Author: علیم ملک

اسلام آباد : ملک میں دسمبر2023 میں ڈیزل سے سب سے زیادہ مہنگی بجلی پیدا کی گئی، جس سے بجلی فی یونٹ 42 روپے15 پیسے میں پڑا۔

تفصیلات کے مطابق مہنگی بجلی کی پیداوارصارفین پرمسلسل اضافی بوجھ بن گئی، دستاویز میں بتایا گیا ہے کہ دسمبر2023 میں ڈیزل سےسب سے زیادہ مہنگی بجلی پیدا کی گئی ، گذشتہ ماہ ڈیزل سےپیداکردہ بجلی فی یونٹ42روپے15 پیسے میں پڑی۔

دستاویز میں کہا گیا کہ دسمبر 2022 اور نومبر 2023میں ڈیزل سے کوئی بجلی پیدا نہیں کی گئی تھی۔

دسمبر2023میں فرنس آئل سے پیداکردہ بجلی فی یونٹ38 روپے55 پیسے میں پڑی اور اسی عرصے میں ایران سے درآمدی بجلی کی فی یونٹ لاگت 33 روپے13پیسے رہی۔

گذشتہ ماہ ایل این جی سے بجلی کی پیداواری لاگت فی یونٹ 26 روپے 22 پیسے رہی جبکہ دسمبر میں درآمدی کوئلے سے فی یونٹ بجلی17 روپے 25 پیسے میں پڑی۔

دسمبرمیں مقامی کوئلے سے بجلی کی پیداواری لاگت فی یونٹ 12 روپے 33 پیسے اور گیس سے پیدا کردہ بجلی کا فی یونٹ14 روپے 60 پیسے میں پڑا۔

گذشتہ ماہ بیگاس سے پیداکردہ بجلی کی فی یونٹ لاگت تقریبا 6 روپے اور جوہری توانائی سے بجلی فی یونٹ ایک روپے 32پیسے رہی۔

سی پی پی اے نے دسمبرکی ایڈجسٹمنٹ میں فی یونٹ 5.62روپے کا اضافہ مانگ رکھا ہے۔

اسلام آباد: پاور ڈویژن نے بجلی کمپنیوں میں اہم تعیناتیوں کیلئے پالیسی تیارکرلی، جس میں سی لیول پوسٹس پر مارکیٹ پروفیشنلز تعینات کرنے کی تجویز ہے۔

تفصیلات کے مطابق بجلی کمپنیوں میں بہتری لانے کیلئے حکومت کا ایک اور اقدام سامنے آیا، ڈسکوز میں اہم عہدوں پر تعیناتیاں پبلک سیکٹر کمپنیز رولز کے تحت کرنے کا فیصلہ کرلیا گیا۔

ذرائع نے بتایا کہ پاور ڈویژن نے کمپنیوں میں اہم تعیناتیوں کیلئے پالیسی تیارکرلی ، پاورڈویژن کی سمری بجلی کمپنیوں کے بورڈز کو ارسال کردی گئی ہے۔

ذرائع کا کہنا تھا کہ بجلی کمپنیوں میں سی لیول پوسٹس پرمارکیٹ پروفیشنلز تعینات کرنے اور مستقبل میں سی لیول پوسٹس پر بجلی کمپنیوں کے افسران کو تعینات نہ کرنے کی تجویز دی گئی ہے۔

ذرائع نے کہا کہ چیف فنانشل آفیسر،کمپنی سیکرٹری چیف انٹرنل آڈیٹر مارکیٹ سے لینے کی تجویز بھی سامنے آئی جبکہ بجلی کمپنیوں میں کیرئیر پلاننگ آفیسر،چیف لیگل آفیسر ، چیف کمرشل آفیسر،انجینئرنگ ایڈوائزر،چیف انفارمیشن ٹیکنالوجی آفیسر کی پوسٹس بھی تخلیق کرنے کی تجویز ہے۔

ڈسکوزمیں چیف سپلائی چین مینجمنٹ آفیسر کی پوسٹ تخلیق کرنے کی تجویز دی گئی اور ڈسکوز کے بورڈز کو ان عہدوں سے متعلق پالیسی مرتب کرنے کی ہدایت کردی ہے، اقدام کا مقصد ڈسکوز میں کلچرل شفٹ کے ذریعے بہتری لانا ہے۔

ذرائع کا کہنا ہے کہ ایک کمپنی کےافسران دوسری کمپنی میں بھجوانے کی تجویز بورڈ کوبھجوائی جاچکی ہے۔

اسلام آباد : گڈو پاور اسٹیشن میں حالیہ خرابی کے باعث ملک بھر میں طویل لوڈشیڈنگ کے معاملے کی تحقیقات کے لئے کمیٹی تشکیل دے دی گئی۔

تفصیلات کے مطابق گڈو پاور اسٹیشن میں حالیہ خرابی کے باعث ملک بھر میں طویل لوڈشیڈنگ کے معاملے پر پاور ڈویژن نے تحقیقات شروع کردیں۔

ذرائع نے بتایا کہ پاور ڈویژن کی جانب سے تحقیقات کے لئے دورکنی کمیٹی تشکیل دے دی گئی ہے ، کمیٹی کنوینئیر ڈی ایم ڈی این پی سی سی اور ڈاکٹرفیاض چوہدری پر مشتمل ہے۔

ذرائع کا کہنا ہے کہ کمیٹی گڈو پلانٹ کے 500 کے وی سوئچ یارڈ میں دھماکے کی وجوہات اور گدو پاور پلانٹ میں انفراسٹرکچر بہتری کے لئے کئے جانے والے اقدامات کی تحقیقات کرے گی۔

ذرائع کے مطابق گزشتہ برسوں میں پاور پلانٹ میں خرابیوں کے بعد بہتری کے اقدامات کی بھی تحقیقات کی جائیں گی، کمیٹی 500 کے وی لائنوں کو کنٹرول کرنے کے لئے شنٹ ری ایکٹر کا کے موجودہ سٹیٹس کو بھی دیکھے گی۔

تربیت یافتہ اسٹاف کی کمی کی وجہ سے سوئچ یارڈ میں دھماکہ ہونے کی تحقیقات کی جائیں گی جبکہ فوگ کیخلاف مزاحمت کی صلایت رکھنے کے باوجود ٹرانسمیشن لائنیں ٹرپ کیوں ہوئیں؟

اس کے علاوہ کمیٹی ٹرپنگ کے باعث بریک ڈاؤن کے ذمہ داروں کا تعین بھی کرے گی۔

کراچی: پاکستان اسٹارٹ اپ فنڈ کا اجراء کر دیا گیا اور فنڈ کے لیئے 2 ارب روپے مختص کردیئے گئے۔

تفصیلات کے مطابق نگراں وفاقی وزیر آئی ٹی ڈاکٹر عمر سیف نے پاکستان اسٹارٹ اپ فنڈ کا اجراء کر دیا۔

اس موقع پر نگراں وزیر آئی ٹی نے تقریب سے خطاب کرتے ہوئے کہا کہ حکومت پاکستان نے پاکستان اسٹارٹ اپ فنڈ کے لیئے 2 ارب روپے مختص کیے ہیں، اس فنڈ کا مقصد پاکستان میں وینچر سرمایہ کاری تیز تر کرنا ہے۔

ڈاکٹر عمر سیف نے بتایا کہ اس فنڈ سے اسٹارٹ اپس کو مالی معاونت فراہم کی جائے گی،اسٹارٹ اپ فنڈ کے ذریعے ہر اسٹارٹ اپ کو 30 فی صد معاونت فراہم کی جائے گی۔

نگراں وزیر کا کہنا تھا کہ اسٹارٹ اپ فنڈ پاکستان کی معاشی ترقی میں اہم کردار ادا کرے گا، وزارت آئی ٹی اسٹارٹ اپس کو سہولیات فراہم کرنے کے لیئے کوشاں ہے، پچھلے چار برس میں پاکستانی اسٹارٹ اپس میں تقریبا 800 ملین ڈالرز بیرونی سرمایہ کاری ہوئی۔

انھوں نے مزید کہا کہ ملک میں آٹھ نیشنل انکیوبیشن سینٹرز اسٹارٹ اپس کو سپورٹ کر رہے ہیں، اس وقت چار ہزار سے زائد اسٹارٹ اپس کام کر رہے ہیں۔