کہ 48 گھنٹوں میں واقعے پر ایکشن لے کر پولیس اہلکاروں کو گرفتار کیا۔یہ کوئی نجی ایونٹ نہیں تھا، اس کی باقاعدہ سوشل میڈیا پر تشہر کی گئی تھی، متعلقہ ایس ایچ او ڈانس پارٹی منعقد کروانے والوں کے ساتھ رابطے میں تھا۔

ایس ایچ او نے ریڈ سے پہلے پارٹی منعقد کروانے والوں کو آگاہ کیا اور کمزور ایف آئی آر دی۔

جسٹس علی ضیا باجوہ نے ریمارکس دیے کہ جو کام پولیس اہلکاروں نے کیا ہے وہ کسی بھی معاشرے میں قابل قبول نہیں ۔

انہوں نے ڈی پی او سے استفسار کیا کہ کیا وہ یقین دہانی کروا سکتے ہیں کہ دوبارہ ان کے ضلع میں یہ نہیں ہو گا۔

جس پی ڈی پی او نے یقین دہانی کرائی کہ ان کے ضلع میں دوبارہ ایسا نہیں ہوگا، پراسیکیوٹر جنرل پنجاب نے آگاہ کیا کہ ملزمان کی ٹک ٹاک بنا کر پولیس پراسیکیوشن کا کیس خراب کرتی ہے۔

جسٹس علی ضیا باجوہ نے ہدایت کی کہ آئندہ سماعت پر ایڈوکیٹ جنرل پنجاب بھی عدالت میں پیش ہوں، ایڈوکیٹ جنرل عدالت کی معاونت کریں کہ کیا کسی ملک میں ملزمان کو ایسے ایکسپوز کرنے کا قانون ہے۔

قصور میں مبینہ ڈانس پارٹی سے گرفتار ملزمان کی ویڈیو بنانے اور وائرل کرنے والے اہلکاروں کو نوکری سے برخاست کردیا گیا۔

لاہور ہائیکورٹ نے تفتیشی افسر اور ایس ایچ او کو توہین عدالت کا نوٹس جاری کردیا اور ڈی آئی جی کو کل پیش ہونے کا حکم دے دیا۔

لاہور: لاہور ہائیکورٹ نے خشک سالی سے بچاو کیلئے واٹر ایمرجنسی نافذ کرنے کی تجویز کرنے کی تجویز دے دی اور ہدایت کی کہ واٹر ایمرجنسی کا معاملہ کابینہ میں پیش کرا کر آئندہ سماعت پر اس بارے میں رپورٹ پیش کی جائے۔

تفصیلات کے مطابق لاہور ہائیکورٹ کے جسٹس شاہد کریم نے سموگ تدارک کیلئے گزشتہ سماعت کا تحریری حکم جاری کر دیا۔

جس میں عدالت نے باور کرایا کہ یہ وقت کی ضرورت ہے کہ پانی کی کمی سے بچاو کیلئے کورونا کی طرز پر ایمرجنسی کا نافذ کیا جائے اور واٹر ایمرجنسی کیلئے اس کی سمری کابینہ میں پیش کی جائے۔

عدالت نے واٹر ایمرجنسی پر کابینہ کی رپورٹ بھی مانگ لی، فیصلے میں نشاندہی کی گئی کہ ڈی جی پی ڈی ایم اے نے ماحولیاتی تبدیلی کے پیش نظر دریائوں میں پانی کی کمی کا خدشہ ظاہر کیا۔

عدالت نے زور دیا کہ پی ڈی ایم اے کو خشک سالی سے بچاو کیلئے بنیادی کردار ادا کرنا ہو گا، اسی پی ڈی ایم اے پانی کے بچاؤ کیلئے پنجاب میں دیگر محکموں کیساتھ ملکر پیشگی اقدامات کرے۔

عدالت نے قرار دیا کہ ایمرجنسی کا نفاذ پی ڈی ایم اے کو پانی کے تحفظ کیلئے اقدامات میں مزید مضبوط کرے گا اور پانی کے تحفظ کیلئے مخلتف محکموں کے فوکل پرسنز کی کمیٹی بنائی جائے۔

فیصلے میں کہا گیا کہ فوکل پرسن پانی کے تحفظ کے بارے میں اقدامات کی رپورٹ بھی عدالت پیش کریں جبکہ دو صفحات کے فیصلے میں عدالت نے گھروں میں پانی ضائع کرنیوالوں اور سوسائٹی انتظامیہ کیخلاف بھی کارروائی کا حکم دے دیا۔

عدالت نے ہدایت کی کہ کوآپریٹو ڈیپارٹمنٹ گھروں میں گاڑیاں دھونے والے اور سوسائٹی انتظامیہ کو بھی جرمانے کرے اور گھروں میں پائپ لگا کر صاف پانی ضائع کرنے پر بھی مکمل پابندی عائد کی جائے تاہم درخواستوں پر آئندہ سماعت 11 اپریل کو ہوگی۔

لاہور : لاہور ہائیکورٹ نے  ایکس کی بندش کیخلاف درخواست پر اٹارنی جنرل پاکستان کو 17 اپریل کیلئے طلب کر لیا اور کہا آکر بتائیں ٹویٹر پر پابندی کی قانونی حیثیت کیا ہے؟

تفصیلات کے مطابق چیف جسٹس لاہور ہائیکورٹ جسٹس عالیہ نیلم کی سربراہی میں تین رکنی فل بنچ نے ایکس کی پابندی کے معاملے پر سماعت کی۔

فل بنچ نے ہدایت کی کہ اٹارنی جنرل پاکستان بتائیں کہ سوشل میڈیا ایکس پر پابندی کے نوٹیفکیشن کی کیا قانونی حیثیت ہے؟

سماعت کے دوران عدالتی حکم پر پی ٹی اے سمیت دیگر متعلقہ اداروں کے افسر پیش ہوئے، ایڈیشنل اٹارنی جنرل مرزا نصر احمد نے بتایا کہ پی ٹی اے کی طرف سے جواب اور رپورٹ داخل ہوچکا ہے۔

چیف جسٹس لاہور ہائیکورٹ نے باور کرایا کہ فل بنچ یہ چاہتا ہے اٹارنی جنرل پاکستان عدالت میں موجود ہوں اور وہ عدالت میں آکر ٹویٹر پر پابندی کی قانونی حیثیت کا بتائیں۔

فل بنچ نے ریمارکس دیئے کہ اٹارنی جنرل پاکستان کی وجہ سے ہی یہ کیسز رکے ہوئے ہیں۔

لاہور : ڈرامہ نگار خلیل الرحمان قمر اغوا برائے تاوان کیس کا ٹرائل مکمل ہونے کے بالکل قریب پہنچ گیا ہے۔

تفصیلات کے مطابق ڈرامہ نگار خلیل الرحمان قمر کو جھانسہ دیکر تاوان کیلئے اغوا کرنے کے کیس میں ملزمہ آمنہ عروج اورحسن شاہ سمیت دیگر کیخلاف مقدمے کی سماعت ہوئی۔

انسداد دہشت گردی عدالت کے جج ارشد جاوید نے مقدمے پر سماعت کی ، پراسیکیوٹر عبدالجبار ڈوگر نے حتمی دلائل دیئے اور موقف احتیار کیا کہ مقدمے کے شواہد یہ ثابت کرتے ہیں کہ ملزموں نے تاوان کیلئے ڈرامہ نگار کو اغوا کیا۔

سرکاری وکیل نے استدعا کی کہ آمنہ عروج اور حسن شاہ سمیت دیگر ملزموں کو واضح ثبوتوں پر سزا سنائی جائے۔

سماعت کے دوران آمنہ عروج اور حسن شاہ سمیت دیگر ملزموں کو عدالت میں پیش کیا گیا تاہم مقدمے پر اب مزید کارروائی کل ہوگی۔

ستوکتلہ پولیس نے خلیل الرّحمٰان قمر کی درخواست پر انہیں تاوان کیلئے اغوا کرنے کا مقدمہ درج کیا، لاہور ہائیکورٹ نے مقدمے پر کارروائی ایک ماہ میں مکمل کرنے کا حکم دے دیا۔

انسداد دہشت عدالت نے مقدمے میں ملزموں کے وکلا کو کل حتمی دلائل کیلئے طلب کر لیا ہے، عدالت حتمی بحث کےبعد مقدمےکا فیصلہ سنائے گی۔

لاہور : شوہر کے قتل کے مقدمے میں سزائے موت پانیوالی بیوی اور ساتھی کو شک کا فائدہ دیتے ہوئے بری کردیا گیا۔

تفصیلات کے مطابق لاہور ہائیکورٹ میں شوہر کے قتل کے مقدمے کے ملزمان کی سزا کے کیخلاف اپیلوں پر سماعت ہوئی۔

لاہور ہائیکورٹ نے شک کا فائدہ دیتے ہوئے ملزمان کی اپیلوں کو منظور کرلیا اور شوہر کے قتل کے مقدمے میں سزائے موت پانیوالی بیوی اور ساتھی بری کردیا۔

جسٹس شہرام سرور کی سربراہی میں دو رکنی بینچ نے تفصیلی فیصلہ جاری کردیا ، جس میں کہا کہ مقدمےکے مطابق بیوی حنااور منیر احمد شادی کی تقریب میں گئے، شادی کی تقریب سےمنیر واپس نہ آیا تلاش کرنے پر اس کی لاش ملی۔

پراسیکیوشن کے مطابق اہلیہ اور دلاور نےدو نامعلوم افراد کیساتھ ملکر شوہر کو قتل کیا، پراسیکیوشن کیس ثابت کرنے میں ناکام رہی،موقع پر کوئی گواہ نہیں تھا، اعلیٰ عدلیہ کے فیصلے کی روشنی میں شک کا فائدہ ملزم کو دیا جاتا ہے۔

خیال رہے ملزمان کیخلاف تھانہ سرگودھا پولیس نے 2019 میں قتل کا مقدمہ درج کیا تھا۔