Author: علیم ملک

اسلام آباد : ملکی تاریخ میں پہلی بار مالی سال کی پہلی سہ ماہی میں سب سےزیادہ لیوی وصول کی گئی، لیوی کی مد میں222ارب روپے وصول کئے گئے۔

تفصیلات کے مطابق پیٹرولیم مصنوعات کی قیمتوں کے ساتھ پیٹرولیم لیوی کا ریکارڈ بوجھ بھی عوام پر ڈال دیا گیا، ملکی تاریخ میں پہلی بار مالی سال کی پہلی سہہ ماہی میں سب سے زیادہ لیوی کی وصولی کی گئی۔

ذرائع نے بتایا کہ جولائی تاستمبر2023سالانہ بنیاد پر پیٹرولیم لیوی کی وصولی میں368فیصد کااضافہ ہوا اور وفاق نےرواں مالی سال کی پہلی سہہ ماہی لیوی کی مد میں222ارب روپے وصول کئے۔

ذرائع کا کہنا تھا کہ گذشتہ سال جولائی تاستمبر لیوی کی مد میں وصولی47 ارب48 کروڑ روپے تھی اور رواں مالی سال کیلئے پیٹرولیم لیوی کی وصولی کاہدف869 ارب روپےمقرر ہے۔

گذشتہ سال پیٹرولیم لیوی کی مد میں580ارب روپےوصول کئے گئےتھے، اس وقت فی لیٹر پیٹرول پر60 روپےلیوی وصول کی جارہی ہے جبکہ ہائی اسپیڈ ڈیزل کےفی لیٹر پر 55روپے کے حساب سے لیوی عائد ہے۔

اسلام آباد: نگراں حکومت عوام پر مہنگائی کا ایک اور بم گرانے کی تیاری کررہی ہے،گیس کی قیمتیں بڑھانےکی سمری کل اقتصادی رابطہ کمیٹی کے اجلاس میں پیش کیے جانے کا امکان ہے۔

تفصیلات کے مطابق ذرائع نے بتایا کہ پیٹرولیم ڈویژن کی سمری میں گیس کا ٹیرف 200 فیصد تک بڑھانے اور گھریلو صارفین کیلئے گیس 172 فیصد تک مہنگی کرنے کی تجویز دی گئی ہے۔

ذرائع کے مطابق دیگر گیٹیگریز کیلئے گیس کی قیمت میں تقریباً 200 فیصد تک اضافہ تجویز کیا گیا ہے اور سب سےکم گیس استعمال کرنیوالوں کیلئے فکسڈچارجز میں 3900 فیصد اضافہ تجویز کی گئی ہے۔

ذرائع نے بتایا کہ پروٹیکڈ صارفین کیلئے فکسڈ ماہانہ چارجز 10سے بڑھا کر 400 روپے کرنے کی تجویز کی گئی ہے۔

آئی ایم ایف کا مطالبہ ، صارفین کے لئے گیس کی قیمت میں 100 فیصد سے زائد اضافے کا امکان

ذرائع کا کہنا ہے کہ ماہانہ 0.25 کیوبک میٹر تک نان پروٹیکٹڈ صارفین کیلئے 100 روپے، ماہانہ0.60 کیوبک میٹر والے صارفین کیلئے قیمت میں 300  روپے فی ایم ایم بی ٹی یو اضافہ کرنے کی تجویز کی گئی ہے۔

ذرائع کا کہنا ہے کہ ماہانہ 100 اور 150 کیوبک میٹر نان پروٹیکٹڈ صارفین کیلئے 600 روپے فی ایم ایم بی ٹی یو اضافہ کی تجویز کی گئی ہے، اس کے علاوہ ماہانہ 200 کیوبک میٹر والے صارفین کےٹیرف میں 800 روپے، ماہانہ 300 کیوبک میٹر والے صارفین کیلئے 1900 روپے اور ماہانہ 400کیوبک میٹر والے صارفین کے ٹیرف میں 1500 روپے فی ایم ایم بی ٹی یو اضافے کی تجویز کی گئی ہے۔

ذرائع کا کہنا ہےکہ برآمدی انڈسٹریز کے ٹیرف میں 950 روپے، ایکسپورٹ انڈسٹریز کا ٹیرف 2050 روپے، غیربرآمدی صنعتوں کے ٹیرف میں 1400 روپے، غیربرآمدی صنعتوں کا ٹیرف 2600 روپے اور سی این جی کیلئے گیس کی قیمت 2 ہزار 595 روپے فی ایم ایم بی ٹی یوبڑھانے کی تجویز کی گئی ہے۔

ذرائع کے مطابق سیمنٹ سیکٹر کےگیس ٹیرف میں2900 روپے، ایکسپورٹ انڈسٹریز کے ٹیرف میں 2050 روپے، سی این جی سیکٹر کیلئے گیس کا ٹیرف 4400 روپے فی ایم ایم بی ٹی یو جب کہ بجلی کارخانوں اور تندوروں کیلئے گیس قیمت برقرار رکھنے کی تجویز کی گئی ہے۔

ذرائع نے یہ بھی بتایا کہ نگران وزیر خزانہ نے ای سی سی کا اجلاس کل شام 4 بجے طلب کیا ہے،  قیمتوں میں اضافے کا اطلاق یکم اکتوبر سے کرنے کی تجویز دی گئی ہے۔

اسلام آباد : پاور ڈویژن نے بجلی چوروں سے 20 ارب 47 کروڑ 70 لاکھ روپے کی ریکوری کا دعویٰ کردیا ،لیسکو میں سب سے زیادہ ریکوری ہوئی۔

تفصیلات کے مطابق بجلی چوروں کے خلاف ملک بھر میں کریک ڈاؤن کا سلسلہ جاری ہے ، بجلی چوروں سے اب تک20 ارب 47 کروڑ 70 لاکھ روپے ریکور کئے گئے۔

پاور ڈویژن کی جانب سے بتایا گیا ہے کہ ملک بھر میں کارروائیوں کے دوران 15 ہزار 165بجلی چور پکڑے گئے، لیسکو میں سب سے زیادہ 5 ارب 34 کروڑ 80 لاکھ روپے کی ریکوری کی گئی اور 5 ہزار 58 بجلی چور گرفتار کئے گئے۔

پاور ڈویژن کا کہنا تھا کہ حیسکو نے اب تک سے 3 ارب 98 کروڑ 80 لاکھ روپے ، پیسکو ریجن نے3 ارب 94 کروڑ 40 لاکھ روپے سے زائد کی اور میپکو نے 2 ارب 5 کروڑ سے زائد کی ریکوری کی ہے۔

کارروائیوں میں اب تک 4 ہزار 944 بجلی چوروں کو پکڑا گیا، سیپکو نے اب تک 2 ارب 43 کروڑ 10 لاکھ روپے، کیسکو نے 90 کروڑ 20 لاکھ، فیسکو نے 77 کروڑ 10 لاکھ روپے ، گیپکو نے 54 کروڑ 30 لاکھ، آئیسکو نے 42 کروڑ40 لاکھ روپے کی ریکوری کی ہے۔

اسلام آباد : پاور ڈویژن نے بجلی چوری میں ملوث ملازمین اور بجلی چوروں کا گٹھ جوڑ ختم کرنے کے لئے ایف آئی اے سے مدد مانگ لی۔

تفصیلات کے مطابق بجلی چوری میں ملوث ملازمین اور بجلی چوروں کا گٹھ جوڑ ختم کرنے کے لیے حکومتی منصوبہ سامنے آگیا۔

ذرائع پاور ڈویژن نے بتایا کہ پاور ڈویژن نے بجلی چوروں کا گٹھ جوڑ توڑنے کیلئے ایف آئی اے سے مدد مانگ لی ہے، حیسکو، سیپکو اور پیسکو میں ملازمین بجلی چوری میں ملوث ہیں۔

ذرائع کا کہنا تھا کہ ایف آئی اے کی فیلڈ فورس کے ساتھ ٹیم فراہم کی جائے، بجلی چوری کے خاتمے کی مہم کی روزانہ کی بنیادپر مانیٹرنگ کی جارہی ہے۔

ذرائع کے مطابق بجلی چوری میں مددفراہم کرنے والے ملازمین کی نشاندہی ضروری ہے، بجلی چوروں کی نشاندہی کیلئے کمپنیوں کی انتظامیہ کی معاونت ضروری ہے۔

اسلام آباد : سندھ میں جیکب آباد، سجاول اورلاڑکانہ بجلی چوری میں سب سے آگے ہے، جیکب آباد میں بجلی چوری کی شرح 59 فیصد، سجاول میں 58 فیصد اور لاڑکانہ میں 57 فیصد ہے۔

تفصیلات کے مطابق پاور ڈویژن نے سندھ میں بجلی چوری کے حوالے سے اعداد و شمار جاری کردیئے ، جس میں کہا ہے کہ سندھ کے 8 اضلاع میں 50 فیصد بجلی چوری ہورہی ہے۔

پاور ڈویژن کا کہنا تھا کہ پندرہ اضلاع میں بجلی چوری کی شرح 40 فیصد اور سندھ کے 19 اضلاع میں 30 فیصد تک بجلی چوری ہورہی ہے جبکہ صرف دو اضلاع میں بجلی چوری کی شرح 20 فیصد سے کم ہے۔

پاور ڈویژن نے بتایا کہ سندھ کے 6 اضلاع میں بجلی چوری کی شرح20 سے40 فیصد تک ہے ، جیکب آباد میں 59 فیصد، سجاول میں بجلی چوری کی شرح 58فیصد اور لاڑکانہ میں بجلی چوری کی شرح 57 فیصد ہے۔

اعداد و شمار کے مطابق کشمور میں بجلی چوری کی شرح 56فیصد، شکار پور، نوشہروفیروز، دادو اور قمبر میں بجلی چوری شرح 52فیصد ، مٹیاری میں بجلی چوری 49 فیصد، خیرپور میں 48 فیصد جبکہ شہید بینظیر آباد میں بجلی چوری کی شرح 43 فیصد ہے۔

تھرپارکرمیں بجلی چوری کی شرح 11 فیصد اور جامشورو میں شرح 15 فیصد تک ہے۔

اسلام آباد : حکومت نے عوام کو سوشل میڈیا پر خود کو سرکاری ملازمین ظاہر کرکے لوٹنے والوں سے خبردار کرتے ہوئے کہا اپنے اکاؤنٹس کی حساس معلومات شیئر نہ کریں اور جعلی میسجز سے الرٹ رہیں۔

تفصیلات کے مطابق سوشل میڈیا پر مختلف حربوں سے شہریوں سے مالی فراڈ کرنے کے معاملے پر پیشہ ور عناصر خود کو سرکاری ملازمین ظاہر کرنے کی آڑ میں شہریوں کو لوٹنے لگے۔

ذرائع نے کہا ہے کہ وفاقی حکومت نے تمام وفاقی وزارتوں ، ڈویژنز اور صوبائی حکومتوں کو مراسلہ بھیج دیا ہے ،جس میں بتایا ہے کہ پیشہ ور عناصر کلوننگ، ایپلی کیشنز اور فیک ویب سائٹس کا استعمال کررہے ہیں اور خود کوبینک ملازم ظاہر کرکے شہریوں سے او ٹی پی اور دیگر معلومات لے رہے ہیں۔

ذرائع کا کہنا تھا کہ مراسلے میں اسٹیٹ بینک کی جعلی ویب سائٹ کو فوری بلاک کرنے کی سفارش کرتے ہوئے صارفین کو بینک ہیلپ لائنز کی طرز پر مشکوک کال کی فوری تصدیق کا مشورہ دیا ہے۔

مراسلے میں صارفین کو اپنے اکاؤنٹس کی حساس معلومات شیئر نہ کرنے ، لاٹری اسکیموں اورانعامی اسکیموں کے جعلی میسجز سے الرٹ رہنے کی سفارش کی ہے۔

انٹرنیٹ بنکنگ ایپلی کیشنز، واٹس ایپ اور جی میل اکاونٹس کیلئے دوہرا تصدیقی نظام اپنانے اور ایپلی کیشنز ڈاون لوڈ کرنے سے پہلے ان کی تفصیلات چیک کرنے کی سفارش کی ہے۔