Author: بابر خان

لاہور کے علاقے پرانی انار کلی میں 12 سال کے لڑکے کو معمولی تنازع پر آگ لگا دی گئی۔

اے آر وائی نیوز کے مطابق لاہور کے علاقے پرانی انار کلی میں 12 سال کے اویس کو معمولی تنازع پر پیٹرول چھڑک کر آگ لگائی گئی جس کے نتیجے میں اس کی حالت تشویش ناک بتائی گئی ہے۔

لڑکے کو تشویش ناک حالت میں میو اسپتال منتقل کیا گیا۔

پولیس نے زخمی بچے کے بھائی کی مدعیت میں مقدمہ درج کرلیا لیکن اب تک ملزمان کو گرفتار نہیں کرسکی ہے۔

بچہ اپنے بھائی کے ساتھ پرانی انار کلی میں جیولری شاپ پر کام کرتا تھا، بچے کا کہنا تھا کہ طاہر نے میرا بازو مروڑ کر پیٹرول چھین کر بوتل میرے اوپر ڈال دی۔

متاثرہ بچے کا کہنا ہے کہ مجھ سے پھر لائٹر منگوایا جب لایا تو آگ لگادی۔

بچے کے والد شاہد کا کہنا ہے میری وزیراعظم شہباز شریف سے اپیل ہے کہ ملزمان کو جلد گرفتار کرکے کیفر کردار تک پہنچایا جائے۔

لاہور میں ڈاکو پاکستانی نژاد برطانوی خاتون سے لوٹ مار کے بعد فرار ہوگئے۔

اے آر وائی نیوز کے مطابق لاہور کے علاقے فیکٹری ایریا میں ڈاکوؤں نے دن دیہاڑے خاتون سے پرس، سونے کی چھین لی اور تشدد کا نشانہ بھی بنایا۔

ویڈیو میں دیکھا جاسکتا ہے کہ خاتون جیسے ہی گاڑی سے اتریں، موٹر سائیکل سوار ڈاکو پہنچ گئے۔

ڈاکوؤں نے خاتون سے پرس چھینا اور سونے کی چین چھینتے ہوئے ان پر تشدد بھی کیا اور لوٹ مار کے بعد اطمینان سے ہوائی فائرنگ کرتے ہوئے فرار ہوگئے۔

واردات ایک گھنٹے بعد بھی پولیس جائے وقوعہ پر نہیں پہنچی تھی۔

پولیس نے بعدازاں پہنچ کر خاتون کا بیان ریکارڈ کرنا چاہا لیکن اہلخانہ کا کہنا ہے کہ خاتون جب بیان دینے کے قابل ہوں گی تو درخواست دے دی جائے گی۔

لاہور کے علاقے سمن آباد میں سابق وزیر میاں اسلم اقبال کے ڈیرے سے لاش برآمد ہوئی ہے۔

اے آر وائی نیوز کے مطابق پولیس کا کہنا ہے کہ سی آئی اے پولیس کانسٹیبل ارشد نے ڈیرے کے کوارٹر کو کرائے پر لیا تھا، شبہ ہے کانسٹیبل ارشد نے کوارٹر میں ٹارچر سیل بنا رکھا تھا۔

پولیس کا کہنا ہے کہ ارشد کو تلاش کیا جارہا ہے، مقتول کی شناخت کے لیے فنگر پرنٹس لیے گئے ہیں۔

تفتیشی حکام کے مطابق لاش 22 فروری کو ملی، بوسیدہ اور کئی روز پرانی تھی فنگر پرنٹس لے لیے گئے، فلیٹ سے ملنے والی لاش کی تاحال شناخت نہیں ہوسکی ہے۔

پولیس کا بتانا ہے کہ 40 سالہ نامعلوم شخص کے کان کے نیچے گولی لگی تھی، کمرے سے منشیات میں استعمال سامان برآمد ہوا ہے جبکہ مقتول کی جیب خالی تھی، دوسری منزل کا فلیٹ سی آئی اے اقبال ٹاؤن کے کانسٹیبل ارشد نے تین ماہ قبل کرایہ پر لیا تھا۔

پولیس حکام کا کہنا ہے کہ کانسٹیبل ارشد بھی آئس کا نشہ کرتا تھا اور جھگڑالو تھا، وہ تین ہفتے سے ڈیوٹی سے بھی غائب ہے۔

تفتیشی حکام کا کہنا ہے کہ ارشد کی فیملی تعاون کررہی ہے جلد ٹریس کرلیا جائے گا جبکہ لاش کی شناخت ڈی این اے کے ذریعے ہوگی۔