Author: افضل خان

کراچی : سپارکو ملازم کے قتل کا مقدمہ درج کرلیا گیا، مقتول صادق نگری کو گزشتہ روز نامعلوم ملزمان نے کار پر فائرنگ کرکے قتل کیا تھا۔

تفصیلات کے مطابق گزشتہ روز کراچی کے علاقے اسکیم 33 خادم سولنگی گوٹھ کے قریب سپارکو ملازم کے قتل کا مقدمہ درج کرلیا گیا۔

مقدمہ مقتول کے بھائی اسلم کی مدعیت میں سائٹ سپرہائی وےتھانے میں درج کیا گیا، مقدمےمیں ڈکیتی مزاحمت اورقتل کی دفعہ بھی شامل کی گئی ہے۔

مدعی مقدمے نے بتایا کہ مقتول صادق نگری اہل خانہ کے ساتھ کارمیں ناشتہ کرنےکیلئےجارہا تھا، صبح ساڑھے 7 بجے اسکیم 33 میں 2 موٹرسائیکل سواروں نے روکنے کی کوشش کی۔

مدعی کا کہنا تھا کہ میں نے بچنےکے لیے کارکی رفتاربڑھائی توملزمان نےفائرنگ کردی، زخمی حالت میں بھائی کو اسپتال لے کر پہنچا جہاں وہ دم توڑگیا۔

پولیس نے بتایا کہ مقتول صادق نگری کوگزشتہ روزنامعلوم ملزمان نےکارپرفائرنگ کرکےقتل کیا تھا تاہم کیس کی تفتیش اسپیشل انویسٹی گیشن یونٹ کو دی گئی ہے

خیال رہے رواں سال کراچی میں ڈکیتی مزاحمت پر قتل افراد کی تعداد 101 سے تجاوز کر چکی ہے۔

کراچی : مسروقہ گاڑی پر تاوان مانگے جانے کا انکشاف سامنے آیا، ملزم نے کال پر کہا رقم ٹرانسفر کرو گاڑی آپ کو پہنچا دیں گے۔

تفصیلات کے مطابق کراچی میں مسروقہ گاڑیوں کے نام پر تاوان طلب کرنے والا گینگ سرگرم ہے، قیمتی گاڑیوں سے محروم شہری دوہری پریشانی کا شکار لیکن مسرقہ گاڑیاں برآمد کرنے میں ناکام ہے، اے وی ایل سی پولیس نے ایسے کیسز کو فراڈ کا نام دے کر جان چھڑا لی اور رواں سال اے وی ایل سی مسروقہ گاڑیوں میں 10 فیصد ریکور نہ کرسکی۔

کراچی میں گاڑیاں اورموٹرسائیکل اسنیچنگ کیسز میں برآمدگی کی شرح 10 فیصد بھی نہیں، شہریوں کی پریشانی میں اس وقت اضافہ ہوجاتا ہے جب ان کی مسروقہ گاڑیوں کی بازیابی کیلئے تاوان کی کالز آنا شروع ہوجائیں۔

ایسا ہی کچھ ہوا عمران نامی شہری کے ساتھ جس کی گاڑی 11 اکتوبر کو کورنگی سے چوری ہوئی اور 15 اکتوبر کو تاوان کیلئے کالز آنا شروع ہوگئی۔

۔کورنگی صنعتی ایریا سے چوری گاڑی کے مالک کو تاوان کیلئے کال موصول ہوئی، تاوان مانگنے والا خود کو پولیس اہلکار ظاہر کرتا رہا اور کال پر کہا رقم ٹرانسفر کرو گاڑی آپ کو پہنچا دیں گے۔

سی سی ٹی وی فوٹیجز میں ملزمان کو گاڑی چوری کرکے لے جاتے دیکھا جاسکتا ہے، سی سی ٹی وی فوٹیجز کے باوجود اے وی ایل سی گاڑی برآمد نہ کرسکی۔

15 اکتوبر کو نامعلوم نمبر سے مدعی سے رابطہ گیا گیا، رابطہ کرنے والے ملزم نے بتایا کہ گاڑی ان کے پاس ہے، ملزم نے گاڑی کی بازیابی کے لئے جوڑ توڑ شروع کیا۔

تاوان کے حوالے سے جیسے ہی پولیس کو اگاہ کیا گیا ملزم نے اپنا نمبر بند کردیا، مدعی کا کہنا ہے کہ اے وی ایل سی حکام کو آگاہ کیا تاحال کوئی پیشرفت نہ ہوسکی۔

پولیس نے موقف دیتے ہوئے کہا کہ ممکنہ طور پر تاوان کے لئے کالز کرنے والا کوئی فراڈی ہوگا، اس قسم کی وارداتوں کے بعد تاوان کے لئے ایسی کالز ماضی میں بھی آتی رہی ہیں ٹیکنالوجی کا استعمال کرتے ہوئے کالز کرنے والے ملزم کو تلاش کررہے ہیں۔

کراچی : نجی اسپتال میں ڈاکٹروں کی مبینہ غفلت کے باعث حاملہ خاتون جاں بحق ہوگئیں، ورثاء نے وزیراعلیٰ ، وزیر صحت اور آئی جی سندھ سےانصاف کی فراہمی کا مطالبہ کردیا ہے۔

تفصیلات کے مطابق کراچی کے علاقے اورنگی ٹاوٴن کے نجی اسپتال میں ڈاکٹروں کی مبینہ غفلت سے حاملہ خاتون جاں بحق ہوگئیں۔

جان بحق خاتون کمسن بچے کی ماں تھی اور دوسرے بچے کی پیدائش سے پہلے موت ہوگئی۔

ورثاء نے الزام عائد کیا ہے کہ چیک اپ کیلئے گھر کے قریب نجی اسپتال میں لے گئے تھے جہاں غلط انجکشن لگانے گئے، جس سے موت واقعے ہوئی۔

اس حوالے سے نجی اسپتال کی لیڈی ڈاکٹر کا موقف ہے کہ متاثرہ خاتون کی حالت پہلے سے ہی بہت تشویشناک تھی جسے طبی امداد فراہم کی گئی۔

متاثرہ خاندان نے محکمہ صحت سندھ سے مطالبہ کیا ہے کہ نجی اسپتال میں علاج معالجے کا معیار بہتر بنانے کیلئے اقدامات کیے جائیں ۔

دوسری جانب حیدرآباد میں بھی ایسا ہی واقعہ سامنے آیا ، جہاں دوران ڈلیوری ڈاکٹر کی مبینہ غفلت سے خاتون جاں بحق ہوگئی۔

پولیس نے حاملہ خاتون کا آپریشن کرنے والی ڈاکٹر کو گرفتارکرلیا ہے، ذرائع نے بتایا کہ پولیس نے آپریشن کرنے والی دو ڈاکٹرز میں سے ایک کو گرفتار کیا لیکن گرفتاری ظاہر نہیں کی۔