Author: عارف حسین

آنکھیں ہمارے وجود کا انمول حصّہ اور بینائی عظیم نعمت ہے۔

انسانی جسم کا یہ نازک اور نہایت حساس عضو کسی حادثے کے نتیجے میں‌، ہماری غفلت یا بڑھتی ہوئی عمر کے ساتھ کم زور اور مختلف بیماریوں کا شکار ہوسکتا ہے. ضعفِ بصر کے علاوہ بعض صورتوں‌ میں‌ ہم بینائی سے بھی محروم ہوسکتے ہیں۔ اسی لیے آنکھوں سے متعلق کسی بھی قسم کی پیچیدگی کو نظرانداز نہیں کیا جانا چاہیے۔ آنکھوں کے بعض امراض فوری طبی معائنہ اور علاج چاہتے ہیں جب کہ معمولی اور عام شکایت کی صورت میں بھی آنکھوں کا باقاعدہ طبی معائنہ کروانا ہی بہتر ہوتا ہے، کیوں کہ ذرا سی غفلت سے تاریکی ہمارا مقدر بن سکتی ہے۔

آنکھ کے امراض کا سبب متعدد قسم کی جسمانی کم زوریاں اور وہ کمی ہو سکتی ہیں جس سے آنکھوں کی طاقت اور بینائی متاثر ہوتی ہے جس میں ناقص غذا اور جسم کا ضروری غذائی اجزا سے محروم ہونا شامل ہے۔ اس کے علاوہ حادثات کی وجہ سے نقصان جیسے سر یا آنکھ پر ضرب یا شدید چوٹ لگنے سے بھی بلواسطہ یا براہِ راست اس عضو کو نقصان پہنچے اور یہ بینائی کو متاثر کرے۔ ہماری کھوپڑی یا سَر کی پشت اور دماغ پر ضرب بھی آنکھوں کو نقصان پہنچاسکتی ہے۔ فضائی آلودگی سے بھی آنکھیں متاثر ہوتی ہیں۔

آنکھوں کے مختلف مسائل کی ایک دوسری وجہ عمر کا بڑھنا ہے جس کے سبب پیدا ہونے والی شکایات سے مکمل طور پر نجات حاصل کرنا ممکن نہیں ہوتا۔ ان میں بہت زیادہ روشنی اور آنکھوں کے آگے اکثر کالے دھبے ابھر آنے کی شکایت عام ہے۔ یہ مسئلہ عموماً پچاس سال کی عمر کے افراد کو لاحق ہوتا ہے۔ تاہم ایسے دس میں سے نو افراد مزید کسی پیچیدگی کا شکار نہیں ہوتے۔ تاہم کئی ایسے امراض اور پیچیدگیاں بھی ہیں جو پاکستان میں امراضِ چشم میں اضافے کا سبب ہیں۔

ان میں آلودگی کی وجہ سے آنکھ کی سوزش اور اس پر توجہ نہ دینے کی صورت میں رفتہ رفتہ بینائی سے محرومی، آنکھوں میں درد رہنا، مسلسل خارش، ذیابیطس کی وجہ سے آنکھ کے پردے کو ہونے والا نقصان اور بینائی کا متاثر ہونا، سفید اور کالا موتیا جیسے امراض جو اندھے پن کی بڑی وجہ ہیں۔

ماہرینِ امراضِ چشم کے مطابق روانہ آنکھوں کو صاف پانی سے دھونا چاہیے۔ موجودہ دور میں جہاں برقی آلات اور اسکرینوں کا استعمال بڑھ گیا ہے، وہیں بعض لوگوں کا تیز روشنی، شعلوں یا ایسے گرد و غبار میں خاصا وقت گزرتا ہے جس میں دھاتی اور ریتیلے ذرات شامل ہوں۔ ایسے افراد آنکھوں کے مختلف مسائل، طبی پیچیدگیوں اور امراض کا جلد شکار ہو جاتے ہیں۔

ویلڈر، مختلف بھٹیوں پر کام کرنے والے، دھاتی صنعت سے وابستہ افراد یا کھلے میدانوں میں دھوپ اور گرد و غبار میں رہنے والے جن کی آنکھیں عام لوگوں کے مقابلے میں زیادہ متاثر ہوتی ہیں۔ انھیں باقاعدگی سے اپنی آنکھوں کا معائنہ کروانا چاہیے جب کہ کسی بھی قسم کی چبھن، جلن، آنکھوں سے پانی بہنے کی شکایت اور کم نظر آنے، دھندلا دکھائی دینے یا بصارت کے عمل کے دوران ارد گرد مختلف دھبے یا دائرے نظر آنے پر طبی معائنہ کروانا چاہیے۔

اسی طرح اپنی غذا اور خوراک میں توازن پیدا کرنے کی ضرورت ہے جس سے آنکھ کے خلیات کو تقویت اور اس کی ضرورت کے مطابق طاقت بخشتا ہے۔ ماہرین کے مطابق اسکرین، کتاب سے مخصوص فاصلہ رکھنا، مناسب و ضروری روشنی میں لکھنا، پڑھنا اور آنکھوں کی صفائی کے ساتھ ان کو آرام دینے سے عام شکایات سے بچا جاسکتا ہے۔

پاکستان میں ٹائیفائیڈ سے بچاؤ کی نئی ویکسین متعارف کروائی گئی ہے۔ ملک میں 30 نومبر تک انسدادِ ٹائیفائیڈ مہم جاری رہے گی جس میں 9 ماہ سے 15 سال تک کے بچوں کو اس بیماری سے بچاؤ کی ویکسین دی جائے گی۔

اس ویکسین کی تیاری، اس کی طبی جانچ کے طریقے اور انسانی جسم پر ویکسین کے اثرات کیا ہوسکتے ہیں یہ جاننا ضروری ہے۔

ویکسین کیا ہوتی ہے؟
ویکسین ایک طبی مصنوع ہے جو کسی بیماری سے انسانی جسم کی حفاظت کے لیے تیار کی جاتی ہے اور اس کی مخصوص مقدار جسم میں داخل کی جاتی ہے۔ کسی بھی دوا کی طرح اس کے جسم پر ضمنی اثرات مرتب ہو سکتے ہیں۔

چوں کہ یہ انتہائی محفوظ، معیاری اور طبی جانچ کے کڑے مراحل سے گزری ہوتی ہے اس لیے ویکسینیشن کے ضمنی اثرات بہت معمولی ہوتے ہیں۔ اس میں درد، سوجن یا جلد پر سرخی ظاہر ہوسکتی ہے۔ اس کے علاوہ بعض ویکسین بخار اور خارش کا سبب بھی بنتی ہیں۔

طبی ماہرین کب ویکسین کی تیاری کی طرف متوجہ ہوئے؟
مختلف وائرس اور خاص قسم کی بیماریوں سے حفاظت کے لیے 19 ویں صدی کے آخر میں ماہرین نے ویکسین کا تجربہ کیا۔ یہ امراض چیچک، ریبیز، ہیضہ اور ٹائیفائیڈ تھے جن پر طبی تحقیق اور ماہرین نے تجربات کے بعد ویکسین تیار کی۔ تاہم ان کی تیاری کے لیے زیادہ محفوظ اور معیاری طریقہ موجود نہ تھا۔ اس لیے دوا کی اس شکل کے ضمنی اثرات بھی سامنے آئے اور خطرناک ثابت ہوئے۔ تاہم جدید دور میں طبی سائنس نے اس بات کو یقینی بنایا ہے کہ ویکسین انتہائی محفوظ ہوں اور ان کا استعمال بھی زیادہ محفوظ اور مؤثر ہو۔

عالمی ادارۂ صحت (ڈبلیو ایچ او) کے تحت بین الاقوامی سطح پر اس قسم کی حیاتیاتی مصنوعات کی نگرانی اور اس حوالے سے سفارشات کی جاتی ہیں۔

ویکسین کی جانچ کا سادہ طریقہ کیا ہوتا ہے؟
ویکسین کی جانچ عام طور پر ایک معیاری اور باقاعدہ طریقے سے کی جاتی ہے۔ اس کے لیے لیبارٹری آلات اور جانوروں کا سہارا لیا جاتا ہے۔ ماہرین کے مطابق یہ تحقیق اور جانچ سال سے زائد عرصہ تک بھی جاری رہ سکتی ہے۔