کراچی: بلین مارکیٹ میں سونے کی فی اونس قیمت میں 9 ڈالر کا اضافہ ہوا جس کے منفی اثرات مقامی صرافہ بازاروں پر بھی نظر آئے۔
تفصیلات کے مطابق انٹرنیشنل مارکیٹ میں ٹریڈنگ کے دوران سونے کی فی اونس قیمت 9 ڈالر اضافے کے بعد 1475 ڈالر کی سطح پر پہنچ گئی، بین الاقوامی مارکیٹ میں ریٹ بڑھنے سے مقامی صرافہ بازاروں میں بھی قیمتیں زیادہ ہوئیں۔
آل پاکستان جیولرز ایسوسی ایشن کے چیئرمین محمد ارشد کے مطابق بلین مارکیٹ میں اضافے کے بعد مقامی صرافہ بازاروں میں فی تولہ قیمت میں 100 رپے جبکہ 10 گرام کے ریٹ میں 86 روپے اضافہ ریکارڈ کیا گیا۔
حالیہ اضافے کے بعد کراچی، حیدرآباد، سکھر، لاہور، ملتان، فیصل آباد، کوئٹہ، پشاور، اسلام آباد، راولپنڈی کے بازاروں میں بتاریخ 12 دسمبر کو سونے کی فی تولہ اور دس گرام کی خریدو فروخت بالترتیب 84ہزار 500 اور 72 ہزار 445 روپے کے ساتھ ہوئی۔
یاد رہے کہ گزشتہ روز بھی بلین مارکیٹ میں سونے کی فی ڈالر قیمت میں 1 ڈالر کا اضافہ ہوا تھا جس کی وجہ سے مقامی صرافہ بازاروں میں سونے کی فی تولہ قیمت میں 100 روپے اور دس گرام کے بھاؤ میں 86 روپے اضافہ ریکارڈ کیا گیا تھا۔
