کراچی: اورنگی ٹاؤن سے جانوروں کی خریداری کے لیے مویشی منڈی میرپور خاص جانے والے بیوپاریوں سے ڈیڑھ کروڑ روپے لوٹنے کی واردات ہوئی ہے، ایک سی سی ٹی وی فوٹیج سامنے آئی ہے جس کے بارے میں کہا جا رہا ہے کہ وہ لٹیروں کی ہے۔

تفصیلات کے مطابق اورنگی ٹاؤن سے بیوپاری مویشی خریداری کے لیے میرپورخاص منڈی جا رہے تھے کہ سپر ہائی وے پر پولیس وردی اور کیپ پہنے لٹیروں نے ان سے خریداری کی رقم لوٹ لی، سفید ویگو ڈالے میں سوار مبینہ ملزمان ٹول پلازہ کا بیریئر توڑتے ہوئے فرار ہوئے۔

واقعے کا مقدمہ متاثرہ بیوپاری کی مدعیت میں گڈاپ تھانے میں درج کر لیا گیا ہے، فوٹیج میں دیکھا جا سکتا ہے کہ مبینہ ملزمان کی ویگو گاڑی میں نمبر پلیٹ بھی موجود نہیں ہے۔

مقدمے کے متن میں بیوپاری فرحان نے کہا عید الاضحیٰ کے جانور لینے کے لیے جا رہے تھے، ہمارے پاس تقریباً ڈیڑھ کروڑ روپے تھے، ہماری گاڑی جب سپر ہائی وے پر پہنچی تو ایک ویگو گاڑی پیچھے لگ گئی، سفید ویگو گاڑی میں پولیس کی وردی اور کیپ لگائے مسلح افراد بھی موجود تھے۔

مدعی فرحان نے بتایا بحریہ ٹاؤن کے قریب ویگو ڈالے میں سوار مبینہ ملزمان نے انھیں روک لیا اور اسلحے کے زور پر تمام بیوپاریوں سے نقد رقم تقریباً ڈیڑھ کروڑ روپے چھین لی اور فرار ہو گئے۔

بکرے کی فروخت، بیوی نے شوہر کے سر پر ڈنڈے کا مہلک وار کر دیا

مدعی نے اپیل کی کہ تمام بیوپاریوں کی پولیس کے اعلیٰ حکام سے درخواست ہے کہ ملزمان کو گرفتار کر کے ان سے رقم ڈیڑھ کروڑ برآمد کر کے واپس دلوائی جائے، مدعی کے مطابق لوٹ مار کا یہ واقعہ 30 اپریل کو پیش آیا تھا، پولیس تاحال کوئی پیش رفت نہیں کر سکی ہے۔

کراچی: نوشکی آئل ٹینکر حادثے کے جھلسنے والے مزید 5 افراد کراچی میں دم توڑ گئے ہیں۔

ریسکیو حکام کے مطابق بلوچستان کے علاقے نوشکی میں آئل ٹینکر میں دھماکے سے جھلسنے کا افسوس ناک واقعہ پیش آیا تھا، جس میں جھلسنے والے مزید پانچ زخمی کراچی کے اسپتال میں رات گئے دوران علاج دم توڑ گئے، جس کے بعد علاج کے لیے کراچی منتقل کیے گئے زخمیوں میں جاں بحق افراد کی تعداد 8 ہو گئی۔

پانچوں جاں بحق افراد کی میتیں سہراب گوٹھ سرد خانے منتقل کر دی گئی ہیں، ایدھی حکام کے مطابق جن کی شناخت 18 سالہ سلمان، 17 سالہ وزیر، 26 سالہ درمحمد، 25 سالہ عبدالباسط اور مصطفیٰ کے ناموں سے ہوئی ہے۔

نوشکی آئل ٹینکر دھماکے کے کتنے زخمی کراچی لائے گئے؟ ویڈیو رپورٹ

دو روز قبل بھی طیب شاہ اور جہاں زیب دوران علاج جان بحق ہوئے تھے، شدید زخمی 24 افراد کو خصوصی طیارے کے ذریعے کراچی ایئر بیس منتقل کیا گیا تھا، جہاں سے زخمیوں کو ایدھی ایمبولینسوں کے ذریعے نجی اسپتالوں میں منتقل کیا گیا تھا، ریسکیو حکام کا کہنا ہے کہ واقعے کے 16 زخمی کراچی کے 2 مختلف نجی اسپتالوں میں زیر علاج ہیں۔

زخمیوں کی کراچی منتقلی کے دوران ایک زخمی دم توڑ گیا تھا، زخمیوں کے علاج معالجے کے اخراجات بلوچستان حکومت ادا کرے گی۔

کراچی : ڈڈیفنس فیز 7 میں آن لائن بائیک رائیڈر کے قتل کرنے والے ملزمان کی سی سی ٹی وی فوٹیج سامنے آگئی، ممکنہ طور پر بائیک رائیڈر سے اسٹریٹ کرمنلز نے واردات کی کوشش اور قتل کیا۔

تفصیلات کے مطابق کراچی کے علاقے ڈیفنس فیز7 میں 2 روز قبل آن لائن بائیک رائیڈر کے قتل کا مقدمہ درج کرلیا گیا۔

بائیک رائیڈر کے قتل میں ملوث ملزمان کے فرار کی سی سی ٹی وی سامنے آگئی ، پولیس نے بتایا کہ ممکنہ طور پر بائیک رائیڈر مدثر سے اسٹریٹ کرمنلز نے واردات کی کوشش اور قتل کیا۔

سی سی ٹی وی میں ایک بائیک پر پینٹ شرٹ پہلے 2 ملزمان کوفرار ہوتے دیکھا جاسکتا ہے۔

حکام کا کہنا تھا کہ مقتول مدثر سرکاری ادارے کاملازم بھی تھا ،پارٹ ٹائم آن لائن بائیک چلاتا تھا، تحقیقات کے مطابق مقتول کی کسی سے دشمنی نہیں تھی۔

قتل کا مقدمہ ماموں کی مدعیت میں درج کیا گیا، مقتول جھنگ کارہائشی تھا اور نجی یونیورسٹی کے طالبعلم کی رائیڈ لے کر ڈیفنس آیا تھا۔

مقتول مدثر کو کمر میں گولی لگی تھی ،ممکنہ طور پر اسٹریٹ کرمنلز نے نہ رکنے پر فائر کیا تاہم قتل کے مقام پرکوئی سی سی ٹی وی نصب نہیں ، مزید تحقیقات جاری ہیں۔