لاہور : لاہور ہائیکورٹ نے گھروں میں گاڑیاں دھوکر پانی ضائع کرنے والوں کو 10 ہزار روپے جرمانہ کرنے کا حکم دے دیا۔
تفصیلات کے مطابق لاہور ہائیکورٹ کے جسٹس شاہد کریم نے اسموگ تدارک کیلئے موثر اقدامات نہ کرنے کیخلاف درخواستوں پر سماعت کی۔
ممبر واٹر جوڈیشنل کمیشن نے زیر زمین پانی کی سطح کم ہونے کے بارے میں رپورٹ پیش کردی، عدالت نے ریمارکس دیے پانی کو محفوظ بنانے کیلئے باقاعدہ رولز بنانے کی ضرورت ہے. اگر گھروں میں گاڑیاں دھونے کا کام ختم کرا لیں تو آپ بہت سا پانی بچا سکتے ہیں۔
عدالت نے ہدایت کی کہ باقاعدہ مہم چلانی چاہیے کہ گھروں میں گاڑیاں دھونا سختی سے منع ہے، جو خلاف ورزی کرے دس ہزار جرمانہ کر دیں۔
لاہور ہائی کورٹ نے کہا کہ ڈولفن کی ذمہ داری لگائیں کہ وہ مکمل مانیٹرنگ کرے اور ہدایت کی کہ جس پٹرول پمپ پر واٹر ٹریٹمنٹ پلانٹ نہیں ہے، اسے سیل کردیں، پہلے وارننگ دے کر ایک لاکھ جرمانہ کریں اور مساجد میں بھی پانی کے ضیاع کو روکنا ہوگا۔
عدالت نے چیمپینز ٹرافی کے دوران ٹریفک جام پر اظہار ناراضگی کرتے ہوئے قرار دیا کہ شہر میں اتنا بڑے ایونٹ ہورہے ہیں،لوگوں کو کچھ پتہ نہیں لگ رہا کہ انہوں نے کہاں جانا ہے۔
عدالت نے استفسار کیا چیف ٹریفک آفیسر کدھر ہیں؟ کیا انہیں پتہ نہیں کہ شہر کی سڑکوں پر کیا ہورہا ہے، لوگوں کو پتہ ہونا چاہیے کہ ٹیموں کی آمدروفت کس وقت ہے اور سڑکوں پر ٹریفک کے متبادل روٹس کے بورڈ لگے ہونے چاہیے۔
عدالت نے ریمارکس دیئے کہ دو تین ماہ پہلے سے پتہ ہے یہاں چمپیئنز ٹرافی ہونی ہے مگر یہ دفتر سے باہر نہیں نکلتے۔
لاہورہائیکورٹ نے کرکٹ ایونٹ متعلق شہریوں کو آگاہی دینے کا بھی حکم دے دیا، بعد ازاں سماعت دس فروری تک ملتوی کردی گئی۔
