Author: بابر خان

لاہور : سی ٹی ڈی پنجاب نے 5 مبینہ دہشت گردوں کو گرفتار کرکے ان کے قبضہ سے اسلحہ و دھماکہ خیز مواد برآمد کر لیا،ان کا تعلق مختلف کالعدم تنظیموں سے ہے۔

تفصیلات کے مطابق کاؤنٹر ٹیررزم ڈیپارٹمنٹ پنجاب نے کارروائی کر کے5 مبینہ دہشت گردوں کوگرفتار کر لیا۔

ترجمان نے بتایا کہ سی ٹی ڈی پنجاب نے ملک میں جاری حالیہ دہشت گردی کے واقعات کے بعد کسی بھی ناخوشگوار واقعہ سے مؤثر طریقے سے نمٹنے کے لیے خفیہ اطلاعات پر صوبہ بھر کے مختلف اضلاع میں 21 آپریشنز کیے گئے۔

جس میں 22 مشتبہ افراد سے پوچھ گچھ کی گئی اور 5 مبینہ دہشت گردوں کو گرفتار کر کے ان کے قبضہ سے اسلحہ و دھماکہ خیز مواد برآمد کر لیا۔

ترجمان کا کہنا تھا کہ گرفتار ہونے والے مبینہ دہشت گردوں میں انعام الحق‘ مسکین اللہ‘واحد خان‘ شیر نقیب اورشاہ ولی شامل ہیں اور ان کا تعلق مختلف کالعدم تنظیموں سے ہے۔

سی ٹی ڈی نے کہا کہ دہشت گردوں کے قبضہ سے ایک آئی ای ڈی بم‘ دھماکہ خیز 510 گرام، سیفٹی فیوز وائر 2.1 فٹ، پرائما کارڈ 6 فٹ،2 عدددستی بم، ایک الیکٹرک سرکٹ، ایک الیکٹرک بٹن، 2 ڈیٹونیٹر ز، الیکٹرک وائر 3 فٹ، بیٹری ایک عدد، کالعدم تنظیم کی 05 کتابیں اور ایک رسید بک، 2 موبائل فونز اورنقدی 17,230روپے برآمد کئے گئے ہیں۔

ترجمان کے مطابق دہشت گردوں نے صوبہ بھر میں تخریب کاری کا منصوبہ بنا رکھا تھا اور وہ اہم تنصیبات اور دہشتگردانہ کارروائی اور مذہبی مقامات کو ٹارگٹ کرنا چاہتے تھے۔

پولیس نے دہشت گردوں کے خلاف لاہور، گوجرانوالہ اور ساہیوال میں 4 مقدمات درج کر کے ان کو نامعلوم مقام پر منتقل کر دیا گیا ہے۔