Author: بابر خان

لاہور: نو مئی کو جناح ہاؤس پر حملے میں ملوث پی ٹی آئی کی سابق ایم پی اے فرحت فاروق کو گرفتار کرلیا گیا، ملزمہ شرپسندوں کو اکسا رہی تھی۔

تفصیلات کے مطابق : نو مئی کو جناح ہاؤس پر حملے میں ملوث افراد کی شناخت اور گرفتاریوں کا سلسلہ جاری ہے، پولیس نے پی ٹی آئی کی سابق ایم پی اے فرحت فاروق کو گرفتار کرلیا۔

پولیس کا کہنا ہے کہ ملزمہ کو جناح ہاؤس کے باہر شرپسندوں کو اکسانے کے الزام میں گرفتار کیا گیا۔

اس کے علاوہ پولیس نے کورکمانڈرکی وردی پہننے والے ملزم کے ساتھ سیلفی لینے والے نوجوان کو بھی گرفتار کرلیا، ملزم اویس کوڈیجیٹل شواہدکی مدد سے ٹریس کیا گیا۔

خیال رہے چیئرمین پی ٹی آئی عمران خان کی گرفتاری کے بعد ملک کے مختلف شہروں میں ہونے والے ہنگاموں میں جناح ہاؤس کو بھی نشانہ بنایا گیا تھا۔

یاد رہے انسداد دہشت گردی کی عدالت نے جناح ہاؤس کی توڑ پھوڑ کیس میں ملوث 16 شرپسندوں کو ملٹری ایکٹ کے تحت کمانڈنگ آفیسر کی تحویل میں دے دیا تھا۔

لاہور : پنجاب حکومت نے نومئی کو جناح ہاؤس لاہور میں توڑ پھوڑ کی تحقیقات کیلئے مزید چار جے آئی ٹیز بنادی، جس کے بعد جے آئی ٹیز کی تعداد 5 ہوگئی۔

تفصیلات کے مطابق محکمہ داخلہ پنجاب نے جناح ہاؤس حملہ اور توڑ پھوڑ کیس میں مزید 4 جے آئی ٹیز تشکیل دے دیں۔

محکمہ داخلہ پنجاب کی جانب سے نوٹیفکیشن میں کہا گیا ہے کہ جے آئی ٹیز جناح ہاؤس حملہ کیس کے مختلف مقدمات کی تفتیش کریں گی۔

ایک جے آئی ٹی کی کنونیر ایس ایس پی انویسٹی گیشن انوش مسعود مقرر کی گئی ہیں، انوش مسعود کی سربراہی میں جے آئی ٹی گلبرگ میں درج مقدمہ کی تفتیش کرے گی۔

دو جے آئی ٹیزکی سربراہی ایس پی رضا تنویر کریں گے، رضا تنویر کی سربراہی میں جے آئی ٹیز مغلپورہ اور سرور روڈ تھانہ میں دج مقدمات کی تفتیشں کرے گی۔

چوتھی جے آئی ٹی کا سربراہ ایس پی انوسٹی گیشن عبد الحںان کو مقرر کیا گیا ہے۔

اس سے قبل بنائی گئی جے آئی ٹی کا کنوینئر ایس پی انویسٹی گیشن اقبال ٹاؤن عقیلہ نیاز نقوی کو مقرر کیا گیاجبکہ پولیس کے چار دیگر افسران بھی جے آئی ٹی میں شامل ہیں، جے آئی ٹی کے ممبران میں ڈی ایس پی معصوم علی، انسپکٹر محمد ارحم، سب انسپکٹر جاوید اور سب انسپکٹر شہباز اختر شامل ہیں۔

جناح ہاؤس میں توڑپھوڑ اور جلاؤ گھیراؤ کے کیسزکی تفتیش کیلئے بنائی گئی جےآئی ٹیزکی تعداد 5 ہوگئی ہے، پانچوں جے آئی ٹیز نے آج سے ہی اپنا کام شروع کردیا ہے۔

لاہور : سابق آئی جی سندھ اور پنجاب میجر (ر) ضیا الحسن کے بیٹے کو بھی جناح ہاؤس حملے کے  الزام میں گرفتار کر لیا گیا۔

تفصیلات کے مطابق سابق آئی جی سندھ اور پنجاب میجر (ر) ضیا الحسن کے بیٹے کو بھی گرفتار کر لیا گیا، پولیس نے بتایا کہ ملزم رضوان ضیا کو کور کمانڈر ہاؤس کے باہر احتجاج ،توڑ پھوڑ کے الزام میں گرفتار کیا گیا ہے۔

پولیس کا کہنا تھا کہ ملزم رضوان کو جیو فینسنگ کی لوکیشن سامنے آنے پر گرفتار کیا گیا، ملزم سابق آرمی آفیسر کے داماد بھی ہیں۔

گذشتہ روز انسداد دہشت گردی کی عدالت نے جناح ہاؤس کی توڑ پھوڑ کیس میں ملوث 16 شرپسندوں کو ملٹری ایکٹ کے تحت کمانڈنگ آفیسر کی تحویل میں دے دیا تھا۔

کمانڈنگ آفیسر نے ملٹری ایکٹ کے تحت 16 شرپسندوں کی تحویل کی درخواست کی تھی، جس کے بعد انسداد دہشت گردی کی عدالت نے کمانڈنگ افسر کی درخواست پر فوری جواب دیتے ہوئے جناح ہاؤس کی توڑ پھوڑ میں ملوث شرپسندوں کو تحویل میں دیا۔

سابق رکن صوبائی اسمبلی (ایم پی اے) میاں اکرم عثمان سمیت 16 ملزمان کو مزید کارروائی کے لیے کمانڈنگ آفیسر کے حوالے کیا گیا تھا۔

لاہور : پولیس نے نگراں حکومت کی جانب سے دیئے گئے الٹی میٹم ختم ہونے کے بعد زمان پارک میں گرینڈ آپریشن سے متعلق حکمت عملی تیار کرلی۔

تفصیلات کے مطابق حکومت پنجاب کی جانب سے زمان پارک میں موجود تیس سے چالیس دہشت گردوں کی گرفتاری کا الٹی میٹم ختم ہونے میں صرف ایک گھنٹہ باقی رہ گیا ہے۔

زمان پارک میں آپریشن کے لیے پولیس نے حکمت عملی تیار کرلی ہے ، پولیس لائن اور قلعہ گجر سنگھ میں کنٹینرز پہنچا دیئے گئے ہیں۔

نگراں حکومت کی جانب سے دوپہر دو بجے آپریشن کرنے کا امکان ہے ، پولیس کا کہنا ہے کہ سی سی پی اور ڈی آئی جی آپریشنز لاہورزمان پارک کا جائزہ لیں گے۔

قائم مقام ڈی آئی جی آپریشن صادق ڈوگرنے زمان پارک کا دورہ کیا اور اہلکاروں کو بریف کیا گیا۔

یاد رہے پنجاب حکومت کی جانب سے زمان پارک میں دہشت گروں ‏کی موجودگی اورممکنہ پولیس آپریشن کا الٹی میٹم دو بجے ختم ہو جائے گا۔

اس حوالے سے نگراں وزیراطلاعات پنجاب نے کہا تھا کہ عمران خان کو گرفتار کرنے کا فیصلہ نہیں ہوا۔ دہشتگردوں کی حوالگی کے لیے چوبیس گھنٹے کا الٹی میٹم دیا ہےآج دوپہر دو بجے سے پہلے کچھ نہیں ہوگا۔

عامرمیر نے بتایا تھا کہ چالیس دہشتگردوں کو پکڑنے کے لیے عمران خان چارسو پولیس اہلکاروں کو آنے کی اجازت دیں، میڈیا بھی ساتھ ہوگا، جیوفینسنگ سےمعلومات ملیں، بیس سے چالیس دہشت گردزمان پارک میں ہیں۔

ان کا کہنا تھا کہ مراد سعیدکی لوکیشن بھی زمان پارک میں ٹریس کی گئی تھی، جناح ہاؤس پرحملہ کرنےوالوں کازمان پارک سے رابطہ تھا۔