کراچی : سندھ ہائی کورٹ نے اے آر وائی نیوز کے خلاف پیمرا کے دوسرے شوکاز پر بھی عملدرآمد معطل کرتے ہوئے پیمرا کو جواب جمع کرانے کی ہدایت کردی۔

تفصیلات کے مطابق سندھ ہائی کورٹ میں اےآر وائی نیوز کےخلاف پیمرا کے دوسرے شوکاز کیخلاف درخواست پر سماعت ہوئی۔

بیرسٹر عابد زبیری نے بتایا کہ اے آر وائی نیوز کوپہلا شوکاز نوٹس 8اگست کو جاری کیا،اس دوران اے آر وائی نیوز کی نشریات کو بند رکھا گیا ، پیمرا نے سنگل بینچ کے اس فیصلے کے خلاف دو رکنی بینچ کے سامنے اپیل بھی کی۔

وکیل کا کہنا تھا کہ عدالت کے فیصلے کی روشنی میں اے آر وائی نیوز نے پیمرا کے شوکاز کا جواب دے دیا تاہم اسی روز 29 اگست کو اسی معاملے پر پیمرا نےدوبارہ شوکاز نوٹس جاری کردیا۔

بیرسٹر ایان میمن نے کہا کہ عدالت کے فیصلے پر عملدرآمد نہ کرنے پر چیئرمین پیمرا کے خلاف توہین عدالت کا شوکاز جاری ہوا ہے، 7 ستمبر کو چیئرمین پیمرا کو ذاتی طور پر توہین عدالت کے معاملے پیش ہونا ہے۔

وکیل اے آر وائی نیوز نے بتایا کہ سندھ ہائی کورٹ نے شوکاز پر کارروائی کی اجازت دیتے ہوئے پیمرا کو حتمی فیصلے کے اعلان سے روکا ہوا ہے۔

بیرسٹر ایان میمن نے استدعا کی دوسرا شوکاز نوٹس بدنیتی پر مبنی اور عدالتی کارروائی سے بچنے کی کوشش ہے ، کالعدم قرار دیا جائے۔

سندھ ہائی کورٹ نے اےآر وائی نیوز کےخلاف پیمرا کے دوسرے شوکاز پر بھی عملدرآمد معطل کر دیا اور پیمرا کو جواب جمع کرانے کی بھی ہدایت کردی۔

کراچی : اے آر وائی نیوز کے وکیل بیرسٹرایان میمن نے سندھ ہائی کورٹ میں‌ دوران سماعت کہا کہ کہ چیئرمین پیمرا کے وارنٹ جاری کئے جائیں،یہ عدالت کی اہمیت کا معاملہ ہے۔

تفصیلات کے مطابق سندھ ہائی کورٹ میں اے آروائی نیوزنشریات بحال نہ کرانے پر چیئرمین پیمرا ودیگر کیخلاف توہین عدالت سے متعلق سماعت ہوئی۔

چیئرمین پیمرا عدالت کے حکم کے باوجود سندھ ہائیکورٹ میں پیش نہیں ہوئے، اے آر وائی نیوز کے وکیل بیرسٹرایان میمن نے کہا کہ اےآروائی نیوزکی نشریات کی بحالی سے زیادہ عدالت کی عزت کامعاملہ ہے، چیئرمین پیمرا کے وارنٹ جاری کئے جائیں،یہ عدالت کی اہمیت کا معاملہ ہے۔

جسٹس ذوالفقارخان نے ریمارکس دیئے کہ عدالت اپنے اختیارات کے استعمال کے سلسلےمیں محتاط ہے، جس پر وکیل پیمرا نے کہا کہ پی ٹی وی کے علاوہ کوئی نیوز چینل کمپلسری کیٹیگری میں نہیں آتا۔

بیرسٹر ایان میمن کا کہنا تھا کہ عدالت کے حکم کے سامنے پیمرا کے ریگولیشنز کی اہمیت نہیں، سپریم کورٹ چیئرمین پیمرا کو نجی چینلز کے کیس میں نشریات یقینی بنانے کا ذمہ دار قرار دے چکی۔

عدالت نے کہا کہ پیمرا ’’چوہا گزر گیا،بلی گزر گئی‘‘جیسے بہانوں کی آڑ کیوں لے رہا ہے، پیمرا کیبل آپریٹرز سےمتعلق اختیارات کیوں استعمال نہیں کررہا۔

جس پر بیرسٹر ایان میمن نے بتایا کہ اگر پیمرا اپنا ریگولیٹری کردار ادا نہیں کرسکتا تو اسے بند کردینا چاہیے۔

وکیل پیمرا کا کہنا تھا کہ چیئرمین کیخلاف توہین عدالت کی اتنی درخواستیں لگادی گئیں کہ فرائض پرتوجہ نہیں دےپارہے ، وہ کبھی دفتر اور کبھی عدالت میں چکر لگارہے ہیں۔

پیمرا کے وکیل نے مزید کہا کہ عدالت کے حکم پر عملدرآمد کےلئےکیبل آپریٹرز کو 3سرکلر جاری کرچکے، اب انہیں شوکاز نوٹس جاری کریں گے،وکیل پیمرا

توہین عدالت کے مرتکب کیبل آپریٹرز کی جانب سےبھی وکالت نامہ جمع کرادیا گیا، جس میں کہا ہمارے کیبلز پر اے آروائی نیوز کی نشریات جاری ہیں، جس پر بیرسٹر ایان میمن کا کہنا تھا کہ عدالت کے سامنے جھوٹ بولا جا رہا ہے افسوسناک ہے۔

سندھ ہائی کورٹ میں سماعت کل 11بجے تک ملتوی کردی گئی، گزشتہ روز 2رکنی بینچ نےحاضری سے مستثنیٰ قرار دینےکی درخواست مسترد کی تھی

کراچی : سندھ ہائی کورٹ نے ایک بار پھر پیمرا کو اے آر وائی نیوز کی نشریات فوری بحال کرانے کا حکم دے دیا۔

تفصیلات کے مطابق سندھ ہائی کورٹ میں اے آروائی نیوز کو شوکاز نوٹس پر حکم امتناع کیخلاف پیمرا کی اپیل پر سماعت ہوئی۔

عدالت نے بڑا فیصلہ سناتے ہوئے پیمرا کو اے آر وائی نیوز کی نشریات فوری بحال کرانے کا حکم دے دیا ہے۔

عدالت نے کہا کوئی کیبل آپریٹرزفیصلے پر عملدرآمد نہیں کرتا تو چیئرمین پیمرا اس کیخلاف کارروائی کریں۔

جسٹس عقیل عباسی نے کہا کہ پیمرا کی جانب سے کاغذی کارروائی کافی نہیں ، چیئرمین پیمراکو قواعد ،عدالتی احکامات کے تحت کارروائی کرنا چاہیے۔

عدالت نے ریمارکس دیئے کہ پیمرا کے پاس وسیع اختیارات ہیں، انہیں استعمال کیا جائے، پیمرا افسر فون کریں تو کیبل آپریٹرز کیسے نشریات روک سکتے ہیں۔

وکیل پیمرا نے استدعا کی کہ چیئرمین پیمرا کیخلاف توہین عدالت کی کارروائی کا نوٹس معطل کیا جائے اور کم از کم ان کی کل حاضری سے استثنیٰ دے دیا جائے۔

جس پر وکیل ایان میمن کا کہنا تھا کہ چیئرمین پیمرا فیصلے پر عمل کرا دیتے ہیں تو توہین عدالت درخواست واپس لیں گے۔

بعد ازاں اے آروائی نیوز کے وکیل ایان میمن نے خصوصی گفتگو میں سماعت کا احوال بتاتے ہوئے کہا کہ آج پیمرا کی اپیل کی سماعت ہوئی ، سماعت میں عدالت نے تفصیل سے سنا۔

چیئرمین پیمرا کی ذمہ داری صرف حکم تک محدود نہیں، پیمرا کا کام اس بات کو یقینی بنوانا ہے کہ چینل دوبارہ اسی پوزیشن پر بحال ہو جس پر وہ پہلے تھا۔