Author: انور خان

کراچی : وزیر توانائی ناصر حسین شاہ کا کہنا ہے کہ کے الیکٹرک سمیت تمام تقسیم کار کمپنیوں سے بات چیت جاری ہے اور رمضان میں لوڈشیڈنگ نہ کرنے کا کہا ہے۔

تفصیلات کے مطابق کراچی کی آئی بی اے یونیورسٹی میں پاکستان اکیڈمک کنسورشیم کے زیر اہتمام اور آغا خان یونیورسٹی ایگزامینیشن بورڈ کے تعاون سے موسمیاتی تبدیلیوں پر "گرین مائنڈز، گرینر اسکولز” کے عنوان سے کانفرنس منعقد کی گئی۔

اس کانفرنس میں موسمیاتی تبدیلیوں کے بارے میں آگاہی فراہم کی گئی اور پائیدار ترقی کے اہداف کو حاصل کرنے کے لیے طلبہ اور اساتذہ کے درمیان تعاون کو فروغ دیا گیا۔

اس موقع پر وزیر توانائی ناصر حسین شاہ نے کہا کہ پوری دنیا میں موسمیاتی تبدیلی کے مسائل ہیں اور پاکستان اس حوالے سے سب سے زیادہ متاثر ہے۔

انہوں نے 2022 میں پاکستان میں موسمیاتی حالات کا ذکر کرتے ہوئے کہا کہ کبھی خشکی، کبھی پانی کی کمی، پاکستان کو مختلف مسائل کا سامنا ہے۔

انہوں نے کہا سندھ میں کے الیکٹرک، حیسکو اور سیپکو کے ساتھ مسلسل بات چیت کی جا رہی ہے اور رمضان میں لوڈشیڈنگ نہ کرنے کا کہا ہے تاکہ عوام کو کسی قسم کی پریشانی کا سامنا نہ ہو۔

وزیر توانائی کا کہنا تھا کہ کہا جاتا ہے جہاں بل ادا نہیں کیا جاتاوہاں پرلوڈشیڈنگ کرتے ہیں لیکن ہم نے کہا رمضان کاخیال کرتےہوئے اس پر زیادہ توجہ نہ دیں تاکہ عوام کومسئلہ نہ ہو۔

ناصر حسین شاہ نے کہا کہ آج ڈائریکٹ پرائیویٹ اسکولز کی جانب سے کانفرنس کا انعقاد ایک خوش آئند قدم ہے، کئی طلبہ نے موسمیاتی تبدیلی سے بچاوٴ کے لیے اچھے پروپوزل پیش کیے ہیں اور حکومت اس پر کام کر رہی ہے تاکہ بہتر حل نکالا جا سکے۔

صوبائی وزیر نے بتایا کہ حکومت پاکستان کو ملین ڈالرز کی سرمایہ کاری ملنے کے بعد اربن فورسٹ اور گرین انرجی کی جانب قدم بڑھا رہی ہے، بلاول بھٹو کے وڑن کے مطابق، ایجوکیشن اور ہیلتھ سیکٹر میں سولر سسٹم فراہم کرنے کی کوشش کی جا رہی ہے اور اس کے لیے سندھ حکومت نے فنڈز مختص کیے ہیں، سولر سسٹم کو مرحلہ وار اسکولوں اور کالجوں میں نصب کیا جائے گا۔

کراچی : پاکستان کے اسپتالوں اور لیبارٹریز کو درکار اہم طبی آلات کی قلت کا خدشہ پیدا ہوگیا ، جس سے صحت کے شعبے میں بڑا بحران جنم لے سکتا ہے۔

تفصیلات کے مطابق بانی رکن محمد عمر ہیلتھ کیئر ڈیوائسز ایسوسی ایشن آف پاکستان نے خبردار کیا ہے کہ ڈریپ کی جانب سے میڈیکل ڈیوائسز کی رجسٹریشن کی توسیع نہ ہونے سے امپورٹرز نئے آلات منگوانے سے قاصر ہیں۔

ہیلتھ کیئر ڈیوائسز ایسوسی ایسن کا کہنا تھا کہ فوری اقدامات نہ لیے گئے تو صحت کے شعبے میں بڑا بحران جنم لے سکتا ہے۔

بانی رکن محمد عمر نے بتایا کہ ملک میں 90 فیصد طبی آلات درآمد کیے جاتے ہیں، رجسٹریشن کے پیچیدہ عمل کے باعث میڈیکل ڈیوائسز قانونی منظوری سے محروم ہیں۔

انھوں نے خبردار کیا جان بچانے والے آلات کی قلت سے سرجریز اور اہم طبی پراسیجرز رُک سکتے ہیں، سرجریز اور اہم طبی پراسیجرز کے تعطل سے مریضوں کی زندگیاں خطرے میں پڑ جائیں گی۔

محمد عمر کا کہنا تھا کہ اسپتالوں میں سرنج سے لے کر بڑی ٹیسٹنگ مشینوں تک کی کمی واقع ہو رہی ہے، مطالبہ ہے کہ مسئلے کو ہنگامی بنیادوں پر حل کیا جائے، رجسٹریشن کے عمل کو آسان بنایا جائے اور فوری طور پر ٹائم لائن میں توسیع دی جائے۔

کراچی : شہر قائد میں معروف کمپنیوں کی جعلی دوائیں کھلے عام فروخت ہونے کا انکشاف ہوا، جس کے بعد شہریوں سے اپیل کی گئی ہے کہ رجسٹرڈ فارمیسی سے ہی دوائیں خریدیں۔

تفصیلات کے مطابق ملاوٹ والی خوراک جعل نوٹ اور کئی دیگر جعل سازیاں کرنے والے سماج دشمن عناصر اس حد تک گر گئے ہیں کہ اب انھوں نے بیماریوں میں مبتلا مریضوں کو بھی ہدف بنالیا ہے۔

رقم کی لالچ میں وہ انسانی زندگیوں سے کھیل رہے ہیں، کراچی میں معروف کمپنیوں کی جعلی دوائیں کھلے عام فروخت ہونے کا انکشاف ہوا ہے۔

ڈرگ انسپکٹرز نے مختلف مقامات پر چھاپوں کے دوران کئی دوائیں تحویل میں لی گئی ہیں، ضبط کی گئی دوائیں ڈرگ ٹیسٹنگ لیبارٹری میں تجزیے کے بعد جعلی قرار پائی ہیں۔

دوسری جانب فارماسوٹیکل کمپنیوں نے ان دواؤں سے لاتعلقی ظاہر کر دی ہے، سربراہ ڈرگ ٹیسٹنگ لیبارٹری نے بھی شہریوں کو جعلی دواوں سے خبردار کیا ہے اور اپیل کی ہے کہ شہری رجسٹرڈ فارمیسی سے ہی دوائیں خریدیں۔ مسلہ انتہائی اہم ہے فوری توجہ کی ضرورت ہے۔

اس حوالے سے چیئرمین پی پی ایم اے توقیر الحق نے اے آر وائی نیوز کے پروگرام باخبر سویرا میں گفتگو کرتے ہوئے کہا کہ جعلی دوائیوں کیخلاف کارروائیوں میں حکومت کے ساتھ ہیں۔

چیئرمین پی پی ایم اے کا کہنا تھا کہ چیئرمین فارماسیوٹیکل مینوفیکچرایسوسی ایشن نےمعاملےپر2میٹنگزکیں، جعلی دوائیوں کے مینوفیکچررزکاپتہ بھی جعلی ہے۔

ان کا کہنا تھا کہ رجسٹرڈ مینوفیکچررز کے برانڈز کو بھی جعلی بنا دیا گیا ہے، کمپنیاں دورے کریں کہ کہیں مارکیٹ میں ان کے نام کا جعلی برانڈ تو نہیں۔

توقیر الحق نے کہا کہ جعلی ادویات پر بارکوڈ نہیں ہوتے، اصل دوا پر بارکوڈ ہوتا ہے جسے اسکین کریں توسب سامنے آجاتا ہے، حکومت کومکمل کارروائی کرنی چاہیےتاکہ ذمہ داروں کوسامنےلایاجائے، ڈریپ کی ویب سائٹ پرجعلی دوائیوں کی رپورٹ کرنی چاہیے۔