Author: علیم ملک

کراچی صرف ملک کو سب سے زیادہ ریونیو ہی نہیں دیتا بلکہ اس کے شہری بھی پاکستان میں سب سے مہنگا آٹا خریدنے والے افراد میں شمار ہوتے ہیں۔

ادارہ شماریات نے ملک میں آٹے کی قیمتوں کے حوالے سے ادارہ شماریات نے ایک رپورٹ جاری کی ہے جس کے مطابق ملک کے سب سے بڑے شہر کراچی کے شہری پاکستان میں سب سے مہنگا آٹا خریدنے پر مجبور ہیں۔

رپورٹ کے مطابق گزشتہ دو ہفتوں کے دوران کراچی میں 20 کلو آٹے کا تھیلا 200 روپے تک مہنگا ہوا ہے اور شہر قائد کے باسیوں کو 20 کلو آٹے کا تھیلا 2200 روپے میں مل رہا ہے۔

ادارہ شماریات کی دستاویز میں سندھ کے دوسرے بڑے شہر حیدرآباد کے شہری دوسرے نمبر پر مہنگا آٹا خریدنے والوں میں شمار ہیں۔ یہاں 20 کلو آٹے کا تھیلا دو ہزار روپے تک میں فروخت کیا جا رہا ہے۔

دستاویزات کے مطابق خضدار میں 20 کلو آٹے کا تھیلا 1950، اسلام آباد میں 1946، راولپنڈی میں 20 کلو آٹے کا تھیلا 1933، کوئٹہ میں 1880 روپے تک میں دستیاب ہے۔

یہی 20 کلو آٹے کا تھیلا بنوں میں 1850، لاڑکانہ میں 1840، پشاور، سیالکوٹ، بہاولپور، گوجرانوالہ اور سرگودھا میں 1800 تک میں فروخت کیا جا رہا ہے۔

سکھر میں 20 کلو آٹا 1780 روپے، ملتان میں 1733 جب کہ لاہور اور فیصل آباد میں 20 کلو آٹے کے تھیلے کی قیمت 1700 تک ہے۔

کراچی کے بجلی صارفین کے لیے بری خبر ہے کہ کے الیکٹرک سے بجلی لینے والوں کے ماہانہ ایڈجسٹمنٹ کے بوجھ میں مزید اضافہ کر دیا گیا ہے۔

اے آر وائی نیوز کے مطابق کے الیکٹرک صارفین پر ماہانہ ایڈجسٹمنٹ کے بوجھ میں مزید اضافہ کر دیا گیا ہے اور وہ ستمبر کے مقابلے اکتوبر میں 1.59 روپے فی یونٹ اضافی ادا کریں گے۔

کراچی الیکٹرک کے صارفین اکتوبر میں ماہانہ سہ ماہی ایڈجسٹمنٹ کی مد میں فی یونٹ 4.33 روپے ادا کریں گے جب کہ اسی مہینے صارفین کو مئی 2024 کے ماہانہ ایڈجسٹمنٹ میں فی یونٹ 2.59 روپے ادا کرنا ہوں گے۔

اس سے قبل ستمبر میں کراچی والوں نے ماہانہ اور سہ ماہی ایڈجسٹمنٹس کی مد میں فی یونٹ 2.74 روپے ادا کیے تھے۔

اس کے علاوہ نومبر میں کے ای صارفین ماہانہ اور سہ ماہی ایڈجسٹمنٹس کی مد میں فی یونٹ 4.91 روپے ادا کریں گے۔ اس ماہ جون 2024 کی ماہانہ ایڈجسٹمنٹ میں صارفین کو فی یونٹ 3.17 روپے ادا کرنا ہوں گے جب کہ ستمبر تا نومبر سہ ماہی ایڈجسٹمنٹ کی مد میں 1.74 روپے ادا کریں گے۔

دوسری جانب نیپرا سے کے الیکٹرک کے لیے جولائی اور اگست 2024 کی ماہانہ ایڈجسٹمنٹس کا فیصلہ ابھی آنا باقی ہے۔

کے الیکٹرک نے جولائی کی ماہانہ ایڈجسٹمنٹ میں فی یونٹ 3.09 روپے کا اضافہ مانگا رکھا ہے جب کہ اگست کے لیے ماہانہ ایڈجسٹمنٹ کی مد میں 51 پیسے کا اضافہ ڈیمانڈ کیا ہے۔