Author: اصغر عمر

کراچی : کنور خالد یونس نے ایم کیو ایم لندن سے لاتعلقی کا اظہار کردیا، ایم کیو ایم لندن نے مارچ میں کنور خالد یونس کو ڈپٹی کنوینر مقرر کرنے کا اعلان کیا تھا۔

تفصیلات کے مطابق سندھ ہائیکورٹ میں سابق رکن قومی اسمبلی کنور خالد کی نظر بندی کے خلاف درخواست پر سماعت ہوئی۔

نور خالد یونس نے ایم کیو ایم لندن سے لاتعلقی کا اظہار کردیا، شوکت حیات ایڈووکیٹ نے عدالت میں بتایا کہ درخواست گزار نے پولیس اور رینجر حکام کے روبرو پیش ہوکر بتایا کہ سیاسی سرگرمیوں سے کوئی تعلق نہیں۔

درخواست گزار نے کہا کہ متحدہ قومی موومنٹ لندن سمیت کسی سیاسی جماعت کی سرگرمی میں ملوث نہیں۔

کنور خالد یونس کا عدالت میں کہنا تھا کہ عمر78سال ہوچکی ہے،متعدد امراض کا شکار ہوں۔

وکیل شوکت حیات ایڈووکیٹ نے استدعا کی کہ نظر بندی کا حکم غیر قانونی قرار دیا جائے ، درخواست میں آئی جی سندھ،ہوم سیکرٹری اور ایس ایس پی جنوبی کو فریق بنایا گیا ہے۔

سرکاری وکیل نے عدالت میں کہا کہ ایم پی او کے تحت نظر بندی کے نوٹیفکیشن کی مدت ختم ہوچکی، نوٹیفیکشن کی مدت ختم ہونے کے بعد درخواست کی سماعت کا جواز نہیں رہا، جس پر عدالت نے غیر موثر ہونے پر درخواست نمٹا دی۔

یاد رہے ایم کیو ایم لندن نے مارچ میں ڈپٹی کنوینر مقرر کرنے کا اعلان کیا تھا،حکومت سندھ نے اپریل میں نظر بندی کا نوٹیفیکشن جاری کردیا تھا۔

کراچی : حکومت سندھ نے ایک بار پھر الیکشن کمیشن سے کراچی میں بلدیاتی انتخابات 3 ماہ کے لیے ملتوی کرنے کی درخواست کردی۔

تفصیلات کے مطابق حکومت سندھ نے بلدیاتی انتخابات کے التوا کے لیے الیکشن کمیشن کو ایک اور خط لکھ دیا۔

خط میں کہا گیا ہے کہ درخواست ہے کراچی میں بلدیاتی انتخابات 3 ماہ کے لیے ملتوی کردیےجائیں،چاہتے ہیں انتخابات امن و امان کی صورت حال کے بغیرشفاف طریقے سے کرائے جاسکیں۔

سندھ حکومت کا کہنا ہے کہ کراچی پاکستان کاسب سے زیادہ آبادی والا ڈویژن ہے اور شہر کی آبادی تقریباً صوبہ بلوچستان کے برابر ہے۔

مراسلے میں کہا ہے کہ کراچی میں انتخابات کےدوران وسیع انتظامات کی ضرورت ہے، لوکل گورنمنٹ الیکشن کے لیے تقریباً 5 ہزارپولنگ اسٹیشنزقائم کیےجائیں گے، تقریباً 1305 کو انتہائی حساس اور 3688 پولنگ اسٹیشن کو حساس قرار دیا گیا ہے۔

خط میں کہنا تھا کہ بلدیاتی انتخابات کے لیے 39،293 پولیس اہلکاروں کی ضرورت ہوگی، مجموعی طور پر22،507 پولیس اہلکارموجودہیں ،16،786اہلکاروں کی کمی ہے۔

ٓسندھ حکومت کی جانب سے مراسلے میں کہا گیا کہ کراچی پولیس کوسیلاب سے متاثرہ اضلاع میں اضافی مدد فراہم کرنی پڑی،آئی ڈی پیز کی بڑی تعداد کراچی کے مختلف اضلاع میں منتقل ہوگئی ہے ، ان کی حفاظت کو یقینی بنانے کے لیے پولیس کی تعیناتی بھی ضروری ہے۔

کراچی : نیب صوبائی وزیر شرجیل میمن کے خلاف انکوائریوں کی مکمل رپورٹ پیش نہیں کرسکا، عدالت نے نیب کو مکمل رپورٹ پیش کرنے کی ہدایت کردی۔

تفصیلات کے مطابق سندھ ہائیکورٹ میں نیب شرجیل میمن کے خلاف انکوائریوں کی مکمل رپورٹ پیش نہیں کرسکا۔

نیب نے عدالت کو بتایا کہ سکھر میں شرجیل میمن کے خلاف کوئی کیس یا انکوائری نہیں ہے جبکہ کراچی اور راولپنڈی سے رپورٹس آئی ہیں تاہم اسلام آباد سے رپورٹ موصول نہیں ہوئی۔

جس پر شرجیل انعام میمن کے وکیل نے کہا کہ اتنا عرصہ گزر جانے کے بعد بھی نیب نے رپورٹ پیش نہیں کی،میرے موکل کو ہراساں کیا جارہا ہے۔

جسٹس جنید غفار کاکہنا تٓھا کہ اب تو قانون تبدیل ہوچکا ہے اب خوف یا دباوٴ کا کیا معاملہ ہے، کوئی انکوائری اور انویسٹیگیشن ہوگی تو نوٹس آجائے گا۔

عدالت نے کہا کہ پہلے کی طرح گرفتاری کا اندیشہ تو نہیں ہے، جس پر وکیل نے بتایا کہ اب بھی چیئرمین کو اختیار حاصل ہے کہ اگر وہ کسی کے فرار ہونے کا امکان سمجھے تو گرفتاری کا حکم دے سکتا ہے۔

جس پر عدالت نے نیب کو مکمل رپورٹ پیش کرنے کی ہدایت کرتے ہوئے سماعت 4 نومبر کیلیے ملتوی کردی۔

پیپلز پارٹی کے رہنما شرجیل انعام میمن نے درخواست دائر کی ہے کہ ان کے خلاف تمام انکوائریوں اور انویسٹیگیشن کی تفصیلات سے آگاہ کیا جائے تاکہ وہ قانونی تحفظ حاصل کرسکیں۔