Author: عاجز جمالی

سیہون شریف کو زیادہ ترلوگ قلندرشہباز کی مناسبت سے جانتے ہیں لیکن نیشنل ہائی وے پرسیہون کی طرف جاتے ہوئے پہلے لکی کا پہاڑی سلسلہ ملتا ہے جو لکی شاہ صدرکے نام سے منسوب ہے۔ یہ خطہ سندھ کے لکیاری خاندان کی وجہ سے مشہوراورلکیاری سید سندھ میں بسنے والے چارطاقت ورسید گھرانوں میں سے ایک ہے۔ سہون سے مغرب کی جانب جاتے ہوے پہلے باجارہ اورجھانگارہ نامی چھوٹے شہرآتے ہیں جو لکیاری سیدوں کے شہرکہلاتے ہیں۔

باجارہ میں میں مشہوربزرگ نجف علی شاہ کا مزار ہے جبکہ جھانگارہ سندھ کے سابق وزیراعلیٰ عبداللہ شاہ مرحوم کا آبائی شہر ہے جنہیں ایک زمانے میں عبداللہ شاہ واہڑائی بھی کہا جاتا تھا۔ عبداللہ شاہ لکیاری بنیادی طورپرسندھ کے زمیندار طبقے سے تعلق رکھتے تھے۔ عبداللہ شاہ پیپلز پارٹی میں اس وقت شامل ہوئے جب ذوالفقارعلی بھٹو نے اپنی نو مولود جماعت کے لئے سندھ بھرکا دورہ کیا تھا۔

عبداللہ شاہ سندھ اسمبلی کے رکن منتخب ہوئے تھے، کابینہ میں بھی رہے لیکن جنرل ضیا کے مارشل لاء کے دوران پیپلز پارٹی کا ساتھ چھوڑ گئے تھے، بعد ازاں پھرشامل ہوئے۔ 1988 میں رکن سندھ اسمبلی منتخب ہوئے، سندھ اسمبلی کے اسپیکر بنے، بعد میں سینٹر بھی بنے اور 1993 میں محترمہ بے نظیر بھٹو نے عبداللہ شاہ کو سندھ کا وزیر اعلیٰ بنوایا۔

مزید پڑھیں: قائم علی شاہ کے سیاسی سفر پر ایک نظر

عبداللہ شاہ کے دور میں ان کے سب سے بڑے مخالف وزیراعظم کے بھائی مرتضیٰ بھٹو تھے اورپھروزیراعظم کے بھائی مرتضیٰ بھٹو بھی اسی دہشت گردی کے بھینٹ چڑھ گئے جس نے ہزاروں گھر اجاڑدیے تھے اوریہ بڑی وجہ بنی عبداللہ شاہ اوربے نظیر بھٹو کی حکومے کے خاتمے کی۔ جس کے بعدعبداللہ شاہ ملک چھوڑ گئے تھے۔

سندھ کے نئے وزیراعلیٰ کے لئے نامزد سید مرادعلی شاہ انہی مرحوم عبداللہ شاہ کے فرزند ہیں جو سندھ حکومت میں ہی افسربھی رہ چکے ہیں۔ مراد علی شاہ بنیادی طورپرانجنیئر ہیں، این ای ڈی یونیورسٹی سے ’بی ای‘ کرنے کے بعد سرکاری ملازمت میں چلے گئے۔ واپڈا میں جونیئرانجنیئر رہے، پورٹ قاسم اتھارٹی میں ایگزیکٹو انجنیئر، اورفش ہاربر اتھارٹی میں ڈائریکٹر رہے، بعد ازاں مراد علی شاہ امریکہ چلے گئے اورکیلیفورنیا کی یونیورسٹی سے ماسٹرزکی ڈگری لی۔

یہ بھی پڑھیں: وزیراعلیٰ سندھ قائم علی شاہ کو تبدیل کرنے کا فیصلہ

مراد علی شاہ نے2002 کے عام انتخابات میں حصہ لیا، رکن سندھ اسمبلی منتخب ہوئے۔ مراد علی شاہ نے پڑھا لکھا ہونے کا حق ادا کیا اورحزب اختلاف میں بھرپورکردارادا کیا۔ مالی معاملات اور اسمبلی قوائد کے معاملے اس نوجوان سیاست داں کا کردار اچھا رہا۔ یہ ہی وجہ تھی کی 2008 میں انتخاب جیتنے کے بعد سندھ کے وزیر آب پاشی اورپھروزیر خزانہ بنے۔ جب سے قائم علی شاہ وزیر اعلیٰ ہیں، تب سے مراد علی شاہ سندھ کے خزانے کے مالک ہیں۔

مراد علی شاہ نا اہل بھی قرار دیئے گئے تھے لیکن پھرمشیر خزانہ بنادیے گئے، اپنے آبائی حلقے سے اپنے کزن کو منتخب کرالیا۔ اب بھی آب پاشی سے متعلق معاملات بھی مرادعلی شاہ ہی دیکھ رہے تھے۔ گزشتہ برس مراد علی شاہ کو سینئروزیرکا بھی ٹائٹل دیا گیا۔ یہ ہی ٹائٹل برسوں سے نثارکھوڑو کے پاس بھی ہے لیکن نثار کھوڑو ہمیشہ وزیراعلیٰ کے امیدوار ہی رہے، قسمت کی لکیروں نے ہمیشہ کھوڑو کے راستے بند رکھے اورقسمت کی دیوی نے کبھی نثار کھوڑو کی سینیارٹی کو اہمیت نہیں دی۔

وزیر اعلیٰ کے امیدواروں میں اپنے نام گنوانے والوں میں ویسے تو منظور وسان، آغا سراج درانی، خورشید شاہ، مخدوم جمیل زماں، میرہزارخان بجارانی بھی شامل رہےلیکن قسمت کی دیوی کی ساری مہربانیاں تین دن قبل دبئی چلی گئیں، بہانہ تو بنے رینجرز کے اختیارات، لیکن یہ ملاقات ایک بہانہ تھی، مراد علی شاہ سے پیار کا سلسلہ پرانا نکلا۔ پارٹی کے جواں سال چیئرمین بھی ان پرراضی نکلے، بڑے صاحب تو پہلے سے ہی مہرباں تھے اوراس طرح قسمت کی دیوی کی پھرکیا مجال تھی۔ اوراس طرح قائم علی شاہ کے مقابلے میں جوان دکھائی دینے والے چوون سالہ مراد علی شاہ سندھ کے نئے وزیراعلیٰ نامزد ہوئے ہیں۔

قلندر شہباز کی نگری میں مراد علی شاہ کے حامی دھمال لگا کر خوشیاں منا رہے ہیں لیکن سندھ کے پڑھے لکھے طبقے کا خیال ہے کہ مراد علی شاہ بھی قائم علی شاہ کی طرح فیصلوں میں آزاد نہیں ہوں گے۔ ان کی کابینہ میں کچھ نئے چہرے ہوں گے کچھ وزراء کے قلم دان تبدیل ہوں گے، لیکن سندھ کے حالات جس قسم کی تبدیلی کے خواہاں ہیں وہ کہیں اور پنہاں ہے۔ چہرے کی تبدیلی شاید ہی سندھ کی قسمت کو تبدیل کر سکے۔

روہن کی پہلی سالگرہ ہمیں دھوم دھام سے منانی چاہئے، کیونکہ روہن ہمارے پیار کی پہلی نشانی ہے۔ سنیتا نے اپنے من میں دبی ہوئی خواہش کا اپنے پریمی شوہر سے کرہی ڈالا تھا، لیکن ڈاکٹر دیپک جانتا تھا کہ پورا سال تو تکالیف اور معاشی تنگ دستی میں گزر گیا،ابھی تو کلینک کی آمدنی بھی بمشکل اتنی ہو رہی تھی کہ گھر کا گذارہ ہو سکے، لیکن ڈاکٹر دیپک نے اپنی پریمکا سنیتا کے گال پر تھپکی دیتے کہا ’’ایسے ہی ہوگا میری جان‘‘۔

کراچی کے علاقے کورنگی میں چھپ کر چوروں کی طرح زندگی بسر کرنے والے ڈاکٹر دیپک اور سنیتا کو یہ شہر بہت مہنگا پڑرہا تھا اور دوسری جانب دونوں سے خاندان نے سماجی بائیکاٹ کر رکھا تھا، کیونکہ خاندان کی نظر میں ڈاکٹر دیپک اور سنیتا کا پریم بندھن خاندان کے ناک کاٹ دینے کے مترادف تھا۔اس لئے خاندان نے اپنی ناک بچاتے ہوئے دونوں سے خاندان کے تمام حقوق چھین لیئے تھے لیکن دیپک اور سنیتا نے پیار کی شادی کرکے کوئی گناہ نہیں کیا تھا لیکن خاندان کی نظر کزن میرج دھرم کے خلاف تصور کیا جاتا تھا۔

ڈھائی سالہ روہن کی پہلی سالگرہ کے بعد کوئی سالگرہ نہیں ہوسکی

اوروہ حالات سے بہت خوفزدہ ہے لیکن سنیتا نے ہمت نہیں ہاری

سندھ کے شہر ٹنڈو الہیار سے تعلق رکھنے والا ڈاکٹر دیپک اور قریبی شہر ٹنڈو غلام علی میں بسنے والی اس کی کزن سنیتا اسکول کے زمانے میں ہی ایک دوسرے کو پسند کرتے تھے، ایک دوسرے کو خط لکھتے تھے اور انہوں نے موبائل فون کے شارٹ میسج سروس ( ایس ایم ایس ) کو لانگ میسج سروس میں تبدیل کردیا تھا۔لیکن جب شادی کی بات نکلی تو خاندان میں طوفان برپا ہوا جس نے دونوں کو چھپ کر شادی کرنے پر مجبور کردیا تھا اور گاؤں چھوڑ کر دونوں کراچی میں کرائے کے گھر میں خوش و خرم رہنے لگے،ان کے پیار کی پہلی نشانی روہن کے جنم کے بعد دونوں بہت ہی خوش تھے۔

بدقسمتی سے خوشی کی یہ گھڑیاں طویل ثابت نہ ہوئی اوروہ بھیانک گھڑی ان کی زندگی میں داخل ہوئی جس نے اس کایا ہی پلٹ دیا اور پندرہ ماہ سے یہ خاندان قانون اور انصاف کی چکی میں ایسے پس رہا ہے کہ دیپک اور سنیتا کو زندگی تو کیا بھگوان پر ہی شک ہونے لگا ہے۔

پندرہ ماہ قبل پولیس پارٹی نے حیدر آباد ہالہ ناکہ کے قریب ایک ایسا کارنامہ سرانجام دیا کہ حیدر آباد کے ایماندار ایس ایس پی کا سر شرم سے جھک جانا چاہئے تھا لیکن ایک غریب ہندو ڈاکٹر سے ڈرامہ رچانے والے پیٹی بھائیوں کو بچانے کے لئے پولیس افسر کی ایمانداری ڈھٹائی میں تبدیل ہوگئی۔ پولیس پارٹی نے گاڑی کو روک کر ڈاکٹر دیپک کو نیچے اتارا، منہ پر کپڑا ڈال کر پولیس موبائل میں ہی خوب دھلائی کی اور پھر تھانے جا کر ہاف فرائی کیا( سندھ میں ہاف فرائی اور فل فرائی جیسی شرمناک ٹرمنالاجی پولیس نے متعارف کرائی ہے ہاتھ،پیر اور ٹانگیں توڑنے کو ہاف فرائی کہتے ہیں ) پولیس نے دیپک کو گولیاں مار کر ایک ٹانگ اور ایک بازو ضائع کردیا،کیونکہ پولیس کو مقابلہ دکھانا تھااور یہ ہی ہوا کہ اخبارات میں بڑے شد و مد سے خبر شایع ہوئی کہ حیدرآباد ہالہ ناکہ کے قریب پولیس مقابلے میں بدنام زمانہ ڈاکو شریف پہنور کو زخمی حالت میں گرفتاری کیا گیا ہے۔

ایمانداری کے عوض حیدر آباد پریس کلب سے اعزاز حاصل کرنے والے ایس ایس پی حیدر آباد عرفان بلوچ نے جعلی مقابلہ کرنے والے ایس ایچ او علی محمد مغل کے خلاف کاروائی کرنے کے بجائے ڈھٹائی کے ساتھ دیپک کو شریف پہنور قرار دے کر سندھ کی سول سوسائٹی کی نظروں میں خود کو گرا دیا۔

پندرہ ماہ گزر جانے کے باوجود پولیس اپنے جھوٹ پر قائم ہے اور ایک ٹانگ سے معذور

ڈاکٹر دیپک کو ہتھکڑی لگا کر جناح ہسپتال کے اسپیشل وارڈ میں بند رکھا ہوا ہے

ڈاکٹر دیپک کی ایک ٹانگ اور ایک بازو کاٹ دیے گئے ہیں اور دیپک کے ساتھ اس کی بیوہ سنیتا اور ڈھائی سالہ بیٹا روہن بھی اسپتال میں قیدی جیسی زندگی بسر کرنے پر مجبور ہیں۔ سنیتا نے سندھ ہائی کورٹ کا دروازہ کھٹکھٹایا ہے۔ جناح اسپتال میں قید ڈاکٹر دیپک سے میں نے پوچھا کہ آخر پولیس کی تم سے کیا دشمنی تھی جو تم پر فائرنگ کی گئی۔؟ ڈاکٹر نے جواب دیا کہ ’’میرے سسرال والوں نے جاسوسی کی تھی، وہ پولیس کے ہاتھوں مجھے ذلیل کروانا چاہتے تھےکیونکہ انہیں ہماری شادی پسند نہیں تھی،پولیس تک غلط اطلاع پہنچائی گئی کہ ڈاکو شریف پہنور جا رہا ہے۔جب مجھے پکڑا گیا تھا تو میں نے کہا کہ میں دیپک ہوں،میں نے اپنا قومی شناختی کارڈ بھی ظاہر کیا لیکن کسی نے ایک بات نہین سنی،مارتے رہے، سڑک کنارے گاڑی روک کر اندھا دھند فائرنگ کی گئی،ٹانگوں سمیت جگہ جگہ پر گولیاں ماری گئیں اور وہ مجھے قتل کر چکے تھے‘‘۔

اس ساری صورتحال کے سبب ڈھائی سالہ روہن کی پہلی سالگرہ کے بعد کوئی بھی سالگرہ نہیں ہوئی اور روہن بہت ہی خوف زدہ نظر آتا ہے لیکن مشکلات جھیلنے والی سنیتا نے با لکل بھی ہمت نہیں ہاری۔ سنیتا کہتی ہے کہ ’’ہمارے ساتھ بہت بڑا ظلم ہوگیا ہے، ہمارا پورا ریکارڈ نادرا سے بھی چیک کیا گیا ہے نادرہ کے ریکارڈ میں بھی ثابت ہوگیا ہے کہ میرا شوہر دیپک ہے اور میں سنیتا ہوں۔ بھگوان نے تو میرے شوہر کو دیپک پیدا کیا لیکن پولیس اب بھی اس کو شریف پہنور کہتی ہے۔ آخر ہم کہان جائیں ہم تو مکمل برباد ہو چکے ہیں در در بھٹک رہی ہوں کہ سچ کو ثابت کرسکوں‘‘۔

سنیتا کہتی ہیں کہ ’’حالات سے تنگ ہوکر میں نے سندھ ہائی کورٹ میں پٹیشن دائر کی ہے کہ بس یہی آخری سہارا ہے۔ ہماری زندگی میں ایک بہت بڑا طوفان آچکا ہے اور کوئی ہماری مدد کرنے کو تیار نہیں ہے‘‘۔

دیپک اور سنیتا کی درد بھری کہانی تو بڑی طویل ہے اور کربناک و دردناک ہے وہ خود بھی جب اپنی کہانی بیان کرتے ہیں تو آنکھوں سے نکلنے والے موتی گالوں پر ٹپک پڑتے ہیں لیکن سندھ پولیس نے نہ جانے ایسی کتنی داستانیں رقم کرکے نا جانے کتنے بے گناہ لوگوں کو فل فرائی اور ہاف فرائی کا نشانہ بنایا،کیا جمہوری راگ الاپنے والوں کو انسانیت کا یہ درد کہیں نظرآتا ہے۔

کراچی: سانولی سلونی سی تیز ترار بچی دوسرے بچے کو دھکیلتی ہوئی آگے بڑھ رہی تھی،گویا خود کو لیڈر ثابت کرتی ہوئی کہنے لگی کہ’’ میں بتاتی ہوں کہ ہمیں پڑھنا ہے ،اب ہم بھیک نہیں مانگیں گے‘‘۔ ایک ننھی سی بغاوت تھی فٹ پاتھ پر بسیرا کرنے والی بچی کی اور پھر تین چار اور بچوں نے بھی یک آواز ہوکر غیر سرکاری تنظیم کے رضاکاروں کو بولا کہ ہم پڑھیں گےاور یوں پل کے نیچے ترپال بچھا کر فٹ پاتھ اسکول کا آغاز کردیا گیا۔

کراچی کے سفید پوشوں کے علاقے میں عبد اللہ شاہ غازی کے مزار کے سامنے ایک ماہ سے جاری فٹ پاتھ اسکول میں اب ایک سو کے لگ بھگ وہ بچے تعلیم کے زیور سے آراستہ ہو رہے ہیں جو اپنے مسقتبل سے بے خبر ہیں۔یہ سڑک چھاپ بچے جو اسکول سے پہلے بھی اسی فٹ پاتھ پر بغیر کسی آشیانے کے سو جاتے تھے اور کچھ بچے قریب کی نیلم کالونی سے آئے ہیں جو پہلے بھیک مانگتے تھے،پھول بیچتے تھے یا پھر غازی کے مزار پر پکنے والی دیگوں سے چاول جمع کرکے گھر والوں کو کھلاتے پلاتے تھے۔

لیکن اب سماجی تنظیم اوشین ویلفیئر ایسو سی ایشن نے ان بچوں کے ہاتھ میں کتابیں تھما دی ہیں، اور اس کے ساتھ ہر بچے کو روزانہ پچاس روپے نقد رقم بھی دی جاتی ہے۔ نیلم کالونی کے ایک ہی گھر سے آنے والے تین بہن بھائی روازانہ شام کو دو سو روپے جب اپنی ماں کے سپرد کرتے ہیں تو ماں کہتی ہے، ’’میں صدقے جاواں میں واری تھیواں‘‘۔ اور یوں اس طرح غریب بچوں کو اسکول کے ساتھ ساتھ اسکول میں پڑھنے کا معاوضہ بھی دیا جاتا ہے۔شاید یہ دو کروڑ آبادی کا پہلا اسکول ہے جہاں طلبہ اور طالبات تعلیم بمع معاوضہ وسول کرتے ہیں۔

فٹ پاتھ اسکول کی روح رواں سیدہ انفاس علی شاہ کا کہنا تھا کہ ’’ یہ سارے بچےاسی علاقے کے ہیں، ہم ان بچوں کو یہاں پڑھانا چاہتے ہیں لیکن حیرت کی بات ہے ان اسٹریٹ چلڈرن کی تعلیم پر اعتراض کیا جا رہا ہے اور سڑک سے اسکول ہٹانے کے لئے دباؤ دالا جا رہا ہے۔اگر یہ ہی بچے اسی مقام پر نشہ استعمال کر رہے ہوں، غیر اخلاقی سرگرمیوں میں ملوث ہوں یا بھیک مانگ رہے ہوں تو کسی کو اعتراض نہیں ہوتا‘‘۔

انفاس علی شاہ کا خیال ہے کہ ’’وہ چاہتی ہیں کہ پورے کراچی کے فٹ پاتھوں پر اسٹریٹ چلڈرین کے لئے اسکول قائم کیئے جائیں لیکن یہ بات مافیا کو پسند نہیں،پولیس کو بھی صرف اسکول پر ہی اعتراض ہے۔یہ کہتی ہیں کہ بحریہ ٹاؤن نے بہت ہی خوب صورت فلائی اوور بنایا ہے اسی فلائی اوور کے ایک کونے پر ہم اسٹریٹ چلڈرین،غریب،یتیم بچوں کا اسکول چلا رہے ہیں ہم ہر وقت سیکیورٹی خطرہ بھی رہتا ہے بعض لوگ دھمکیاںبھی دیتے ہیں،اس لئے بحریہ ٹاؤن ان اسکولوں کی کفالت کرے،تعلیم ان بچوں کا بھی حق ہے‘‘۔

بچوں کے جمگھٹے میں زمیں پر بیٹھ کر یونیورسٹی کی طالبہ سحرش ان بچوں کو اے فار ایپل پڑھا رہی تھیں، سحرش نے بتایا کہ وہ کوئی تنخواہ نہیں لیتی روزانہ تین گھنٹے فٹ پاتھ اسکول کو دیتی ہے۔سحرش نے بتایا کہ ہم ان بچوں کو پچاس روپے بھی روزانہ دیتے ہیں تاکہ ان کے گھروں میں معاشی مسئلہ نا ہو ورنہ ان کے والدین بچوں کو پڑھنے نہیں دیں گے۔

میں نے سحرش سے پوچھا کہ آپ کا کیا خیال ہے میں ان پچاس ساٹھ بچوں میں کتنے ایسے بچے ہوں گے جو واقعی بھی تعلیم حاصل کرکے کچھ بن سکتے ہیں؟۔ جواب بڑا حیرت ناک تھا، انہوں نے کہا کہ ’’ یہ بچے گھروں میں بیٹھے بچوں سے زیادہ ذہین اور زیادہ تیز ہیں اور اکثر بچے تعلیم کی حاصلات چاہتے ہیں‘‘۔

ایک دوسری ٹیچر عظمیٰ گل ہے،جو ایک رضاکار ہے، میں دیکھ رہا تھا شدید گرمی میں دوپٹہ لپیٹ کر ننھی بچیوں کو کاپی پر انگریزی اے بی سی لکھوا رہی تھیں اور نوشاد نامی ٹیچر ان بچوں کو پاکستان کا ترانہ یاد کراتے ہوئے زندگی میں کچھ بننے کی تربیت دے رہا تھا۔

ابھی ہم کتاب تھامے پانچ سالہ نیہا سے بات ہی کر رہے تھے کہ مزار کی جانب سے دو بچے ہ بھاگتے ہوئے آئے اور گھبرائے ہوئے لہجے میں کہنے لگے’’ انک انکل وہ دیکھیں پولیس والا ہمیں مار رہا ہے‘‘۔ میں دیکھا کہ دور سے ایک سپاہی ہاتھ میں لاٹھی لیے چلا آرہا تھا، لیکن ہمارا کیمرہ دیکھ کر وہ عجلت میں پولیس موبائل میں بیٹھ کر روانہ ہوگیا۔مجھے بات سمجھ میں آنے لگی تھی کہ پولیس کو اعتراض کیوں نا ہو؟ کیونکہ این جی او کے لوگ، میڈیا کے لوگ، شہریوں کا جمگھٹا، پھر مزار کے سامنے چلنے والی دکان کا کیا ہوگا، پولیس اپنا کاروبار سڑک چھاپ بچوں کے لئے تو خراب نہیں کر سکتی نا۔البتہ پولیس کے افسران کا کہنا ہے کہ فٹ پاتھ پر اسکول کی موجودگی سیکیورٹی خدشہ ہے ۔

زمین پر اوڑھنا،بچھونا،کھانا پینا اور پھر زمین پر ہی سو جانا،در اصل یہ ہی زندگی ہے ان زمین کے تاروں کی۔جو اب علم کی روشنی سے چمکنا چاہتے ہیں،سچ ان بچوں کی آنکھوں میں بڑی چمک ہے اور یہہی مستقبل میں امید کی کرن بھی بن سکتے ہیں۔