کراچی: شہرقائد میں کسٹمز نے مختلف کارروائیاں کرتے ہوئے ساڑھے پانچ کروڑ روپے مالیت کی چھالیہ سگریٹ اورگٹکا چھالیہ اورممنوعہ اشیاء کی اسمگلنگ ناکام بنادی ۔
تفصیلات کے مطابق کسٹم ہاوس کراچی میں پریس کانفرنس میں کلیکٹر کسٹم پریوینٹوڈاکٹرافتخار احمد نے ایڈیشنل کلیکٹرکسٹم عامر تہیم اور ڈی سی اینٹی اسمگلنگ آرگنائزیشن محمد فیصل کے ہمراہ پریس کانفرنس میں بتایاکہ کسٹم پریونٹو اینٹی اسمگلنگ آرگنائزیشن نے ایک ہفتے میں پانچ بڑی کارروائیوں میں چھالیہ اور ممنوعہ اشیاء کی اسمگلنگ کوناکام بنایاہے۔
انہوں نے بتایاکہ 17 ستمبر کو ریلوے کے ذریعے اسمگلنگ کی اطلاع پر کارروائی کے دوران اسمگل شدہ سامان کی بوگی پکڑی جبکہ ایک ہفتے کے دوران پانچ بوگیاں پکڑی گئیں۔انہوں نے بتایاکہ سٹی اسٹیشن اور متصل جگہ پر پانچ بوگیاں ملتان اور اپرپنجاب کے علاقے سے کراچی مال گاڑی میں آئیں۔ کارروائی کے دوران کچھ گرفتاریاں بھی ہوئی ہیں۔
انہوں نے بتایاکہ مشترکہ کاروائیوں میں مجموعی طور پر5 کروڑ64لاکھ روپے کی چھالیہ سگریٹ اورگٹکا برآمدکیاجس میں 4 کروڑ سے زائد کا گٹگا، 1 کروڑ سے زائد کی چھالیہ اور 27 لاکھ روپے سے زائد کی سگریٹ پکڑی گئی۔
افتخاراحمد نے بتایاکہ جہاں سے بوگیاں پکڑی گئیں وہاں بھی کسٹم و دیگر کو اطلاع دی گئی ہے گٹکا کس طرح سے اسمگل کیا گیا تحقیقات کررہے ہیں ،کارروائیوں میں ایک ملزم کو گرفتار کیا گیا ہے۔انہوں نے بتایاکہ اسمگلنگ ایک مرتبہ کا جرم نہیں بلکہ مسلسل جرم ہے۔
ان کاکہناتھاکہ اسمگلرز نئے نئے طریقے ایجاد کرتے رہتے ہیں ، ایک طریقے پر گرفت کی جاتی ہے تو دوسرا طریقہ سامنے آجاتا ہے۔ایڈشنل کلیکٹر کسٹم پریونٹو عامر تہیم نے بتایاکہ اسمگلرز خود سامنے رہ کر کام نہیں کرتے بلکہ ان کے فرنٹ مین کام کرتے ہیں تاکہ ان کے پکڑے جانے کی صورت میں اصل ملزمان واضح نہ ہوسکیں۔
