Author: عارف حسین

یہ کہانی آپ کو جموں و کشمیر کے ایک دور دراز گاؤں تک لے جائے گی۔

اس کی مصنف مادھوری وجے ہیں‌اور یہ انگریزی زبان میں‌ تحریر کردہ کہانی ہے۔ نوجوان ناول نگار کو ان کی تخلیق پر ادب کی دنیا کا نقد انعام 25 لاکھ روپے بھی دیا گیا ہے۔

یہ ناول مقبوضہ کشمیر کی موجودہ صورتِ حال میں ایک بار پھر زیرِ بحث آرہا ہے۔

مادھوری وجے کا یہ ناول "دی فار فیلڈ” کے نام سے شایع ہوا تھا۔

اس کہانی کا اسلوب اور انداز ایسا ہے کہ قاری ہندوستانی فوج کے کشمیریوں پر مظالم اور بربریت کو گویا خود دیکھ سکتا ہے۔ آئیے اس ناول کے مرکزی کردار شالنی سے ملتے ہیں۔
شالنی زندگی کی تیس بہاریں دیکھ چکی ہے۔ اس کی پیدائش بنگلور کی ہے، لیکن اب وہ کشمیر جارہی ہے۔

بنگلور میں اس کی ماں نے ہمیشہ کے لیے اسے الوداع کہہ دیا۔ اس کی موت کے وقت شالنی چوبیس برس کی تھی۔

والدہ کی موت کا غم بھلانے کی کوشش کرتے ہوئے شالنی بنگلور ہی میں ملازمت کر لیتی ہے، لیکن ایک موقع پر برطرفی کے بعد وہ جموں و کشمیر کے ایک چھوٹے سے گاؤں جانے کا فیصلہ کرتی ہے۔ اس فیصلے کی وجہ بشیر احمد ہے جسے اس نے بچپن میں دیکھا تھا۔

وہ ایک ٹیکسٹائل سیلز مین اور وجیہہ صورت مرد تھا۔ اب وہ اسے تلاش کرنا چاہتی ہے۔ شالنی کسی طرح مقبوضہ کشمیر پہنچ جاتی ہے۔ کہانی کے مطابق مقبوضہ کشمیر میں رہائش کے دوران شالنی ہندوستانی فوج کے سپاہیوں سے خوف محسوس کرتی۔ وہ کشمیری عوام کے مسائل اور ان پر ظلم و ستم دیکھتی تو تڑپ اٹھتی تھی اور پھر اس نے ان کی کہانیاں بیان کرنا شروع کر دیں۔

ناول کا یہ مرکزی کردار آسان اور سادہ زبان میں ایک ایسے خطے کے بارے میں قارئین کو بتاتا ہے جہاں ریاستی تشدد اور ظلم و ستم کی مختلف صورتیں عام ہیں اور زندگی سسک رہی ہے۔

بھارت میں موجودہ حکومت کے متنازع شہریت بل اور مقبوضہ کشمیر کے خودمختار اور انتظامی امور سے متعلق بدترین فیصلوں کے بعد مادھوری وجے کے اس ناول کو بہت اہمیت دی جارہی ہے۔

دولت اور جائیداد تو اصل میں اسٹیو وین نے اپنے جوئے خانوں کی کمائی سے بنائی ہے، مگر امریکا میں اسے ریئل اسٹیٹ دنیا کا بادشاہ مانا جاتا ہے۔ یہی نہیں بلکہ وہ فائن آرٹ کا دلداہ اور فن و ثقافت کا بڑا قدر دان بھی ہے۔

اس کے رئیل اسٹیٹ کے کاروبار اور آرٹ میں دل چسپی کی اصل وجہ سبھی جانتے ہیں، یعنی غیرقانونی اور ناجائز طریقے سے اکٹھی کی گئی دولت اور خود کو قانون کی گرفت سے بچانے کے لیے اس نے یہ سب کر رکھا ہے۔

اسٹیو وین دنیا بھر کے نام وَر آرٹسٹوں کے فن پارے خریدنے کے لیے بھی مشہور ہے۔ وہ کوئی بھی تخلیق منہ مانگے داموں خرید کر اپنی آرٹ گیلری میں منتقل کر لیتا ہے۔

چند سال پہلے تک شہرہ آفاق مصور پابلو پکاسو کی مشہورِ زمانہ پینٹنگ لیغیو بھی اس کی آرٹ گیلری کی زینت تھی۔

یہ 2006 کی بات ہے جب اسٹیو وین کے ایک کاروباری شناسا نے اس شاہ کار کو خریدنے کی خواہش ظاہر کی۔ اسٹیو وین نے ہامی بھر لی۔

سودا طے ہوا اور ایک شام اپنے چند دوستوں کے ساتھ وہ خواہش مند اسٹیو وین کی آرٹ گیلری میں اسی پینٹنگ کے قریب کھڑا تھا۔ ان کا موضوعِ بحث پابلو پکاسو، اس کا فن اور وہی پینٹنگ تھی جو چند گھنٹوں بعد اسٹیو وین کی ملکیت نہ رہتی، مگر ایک حادثے نے ان کے ارادوں اور خواہشات پر پانی پھیر دیا۔

دورانِ گفتگو پینٹنگ کے نزدیک موجود اسٹیو وِن اچانک پیچھے ہٹا اور اپنی کہنی کو کچھ اس زور سے حرکت دی کہ وہ اس تصویر میں گویا گڑ گئی اور اس میں سوراخ ہوگیا۔

پینٹنگ کا سودا اُسی وقت منسوخ ہوگیا۔ میڈیا نے اسٹیو وین کو چار کروڑ ڈالر کی کہنی والا کہہ کر اس واقعے کی تفصیلات ناظرین تک پہنچائیں۔ امریکا بھر میں اس امیر ترین شخص اور آرٹ کے قدر دان کا مذاق اڑایا گیا۔

ماہرین نے اسٹیو وین کی خواہش پر اس فن پارے کو اصل حالت میں‌ لا کر دوبارہ گیلری میں سجا دیا۔

دل چسپ بات یہ ہے کہ چند سال بعد یعنی 2013 میں اسٹیو وین نے اُسی کاروباری دوست کے ہاتھوں‌ وہی فن پارہ پچھلے سودے کی نسبت کئی گنا زیادہ پر فروخت کردیا۔

(تلخیص و ترجمہ: عارف حسین)

آئیے سوئٹزرلینڈ کی ایک قدیم اور پُرشکوہ عمارت کی سیر کو چلتے ہیں۔

اس عمارت میں‌ ایک کتب خانہ ہے جو ایبے لائبریری کے نام سے مشہور ہے۔ عمارت کا منفرد طرزِ تعمیر، خوب صورتی اور سجاوٹ دیکھ کر آپ دم بخود رہ جائیں گے۔ یہی نہیں بلکہ اندر جاکر آپ خوف زدہ بھی ہوسکتے ہیں۔ اگر داخل ہونے سے پہلے آپ یہ جان لیں‌ کہ اس عظیم الشان عمارت میں چند حنوط شدہ جسم بھی رکھے ہوئے ہیں تو فیصلہ کرسکتے ہیں‌ کہ اندر داخل ہونا ہے یا نہیں، مگر ہمیں یقین ہے کہ تجسس خوف پر غالب آجائے گا اور آپ سوئٹزر لینڈ کے علاقے سینٹ گالیں‌ کی اس لائبریری کے اندر  ضرور جائیں گے۔

یہ کتب خانہ قدیم رسائل، نوادر اور حیرت انگیز موضوعات پر کتابوں سے بھرا ہوا ہے۔ یہاں کئی مخطوطات اور قدیم نقشے بھی محفوظ ہیں۔ صدیوں پہلے یہاں ایک معبد قائم کیا گیا تھا اور بعد کے ادوار میں یہاں کتب خانہ بنا دیا گیا۔ آج اس دو منزلہ کتب خانے کی شہرت دنیا بھر میں ہے۔

یہ کتب خانہ ایک بڑے ہال پر مشتمل ہے جس میں ہر طرف لکڑی کی الماریوں میں کتابیں محفوظ ہیں۔ یہاں کے در و دیوار سے اس عمارت کی شان و شوکت اور اس کا حسن جھلکتا ہے۔ یہاں لکڑی کا کام نہایت نفیس اور باریکی سے کیا گیا ہے۔ الماریوں کے علاوہ زینے اور چھت کو جس مہارت سے منقش اور مزین کیا گیا ہے اس کی نظیر کم ہی ملتی ہے۔

یہ عمارت فنِ تعمیر کا ایک شاہ کار بھی مانی جاتی ہے جس میں ہوا اور روشنی کی آمدورفت کا خاص اہتمام کیا گیا ہے جب کہ اس کے ہال کی بناوٹ بھی ایک خاص پیمائش اور ڈھب سے کی گئی ہے۔ 1983 میں اسے عالمی ورثہ قرار دیا گیا تھا۔

اب چلتے ہیں لائبریری میں موجود حنوط شدہ لاشوں کی طرف۔ کہتے ہیں کہ یہ لگ بھگ تیرہ سو برس پہلے حنوط کیے گئے جسم ہیں جو مرکزی ہال میں کتابوں کی الماریوں کے درمیان رکھے ہوئے ہیں۔

غالب کے رفقا میں سے ایک حاتم علی بیگ بھی تھے۔

پیشہ ان کا وکالت تھا۔ برطانوی دور میں‌ ہائی کورٹ سے وابستہ رہے۔ اپنی پیشہ ورانہ مصروفیات کے ساتھ علمی اور ادبی سرگرمیاں‌ بھی جاری رکھیں‌۔ نہایت باذوق اور شاعر بھی تھے، مگر ان کا بہت کم کلام سامنے آیا ہے۔

حاتم علی بیگ کا تخلص مہر تھا۔ ان کی ایک غزل آپ کے حسنِ ذوق کی نذر ہے۔

ذکرِ جاناں کر جو تجھ سے ہو سکے
واعظ، احساں کر جو تجھ سے ہو سکے

رازِ دل ظاہر نہ ہو اے دودِ آہ
داغ پنہاں کر جو تجھ سے ہو سکے

اے مسیحا مجھ کو ہے آزارِ عشق
میرا درماں کر جو تجھ سے ہو سکے

چپ ہے کیوں او بُت خدا کے واسطے
کچھ تو ہوں ہاں کر جو تجھ سے ہو سکے

دل تو اس پر آج صدقے ہو گیا
تُو بھی اے جاں کر جو تجھ سے ہو سکے

وہ پری میری مسخر، ہو یہ کام
اے سلیماں کر جو تجھ سے ہو سکے!