کراچی : نیوچالی میں ٹرالر کی ٹکر سے جاں بحق دو نوجوانوں کو سپرد خاک کر دیا گیا، جوان سال نور محمد اور زاہدآپس میں کزنز اور بچپن کے دوست تھے۔

تفصیلات کے مطابق کراچی کے علاقے پولٹن مارکیٹ نیو چارلی کے قریب دندناتے ہیوی ٹریفک نے دو نوجوانوں کو زندگی سے محروم کردیا۔

لیاری کے نور محمد اور زاہد آپس میں کزن اور بچپن کے دوست تھے، دونوں کی نماز جنازہ مولوی عثمان پارک لیاری میں ادا کی گئی۔

دونوں دوستوں سے ملنے برتن گلی گئے تھے تاہم پولیس نے گرفتار ڈرائیور کے خلاف مقدمہ درج کرلیا ہے۔

جاں بحق نوجوانوں کے ورثاء نے الزام لگایا ہے کہ حادثے کا ذمہ دار ڈرائیور نشے میں تھا۔

نور محمد اور زاہد کی افسوسناک موت پر غمزدہ ان کے رشتہ داروں نے مطالبہ کیا ہے کہ مخصوص اوقات کے علاوٴہ شہر کے بیچوں بیچ ہیوی ٹریفک کا داخلہ بند کیا جائے۔

خیال رہے کراچی کے مختلف علاقوں میں رواں سال ٹریفک حادثات کے دوران جان بحق افراد کی تعداد 266 سے تجاوز کرگئی ہے۔

کراچی: شہر قائد کے علاقے جمالی گوٹھ میں ایک افسوس ناک واقعہ پیش آیا ہے، پانی کی لائن ٹوٹنے سے جمع پانی کے جوہڑ میں ایک 4 سالہ بچی ڈوب کر جاں بحق ہو گئی۔

تفصیلات کے مطابق سپر ہائی وے جمالی گوٹھ سے 4 سالہ بچی کی ڈوبی ہوئی لاش مل گئی ہے، ننھی یاسمین جمعہ کی دوپہر سے لاپتا تھی، بچی جمالی گوٹھ گلی نمبر 9 کی رہائشی تھی۔

علاقے کے مکین اپنی مدد آپ کے تحت بچی کو تلاش کرتے رہے، لیکن وہ نہیں مل سکی تھی، آج فراہمی آب کے لیے جمع پانی کے جوہڑ سے بچی کی لاش ملی ہے۔

والدین نے پولیس کے رویے سے اظہار مایوسی کرتے ہوئے کہا ہے کہ وہ قانونی کارروائی نہیں چاہتے، پولیس کے رویے سے پہلے ہی مایوس ہیں۔

دہلی کالونی میں دل دہلا دینے والے ٹریفک حادثے کی ویڈیو، خواتین اڑ کر دور جا گریں

ٹاؤن چیئرمین لالہ رحیم نے کہا ہے کہ جس جگہ سے بچی کی لاش ملی وہ ایک پرائیوٹ سوسائٹی ہے، جہاں پانی کی لائن ٹوٹ جانے کے باعث جوہڑ بن گیا تھا، اگر کسی کی بھی غفلت سامنے آئی تو اس کے خلاف کارروائی کریں گے۔

دوسری طرف بچی کی لاش ملنے کے معاملے پر سائٹ سپر ہائی وے اور سہراب گوٹھ پولیس نے اظہار لاعلمی کیا ہے، تاحال پولیس ضابطے کی ابتدائی کارروائی کے لیے بھی ورثا کے پاس نہیں پہنچ پائی۔

کراچی: کورنگی کریک میں بتایا جا رہا ہے کہ آگ گیس کے کسی محدود ذخیرے میں لگی ہے، جس کے بارے میں جاننے کے لیے ماہرین نے ٹیسٹ کے لیے پانی اور کیچڑ کے نمونے لے لیے ہیں۔

تفصیلات کے مطابق متعلقہ اداروں کے ماہرین کی ٹیم نے آج بھی کورنگی کریک میں آگ بھڑکنے کے جائے وقوعہ کا دورہ کیا، اور مزید لیب ٹیسٹ کروانے کے لیے مختلف مقامات سے نمونے لے لیے گئے۔

آگ والی جگہ سے پانی اور کیچڑ کے نمونے حاصل کیے گئے ہیں، اطراف کی زمین کے مختلف حصوں سے بھی نمونے لیے گئے ہیں، لیے گئے ان نمونے سے سوائل ٹیسٹ کروایا جائے گا، اور اس سے قدرتی گیس کے محدود ذخیرے کا حجم معلوم ہو سکے گا۔

ادھر کنٹونمنٹ بورڈ کے ماہرین نے انکشاف کیا ہے کہ آگ خود ہی کچھ دنوں میں بجھ جائے گی، آگ بجھانے کی صورت میں نکلنے والی گیس اطراف کے علاقوں میں پھیلنے کا خدشہ ہے۔

پلاسٹک، خطرناک فضلہ دریاؤں، لینڈ فلز، ہوا کو بری طرح متاثر کررہا ہے، وزیراعظم

آگ بورنگ کے دوران لگی

واضح رہے کہ کورنگی کریک میں بورنگ کے دوران لگنے والی آگ پر تاحال قابو نہیں پایا جا سکا ہے، جہاں نجی ہاؤسنگ سوسائٹی کی بورنگ کے دوران آگ بھڑکی تھی، آئل گیس ماہرین نے خیال ظاہر کیا ہے کہ آگ ممکنہ طور پر گیس کے زیر زمین ذخیرے میں لگی ہوگی، یہ کم گہرائی میں موجود گیس کا چھوٹا ذخیرہ ہو سکتا ہے۔

کریک کنٹونمنٹ نے علاقے کو اپنی تحویل میں لے لیا ہے، جس جگہ آگ لگی وہاں 1200 فٹ سے زائد بورنگ یا ڈرلنگ کی گئی ہے، کے ایم سی اور کنٹونمنٹ بورڈ کی فائر بریگیڈ جائے وقوعہ پر موجود ہے، فائر بریگیڈ کا کہنا ہے کہ جائے وقوعہ پر سوئی سدرن گیس یا کسی دوسرے ادارے کی گیس لائن موجود نہیں ہے۔

کمشنر کراچی کے مطابق نجی پلاٹ پر بورنگ کے دوران رات سوا 2 بجے کے قریب آگ لگی، آگ لگنے کی جگہ کے اطراف آبادی موجود نہیں ہے، ڈی سی کورنگی، ایس ایس جی سی اور پی پی ایل کے نمائندے جائے وقوعہ پر موجود ہیں۔

پاکستان آئل ریفائنری

پاکستان آئل ریفائنری کے نمائندے نے کہا ہے کہ ابھی ذخیرے کا اندازہ نہیں لگایا جا سکتا کہ کتنا بڑا ہے، پانی کے سیمپل لے لیے گئے ہیں، ٹیسٹ کے بعد صورت حال واضح ہو جائے گی، اس علاقے میں پہلے بھی ایسے واقعات ہوئے ہیں، بورنگ کے دوران گیس کا اخراج ہو جاتا ہے، اور عموماً ایک سے 2 ہفتوں میں ایسی آگ خود بجھ جاتی ہے۔

نمائندہ پاکستان آئل ریفائنری کا کہنا ہے کہ آگ کو مانیٹر کیا جائے گا اس کے بعد آئندہ کا لائحہ عمل طے کیا جائے گا، نمائندے نے آگ کے مقام پر کنکریٹ بلاک لگانے کی ضرورت سے بھی آگاہ کیا۔

کراچی : کورنگی کراسنگ کے قریب لگی آگ 10 گھنٹے بعد بھی نہیں بجھائی جاسکی، آگ کی شدت کےباعث پانی اور فوم کے استعمال کا فائدہ نہیں ہورہا۔

تفصیلات کے مطابق کراچی کے علاقے کورنگی کریک آئل ریفائنری کے قریب کھدائی کے دوران لگی آگ تاحال بے قابو ہے، فائر بریگیڈ کی کوششوں کے باوجود 10 گھنٹے بعد بھی آگ پر قابو نہیں پایا جاسکا۔

فائر بریگیڈ کی کوششوں کے باوجود اب تک آگ پر قابو نہیں پایا جاسکا، فائر بریگیڈ کی آٹھ گاڑیاں اور واٹرٹینکر آگ بجھانے کی کوششوں میں مصروف ہیں۔

چیف فائرافسرمحمد ہمایوں خان نے میڈیا سے گفتگو کرتے ہوئے کہا کہ آگ رات1 بجے لگی تھی جس پر تاحال قابو نہیں پایا گیا، جہاں آگ لگی وہاں بورنگ کرائی جارہی تھی کئی فٹ کھدائی کی گئی، ممکنہ طور پر گیس پائپ کو نقصان پہنچا یا زمین میں گیس کے ذخائر پر آگ لگی ہو۔

ہمایوں خان کا کہنا تھا کہ جائے وقوعہ پر پہلے گیس کا بہت شور تھا بعد میں شارٹ سرکٹ سے آگ لگ گئی، گیس کے ذخائر پر کام کرنے والے ماہرین کی ٹیم جائے وقوعہ کا دورہ کرے گی، ماہرین کی ٹیم کا جائزہ لینے کے بعد آگ بجھانے کی واضح حکمت عملی ترتیب دے سکیں گے۔

مزید پڑھیں : کورنگی کریک : گیس پائپ لائن میں خوفناک آتشزدگی

چیف فائر افسر نے کہا کہ 10 گاڑیاں کام کررہی ہیں،ریت ،مٹی کی مدد سے بھی آگ بجھانے کی کوشش کررہے ہیں اور فوم کا استعمال بھی کیا گیا لیکن آگ کی شدت برقرارہے، آگ کی شدت کے باعث پانی،فوم کے استعمال کا فائدہ نہیں ہورہا۔

ان کا کہنا تھا کہ آگ کی شدت کے باعث پھینکا گیا پانی واپس آرہا ہے، کوشش کر رہے ہیں ریت کی مدد سے آگ کو بجھایا جائے، جس کے لئے کرین اور ڈمپر بھی جائے وقوعہ طلب کرلیےگئےہیں، ڈمپر میں ریت بھر کر آگ پر ڈالی جائے گی۔

آگ لگنے کی وجوہات اورآگ کی نوعیت جاننے کیلئے ماہرین کی ٹیم کا جائے وقوعہ پر اجلاس ہوا، ماہرین نے جائے وقوعہ پر ٹیسٹ کرانے کیلئے پانی کے نمونے لیے، ٹیسٹ رپورٹ آنے کے بعد واضح ہوسکے گا کہ کس چیزمیں آگ لگی ہے۔

حکام کا کہنا ہے کہ فائربریگیڈ کی جانب سے امکان ظاہر کیا گیا ہے کہ یہ زمین سےنکلنےوالی قدرتی گیس ہے تاہم ایس ایس جی سی وضاحت دے چکی کہ ان کی تنصیبات یا گیس کی لائن موجود نہیں۔

کمشنر کراچی حسن نقوی کا بھی کہنا ہے کہ ایسا لگتا ہے جائے وقوعہ پر گیس کا کوئی ذخیرہ ہے، رات سے جس طرز کی آگ تھی تاحال وہی صورتحال ہے، جائے وقوعہ پر کس چیز کیلئے بورنگ کی جارہی تھی ، معلومات اکھٹی کر رہے ہیں اور متعلقہ ادارے کے پاس موجود اجازت نامےکی تصدیق کرارہے ہیں۔