Author: افضل خان

کراچی : فائرنگ سے جاں بحق ہونے والی مریم ثاقب کے والد کا کہنا ہے کہ بیٹی کو اسکول چھوڑنے جارہا تھا کہ اچانک فائرنگ کی آواز سن کر پیچھے مڑ کر دیکھا تو بیٹی خون میں لت پت تھی۔

تفصیلات کے مطابق کراچی کے علاقے بفرزون میں فائرنگ سے 7 سالہ مریم ثاقب کے جاں بحق ہونے کا معاملے پر تیموریہ پولیس نے واقعے کے عینی شاہد مریم کے والد ثاقب کا بیان لے لیا۔

والد نے بتایا کہ مریم ثاقب کو کار میں اسکول چھوڑنے جارہا تھا کہ اچانک فائرنگ کی آواز سن کر پیچھے مڑ کر دیکھا تو کار کی پچھلی سیٹ پر بیٹی خون میں لت پت تھی۔

مریم کے والد کے بیان کے مطابق مسلح ملزمان فائرنگ کے بعد بھاگتے ہوئے دیکھے گئے، ممکنہ طورپرنامعلوم افراد کے درمیان فائرنگ کا تبادلہ ہورہا تھاکہ مریم ثاقب فائرنگ کی زد میں آگئی۔

ایس ایس پی سینٹرل نے کہا کہ بفرزون میں روڈ کی دوسری جانب سےگولی 7سالہ مریم کو لگی، جائے وقوعہ اور اطراف کے علاقوں میں سی سی ٹی وی فوٹیجز تلاش کر رہے ہیں، جائے وقوعہ پرگولیوں کے خول بھی ڈھونڈ رہے ہیں۔

حکام کا کہنا تھا کہ واقعاتی شواہد کی مدد سے ملزمان کی گرفتاری کیلئے کوششیں کررہے ہیں۔

کراچی : میاں بیوی کو گھر میں گھس کر قتل کرنے والے مبینہ ملزم کےفرار ہوتے وقت کی فوٹیج سامنے آگئی ، ملزم گلیوں سے ہوتا ہوا پیدل فرار ہوا۔

تفصیلات کے مطابق کراچی میں کورنگی مہران ٹاؤن میں دہرے قتل کے واقعے کی تحقیقات جاری ہے ، میاں بیوی کو گھر میں گھس کر قتل کرنے والے مبینہ ملزم کےفرار ہوتے وقت کی فوٹیج سامنے آگئی ہے۔

سفید شلوارقمیض پہنے ٹوپی لگائے ملزم کو فرارہوتے دیکھا جاسکتا ہے، ملزم گلیوں سے ہوتا ہوا پیدل فرار ہوا، پولیس کا کہنا ہے کہ سی سی ٹی وی فوٹیج کی مدد سے ملزم کو شناخت کررہے ہیں۔

پولیس حکام نے بتایا دونوں میاں بیوی کی پسند کی شادی تھی، علاقہ مکین نے بتایا ہے مقتولین کا کسی رشتے دار سے جھگڑا چل رہا تھا اورآج صبح یہ فائرنگ کا واقعہ ہوا ہے۔

حکام کا کہنا ہے کہ موقع سے چار خول ملے ہیں، جلد ملزمان کو گرفتار کرلیں گے۔

علاقہ مکین نے پولیس کو بتایا تھا کہ واقعہ ابتدائی طور پرغیرت کےنام پر قتل کا ہے، دونوں میاں بیوی تقریباً 8سال سےرہائش پزیرتھے، موٹر سائیکل پر سوار 2 ملزمان گھر کے باہر پہنچے،گھر کے اندر آدھے گھنٹے تک شور شرابہ اور لڑائی جھگڑا ہوتا رہا تاہم جھگڑا اورشور شرابہ سن کر محلے سے کوئی ان کی مدد کو نہ آیا۔

رینجرز اور پولیس کی بھاری نفری جائے وقوعہ پر موجود ہے اور علاقہ مکینوں کے بیانات حاصل کئے جارہے ہیں۔

محکمہ جیل خانہ جات میں کرپٹ سسٹم کے خلاف گھیرا تنگ کردیا گیا، احتساب کی بازگشت سن کر کرپٹ سسٹم کے آلاکار بھاگنے لگے۔

تفصیلات کے مطابق محکمہ جیل خانہ جات کے بااثر افسر سنیل حسین شاہ نے 90 روز کی رخصت لے لی ہے۔ سنیل حسین کے خلاف بداعنوانی اور خلاف ضابطہ تقرری کے الزامات ہیں۔

مذکورہ افسر کے خلاف نیب اور دیگر اداروں میں انکوائریز چل رہی ہیں۔ گریڈ 16 کے باثر افسر سنیل کو ایک ہی وقت میں کئی عہدوں کا چارج دیا گیا۔

سنیل حسین شاہ آئی جی سندھ کے پی ایس او کے علاوہ ترجمان صوبائی وزیر جیل خانہ جات بھی رہے۔ وہ ہیڈ آف اکاؤنٹس آئی جی جیل خانہ جات کے عہدوں پر براجمان رہے۔ دوران ملازمت سنیل آئی جی جیل خانہ جات کے تمام مالی معاملات بھی دیکھتے تھے۔

سنیل حسین شاہ کی چھٹی کے بعد شیراز حیدر کو آئی جی جیل خانہ جات کا پی ایس او مقرر کیا گیا ہے، اس سلسلے میں آرڈر جاری کردیا گیا ہے۔