کراچی : وزیراعلیٰ ہاؤس میں نگران وزیراعلیٰ سندھ فضل الرحمن کی زیرِ صدارت دفاعی سازوسامان کی نمائش آئیڈیا 2018 کی اسٹیئرنگ کمیٹی کی اجلاس منعقد کیا گیا، اجلاس میں نمائش کے انعقاد سے متعلق بریفنگ دی گئی۔

تفصیلات کے مطابق پاکستان کی اہم ترین دفاعی نمائش آئیڈیاز 2018 جس کا انعقاد رواں سال نومبر کے مہینے میں ہوریا ہے، اس کی تیاریوں کے لیے سول اور عسکری حکام کی اعلیٰ سطحی میٹنگ منعقد ہوئی جس حکومت اور تینوں مسلح افواج کے سینئر افسران شریک ہوئے ۔

وزیراعلیٰ سندھ کے زیرِ صدارت ہونے والے اس اجلاس میں ڈی جی ڈیپو میجر جنرل محمود حیات، ڈی جی رینجرز، آئی جی سندھ، میئر کراچی، کمشنر کراچی، پرنسپل سیکریٹری، سندھ پولیس کے سینئر افسران، صوبائی سیکریٹریز، پاکستان آرمی، نیوی و ایئرفورس کے سینئر افسران شریک ہوئے۔

آئیڈیاز 2018 ، ڈیفنس ایکسپورٹ پروموشن آرگنائیزیشن (ڈیپو) کے زیرِ اہتمام 27 نومبر سے 30 نومبر تک کراچی ایکسپو سنٹر میں منعقد ہوگی۔،

اس موقع پر وزیراعلیٰ سندھ کا کہنا تھا کہ آئیڈیاز 2000 میں پہلی بار منعقد ہونے کے بعد سے اب تک یہ نمائش مینوفیکچرز، مالیاتی ماہرین اوراعلیٰ سطحی پالیسی سازوں کے لیے اہم ہوگئی ہے ، اس نمائش سے پاکستان کے اسٹریٹجک تعلقات کو مزید استحکام ملے گا۔

انہوں نے مزید کہا کہ ہر دو سال بعد منعقد ہونے والی اس نمائش کے انعقاد سے پاک فوج کے تینوں شعبہ جات کو اپنی عسکری قوت نمایاں کرنے کا موقع ملتا ہے ۔ اس سلسلے میں حکومتی اداروں، افواج پاکستان، امن و امان قائم کرنے والے اداروں، دفاعی مصنوعات کی صنعت، تجارتی انجمنوں اور کراچی کے عوام کی کوششیں لائق تحسین ہیں۔

وزیراعلیٰ سندھ کا کہنا تھا کہ یہ ہمارا ایونٹ ہے، سندھ حکومت میزبان ہے اور ہمیں اس کو ایک زبردست ایونٹ بنانا ہے۔سندھ حکومت کے ایم سی کی مدد سے آئیڈیاز 2018 کے انعقاد کے موقع پر شہر کو خوبصورت بنائے گی

دوسری جانب اجلاس کے بعد ڈ ائریکٹر جنرل ڈیپو ،میجر جنرل محمود حیات نے نمائش کے حوالے سے اجلاس کو بریفنگ دیتے ہوئے کہا کہ نمائش میں جدید ٹیکنالوجی کی مصنوعات پیش کی جائیں گی۔

ان کے ترجمان کے مطابق ڈی جی ڈیپو نے یہ بھی کہا کہ انٹرنیشنل ڈیفنس ایگزی بیشن کے ساتھ ساتھ سیمینار بھی منعقد کیے جائیں گے ۔ اس موقع پر ثقافتی پروگرامز بھی منعقد کیے جائیں گے اور حکومت اور نجی اداروں کے درمیان تجارتی معاہدے بھی تشکیل دیئے جائیں گے۔

ان کے ترجمان کے مطابق نگران وزیر اعلیٰ سندھ نے اپنی حکومت کے تمام اداروں کو اس کانفرنس کے انعقاد میں ہر ممکن تعاون کرنے کی ہدایت جاری کی ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں