Author: علی حسن

قومی کرکٹ ٹیم اور پرائم منسٹر الیون کی ٹیمیں اتوار سے پرتھ میں ڈیرے ڈالیں گی، دونوں ٹیمیں 14 دسمبر سے شروع ہونے والے ویسٹ ٹیسٹ میں شرکت کریں گی۔

تفصیلات کے مطابق تین میچز پر مشتمل سیریز کا پہلا ٹیسٹ پرتھ اسٹیڈیم میں کھیلا جائے گا، پیٹ کمنز کی قیادت میں آسٹریلیا کرکٹ ٹیم کل پرتھ پہنچے گی۔

سیریز کے لیے پرائم منسٹر الیون کی ٹیم اتوار سے تربیتی سیشن کا آغاز کرے گی، ہیڈ کوچ اینڈریو میکڈونلڈ سیشن کے بعد میڈیا کانفرنس میں شرکت کریں گے۔

دوسری جانب پاکستانی اسکواڈ اتوار کو کینبرا سے پرتھ روانہ ہوگا، قومی ٹیم  پیر سے ٹریننگ کا آغاز کرے گی، پاکستانی اسکواڈ کا ایک رکن پریکٹس سیشن کے بعد میڈیا سے بات چیت کے لیے دستیاب ہوگا۔

ویسٹ ٹیسٹ کی خاص بات یہاں ٹیسٹ سیریز لانچ کا انعقاد ہے، جو پیر کو منعقد ہوگا، بارہ دسمبر کو اسٹیو اسمتھ پریکٹس سیشن سے قبل پرتھ اسٹیڈیم میں میڈیا سے گفتگو کریں گے۔

پاکستانی ٹیم دوپہر کو یہاں اپنی ٹریننگ کا آغاز کرے گی، تیرہ دسمبر کو دونوں کپتان بینو قادر ٹرافی کے فوٹو شوٹ میں شرکت کریں گے، ٹرافی شوٹ کے بعد دونوں کپتان پریس کانفرنس میں شرکت کریں گے۔

وکٹ کیپربیٹر سرفراز احمد نے کہا ہے کہ مجھے اور رضوان کو منیجمنٹ جو بھی رول دے گی اس پر پورا اتریں گے۔

پاکستان کرکٹ ٹیم کے وکٹ کیپربیٹر سرفراز احمد نے کینبرا میں میڈیا سے گفتگو کرتے ہوئے کہا کہ جب ہم کرکٹ کھیلتے ہیں تو جو بھی رول دیا جائے ہم اس کے لیے تیار رہتے ہیں، رضوان اور مجھے جو بھی رول دیا جائے گا اس پر پورا اترنے کی کوشش کریں گے۔

سابق کپتان نے کہا کہ آسٹریلیا ایک ٹاپ ٹیم ہے اور آپ اس کے خلاف ٹیسٹ سیریز کھیل رہے ہیں، آسٹریلیا اپنے ملک میں ہمیشہ ٹف رہی ہے، ہمارا ٹیم گول یہ ہی ہے کہ یہاں اچھی کرکٹ کھیلنی ہے اور سیریز جیتنی  ہے، ہماری ٹیم بہت اچھی ہے میدان میں اچھی کرکٹ کھیلیں گے۔

We want to play best quality cricket in Australia… Kaptaaan#Pakistan #PakistanCricketTeam pic.twitter.com/8kh3IslqNA

— Ali Hasan 🏅 (@AaliHasan10) December 4, 2023

سرفراز احمد نے کہا کہ کینبرا میں موسم اچھا ہے، چار روزہ میچ ہمارے لیے اہمیت رکھتا ہے، آسٹریلیا کا ٹور چیلنجنگ ہوتا ہے، ہماری کوشش ہے کہ پریکٹس میچ سے زیادہ سے زیادہ فائدہ اٹھائیں۔

سرفراز نے کہا کہ ڈیوڈ وارنر کے لیے نیک خواہشات ہیں، کوشش کریں گے کہ انہیں جتنا جلد آؤٹ کر سکیں کریں، ہماری کوشش ہے کہ ان کو اچھا اسٹارٹ نہ لینے دیں اور آؤٹ کردیں۔

سرفراز احمد نے مزید کہا کہ پرتھ ٹیسٹ کے لیے اچھی تیاری کر رہے ہیں، ہ،اری بیٹنگ اور فاسٹ بولنگ لائن اچھی ہے، یہ نسیم شاہ کی کمی پوری کر سکتے ہیں۔

پاکستان کرکٹ ٹیم کے فاسٹ بولر شاہین آفریدی نے آسٹریلوی اوپنر ڈیوڈ وارنر کو آخری ٹیسٹ سیریز یادگار نہ بنانے دینے کی خواہش کا اظہار کیا ہے۔

پاکستان کرکٹ ٹیم کے فاسٹ بولر شاہین آفریدی نے آسٹریلیا سے پہلے ٹیسٹ سے قبل گفتگو کرتے ہوئے اوپنر ڈیوڈ وارنر کو آخری ٹیسٹ سیریز  یادگار نہ بنانے دینے کی خواہش کا بھی اظہار کیا۔

شاہین آفریدی نے کہا کہ ڈیوڈ وارنر کا کرکٹ کیرئیر شاندار ہے، وہ تینوں فارمیٹ کے بہترین کھلاڑی ہیں، وارنر کے لیے نیک تمنائیں ہیں مگر پرامید ہوں وہ پاکستان کے خلاف اچھا پرفارم نہیں کریں گے۔

فاسٹ بولر کا کہنا تھا کہ پاکستان فی الحال ورلڈ ٹیسٹ چیمپئن شپ کے پوائنٹس ٹیبل پر سرفہرست ہے، امید ہے آسٹریلیا میں اچھی کارکردگی کا مظاہرہ کریں۔

ان کا کہنا تھا کہ کینبرا میں کھیلنے کا زیادہ تجربہ نہیں مگر پی ایم الیون کے خلاف میچ سیریز کی تیاری کا اچھا موقع ملے گا، آسٹریلیا نے مضبوط اسکواڈ کا اعلان کیا ہے مگر پاکستان ٹیم اس چیلنج کے لیے تیار ہے۔

پاکستان کرکٹ ٹیم کے فاسٹ بولر شاہین شاہ آفریدی نے کہا کہ پاکستان کے پاس سینئر اور جونیئر کا اچھا کمبی نیشن ہے، ہم آسٹریلیا کے تمام کھلاڑیوں کے خلاف کھیل چکے ہیں آسٹریلوی کھلاڑی ہمیشہ مضبوط انداز سے مقابلہ ہیں۔

پاکستان کرکٹ ٹیم کے فاسٹ بولر حسن علی نے کہا ہے کہ آسٹریلیا کے خلاف ٹیسٹ سیریز میں آسٹریلوی کرکٹر عثمان خواجہ سے محتاط رہیں گے۔

ایک انٹرویو میں قومی کرکٹ ٹیم کے فاسٹ بولر حسن علی نے کہا ہے کہ آسٹریلیا کے خلاف ٹیسٹ سیریز میں عثمان خواجہ سے محتاط رہیں گے، وہ اردو جانتے ہیں، گراونڈ میں ان کے سامنے کوئی اسٹریٹجی ڈسکس نہیں کریں گے۔

حسن علی نے دعویٰ کیا کہ عثمان خواجہ نے کراچی میں میچ کے دوران ہماری ٹیم کی گیم اسٹریٹجیز آسٹریلوی ٹیم کے ساتھ شیئر کیں کیونکہ وہ اردو سمجھتے ہیں۔

فاسٹ بولر نے کہا کہ آن فیلڈ پلاننگ خفیہ رکھنے کے لیے عثمان خواجہ سے دور رہ کر باتیں کریں گے، جنوبی ایشیائی ٹیموں کے لیے دورہ آسٹریلیا ہمیشہ سے ٹف رہتا ہے۔

انہوں نے کہا کہ اضافی باونس کی وجہ سے جنوبی ایشیائی ٹیموں کو یہاں 20 وکٹیں حاصل کرنے میں دشواری کا سامنا کرنا پڑتا ہے۔

فاسٹ بولر حسن علی کا مزید کہنا تھا کہ آسٹریلیا کے موجودہ اسکواڈ میں سب سے بہترین باولر پیٹ کمنز ہیں، آسٹریلوی کپتان تینوں فارمیٹ کے خطرناک باولر ہیں لیکن شاہین شاہ آفریدی بھی نئی اور پرانی گیند کرنے کا فن جانتے ہیں۔

پرتھ: آسٹریلوی کے آل راؤنڈر مچل مارش پاکستان کے خلاف ٹیسٹ سیریز کے منتظر ہیں، کہا کہ میں یہاں کرکٹ سے لطف اندوز ہونے اور مزے کرنے آیا ہوں۔

آسٹریلوی کے آل راؤنڈر مچل مارش ہوم گراؤنڈ میں پاکستان کے خلاف ٹیسٹ سیریز کے لیے آسٹریلوی پرائم منسٹر الیون کا حصہ نہیں ہیں، تاہم وہ سیریز کے منتظر ہیں۔

آسٹریلوی کے آل راؤنڈر مچل مارش نے پرتھ میں میڈیا ست گفتگو کرتے ہوئے کہا کہ کبھی بھی پرتھ میں ٹیسٹ میچ نہیں کھیلا، خواہش ہے یہاں ویسٹ ٹیسٹ کا حصہ بنوں، اگر آسٹریلیا ٹیسٹ اسکواڈ میں منتخب ہوا تو بہت پرجوش ہوں گا۔

انہوں نے کہا کہ ہوم فینز کے سامنے کھیلنے کا منتظر ہوں، پرتھ اسٹیڈیم کی پچ دنیا کی بہترین وکٹ ہے، یہ فاسٹ اور باونسی پچ ہے جہاں بولرز اور بیٹرز دونوں کو مدد ملتی ہے۔

آسٹریلوی آل راؤنڈر کا کہنا تھا کہ گزشتہ 9 سال آسٹریلیا کرکٹ کے شاندار لمحات ہیں، پیٹ کمنز شاندار انداز میں ٹیم کی قیادت کررہے ہیں اور موجودہ آسٹریلیا کرکٹ ٹیم کا حصہ ہونے پر فخر ہیں، کسی بھی فارمیٹ میں ٹیم کی نمائندگی کا موقع ملنے پر فخر محسوس کرتا ہوں۔

واضح رہے کہ پاکستان کرکٹ ٹیم کپتان شان مسعود کی قیادت میں آسٹریلیا کے دورے پر سڈنی پہنچ گئی جہاں تین میچوں کی سیریز کا پہلا ٹیسٹ پرتھ میں کھیلا جائے گا جبکہ دوسرا ٹیسٹ 26 دسمبر سے میلبرن  اور سیریز کا تیسرا اور آخری ٹیسٹ میچ 3 جنوری کو سڈنی میں ہوگا۔

پاکستان کے خلاف پی ایم الیون اسکواڈ میں کپتان نیتھن میک سوینے، کیمرون بین کرافٹ، کیمرون گرین، مارکس ہیرس، نیتھن میک اینڈریو، ٹوڈ مرفی، مائیکل نیسر، جمی پیرسن، میتھیو رینشاہ، مارک سٹیکیٹے اور بیاو ویبسٹر شامل ہیں۔

جبکہ قومی ٹیم میں شان مسعود ( کپتان )، عامر جمال، عبداللہ شفیق، ابرار احمد، بابر اعظم، فہیم اشرف، حسن علی، امام الحق، خرم شہزاد، میر حمزہ، محمد رضوان، محمد وسیم جونیئر، نعمان علی، صائم ایوب، سلمان علی آغا، سرفراز احمد، سعود شکیل، شاہین شاہ آفریدی شامل ہیں۔