Author: افضل خان

کراچی میں ڈاکوؤں نے لوٹ مار کی واردات میں ناکامی کے بعد فائرنگ کرکے باپ کو قتل اور بیٹے سمیت دو افراد کو زخمی کیا شہریوں نے پکڑ کر دونوں ڈاکوؤں کو مار ڈالا۔

اے آر وائی نیوز کے مطابق یہ واقعہ کراچی کے علاقے سرجانی ٹاؤن سیکٹر سیون اے میں پیش آیا جہاں 2 ڈاکوؤں نے فائرنگ کرکے ایک شخص کو قتل اور دو کو زخمی کردیا اور فرار ہونے کی کوشش کی تاہم اس موقع پر شہری کی فائرنگ سے دونوں ڈاکو موٹر سائیکل سے گر گئے۔

اس موقع پر فائرنگ کی آواز سن کر جمع ہونے والے افراد نے گرنے والے ڈٓاکوؤں پر دھاوا بول دیا اور انہیں تشدد کرکے مار ڈالا۔ واقعے کی اطلاع پر جب تک پولیس پہنچی مشتعل عوام کے تشدد سے ڈاکو ہلاک ہوچکے تھے۔

پولیس نے بتایا کہ ڈاکوؤں نے سرجانی سیکٹر سیون اے میں باپ اور بیٹا گھر کے باہر بیٹھے تھے۔ ڈاکوؤں نے انہیں لوٹنے کی کوشش کی اور ناکامی پر فائرنگ کردی۔

پولیس کے مطابق فائرنگ سے باپ موقع پر ہی جاں بحق ہوگیا جب کہ بیٹا اور ایک راہ گیر زخمی ہوئے۔ اس موقع پر ڈاکوؤں نے فرار ہونے کی کوشش کی لیکن ایک شہری کی فائرنگ سے دونوں ڈاکو موٹر سائیکل سے گر گئے۔

پولیس کا کہنا تھا کہ عوام نے ڈاکوؤں کو پکڑ کر شدید تشدد کا نشانہ بنایا جس کے نتیجے میں دونوں ڈاکو ہلاک ہوگئے۔

کراچی: شہر قائد کے علاقے لانڈھی مسلم آباد میں کمسن بچی کے اغوا اور قتل کی تحقیقات میں اہم پیش رفت ہوئی ہے۔

اے آر وائی نیوز کے مطابق کراچی کے علاقے لانڈھی مسلم آباد میں گزشتہ روز 7 سالہ بچی منیبہ کی لاش برآمد ہوئی تھی جسے تشدد اور زیادتی کا نشانہ بنانے کے بعد قتل کیا گیا تھا۔

بچی کے والد مقبول احمد کا کہنا تھا کہ دو روز تک بچی کو ڈھونڈتے رہے لیکن پولیس نے مقدمہ درج نہیں کیا اور ٹال مٹول کرتی رہی، بچی کی لاش بعدازاں کچرا کنڈی سے برآمد ہوئی۔

ان کا کہنا تھا کہ منیبہ بدھ کی دوپہر بھائی کے گھر سے لاپتا ہوئی وہ گھر سے بنا چپل پہنے نکلی تھی، بدھ کی شب تک لاش نہ ملنے پر یقین ہوگیا تھا کہ منیبہ کو اغوا کیا گیا ہے۔

بعد ازاں ابتدائی پوسٹ مارٹم میں زیادتی کی تصدیق ہوئی تھی، پوسٹ مارٹم رپورٹ میں بتایا گیا کہ مقتولہ کے جسم پرتشدد کے نشانات بھی موجود ہیں۔

 مزید پڑھیں: کراچی میں 7 سالہ معصوم بچی کا زیادتی کے بعد قتل، مقدمہ درج

کمسن بچی کی لاش ملنے کے بعد تفتیشی ٹیم نے واقعے کا مقدمہ قائد آباد تھانے میں درج کیا اور 10 مشتبہ افراد کو گرفتار کرلیا ہے۔

تفتیش میں کسی بھی صورت لاپرواہی برداشت نہیں کی جائے گی، ایس ایس پی ملیر

ایس ایس پی ملیر عرفان بہادر اور ایس ایس پی انویسٹی گیشن نے جائے وقوعہ کا دورہ کیا اور بچی کے والد کو ابتدائی تفتیش سے آگاہ کیا۔

پولیس حکام کا کہنا ہے کہ فرانزک کرائم ٹیم نے شواہد جمع کرکے لیبارٹری روانہ کردیے ہیں۔

عرفان بہادر کا کہنا تھا کہ مقدمہ کے اندراج میں تاخیر اور غفلت برتنے پر ایس ایچ او سمیت تین افسران کو معطل کردیا گیا ہے۔ انہوں نے مزید کہا کہ تفتیش میں کسی بھی صورت لاپرواہی برداشت نہیں کی جائے گی۔

کراچی: سپریم کورٹ کے حکم پر عدالتی عملہ اسلامیہ کالج کی عمارت خالی کروانے پہنچا تو طلبا نے احتجاج کیا، مزاحمت کرنے پر پولیس نے لاٹھی چارج کرتے ہوئے متعددطلبا کو حراست میں لے لیا۔

اے آر وائی نیوز کے مطابق کراچی میں اسلامیہ کالج کے طلبا کی جانب سے کالج کی عمارت خالی کروانے کے خلاف احتجاج کیا گیا جب طلبا کی جانب سے مزاحمت کی گئی تو پولیس نے طلبا پر لاٹھی چارج کیا۔

طلبا کی جانب سے پولیس پر پتھراؤ بھی کیا گیا، بعدازاں پولیس نے مزید نفری طلب کرکے طلبا کو منتشر کرنے کے لیے آنسو گیس کی شیلنگ اور واٹر کینن کا استعمال کیا۔

ذرائع کے مطابق پولیس نے متعدد طلبا کو حراست میں لے لیا ہے۔

پولیس کا کہنا ہے کہ اسلامیہ کالج پرائیویٹ پراپرٹی پر قائم ہے، ہم عدالتی بیلف کو سپورٹ کرنے کے لیے پہنچے ہیں۔

پولیس حکام کا کہنا ہے کہ کالج کا قبضہ کیس جیتنے والے ٹرسٹیز کے حوالے کیا جائے گا، دو سے تین طلبا کو حراست میں لے کر تھانے منتقل کیا گیا ہے۔

واضح رہے کہ سپریم کورٹ کے حکم پر عمل درآمد کے لیے عدالتی عملہ اسلامیہ کالج کراچی کی عمارت خالی کرانے پہنچ گیا۔

دوسری جانب کالج انتظامیہ کا مؤقف ہے کہ کالج خالی کرنے کے لیے لیگل نوٹس نہیں ملا ہے۔

کراچی کے علاقے لانڈھی میں کچرا کنڈی سے 7 سالہ بچی کمسن بچی کی لاش برآمد ہوئی ہے۔

اے آر وائی نیوز کے مطابق شہر قائد کے علاقے لانڈھی مسلم آباد سے 7 سالہ بچی کی تشدد زدہ لاش برآمد ہوئی جس کی شناخت منیبہ عمر کے نام سے ہوئی ہے۔

پولیس مقدمہ درج کرنے کے بجائے ٹال مٹول کرتی رہی، والد

بچی کے والد مقبول کا کہنا ہے کہ منیبہ بدھ کی دوپہر بھائی کے گھر سے لاپتا ہوئی وہ گھر سے بنا چپل پہنے نکلی تھی، دو روز تک پولیس ایف آئی آر درج کرنے کے بجائے ٹال مٹول کرتی رہی۔

والد نے بتایا کہ بدھ کی شب تک لاش نہ ملنے پر یقین ہوگیا تھا کہ منیبہ کو اغوا کیا گیا ہے۔

انہوں نے کہا کہ پولیس نے نام نمبر لے کر تھانے سے روانہ کردیا اور کہا کہ اگر بچی مل جائے گی تو آگاہ کردیں گے، جمعرات کی شب بھی تھانے گیا تو روزنامچے پر کوئی افسر موجود نہ تھا جب جمعے کی صبح گیا تو پولیس نے ٹال دیا۔

بچی کے والد کے مطابق بچی کی لاش کو ہم نے خود تلاش کیا، بھائی نے فون کرکے آگاہ کیا کہ علاقے سے ہی منیبہ کی لاش ملی۔

ورثا نے قائد آباد لانڈھی اسپتال چورنگی پر احتجاج کیا جس کے باعث ٹریفک کی روانی متاثر ہوئی۔

ابتدائی پوسٹ مارٹم رپورٹ میں بچی سے زیادتی کی تصدیق

ادھر پولیس کا کہنا ہے کہ ابتدائی پوسٹ مارٹم رپورٹ میں بچی سے زیادتی کی تصدیق ہوئی ہے، بچی کے جسم پر جگہ جگہ تشدد کے نشانات موجود تھے۔

 ایس ایس پی ملیر اور ایس ایس پی انویسٹی گیشن نے جائے وقوعہ کا دورہ کیا، تفتیشی حکام کا کہنا ہے کہ جائے وقوعہ اور اطراف کی جیو فینسنگ کی جارہی ہے، مشتبہ افراد کو گرفتار کرکے ان کا ڈی این اے کروایا جائے گا۔

پولیس حکام کا کہنا ہے کہ بچی کے لواحقین کا بیان قلمبند کرلیا گیا ہے، اغوا اور قتل سے متعلق اہم شواہد ملے ہیں، ملزمان جلد قانون کی گرفت میں ہوں گے۔

احتجاج ختم، پولیس کے مظاہرین سے مذاکرات کامیاب

بعدازاں مظاہرین نے پولیس سے مذاکرات کامیاب ہونے کے بعد احتجاج ختم کردیا جبکہ کوتاہی برتنے پر دو افسران کو بھی معطل کردیا گیا ہے۔

کراچی کے علاقے صدر ریمبو سینٹر کے قریب ٹریفک پولیس اہلکار نے بہادری کا مظاہرہ کرتے ہوئے بچے کو اغوا کرنے کی کوشش ناکام بنا دی۔

اے آر وائی نیوز کے مطابق شہر قائد کے مرکزی علاقے صدر میں ملزم بچے کو زبردستی لے کر جا رہا تھا کہ بچے نے ریمبو سینٹر کے قریب خود کو اغوا کار سے چھڑاتے ہوئے شور مچا دیا۔

بچے کا شور سن کر قریب ہی موجود ٹریفک پولیس اہلکار نے بھاگ کر اغوا کار کو قابو کیا اور بچے کو اس سے چھڑایا جب کہ اس دوران وہاں موجود شہریوں نے بھی ملزم کو دبوچ لیا۔

مبینہ اغوا کار کو پریڈی پولیس کے حوالے کردیا گیا ہے۔

پولیس حکام کا کہنا ہے کہ ملزم سے تفتیش جاری ہے کہ وہ کس مقصد کے لیے بچے کو اغوا کرکے لے جا رہا تھا۔