کراچی : کے الیکٹرک عملے کی غفلت نے ایک اور بچے کی جان لے لی، سرجانی ٹاؤن میں پانچ سالہ بچہ بجلی کے گرے ہوئے تار سے کرنٹ لگنے کے باعث جاں بحق ہوگیا۔
تفصیلات کے مطابق کراچی کے علاقے سرجانی تیسرٹاؤن میں کے الیکٹرک عملے کی غفلت کا ایک اور واقعہ سامنے آیا ہے، تیسرٹاؤن میں 5سال کا بچہ بجلی کے گرے ہوئے تار سے کرنٹ لگنے کے باعث بے ہوش ہوگیا۔
خضر کو کرنٹ لگنے کے بعد اسپتال لے جایا گیا تھا جہاں اس نے دوران علاج دم توڑ دیا، خضر کو اس کے گھر کے سامنے بجلی کے گرے ہوئے تار سے کرنٹ لگا، علاوہ ازیں گزشتہ رات بھی اورنگی ٹاؤن میں پی ایم ٹی گرنے سے ایک شخص شدید زخمی ہوا تھا۔
یاد رہے کہ کراچی کے علاقے احسن آباد میں کے الیکٹرک کی لاپرواہی کے باعث 8 سالہ بچے عمر پر بجلی کے تار گرگئے تھے جس کے باعث بچے کے دونوں بازو ضائع ہوگئے تھے، متاثرہ بچے کے والدین کی جانب سے کے الیکٹرک کی لاپرواہی پر ادارے کے خلاف بھرپور قانونی چارہ جوئی کرنے کا اعلان کیا گیا تھا۔
بعد ازاں گورنر سندھ عمران اسماعیل نے8سالہ بچے عمر کے بازو ضائع ہونے پر کے الیکٹرک کے حکام سے تار گرنے کی وضاحت طلب کرتے ہوئے متاثرہ بچے کو علاج معالجے کی تمام سہولتیں فراہم کرنے کی ہدایات جاری کی تھیں۔
کراچی : ایری زونا گرل ریسٹورنٹ کی انتظامیہ اپنے گاہکوں کو ایک عرصے سے زائد المیعاد گوشت کھلاتی رہی۔ ایک سال سے ایری زوناگرل ریسٹورنٹ نے کسی قسم کا گوشت درآمد نہیں کیا۔
تفصیلات کے مطابق محکمہ کورنٹائن کے ڈائریکٹر نے انکشاف کیا ہے کہ ایری زونا گرل ریسٹورنٹ میں زائد المیعاد گوشت کب اور کہاں سے درآمد کیا گیا اس کا کوئی ریکارڈ موجود نہیں ہے۔
ادارے کے ڈائریکٹرمحمد الیاس کے مطابق گزشتہ ایک سال سے ریسٹورنٹ نے گوشت درآمد ہی نہیں کیا، زائد المیعاد گوشت کب اور کہاں سے آیا ؟ کوئی ریکارڈ سرے سے موجود ہی نہیں ہے، دو ہزار سترہ سے پہلے پاکستان میں درآمدی گوشت کی چیکنگ کا کوئی محمکہ نہیں تھا۔
واضح رہے کہ ایری زونا گرل ریسٹورنٹ میں کھانا کھانے کے بعد خاتون اور دو بچوں کی حالت غیر ہو گئی تھی، جس کے نتیجے میں دو بچے محمد اور احمد دم توڑ گئے تھے ان کی والدہ اسپتال میں تاحال زیر علاج ہیں۔
واقعے کے بعد سندھ فوڈ اتھارٹی کی جانب سے گودام پر چھاپے کے دوران بڑی مقدار میں زائد المیعاد گوشت اور دیگر سامان برآمد ہوا تھا، بعدا زاں ایری زوناگرل کے گودام سے برآمد ہونے والا زائدالمیعاد گوشت سرجانی ٹاؤن ڈمپنگ پوائنٹ میں تلف کردیا گیا، سندھ فوڈ اتھارٹی نے80 کلو سے زائد گوشت کو زمین میں دبا کر کیمیکل ڈال دیا۔
فوڈ اتھارٹی کے مطابق اس کے علاوہ برآمد شدہ زائدالمیعاد مشروبات کو کورنگی ڈمپنگ پوائنٹ پر تلف کیا گیا، گودام سے ملنے والے گوشت اور مشروبات کے نمونے ٹیسٹ کیلئے لے لیےگئے۔
ڈائریکٹرمحکمہ کورنٹائن محمد الیاس کی صحافیوں سے گفتگو
ڈائریکٹرمحکمہ کورنٹائن محمد الیاس نے صحافیوں کو تفصیلات بتاتے ہوئے کہا کہ جولائی2017تا2018ساڑھے45لاکھ42ہزار کلو گوشت درآمد کیا گیا،جولائی2017سےاب تک166درآمدی کنسائمنٹ آئے،37لاکھ10ہزار ڈالرکا گوشت، گردے، کلیجی اور اوجھڑی درآمد کی گئی۔
ایک کنسانمنٹ کے لیبارٹری ٹیسٹ کیلئے75روپے فیس مقرر ہے، بجٹ محدود ہونے کی وجہ سے باہر سے لیبارٹری ٹیسٹ کراتے ہیں، جس کیلئے ایک ٹیسٹ کے10سے15ہزار روپے تک ادائیگی کی جاتی ہے، محکمہ کے پاس لیبارٹریاں ہیں لیکن فنڈ ز نہ ہونے کے باعث کام نہ ہونے کے برابر ہورہا ہے۔
کورنٹائن ڈیپارٹمنٹ درآمدی اشیاء خوردونوش کی نگرانی کاذمہ دار ہے، اس محکمے میں 40 افراد کام کرتے ہیں، درآمدی پالیسی میں کلیجی، پائے ،دل ، گردہ اور گوشت کی اجازت ہے، درآمد اور برآمد کیلئے کورنٹائن محکمے کا کلیئرنس سرٹیفیکٹ لازمی ہوتا ہے، وفاقی محکمہ کورنٹائن کابجٹ ساڑھے8کروڑ30لاکھ ہے، محکمہ کورنٹائن کیلئے سندھ کا بجٹ 3 کروڑ 75 لاکھ روپے ہے۔
سندھ فوڈ اتھارٹی کا بجٹ20کروڑروپے، کارکردگی صفر
ذرائع کا کہنا ہے کہ سندھ فوڈ اتھارٹی کا بجٹ20کروڑ روپے مختص کیا گیا ہے، کروڑوں روپے کا بجٹ ملنے کے باوجود سندھ فوڈ اتھارٹی کی کارکردگی پر سوالیہ نشان اٹھ گیا،۔
بجٹ کے5کروڑ روپے سندھ فوڈ اتھارٹی کو پہلے ہی مل چکے ہیں، کروڑوں روپے تو مل گئے لیکن عملے کے پاس گاڑی ہے اور نہ ہی کوئی موبائل ٹیسٹنگ وین۔ اس کے علاوہ فوڈ اتھارٹی فیلڈ فورس بنانے میں بھی تاحال ناکام ہے۔
ذرائع کے مطابق فوڈ اتھارٹی نے7ماہ میں 40 چھاپے مارے اوردکانداروں پر16لاکھ روپے کے جرمانےکئے، حال ہی میں سڑا ہوا گوشت ملنے پر نجی ریسٹورنٹ کی کھلی ہوئی شاخیں فوڈ اتھارٹی پر سوالیہ نشان ہیں۔
کراچی: شہرِ قائد میں ویلڈنگ کرنے والے محنت کش عمران کی دبئی میں بے نامی جائیداد کا انکشاف ہوا ہے، ایف آئی اے نے نوٹس بھیج دیا۔
تفصیلات کے مطابق فالودے والا، رکشے والا اور طالب علم کے بے نامی اکاؤنٹس کے انکشاف کے بعد اب کراچی کے ایک ویلڈر کی بے نامی جائیداد سامنے آ گئی ہے۔
[bs-quote quote=”میرے پاس پاسپورٹ تک نہیں، دبئی جانا تو دور کی بات کبھی تصور بھی نہیں کیا۔” style=”style-7″ align=”left” color=”#dd3333″ author_job=”ویلڈر عمران”][/bs-quote]
نشتر روڈ پر کام کرنے والے محنت کش ویلڈر عمران کی دبئی میں جائیداد سامنے آنے پر ایف آے آئی نے ان کو نوٹس بھیج کر 20 نومبر کو کاغذات سمیت دفتر طلب کر لیا۔
عمران کا کہنا ہے ’میں گیٹ اور جالی کی ویلڈنگ کرتا ہوں، میرے پاس پاسپورٹ تک نہیں، دبئی جانا تو دور کی بات کبھی تصور بھی نہیں کیا۔‘
محنت کش کے مطابق انھیں ایف آئی اے کی جانب سے بھیجے گئے نوٹس سے معلوم ہوا کہ ان کے نام پر دبئی میں جائیداد موجود ہے۔
خیال رہے کہ جعلی اکاؤنٹس کے ذریعے اربوں روپے کی منی لانڈرنگ کے سلسلے میں اب تک فالودے والا، رکشے والا، ٹیکسی والا، طالب علم، فیکٹری مزدور، مرحوم افراد اور دھوبی کے جعلی اکاؤنٹس اور فیکٹریوں کی خبریں آ چکی ہیں۔
کراچی: اسٹیٹ بینک آف پاکستان نے بینکوں کے ڈیٹا کی چوری سے متعلق ایف آئی اے رپورٹس کی تردید کرتے ہوئے کہا ہے کہ اب تک ڈیٹا چوری کے کوئی شواہد نہیں ملے۔
تفصیلات کے مطابق بینک کارڈز کی ہیکنگ کے حوالے سے ایف آئی اے کے دعوے پر اسٹیٹ بینک کی وضاحت آ گئی، کہا کارڈز ڈیٹا چوری ہونے کا ایف آئی اے کا دعویٰ غلط ہے۔
[bs-quote quote=”بینکوں کا ڈیٹا چوری ہونے کے کوئی شواہد نہیں ملے، نہ ہی کسی بینک کی جانب سے کوئی شکایت موصول ہوئی۔” style=”style-7″ align=”left” color=”#dd3333″ author_name=”اسٹیٹ بینک”][/bs-quote]
اسٹیٹ بینک نے کہا ہے کہ 27 اکتوبر 2018 کو ایک بینک کے سیکورٹی حصار کے توڑے جانے کا وقعہ پیش آیا تھا، اس کے بعد ایسا کوئی واقعہ پیش نہیں آیا۔
اسٹیٹ بینک کا کہنا ہے کہ نہ تو بینکوں کا ڈیٹا چوری ہونے کے کوئی شواہد ملے ہیں، نہ ہی کسی بینک کی جانب سے ایسی کوئی شکایت موصول ہوئی۔
اسٹیٹ بینک نے کہا کہ بینکوں کا ٹرانزیکشن نظام مضبوط بنانے کے لیے پہلے ہی ہدایات جاری کی جا چکی ہیں، اسٹیٹ بینک واضح کر چکا ہے کہ کسی بھی سائبر حملے کے خدشے کی صورت میں بینک اس کا پیشگی تدارک کریں۔
اسٹیٹ بینک کے مطابق کمرشل بینکس اپنے خود کار سیکورٹی سسٹم سے مطمئن ہیں، پیشگی احتیاط کے سبب چند بینکوں نے بین الاقوامی لین دین مکمل طور پر بند کر رکھا ہے، جب کہ اسٹیٹ بینک معاملے کی خود نگرانی کر رہا ہے۔
خیال رہے کہ سائبر سیکورٹی کمپنی کی رپورٹ کے مطابق سائبر کرمنلز نے پاکستانی بینکوں کو نشانے پر رکھ لیا ہے، کئی ہزار ہیک شدہ کریڈٹ اور ڈیبٹ کارڈز کی ڈارک ویب پر فروخت کا انکشاف ہوا ہے۔
کریڈٹ اور ڈیبٹ کارڈ ڈارک ویب پر 100 سے 160 ڈالرز میں بیچا گیا، 22 پاکستانی بینکوں کے مجموعی طور پر 19864 کارڈز کا ڈیٹا چوری ہوا، پاکستانی اے ٹی ایم استعمال کرنے والے غیر ملکیوں کا ڈیٹا بھی چرایا گیا۔
پاک فضائیہ کے سربراہ نے ژوہائی ائیر شو کی افتتاحی تقریب میں شرکت کی، ائیر چیف نے اعلیٰ افسران اور دیگر معزز شخصیات کے ہمراہ فخر پاکستان جے ایف17تھنڈر طیارے کا مسحور کن فضائی مظاہرہ بھی دیکھا۔
تفصیلات کے مطابق پاک فضائیہ کے سربراہ ائیر چیف مارشل مجاہد انور خان نے ژوہائی ایئر شو چین کی افتتاحی تقریب میں شرکت کی۔ کئی ممالک کی فضائی افواج کے سربراہان اور اعلیٰ سطح وفود بھی اس موقع پر موجود تھے۔
ائیر چیف نے پاکستان ائیرو ناٹیکل کمپلیکس کامرہ کی جانب سے قائم کردہ اسٹال کا دورہ کیا جہاں انہوں نے پاک فضائیہ کے دستہ سے ملاقات بھی کی۔
انہوں نے شو میں شریک پاک فضائیہ کے افراد کی تعریف کرتے ہوئے کہا کہ پاک فضائیہ کی اس ائیر شو میں شرکت پوری قوم کے لئے باعثِ فخر ہے۔ ائیر چیف نے وہاں پر اسٹیٹک ڈسپلے پر موجود جے۔ایف 17 تھنڈر کا معائنہ بھی کیا اور پائلٹ اور گراؤنڈ کریو سے ملاقات کے دوران ان کی شو میں عمدہ کارکردگی کو بھی سراہا۔
اس موقع کی مناسبت سے ائیر چیف نے دنیا بھر سے شرکت کنندہ فضائی افواج کے سربراہان سے ملاقات کی اور ان سے پیشہ وارانہ دلچسپی کے امور پر گفتگو کی۔ ائیر چیف نے اپنے ہم منصب پیپلز لبریشن آرمی (ائیر فورس) کے کمانڈر لیفٹیننٹ جنرل ڈنگ لی آنگ سے بھی ملاقات کی۔
دونوں معزز شخصیات نے اپنے ممالک کی فضائی افواج کے درمیان تربیت اور صلاحیت کو بڑھانے کے پروگرامز میں مزید تعاون کو فروغ دینے پر اتفاق کیا، بعدازاں انہوں نے مختلف اسٹالز کا معائنہ کرتے ہوئے وہاں پر موجود کئی ممالک کی ائیرفور سزکے اعلیٰ حکام سے ملاقاتیں بھی کیں۔
کراچی: بے نامی اکاؤنٹس کیس میں بڑی ٹرانزیکشن کا انکشاف ہوا ہے، رکشے والے کے اکاؤنٹ سے ساڑھے 8 ارب کی منتقلی نے کھلبلی مچا دی۔
تفصیلات کے مطابق بے نامی اکاؤنٹس کیس میں سنسنی خیز انکشافات کا سلسلہ جاری ہے، فالودے اور دھوبی کے بعد ارب پتی رکشہ ڈرائیور سامنے آگیا۔
رکشے ڈرائیور زور طلب خان کے اکاؤنٹ میں مجموعی طور پر ساڑھے 8 ارب کی ٹرانزیکشن ہوئی ہے، ایف بی آر نے سبزی منڈی کے رہائشی رکشہ ڈرائیور کو نوٹس بھی جاری کر دیا۔
ایف بی آر ذرائع کے مطابق زور طلب خان کے نام پر موجود اکاؤنٹ سے سالار انٹرپرائزز کے ذریعے کاروبار کیا گیا، سالار انٹر پر ائززاور سالار مائننگ کے ذریعے پانچ بینکوں سےٹرانزیکشن ہوئی، رکشے والے کا اکاؤنٹ عمارخان نامی شخص استعمال کرتا رہا۔
کراچی : سندھ حکومت کی جانب سے فلور ملز کو گندم نہ ملنے کے باعث آٹے کی قیمت میں اضافے کا امکان ہے، اوپن مارکیٹ میں گندم کی ایک بوری پر سو روپے کا اضافہ کردیا گیا۔
تفصیلات کے مطابق اوپن مارکیٹ میں گندم کی قیمت کو پر لگ گئے، فی بوری گندم کی قیمت میں سو روپے اضافہ کردیا گیا جس کے بعد آٹے کی قیمتوں میں اضافے کا قوی امکان ہے۔
اس حوالے سے چیئرمین فلور ملز ایسوسی ایشن جاوید یوسف کا کہنا ہے کہ سندھ حکومت مسلسل رابطے کے باوجود فلور ملز کو گندم فراہم نہیں کررہی، وزیرخوراک اور سیکریٹری سندھ سے ملاقات کے باوجود فلور ملز کو گندم نہیں ملی۔
جاوید یوسف نے کہا کہ اوپن مارکیٹ میں گندم مہنگا ہونے سے ملوں کو موجودہ نرخ پر آٹا فروخت کرنا مشکل ہے، فلور ملز ایسوسی ایشن کے ہنگامی اجلاس میں آئندہ کا لائحہ عمل طے کریں گے۔
کراچی میں میڈیا سے گفتگو میں ان کا مزید کہنا تھا کہ لاکھوں ٹن گندم سندھ حکومت کی پاس موجود ہے، اس سلسلے میں وزیر اعلیٰ سندھ سید مراد علی شاہ سے جلد ملاقات کرنے کی کوشش کررہے ہیں۔
سیزن کے آغاز میں گندم کی بوری3075 کی تھی جو اب3450روپے تک پہنچ گئی ہے، حکومت نے فوری گندم ریلیز نہ کی تو مسائل مزید بڑھ جائیں گے،۔
چیئرمین فلور ملزایسوسی ایشن نے بتایا کہ صوبہ پنجاب نے ڈیڑھ ماہ قبل3250روپے کا نرخ مقرر کردیا تھا، سندھ کے علاوہ تینوں صوبے فلور ملز کے لئے ریٹ مقرر کرچکے ہیں۔
راولپنڈی : چیئرمین جوائنٹ چیفس آف اسٹاف کمیٹی جنرل زبیر محمود حیات نے پاکستان ایرو ناٹیکل کمپلیکس کامرہ کا دورہ کیا، اس موقع پر انہیں کارکردگی سے متعلق تفصیلات سے آگاہ کیا گیا ۔
تفصیلات کے مطابق جنرل زبیر محمود حیات کو پاکستان ایرو ناٹیکل کمپلیکس کامرہ (پی اے سی) کی فیکٹریز میں جاری منصوبہ جات پر مکمل بریفنگ دی گئی۔
جنرل زبیر نے کام کی رفتار اور اس کی کارکردگی پر اطمینان کا اظہار کیا،اس موقع پر گفتگو کرتے ہوئے جنرل زبیر محمود حیات نے کہا کہ پی اے سی دفاعی پیداوار میں ایک کلیدی کردار کا حامل ادارہ ہے،انہوں نے پی اے سی کی خود انحصاری کی پالیسی اور تمام منصوبوں میں عالمی معیار کے حصول کو سراہا۔
چیئرمین جوائنٹ چیفس آف اسٹاف کمیٹی نے پی اے سی کامرہ کے مستقبل کے منصوبہ جات میں بھرپور اعانت کا اعادہ کیا، جنرل زبیر محمود حیات کی پی اے سی آمد کے موقع پر ائیرمارشل احمر شہزاد لغاری نے ان کا استقبال کیا۔
کراچی: محکمہ وائلڈ لائف سندھ نے خفیہ اطلاع پر چھاپہ مار کر 150 کلو گرام کچھوے کے خول اور 200 کلو گرام پین گولین کی کھالیں برآمد کرلیں۔
تفصیلات کے مطابق محکمہ وائلڈ کے کنورسیٹر تاج محمد شیخ کا کہنا ہے کہ یہ کارروائی کراچی کے علاقے کھڈا مارکیٹ میں خفیہ اطلاع پرکارروائی کرتے ہوئے عمل میں لائی گئی۔ ان کے مطابق یہ کارروائی ٹھٹھہ اور کراچی کی مشترکہ ٹیموں نے انجام دی ہے۔
کارروائی کے دوران برآمد ہونے والے کچھووں کے خول اور پین گولین کی کھالوں کی قیمت عالمی مارکیٹ میں 90 ہزار امریکی ڈالر یعنی ایک کروڑ 15 لاکھ رو پے پاکستانی سے زائد ہے۔
میڈیا کو جاری کردہ پریس ریلیز کے مطابق کارروائی کرنے والی ٹیم کی سربراہی عدنان حامد خان اور محمد عظیم خان برفت نے مشترکہ طور پر کی ، خفیہ اطلاع تھی کہ کھڈا مارکیٹ میں موجود ایک گاڑی میں یہ خول اور کھالیں موجود ہیں۔
محکمہ وائلڈ لائف کے مطابق برآمد شدہ کھالیں اور کچھوے کے خولوں کو چین برآمد کیا جانا تھا۔ کارروائی کے دوران کوئی بھی گرفتاری عمل میں نہیں آئی ہے اور اسمگلنگ کے اس واقعے میں ملوث ملزمان کی تلاش جاری ہے۔
کراچی: پاکستان کی تاریخ میں بینکنگ سسٹم پر سب سے بڑا سائبر حملہ ہوا ہے، بینک اسلامی پر ہونے والا سائبر حملہ ملک کا سب سے بڑا حملہ قرار دیا جا رہا ہے۔
تفصیلات کے مطابق پاکستان میں بینکاری نظام پر ملک کی تاریخ کا سب سے بڑا سائبر حملہ ہوا ہے، جس میں بینک کے کریڈٹ، اے ٹی ایم کارڈز سے لاکھوں ڈالر نکال لیے گئے۔
[bs-quote quote=”اسٹیٹ بینک نے سمندر پار ٹرانزیکشنز کے لیے عارضی پابندیاں عائد کر دی ہیں” style=”style-7″ align=”left” color=”#dd3333″][/bs-quote]
ذرائع بینکنگ نے کہا ہے کہ اس سائبر حملے کو ملکی تاریخ کا سب سے بڑا حملہ کہا جا رہا ہے، اسٹیٹ بینک نے سمندر پار ٹرانزیکشنز کے لیے عارضی پابندیاں عائد کر دی ہیں۔
اسٹیٹ بینک کی جانب سے بینکوں کو ہدایات جاری کر دی گئی ہیں کہ وہ ملک میں تمام پے منٹ کارڈز کی سیکورٹی یقینی بنانے کے لیے انتظامات کریں، اور کارڈز کے استعمال خاص طور پر بیرون ملک لین دین کی ریئل ٹائم نگرانی کی جائے۔
نجی بینک کے پے منٹ کارڈز کی سیکورٹی کی خلاف ورزی کا معاملہ گزشتہ روز پیش آیا تھا، اسٹیٹ بینک نے متعلقہ بینک کو خامی کی نشان دہی کی ہدایت کر دی۔
ترجمان اسٹیٹ بینک کے مطابق متاثرہ بینک کو ہدایت جاری کر دی گئی ہے کہ وہ اپنے صارفین کے لیے احتیاطی تدابیر کے حوالے سے ایڈوائزری جاری کرے۔
سائبر حملے سے متعلق بینک اسلامی کا وضاحتی بیان
بینک اسلامی نے اپنا وضاحتی بیان جاری کرتے ہوئے کہا ہے کہ ڈیبٹ کارڈ کی انٹرنیشنل پیمنٹ پر غیر معمولی ادائیگی نوٹ کی، خلاف معمول ٹرانزیکشنز پر انٹرنیشنل پیمنٹ سسٹم منجمد کر دیا، غیر معمولی ٹرانزیکشنز کے دوران 26 لاکھ روپے نکالے گئے۔
بینک اسلامی کے مطابق احتیاطی طور پر اے ٹی ایم سمیت تمام ٹرانزیکشنز فوری روک دیں، غیر معمولی ٹرانزیکشنز 27 اکتوبر کو نوٹ کی گئیں، اے ٹی ایم سے کیش نکالنے کی سہولت اسی روز بحال کر دی گئی تھی، بینک کی دیگر سروسز کی بحالی کے لیے کام جاری ہے۔
