Author: بابر خان

لاہور : بازیاب ہونے والی میٹرک کی طالبہ نے انکشاف کیا ہے کہ اغوا کے بعد عابد نے پاکپتن لے جا کر زبردستی نکاح کی کوشش کی، میں نے نکاح سے انکار کیا تو مجھے تشدد کا نشانہ بنایا گیا۔

تفصیلات کے مطابق لاہور شادباغ سے اغوا کے بعد بازیاب ہونے والی میٹرک کی طالبہ کیس میں اہم پیش رفت ہوئی ، عشاء ذوالفقار نے پولیس کو اپنا بیان ریکارڈ کروادیا۔

طالبہ نے بازیابی کے بعد پولیس کو اپنے بیان میں بتایا کہ اغوا کے بعد عابد نے پاکپتن لے جا کر زبردستی نکاح کی کوشش کی، میں نے نکاح سے انکار کیا تو مجھے تشدد کا نشانہ بنایا گیا۔

طالبہ کا کہنا تھا کہ میرے ساتھ عابد یا اس کے کسی ساتھی نے زیادتی نہیں کی، ملزم ہفتے کو اغوا کے بعد ہی مجھے قصورلے گئے تھے، جہاں ملزمان قصور پولیس کے آنے سے پہلے مجھے پاکپتن لے گئے۔

عشاء ذوالفقار نے کہا کہ ملزمان نے مجھے رات عارف والا ایک بس اڈے پر چھوڑ دیا جہاں پولیس پہنچ گئی۔

پولیس واقعے میں شامل ملزمان سے تفتیش کررہی ہے جبکہ مرکزی ملزم عابد کی باضابطہ گرفتاری ظاہر نہیں کی گئی، ملزم عابد ریکارڈ یافتہ ہے۔

پولیس کا کہنا تھا کہ بیس سالہ ملزم عابد ڈکیتی سمیت دیگرسنگین وارداتوں میں ملوث رہا ہے ، متعدد بار جیل جاچکاہے، اس کیخلاف تھانہ شادباغ میں مزید تین مقدمات درج ہیں جبکہ یہ ڈکیتی سمیت دیگر سنگین وارداتوں میں بھی ملوث رہا ہے۔

یاد رہے لاہور شاد باغ سے اغوا ہونے والی دسویں جماعت کے طالبہ کو ساہیوال سے بازیاب کرایا گیا تھا ، منگنی توڑنے پر سابقہ منگیتر نے طالبہ کواغوا کیا تھا۔

چیف جسٹس لاہورہائی کورٹ نے اغواکانوٹس لیتے ہوئے بچی کو بازیاب کرانے کا حکم دیا تھا۔

اسلام آباد : شہبازشریف فیملی کیخلاف منی لانڈرنگ کیس کی تحقیقات کرنے والے ڈاکٹررضوان انتقال کرگئے، شہباز حکومت نے آتے ہی ڈاکٹر رضوان کوعہدے سے ہٹا دیا تھا۔

تفصیلات کے مطابق ایف آئی اےکے سابق ڈائریکٹر ڈاکٹر رضوان انتقال کر گئے ، ڈاکٹر رضوان عارضہ قلب میں مبتلا تھے، انھیں دل کا دورہ پڑا مگر جانبر نہ ہو سکے۔

ڈاکٹررضوان نے بطور ڈائریکٹرایف آئی اے شہبازشریف اوران کی فیملی کے منی لانڈرنگ کیسزمیں تفتیش کی جبکہ شوگراسکینڈل سمیت کئی کیسوں کی بھی تحقیقات کی تھیں۔

موجودہ حکومت کے آنے پر ڈاکٹر رضوان چھٹیوں پر چلے گئے تھے تاہم ن لیگ نے حکومت سنبھالتے ہی ڈاکٹر رضوان کا تبادلہ کردیا تھا ، وہ ڈائریکٹر ایف آئی اے پنجاب تعینات تھے۔

سابق وفاقی وزیر اطلاعات فواد چوہدری نے ڈاکٹر رضوان کے انتقال پر افسوس کا اظہار کرتے ہوئے کہا کہ شہباز شریف کے خلاف کیس کرنےوالے ڈاکٹر رضوان خالق حقیقی سے جا ملے ہیں ، مرحوم بہت دلیر ، فرض شناس تھے ، اللہ انہیں جنت میں جگہ نصیب فرمائے۔

شہباز شریف کیخلاف TT کیس کرنیوالے بہادر ڈائریکٹر FIA ڈاکٹر رضوان خالق حقیقی سے جا ملے، خدا ان کو کروٹ کروٹ جنت نصیب کرے بہت دلیر اور فرض شناس شخص دنیا سے گیا ہے

— Ch Fawad Hussain (@fawadchaudhry) May 9, 2022

پی ٹی آئی رہنما ڈاکٹر شہبازگل نے سماجی رابطے کی ویب سائٹ ٹوئٹر پر ڈاکٹر رضوان کے انتقال پر اپنے بیان میں کہا کہ یہ کوئی نئی بات نہیں اسی طرح سے قتل کیا جاتا ہے ، لوگوں اس ملک میں میری خبر کار ایکسیڈنٹ کی آنی تھی جیسےانکی ہارٹ اٹیک کی آئی ، سب کچھ اتنا اچھا مینج کیا جاتا ہے جیسے کہ واقعی کوئی اتفاقی حادثہ ہو، ملک میں ایک ساتھ اتنےاتفاقی حادثےنہیں قتل ہورہے ہیں۔

لاہور: پنجاب پولیس نے صوبائی اسمبلی میں افسران اور اہل کاروں پر تشدد کرنے والوں پر مقدمہ درج کرنے کا فیصلہ کر لیا ہے۔

تفصیلات کے مطابق پولیس اہلکاروں پر اسمبلی میں تشدد کے معاملے پر پنجاب پولیس نے اہم فیصلہ کر لیا ہے، اسمبلی کے اندر پولیس اہل کاروں پر تشدد کرنے والے ارکان اسمبلی کو گرفتار کیا جائے گا، سی سی ٹی وی فوٹیجز کی مدد سے تشدد کرنے والے ارکان کی شناخت کر لی گئی۔

ذرائع کا کہنا ہے کہ تشدد کرنے والے ارکان میں خواتین ایم پی ایز بھی شامل ہیں، اس سلسلے میں میڈیا اور سوشل میڈیا پر وائرل ویڈیوز کا بھی جائزہ لیا گیا ہے۔

ذرائع نے بتایا کہ تشدد کرنے والے ایم پی ایز میں فیاض چوہان، عمر تنویر، رانا شہباز، خیال کاسترو، حافظ عمار یاسر، مہندر سنگھ، واثق قیوم، نوابزادہ وسیم، تیمور سعود، مومنہ وحید، زینب عمر، شاہدہ احمد، آسیہ امجد شامل ہیں۔

لاہور : نشے کے عادی شخص نے فائرنگ کرکے گھر کے چھ افراد کو قتل کردیا، قتل ہونے والوں میں ملزم کا والد ، والدہ ، بہن ، بھنجا اور خالہ ساس شامل ہیں۔

تفصیلات کے مطابق پنجاب کے دارلحکومت میں لاہور میں قتل کا اندوہناک واقعہ پیش آیا ، جہاں گرین ٹاؤن امیرچوک کے قریب ایک شخص نے فائرنگ کردی ، جس کے نتیجے میں 6 افراد جاں بحق ہوگئے۔

ملزم نے پہلے ماں ، باپ ، بہن اور بھائی پر گولیاں برسائیں اور پھر سسرال جا کر بھی فائرنگ کی، جس کے نتیجے میں ساس اور قریبی عزیز جاں بحق ہوگئے۔

پولیس نے بتایا کہ ملزم نے آئس نشہ کر رکھا تھا ، سینئر پولیس افسران فرانزک ٹیمون نے موقع سے شواہد اکٹھے کر لیے اور ملزمان کی گرفتاری کے لئے ٹیمیں تشکیل دے دی۔

قائمقام سی سی پی او شہزادہ سلطان نے گرین ٹاؤن میں 5 افراد کے قتل کا نوٹس لیتے ہوئے ایس ایس آپریشنز سے رپورٹ طلب کرلی اور
اندوہناک قتل میں ملوث ملزمان کی فوری گرفتاری کی ہدایت کی۔

گھر میں فائرنگ کے واقعے کی تفتیش میں میں پولیس نے بتایا کہ ملزم عابد نے اپنے ہی گھر پرفائرنگ کرکے 4افرادکو قتل کیا، ملزم نے اپنی والدہ، والد، ہمشیرہ ، چھوٹے بھائی پر فائرنگ کی۔

پولیس کا کہنا تھا کہ گھر میں فائرنگ کے بعد ملزم عابد نے ہی باگڑیاں میں سسرال جاکر خالہ ساس اور سسرپرفائرنگ کی۔

پولیس نے بتایا کہ ملزم عابد کو گرفتار کر لیا گیا ہے اور مزید تفتیش جاری ہے ، ابتدائی تحقیقات میں ملزم نے بیان میں کہا ان لوگوں نے بیٹے پر تشدد کیا تھا۔

لاہور : ایف آئی اے نے حساس اداروں اورشخصیات کےخلاف سوشل میڈیا پر مہم چلانے پر 4 ہزار ٹرینڈ سیٹراور یوزر اکاؤنٹ بند کرنے کے لیے پی ٹی اے کو مراسلہ بھیج دیا۔

تفصیلات کے مطابق حساس اداروں اورشخصیات کے خلاف سوشل میڈیا پر مہم کے معاملے پر ایف آئی اے کی جانب سے 4 ہزار ٹرینڈ سیٹر اور یوزر اکاؤنٹس بند کرنے کے لیے پی ٹی اے کو مراسلہ ارسال کردیا گیا۔

سائبر کرائم نے پی ٹی اے کو تفصیلات اور تصاویر بھی بھجوا دیں۔

خیال رہے اداروں اور اہم شخصیات کے خلاف سوشل میڈیا پر مہم چلانے والے گرفتار پندرہ ملزمان کوآج عدالت پیش کیا جائے گا۔

ذرائع ایف آئی اے کا کہنا تھا کہ 50 ایسے افراد کی فہرست دی گئی جو سیکڑوں جعلی اکاؤنٹ چلا رہے تھے، جعلی اکاؤنٹس سے ٹرولنگ کی گئی۔

ایف آئی اے نے بتایا تھا کہ بعض اکاؤنٹس بیرون ممالک سےبیٹھ کر آپریٹ کیے جا رہے ہیں۔