Author: علیم ملک

اسلام آباد: وفاقی حکومت نے عالمی منڈی میں تیل کے نرخ کم ہونے کے باوجود پیٹرولیم مصنوعات کی قیمتیں برقرار رکھتے ہوئے اس پر لیوی میں اضافہ کر دیا۔

حکومت نے پیٹرول پر پیٹرولیم لیوی 8 روپے 2 پیسے بڑھا کر شرح 78 روپے 2 پیسے فی لیٹر کر دی جبکہ ڈیزل پر لیوی کی شرح 7 روپے 1 پیسے فی لیٹر اضافے کے ساتھ 77 روپے 1 پیسے مقرر کر دی۔

مٹی کے تیل پر پیٹرولیم لیوی 7 روپے 99 پیسے فی لیٹر بڑھا کر شرح 18 روپے 95 پیسے کر دی گئی۔ لائٹ ڈیزل آئل پر اس کی شرح میں 7 روپے 62 پیسے فی لیٹر کا اضافہ کر کے 15 روپے 37 پیسے مقرر کی گئی۔

یہ بھی پڑھیں: شہری پیٹرولیم لیوی کے بوجھ تلے دب گئے

ایچ او بی سی پر پیٹرولیم لیوی 8 روپے 2 پیسے فی لیٹر بڑھا کر شرح 78 روپے 2 پیسے کر دی گئی۔

گزشتہ روز وفاقی حکومت نے اگلے 15 روز کیلیے پیٹرولیم مصنوعات کی قیمتیں برقرار رکھنے کا فیصلہ کیا۔ وزارت خزانہ کی جانب سے جاری نوٹیفکیشن میں بتایا گیا کہ پیٹرول کی قیمت 254 روپے 63 پیسے فی لیٹر پر برقرار رکھی گئی جس کا اطلاق 16 اپریل 2025 سے ہوگا۔

نوٹیفکیشن کے مطابق ہائی اسپیڈ ڈیزل کی قیمت بھی 258 روپے 64 پیسے فی لیٹر پر برقرار ہے، پیٹرول اور ڈیزل کی قیمتیں 30 اپریل تک برقرار رہیں گی۔

اس سے قبل وزیر اعظم شہباز شریف نے کابینہ اجلاس سے خطاب کرتے ہوئے کہا کہ اگلے پندرہ دن تک پیٹرولیم مصنوعات کی قیمتیں کم نہیں کی جائیں گی، عالمی سطح پر تیل کی قیمتوں میں کمی کے فوائد صارفین تک ترقیاتی منصوبوں کے ذریعے عوام تک پہنچائے جائیں گے۔

وفاقی وزیر پاور ڈویژن اویس لغاری نے وزیراعظم کی جانب سے بجلی کے ٹریف میں کمی کو عوام سے کیے گئے وعدے کی جانب قدم قرار دیا ہے۔

اپنے بیان نے میں انہوں نے کہا کہ بجلی کی قیمت میں تاریخی کمی عوام سے کیے وعدہ وفا کرنے کی جانب  قدم ہے گھریلو صارفین کیلئے7.41،صنعتوں کیلئے بجلی7.69 روپے کی کمی کر دی۔

اویس لغاری نے کہا کہ پاور ڈویژن اب بجلی کی قیمت میں مزید کمی اور استحکام پرکام کر رہا ہے عوام کو بجلی کے شعبے میں اب بہتری ہی نظر آئے گی، بجلی کےتقسیم کار سسٹم میں مزیدبہتری لانےکیلئےدن رات کام کررہے ہیں۔

انہوں نے بتایا کہ 2 کروڑ صارفین کو بجلی پیداواری قیمت کا بھی 70فیصد ڈسکاؤنٹ مل رہا ہے ان 2کروڑ صارفین کو 11.50روپے سے بھی کم فی یونٹس بجلی ملنے لگی ہے، عنقریب صنعتوں کا پہیہ پوری قوت کےساتھ چلنا شروع ہو گا۔

قیمتوں میں کمی

شہباز شریف نے گھریلو صارفین کیلئے بجلی کی قیمت میں 7روپے 41 پیسے فی یونٹ روپے کمی کا اعلان کردیا اور کہا تمام صارفین کو کو 34 روپے 37 پیسے فی یونٹ بجلی فراہم کی جائے گی۔

ان کا کہنا تھا کہ جون 2024 میں گھریلو صارفین کیلئے بجلی کی قیمت 48 روپے 70 پیسے تھی، آج گھریلو صارفین کیلئے بجلی کی قیمت فی یونٹ 45 روپے5 پیسے پر ہے۔

وزیراعظم نے صنعتوں کیلئے بجلی کی قیمت میں مزید 7روپے 59 پیسے فی یونٹ روپے کمی کا اعلان کیا۔

ان مزید کہنا تھا کہ سال میں 600ارب روپے کی بجلی چوری ہورہی ہے اس کا خاتمہ کرنا ہے، بجلی کی چوری کو روکنا ہمارا اگلا ہدف ہے، 600ارب روپے کی بجلی کی چوری کو مکمل طورپر بند کرنا ہے۔