Author: انجم وہاب

کراچی: پاکستان اسٹاک ایکسچینج میں آج بھی مثبت کاروبار ہوا اور 100 انڈیکس میں 109 پوائنٹس کا اضافہ ریکارڈ کیا گیا۔

تفصیلات کے مطابق پاکستان اسٹاک ایکسچینج میں کاروباری ہفتے کے تیسرے یعنی بدھ کے روز بھی سرمایہ کاروں نے لین دین میں دلچسپی ظاہر کی جس کے باعث مارکیٹ میں آغاز سے ہی تیزی رہی۔

ٹریڈنگ کا آغاز ہوتے ہی مارکیٹ مثبت زون میں داخل ہوگئی جبکہ ایک وقت میں 100 انڈیکس 183 پوائنٹس نیچے بھی گیا مگر دوسرے سیشن میں لین دین زیادہ ہوئی جس کے بعد انڈیکس مستحکم ہوا۔

مزید پڑھیں: پاکستان اسٹاک ایکسچینج، 100 انڈیکس 175 پوائنٹس اضافے پر بند

پی ایس ایکس کا 100 انڈیکس 109 پوائنٹس اضافے کے بعد 32 ہزار 363 پر بند ہوا، ٹریڈنگ کے دوران 5 ارب 42 کروڑ روپے مالیت کے 18 کروڑ  سے زائد شیئرز کی لین دین ہوئی۔

ٹریڈنگ کے دوران 335 کمپنیوں کے شیئرز مارکیٹ میں خرید و فروخت کے لیے پیش کیے گئے جن میں سے 190 کی قیمتوں میں اضافہ، 126 کے داموں میں کمی جبکہ 19 کے ریٹ مستحکم رہے۔

کراچی: اسٹیٹ بینک آف پاکستان نے زرمبادلہ کے ذخائر کی رپورٹ جاری کردی جس کے مطابق سرکاری زرمبادلہ میں ایک ہفتے کے دوران 13 کروڑ ڈالر سے زائد کی کمی ریکارڈ کی گئی۔

اسٹیٹ بینک آف پاکستان کی جانب سے جاری ہونے والے زرمبادلہ کے زخائر  کے اعداد و شمار میں بتایا گیا ہے کہ بیرونی قروضوں کی ادائیگی پر ایک ہفتے میں مرکزی بینک کے زخائر میں 13 کروڑ 50 لاکھ ڈالر کمی ہوئی۔

اعلامیے کے مطابق حالیہ کمی کے بعد سرکاری ذخائر 8ارب 6 کروڑ ڈالر سے کم ہوکر 8 ارب 46 کروڑ ڈالر تک پہنچ گئے جبکہ مجموعی طور ذخائر 15 ارب 77 کروڑ 26 لاکھ ڈالر کی سطح پر پہنچ گئے۔

اسٹیٹ بینک کے مطابق کمرشل بینکوں کے ذخائر 7 ارب 30 کروڑ ڈالرز پر موجود ہیں۔

یاد رہے کہ رواں ماہ کے اوائل میں عالمی ریٹنگز ایجنسی موڈیز  نے رپورٹ جاری کی تھی جس میں بتایا گیا تھا کہ ٹیکس وصولی کے اہداف میں کمی، بیرونی قرض اور سود کی ادائیگی پاکستان میں مالی تنگی کا باعث بن رہی ہے۔

رپورٹ میں بتایا گیا تھا کہ بیرونی دباؤ کی وجہ سے زر مبادلہ کے ذخائر پر براہ راست اثر انداز ہورہے ہیں۔موڈیز کا کہنا تھا کہ مالیاتی اور سیاسی صورتحال معیشت پر اثر انداز ہوتی ہے، فی کس آمدن اور عالمی اعتبار سے مسابقتی ماحول بھی کافی کم ہے۔

کراچی: بلین مارکیٹ میں سونے کی فی اونس قیمت میں اضافے کے اثرات مقامی صرافہ بازاروں پر بھی واضح نظر آنے لگے۔

تفصیلات کے مطابق انٹرنیشنل مارکیٹ میں ٹریڈنگ کے دوران سونا کی قیمت 9 ڈالر اضافے کے بعد 1530 ڈالر تک پہنچ گئی جس کے باعث مقامی صرافہ بازاروں میں بھی قیمتوں کو پر لگ گئے۔

آل پاکستان جیولرز ایسوسی ایشن کے چیئرمین محمد ارشد کے مطابق بلین مارکیٹ میں اضافے کے بعد سونے کی فی تولہ قیمت میں 500 اور دس گرام میں 430 روپے کا اضافہ ریکارڈ کیا گیا۔

کراچی، حیدرآباد، سکھر، پشاور، کوئٹہ، لاہور، اسلام آباد، راولپنڈی، فیصل آباد، ملتان کے صرافہ بازاوں میں خرید و فروخت فی تولہ 88 ہزار 500 اور دس گرام 75 ہزار 874 روپے کے ساتھ ہوئی۔

یاد رہے کہ 21 ستمبر کو انٹرنیشنل مارکیٹ میں مہنگا ہونے کے بعد مقامی صرافہ بازاروں میں قیمتوں کو پر لگے تھے جس کے بعد فی تولہ کی قیمت میں 600 جبکہ 10 گرام 515 روپے اضافہ ہوا تھا۔

کراچی: بلین مارکیٹ میں اضافےکے بعد مقامی صرافہ بازاروں میں سونا مزید مہنگا ہوگیا۔

تفصیلات کے مطابق بین الاقوامی مارکیٹ میں ٹریڈنگ کے دوران سونے کی قیمت میں 18 ڈالر کا اضافہ ریکارڈ ہوا جس کے بعد قیمت 1517 ڈالر فی اونس تک پہنچ گئی۔

انٹرنیشنل مارکیٹ میں مہنگا ہونے کے بعد مقامی صرافہ بازاروں میں قیمتوں کو پر لگے اور اڑان کو کوئی نہ روک سکا۔ آل پاکستان تاجر ایسوسی ایشن کے چیئرمین محمد ارشد کے مطابق مقامی صرافہ بازاروں میں فی تولہ کی قیمت میں 600 جبکہ 10 گرام 515 روپے مہنگا ہوا۔

کراچی، حیدرآباد، سکھر، پشاور، کوئٹہ، لاہور، اسلام آباد، راولپنڈی، فیصل آباد، ملتان کے صرافہ بازاوں میں فی تولہ اضافے کے بعد 87 ہزار 500 اور دس گرام 75 ہزار 17 روپے کے ساتھ فروخت ہوا۔

یاد رہے کہ گزشتہ روز مقامی صرافہ بازاروں میں سونے کے ریٹ کم ہوئے تھے، آل پاکستان جیولرز ایسوسی ایشن کے چیئرمین محمد ارشد کے مطابق حالیہ کمی کے بعد مقامی صرافہ بازاروں میں سونے کی فی تولہ اور دس گرام قیمتوں میں بالترتیب 250 اور 215 روپے کمی ریکارڈ ہوئی۔

کراچی: اوپن مارکیٹ میں روپے کی قدر مستحکم ہوئی اور انٹربینک مارکیٹ میں ڈالر کے ریٹ کم ہوئے۔

تفصیلات کے مطابق انٹربینک میں ڈالر گزشتہ روز 156 روپے 23 پیسے پر بند ہوا تھا، آج جب ٹریڈنگ شروع ہوئی تو روپے کی قدر مستحکم رہی اور کاروباری ہفتے کے آخری روز ڈالر 10 پیسے سستا ہوا۔

فاریکس ڈیلر کے مطابق انٹر بینک میں ڈالر 156.23 سے کم ہوکر 156.07 روپے پر بند ہوا جبکہ روپے کی قدر مستحکم رہی اور ڈالر 156 روپے 30 پیسے کی سطح پر برقرار رہا۔

اسٹیٹ بینک کی جانب سے جاری ہونے والی تفصیل کے مطابق آج 20 ستمبر کو پاکستانی روپے کے مقابلے میں متحدہ عرب امارات کا درھم کی خرید 42.45 پیسے جبکہ فروخت 42.55 پیسے کے ساتھ ہوئی۔ اسی طرح آسٹریلین ڈالر کی لین 106.32 پیسے جبکہ فروخت 106.29 پیسے کے ساتھ ہوئی۔