Author: علیم ملک

وفاقی حکومت نے بجلی کی قیمت میں کمی کے لیے بڑا قدم اٹھا لیا ہے اور صوبائی الیکٹریسٹی ڈیوٹی کو ختم کرنے کا فیصلہ کیا ہے۔

اے آر وائی نیوز کے مطابق وزیراعظم شہباز شریف اور وفاقی وزیر پاور ڈویژن اویس لغاری متعدد بار عوام کو بجلی کی قیمت میں جلد کمی کی خوشخبری سنا چکے ہیں۔ تاہم اب اس حوالے سے وفاقی حکومت نے بڑا قدم اٹھا لیا ہے اور بجلی کی قیمت میں کمی کے لیے صوبائی الیکٹریسٹی ڈیوٹی ختم کرنے کا فیصلہ کیا ہے۔

اس سلسلے میں وفاقی وزیر پاور ڈویژن اویس لغاری نے تمام صوبائی وزرائے اعلیٰ کو خطوط لکھے ہیں اور صوبائی حکومتوں سے الیکٹریسٹی ڈیوٹی کے خاتمے کے لیے تعاون کی درخواست کی ہے۔

وفاقی وزیر نے اپنے خط میں کہا ہے کہ بجلی کے زائد نرخ پہلے ہی عوام کے لیے بوجھ بنے ہوئے ہیں۔ اس لیے بجلی کے بلوں کو آسان اور شفاف بنانے کی کوششیں جاری ہیں اور غیر متعلقہ چارجز کو بجلی بلوں سے نکالنے کے لیے اقدامات جاری ہیں۔ اسی سلسلے میں وفاقی حکومت نے جولائی 2025 سے بجلی کے بلوں میں سے الیکٹرک ختم کرنے کا فیصلہ کیا ہے۔

وفاقی وزیر نے اپنے خطوط میں وزرائے اعلیٰ کو متبادل ریونیو کلیکشن کا نظام وضع کرنے کی تجویز دی ہے۔

اویس لغاری نے کہا کہ وفاقی حکومت چاہتی ہے کہ صارفین کو صرف بجلی کے اصل نرخ ادا کرنے چاہئیں۔ اسی لیے بجلی کے نرخ کم کرنے کے لیے اصلاحات پر عمل پیرا ہے۔

سستی بجلی کیسے بنائی جا سکتی ہے؟ جاننے کے لیے کلک کریں

واضح رہے کہ پاکستان کا شمار ان ممالک میں ہوتا ہے جہاں بجلی کا ٹیرف سب سے مہنگا ہے۔ وفاقی حکومت نے بجلی کی قیمت کم کرنے کے لیے گزشتہ سال آئی پی پیز سے بات چیت کا سلسلہ شروع کیا، جس کے مثبت نتائج بھی برآمد ہوئے اور کئی آئی پی پیز بجلی کی قیمت کم کرنے پر آمادہ ہوئیں۔

وزیر خزانہ محمد اورنگزیب نے بھی ایک تقریب میں جلد بجلی سستی ہونے اور آئی پی پیز سے معاملات خوش اسلوبی سے طے ہونے کی نوید سنائی تھی۔

وفاقی حکومت نے بجٹ سے قبل مذاکرات میں بجلی سستی کرنےکا پلان آئی ایم ایف سے شیئر کیا تھا اور بتایا تھا کہ حکومت کیپٹو پاور لیوی سے بجلی سستی کرنے کا منصوبہ بنا رہی ہے۔

https://urdu.arynews.tv/federal-govt-shares-plan-to-make-electricity-cheaper-with-imf/

گیس صارفین کے لیے اچھی خبر یہ ہے کہ گیس کی قیمت برقرار رکھی گئی ہے تاہم فکسڈ چارجز میں 100 فیصد تک اضافہ کر دیا گیا ہے۔

اے آر وائی نیوز کے مطابق بجٹ کے بعد عوام پر گیس کا بم پھوڑ دیا گیا ہے۔ اوگرا نے صارفین کے لیے گیس کی قیمت تو برقرار رکھی ہے، تاہم فکسڈ چارجز میں 50 فیصد تک اضافہ کر دیا گیا ہے۔ اوگرا نے اس حوالے سے نوٹیفکیشن بھی جاری کر دیا ہے۔

اوگرا نوٹيفکیشن کے مطابق نان پروٹیکٹڈ گھریلو صارفین کے لیے فکسڈ چارجز 500 روپے بڑھا دیے گئے ہیں جب کہ 1.5 کیوبک میٹر کھپت والے نان پروٹیکٹڈ گھریلو صارفین کے لیے فکسڈ چارجز 1500 روپے کر دیے گئے ہیں۔

اوگرا نے 1.5 کیوبک میٹر سے زائد والے نان پروٹیکٹڈ صارفین کے فکسڈ چارجز میں سو فیصد اضافہ کر دیا گیا ہے اور ایسے صارفین کے فکسڈ چارجز میں ایک ہزار روپے اضافہ کر کے فکسڈ چارجز 2 ہزار روپے کر دیے گئے ہیں۔

پروٹیکٹڈ گھریلو صارفین کے لیے فکسڈ چارجز میں 200 روپے کا اضافہ کیا گیا ہے اور اب ان صارفین کو فکسڈ چارجز کی مد میں 400 روپے کے بجائے 600 روپے ادا کرنا ہوں گے۔

گیس کے بلوں میں فکسڈ چارجز کے اضافے سے عوام بالخصوص غریب طبقہ کی مشکلات میں اضافہ ہوگا۔

واضح رہے کہ اوگرا نے آج گیس کے بلک صارفین، پاور سیکٹر اور انڈسٹری کے لیے گیس کی قیمتوں میں اضافے کا نوٹیفکیشن بھی جاری کیا تھا۔ نوٹیفکیشن کے مطابق گیس کی قیمتوں میں یکم جولائی سے اضافہ ہوگا۔

ذرائع کے مطابق گیس پر چلنے والے پاور پلانٹس اور صنعتی صارفین کے لیے قیمتوں میں دس فیصد اضافہ کی منظوری دی گئی ہے۔