Author: انجم وہاب

کراچی : آئل ٹینکرز مالکان اور کنٹریکٹز کی تنظیموں نے گورنر سندھ محمد زبیر سے ملاقات کے بعد ہڑتال کا فیصلہ واپس لے لیا ہے.

تفصیلات کے مطابق آل پاکستان آئل ٹینکرز ایسوسی ایشن کے میر محمد یوسف شاہوانی اور آئل ٹینکرز کنٹریکٹرز ایسوسی ایشن کے صدر بابر اسماعیل کی سربراہی میں ایک وفد نے گورنر ہاؤس میں گورنر سندھ سے ملاقات کی اور مسائل حل کرنے کی یقین دہانی پر ہڑتال کی کال واپس لے لی ہے.

وفد کے دیگر اراکین میں حاجی حنیف اچکزئی، میر شمس شاہوانی، حاجی داؤد کرد، حمید بھٹی، نظر محمد آفریدی، عبداللہ آفریدی، شعیب اشرف، انور سعادت، سید طیم آغا، ثنا اللہ آفریدی، محمد خان ترین، عبدالباقی مینگل اور حاجی اکرم شامل تھے.

اس موقع پر گورنر سندھ محمد زبیر کا کہنا تھا کہ آئل ٹینکرز کو درپیش مسائل جن میں سیلز ٹیکس، موٹر وے پولیس، اوگرا، پی ایس او اور دیگر اداروں سے متعلق معاملات اور شکایات کو حل کرانے کے لیے اپنا اثر ورسوخ استعمال کریں گے اور ترجیحی بنیادوں پر ان مسائل کا حل ڈھونڈا جائے گا۔

گورنر سندھ محمد زبیر نے آئل ٹینکرز اونرز اور کنٹریکٹرز کی جانب سے ہڑتال کی کال واپس لینے پر شکریہ ادا کیا اور صوبے میں صنعتوں کی ترقی اور معاشی پہیہ چلانے میں ان کے کردار کی تعریف کی علاوہ ازیں یہ وفد منگل کو وزیراعظم کے مشیر برائے اقتصادی امور مفتاح اسماعیل سے بھی ملاقات کرے گا۔

واضح رہے آئل ٹینکرز اونرز اور کنٹریکٹرز کی تنظیموں نے سندھ بھر میں ہڑتال کرنے کا اعلان  کر رکھا تھا جس کے باعث صوبے بھر میں بالعموم اور کراچی میں بالخصوص پٹرول کی قلت کا خدشہ پید اہو گیا تھا۔

اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔

کراچی : گورنر سندھ محمد زبیر نے کہا ہے کہ وفاقی حکومت کے اقدامات کے باعث سرمایہ کاری، نئی صنعتوں کے قیام اور تجارتی سرگرمیوں میں اضافہ ہوا ہے میں جس سے روزگار کے مواقع بھی پیدا ہورہے ہیں۔

ان خیالات کا اظہار انہوں نے ایف پی سی سی آئی کے صدر زبیر طفیل سے ملاقات کے دوران کہی گورنر سندھ نے معاشی سرگرمیوں میں وفاق ایوان ہائے صنعت و تجارت پاکستان کے فعال کردار کو سراہتے ہوئے کہا کہ حکومت ہر ادارہ کی فعالیت کے لئے ہر ممکن سہولیات اور تعاون فراہم کررہی ہے۔

گورنرسندھ محمد زبیر نے کہا ہے کہ جمہورت کے استحکام سے ہی معاشی خوشحالی یقینی ہے، جمہوریت میں اداروں کی فعالیت، استحکام، آزادانہ پالیسی اور سرمایہ کاری کے بھرپور مواقع حاصل ہو تے ہیں اور اداروں میں جمہوری نظام سے ادارے فعال کردار اور نئی لیڈر شپ سے جدید تقاضوں اور تیزترین ترقی کے وژن کو تقویت بھی حاصل ہوتی ہے۔

انہوں نے کہا کہ وفاق ایوان ہائے صنعت و تجارت پاکستان ملکی ترقی اور معاشی استحکام میں ریڑھ کی ہڈی کی مانند ہے اور ملک کی معاشی سرگرمیوں میں اضافے میں صنعت کاروں کا یہ ادارہ فعال کردار ادا کررہا ہے چنانچہ حکومت کی اولین ترجیح بھی یہی ہے کہ اس ادارہ کے مسائل کو جلد از جلد حل کرے.

گورنر سندھ نے کہا کہ کراچی پاکستان کی معاشی شہ رگ ہے چنانچہ وفاقی حکومت کراچی کے صنعتی علاقوں میں انفرااسٹرکچر کی بحالی و ترقی کے لیے کوشاں ہے یہی وجہ ہے کہ قیام امن کے بعد قائد کا شہرغیرملکی سرمایہ کاروں کے لئے پُرکشش شہر بن گیا ہے تاہم کراچی کی استعداد سے بھرپور فائدہ اٹھانے کے لئے غیر ملکی سرمایہ کار اگر سرمایہ کاری کریں تو وفاقی حکومت مزید تعاون بھی فراہم کرے گی۔

زبیر طفیل نے گورنر سندھ کو معاشی ترقی و خوشحالی کے لیے ایف پی سی سی آئی کے بھرپور تعاون کی یقین دہانی کراتے ہوئے کہا کہ صنعتی علاقوں میں انفرا اسٹرکچر کی بحالی سب سے اہم ہے اور یہ بات خوش آئند ہے کہ وفاقی حکومت اس جانب خصوصی توجہ دے رہی ہے جس سے نئی صنعتوں کا قیام عمل میں آئے گا اور روزگار کے مواقع بھی پید ا ہوں گے۔

اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔