کراچی: پیپلزپارٹی کی سینٹرل ایگزیکٹو کمیٹی (سی ای سی) کے اجلاس میں یوسف رضا گیلانی نے مستعفی ہونے کی پیشکش کردی۔

اے آر وائی نیوز کی رپورٹ کے مطابق چیئرمین پیپلزپارٹی بلاول بھٹو کی زیر صدارت پیپلزپارٹی کی سینٹرل ایگزیکٹو کمیٹی (سی ای سی) کا اجلاس جاری ہے جس میں یوسف رضا گیلانی نے اپوزیشن لیڈر سینیٹ سے مستعفی ہونے کی پیشکش کی۔

ذرائع کے مطابق پیپلزپارٹی سی ای سی نے گیلانی کی مستعفی ہونے کی پیشکش مسترد کردی۔

ذرائع کا کہنا ہے کہ یوسف رضا گیلانی نے اپوزیشن لیڈر سینیٹ سے مستعفی ہونے کی پیشکش کی تھی، ان کا کہنا تھا کہ پارٹی سمجھتی ہے تو میں ابھی مستعفی ہونے کو تیار ہوں۔

یوسف رضا گیلانی کا کہنا تھا کہ پارٹی پر ایسے الزامات نہیں لگائے جاسکتے جن میں حقیقت نہ ہو۔

مزید پڑھیں: بلاول بھٹو نے شاہد خاقان کا شوکاز نوٹس پھاڑ کر پھینک دیا

سی ای سی کے شرکا نے کہا کہ آپ نے اصولوں پر وزیراعظم کی کرسی کو ٹھوکر ماری، مستعفی نہ ہوں، پوری پارٹی آپ کے ساتھ کھڑی ہے۔

قبل ازیں بلاول بھٹو نے شرکا کو شاہد خاقان عباسی کا شوکاز نوٹس پڑھ کر سنایا اور پھر اسے پھاڑ کر پھینک دیا تھا۔

ذرائع کا کہنا تھا کہ شوکاز نوٹس پھاڑے جانے پر سی ای سی کے شرکا کی جانب سے تالیاں بجائی گئیں، بلاول بھٹو کا کہنا تھا کہ ہم سیاست عزت کے لیے کرتے ہیں، عزت سے بڑھ کر کوئی چیز نہیں ہے۔

کراچی: پاکستان پیپلزپارٹی نے پی ڈی ایم کے پلیٹ فارم سے ہونے والی تنقید کے بعد مسلم لیگ ن کی حمایت نہ کرنے کا فیصلہ کرلیا۔

اے آر وائی نیوز کی رپورٹ کے مطابق کراچی کے حلقہ این اے 249 میں قومی اسمبلی کی نشست پر ہونے والے ضمنی انتخابات میں پاکستان پیپلزپارٹی نے مسلم لیگ ن کی حمایت نہ کرنے کا فیصلہ کرلیا۔

ذرائع کے مطابق پاکستان پیپلزپارٹی کے شریک چیئرمین آصف علی زرداری نے این اے 249 کے حوالے سے مشاورتی اجلاس طلب کیا ہے، جس میں صوبائی وزرا اور اراکین اسمبلی شرکت کریں گے۔

ذرائع کے مطابق پیپلزپارٹی کے امیدوار برائےحلقہ این اے 249 قادر مندو خیل بھی اجلاس میں شرکت کریں گے۔

مزید پڑھیں: کراچی ضمنی انتخاب، کونسے امیدوار دستبردار؟

پی پی پی کے ذرائع نے بتایا کہ ’پاکستان ڈیموکریٹک موومنٹ (پی ڈی ایم) کے پلیٹ فارم سے ہونے والی تنقید، شو کاز نوٹس اور پاکستان پیپلزپارٹی پر عائد ہونے والے الزامات کی وجہ سے قیادت نے امیدوار کو دستبردار نہ کرنے کا فیصلہ کیا‘۔

ذرائع کا یہ بھی کہنا ہے کہ ’پاکستان پیپلزپارٹی نے اپنے رہنماؤں اور مقامی عہدیداران کو تنقید کا جواب دینے کی اور انتخابی مقابلے میں‌ بھرپور طریقے سے مقابلہ کرنے کی اجازت بھی دی ہے‘۔

واضح رہے کہ مسلم لیگ ن کی جانب سے حلقہ این اے 249 کے لیے مفتاح اسماعیل کو ٹکٹ جاری کیا گیا ہے، عوامی نیشنل پارٹی اور جمعیت علما اسلام ف کے امیدوار لیگی امیدوار کے حق میں دستبردار ہوچکے ہیں۔

لاڑکانہ: جمیعت علما اسلام  پاکستان (جے یو آئی) نے لاڑکانہ میں پاکستان پیپلزپارٹی کے خلاف نیا عوامی اتحاد تشکیل دے دیا۔

اے آر وائی نیوز کی رپورٹ کے مطابق جےیوآئی نےلاڑکانہ میں پیپلزپارٹی مخالف اتحادبنالیا، اس حوالے سے جے یو آئی نے پاکستان تحریک انصاف، گرینڈ ڈیموکریٹک الائنس کے مقامی رہنماؤں سے ملاقاتیں کیں اور ضلع میں مل کر کام کرنے پر اتفاق کیا۔

ذرائع کے مطابق جےیوآئی نے لاڑکانہ میں پی پی کےخلاف بنائے جانے والے عوامی اتحاد میں پی ٹی آئی اورجی ڈی اے کے علاوہ قوم پرست تنظیموں کو بھی ساتھ چلنے کی دعوت دی۔

جےیوآئی لاڑکانہ کی قیادت عوامی اتحاد میں شامل جماعتوں  کے ساتھ مل کر جلد پاکستان پیپلزپارٹی کے خلاف مہم شروع کرے گی۔

لاڑکانہ عوامی اتحاد میں پی ٹی آئی کے اہم رہنما اللہ بخش انڑ اور رہنما امیربخش بھٹو جبکہ جی ڈی اے کے رہنما صفدر عباسی اور معظم عباسی شامل ہیں۔

اس حوالے سے آج لاڑکانہ عوامی اتحادکا اجلاس بھی ہوا جس میں پیپلزپارٹی مخالف اتحاد کا دائرہ کار ڈویژن کی سطح  پر  پھیلانے پر اتفاق کیا گیا۔

واضح رہے کہ جے یو آئی کے پاس حکومت مخالف اپوزیشن اتحاد پی ڈی ایم کی صدارت ہے، مولانا فضل الرحمان اس اتحاد کے سربراہ ہیں۔

پی ڈی ایم میں مسلم لیگ ن، پاکستان پیپلزپارٹی سمیت دیگر جماعتیں شامل ہیں۔

کراچی: پاکستان پیپلزپارٹی کے شریک چیئرمین اور سابق صدر آصف علی زرداری نے پاکستان ڈیموکریٹک موومنٹ (پی ڈی ایم) میں جاری اختلافات کو ختم کرنے کا اشارہ دے دیا۔

اے آر وائی نیوز کی رپورٹ کے مطابق پی ڈی ایم میں شامل جماعتوں مسلم لیگ ن اور پیپلزپارٹی کے اختلافات کو ختم کروانے کے لیے بلوچستان نیشنل پارٹی (بی این پی) نے کوششیں تیز کردی ہیں۔

بی این پی کے وفد نے بلاول ہاؤس کراچی میں پاکستان پیپلزپارٹی کی قیادت سے ملاقات کی جس میں پی ڈی ایم میں جاری اختلافات کو ختم کرنے پر غور کیا گیا۔

ملاقات میں آصف علی زرداری نے اختلافات ختم کرنے کے لیے بی این پی کے ذریعے مسلم لیگ ن کو مصالحتی پیغام دیا، جسے بلوچستان نیشنل پارٹی کی قیادت کل ن لیگی قیادت تک پہنچائے گی۔

مزید پڑھیں: ‘پی ڈی ایم کو نقصان پہنچانے والے کو قوم معاف نہیں کرے گی’

بی این پی کی جانب سے شروع کی جانے والی کوششوں  سے بریک تھرو کا امکان بھی ہے کیونکہ یہ وفد کل مسلم لیگ ن کی قیادت سے ملاقات کر کے آصف علی زرداری کا مصالحتی پیغام پہنچائے گا۔

بی این پی وفد کا کہنا تھا کہ ’ اختر مینگل کی ہدایت پر مشن پر نکلے ہیں تاکہ پی ڈی ایم میں شامل جماعتوں کے اختلافات ختم ہوں، مریم نواز کے ساتھ اظہار یکجہتی کرنے کے لیے نیب پیشی پر جانے کے لیے تیار ہیں‘۔

سینیٹر جمالدینی کا کہنا تھا کہ ’آصف علی زرداری نے پیغام میں مثبت پیغام دیا، اس پیغام کو ن لیگی قیادت تک پہنچا کر رنجشیں ختم کرنے کی کوشش کریں گے‘۔

اُن کا کہنا تھا کہ ’ہماری کوشش ہے کہ پی ڈی ایم قائدین مشترکہ مؤقف اپنائیں تاکہ اتحاد کو نقصان نہ پہنچے‘۔

واضح رہے کہ لانگ مارچ سے قبل اسمبلیوں سے مستعفیٰ ہونے کے معاملے پر پی پی نے دو ٹوک جواب دیا جس کے بعد مسلم لیگ ن اور پیپلزپارٹی میں لفظی جنگ شروع ہوگئی ہے۔

یہ بھی پڑھیں: پی ڈی ایم سے راہیں جدا؟ پیپلز پارٹی نے جماعت اسلامی سے تعلقات استوار کر لیے

قبل ازیں پی ڈی ایم کے سربراہ مولانا فضل الرحمان نے آصف علی زرداری اور نوازشریف سے علیحدہ علیحدہ ٹیلی فونک رابطہ کیا جس میں معاملات کو افہام و تفہیم سے حل کرنے اور بیان بازی سے گریز کرنے پر اتفاق کیا گیا۔