کراچی (17 اگست 2025): پاکستان کرکٹ ٹیم کے سابق کپتان سرفراز احمد اور عبدالرزاق نے ایشیا کے لیے اعلان کردہ قومی اسکواڈ پر ردعمل کا اظہار کیا ہے۔

اے آر وائی نیوز کے مطابق رواں ماہ اگست اور اگلے ماہ ستمبر میں متحدہ عرب امارات میں کھیلی جانے والے ٹرائی نیشن سیریز اور ایشیا کپ کے لیے پی سی بی نے قومی اسکواڈ کا اعلان کر دیا ہے۔ اسکواڈ میں تجربہ کار بیٹر اور سابق  کپتان بابر اعظم اور ون ڈے ٹیم کے موجودہ کپتان محمد رضوان کو نظر انداز کیا گیا ہے۔

بابر اعظم کو ایشیا کپ کے اسکواڈ میں جگہ نہ دینے پر کرکٹ کے مختلف حلقے اپنی اپنی رائے کا اظہار کر رہے ہیں۔

کراچی میں پاکستان کرکٹ ٹیم کے سابق کپتان سرفراز احمد نے میڈیا سے گفتگو کرتے ہوئے کہا کہ سہ فریقی سیریز اور ایشیا کپ کے لیے اچھی ٹیم کا اعلان ہوا ہے۔ یو اے ای کی پچز پر پاکستان کا ریکارڈ شاندار رہا ہے۔ ٹیم سیریز اور ٹورنامنٹ دونوں جیت سکتی ہے۔

سرفراز احمد کا کہنا تھا کہ گزشتہ تین چار سالوں میں نئی ٹیم ابھر کر سامنے آ رہی ہے۔ حسن نواز، حسین طلعت، صائم ایوب سمیت نوجوان کھلاڑیوں کو موقع دیا گیا ہے۔ فخر زمان میچ ونر اور گزشتہ کچھ عرصہ سے بہت اچھا پرفارم کر رہے ہیں۔

انہوں نے اولمپک میں کرکٹ کی شمولیت کو خوش آئند قرار دیتے ہوئے کہا کہ امید ہے کہ پاکستان کرکٹ ٹیم اولمپک میں بھی گولڈ میڈل جیت کر لائے گی۔

سابق قومی آل راؤنڈر عبدالرزاق نے کہا کہ میرٹ پر ٹیم بن رہی ہے اور امید ہے کہ اچھا پرفارم کرے گی۔ نیک تمنائیں ٹیم کے ساتھ ہیں۔

عبدالرزاق نے مزید کہا کہ ٹیم میں نوجوان کھلاڑیوں کو موقع دیا گیا ہے۔ اب قومی ٹیم جارحانہ انداز میں کھیل رہی ہے، جس کو دیکھ کر مسرت ہوتی ہے۔ پاکستان کو ان میں سے جلد پاور ہٹرز ملیں گے۔

https://urdu.arynews.tv/pcb-pakistan-squad-for-tri-series-asia-cup-2025-17-august-2025/

اسٹریٹ چلڈرن فٹبال چیمپئن شپ کے لیے ناروے جانے والے مسلم ہینڈ کلب پاکستان کا کھلاڑی امان اللہ بلوچ وطن واپس آنے کے بجائے ناروے میں ہی غائب ہو گیا۔

اے آر وائی نیوز کے مطابق ناروے میں ہونے والی اسٹریٹ چلڈرن فٹبال چیمپئن شپ کے لیے پاکستانی اسکواڈ میں شامل مسلم ہینڈ کلب پاکستان کے کھلاڑی امان اللہ بلوچ وطن واپسی کے بجائے ناروے میں ہی غائب ہو گئے ہیں۔ معاملے کی تحقیقات نارویجین پولیس اور پاکستانی سفارتخانہ کر رہا ہے۔

امان اللہ کا تعلق لیاری کے علاقے سنگو لین سے ہے اور وہ مسلم ہینڈ کلب کے ہمراہ اسٹریٹ چلڈرن فٹبال چیمپیئن کھیلنے کیلیے ناروے گئے تھے لیکن ایونٹ کے آغاز سے قبل ہی وہ ٹیم کو چھوڑ کر چلے گئے۔

اطلاعات کے مطابق اوسلو میں ٹیم کے اعزاز میں تقریب رکھی گئی تھی، جس کے دوران امان اللہ فون پر بات کرتے ہوئے بلڈنگ سے باہر گئے اور ٹیکسی میں بیٹھ کر روانہ ہوگئے۔

ٹیم مینجمنٹ کے مطابق یہ کیس نارویجین پولیس کے حوالے کر دیا گیا ہے اور پاکستان ایمبیسی بھی اس معاملے کو دیکھ رہی ہے۔

فٹبالر کے اہل خانہ سے رابطہ کرنے کی کوشش بھی کی گئی لیکن وہ اس بارے میں بات کیلیے تیار نہیں ہیں۔

واضح رہے کہ دو ماہ کے دوران یہ دوسرا واقعہ ہے جب کوئی پاکستانی کھلاڑی کسی دوسرے ملک میں سلپ ہوا ہے۔ اس سے قبل ورلڈ یونیورسٹی گیمز میں پنجاب کے 2 ایتھلیٹس جرمنی میں غائب ہوگئے تھے۔