Author: بابر ملک

بھمبر: آزاد کشمیر کے ضلع بھمبر میں اپنی شادی کے لیے درخت کاٹنے والا دولھا درخت کے نیچے دب کر جاں بحق ہو گیا۔

تفصیلات کے مطابق بھمبر کی تحصیل سماہنی میں شادی کے لیے تیاریاں کرنے والے نوجوان کی افسوس ناک موت واقع ہو گئی، شادی کا گھرماتم کدہ بن گیا، نوجوان درخت کاٹتے ہوئے درخت تلے ہی آ کر جاں بحق ہو گیا۔

نوجوان پس ماندہ علاقے رعل میں اپنی شادی کی تقریب کے لیے ایندھن جمع کر رہا تھا، اس مقصد کے لیے وہ درخت کاٹنے لگا، لیکن چیل کا درخت نوجوان کے اوپر ہی آ گرا جس سے وہ جان سے ہاتھ دھو بیٹھا۔

خیال رہے کہ اس طرح کے افسوس ناک واقعات ماضی میں بھی پیش آتے رہے ہیں جب دولھا عین اپنی شادی کے دن کسی ناگہانی حادثے کا شکار ہو کر دنیا سے رخصت ہوا، یا قتل کیا گیا۔ ایسا ہی ایک واقعہ 28 دسمبر کو پشاور کے مضافاتی علاقے سردار گڑھی میں بھی پیش آیا تھا۔

پشاور : شادی کی تقریب میں جھگڑا، فائرنگ سے دولہا جاں بحق

شادی کی تقریب جاری تھی، تصاویر اور ویڈیو بنائی جا رہی تھی، جب گھر میں اسی بات پر جھگڑا شروع ہو گیا کہ خواتین کی تصاویر اور ویڈیو نہیں بنائی جائے گی، جھگڑا اتنا بڑھا کہ اسلحہ نکل آیا اور فائرنگ شروع ہو گئی جس میں بد قسمت دولھا عابد زخمی ہو گیا، بعد ازاں اسپتال لے جاتے ہوئے دم توڑ گیا۔ فائرنگ کرنے والے ملزمان میں دولھے کا بہنوئی بھی شامل تھا۔

راولپنڈی: عدالت نے 24 سال پرانے تہرے قتل کے کیس میں جج بلیک میلنگ اسکینڈل کے مرکزی کردار ناصر بٹ کو اشتہاری قرار دینے کی کارروائی شروع کر دی۔

اے آر وائی نیوز کے مطابق ناصر بٹ کے خلاف تہرے قتل کیس میں وارنٹ گرفتاری بغیر تعمیل واپس کر دیا گیا، صادق آباد تھانے کے سب انسپکٹر راشد نے وارنٹ سے متعلق رپورٹ عدالت میں جمع کراتے ہوئے کہا کہ ناصر بٹ کی گرفتاری کے لیے عدالتی حکم پر ریکارڈ میں درج ایڈریس پر گیا، لیکن دستیاب پتے پر ناصر بٹ موجود نہیں تھا۔

عدالت نے سب انسپکٹر کی رپورٹ پر ملزم ناصر بٹ کو اشتہاری قرار دینے کی کارروائی کا آغاز کر دیا، ضابطہ فوجداری کی دفعہ 87 کے تحت ملزم کے خلاف نوٹس اشتہار بھی جاری کر دیا گیا جو عدالت، گھر، عوامی مقامات، ایئرپورٹ اور متعلقہ تھانے کی دیوار پر چسپاں ہوگا۔

جج ویڈیو اسکینڈل: اسلام آباد ہائی کورٹ میں ناصر بٹ کی درخواست مسترد

نوٹس میں کہا گیا ہے کہ 30 یوم کی مدت کے اندر اگر ملزم نے خود کو عدالت کے روبرو پیش نہ کیا تو اسے اشتہاری قرار دیا جائے گا، نوٹس اشتہار جاری کرنے کے بعد عدالت نے سماعت 11 اپریل تک ملتوی کر دی۔

خیال رہے کہ 24 سال پرانا کیس ناصر بٹ و دیگر کے خلاف حال ہی میں ری اوپن ہوا تھا، 1996 میں چاندنی چوک پر فائرنگ کے نتیجے میں پجارو میں سوار 3 افراد جاں بحق ہوئے تھے، مقتولین میں 2 سگے بھائی انوار الحق اور اکرام الحق اور ڈرائیور گلفراز عباسی شامل تھے۔

ناصر بٹ اس مقدمے میں اشتہاری رہا، حال ہی میں سندھ ہائی کورٹ سے ضمانت کے بعد شامل تفتیش ہوا تھا، علاقہ مجسٹریٹ نے پولیس کی جانب سے ناصر بٹ کو بے گناہ قرار دے کر ڈسچارج کرنے کی درخواست اور ریکارڈ سیشن جج کو بھجوائے تھے۔

راولپنڈی :پولیس سب انسپکٹر سمیت 3پولیس اہلکاروں کو فائرنگ کر کے شہید کرنے والے مجرم کو انسداد دہشت گردی کی عدالت نے 6مرتبہ سزائے موت اورمجموعی طور پر74سزا قید کی سزا کا حکم سنا دیا۔

تفصیلات کے مطابق 6 مرتبہ سزائے موت و 74سال قید کی سزا پانے والے مجرم عبدالقدیر نے گزشتہ سال فائرنگ کر کے سب انسپکٹر محمد اکرم،کانسٹیبل محمد زعفران اور ساجد محمود کو شہید کر دیا تھا۔

شہید ہونے والے پولیس اہلکار صادق آباد کے علاقہ میں پولیس ناکہ پر کھڑے تھے تو اہلکاروں نے مجرم عبد القدیر کو روکا تو اس نے فائرنگ کر دی۔

پولیس نے یکسوئی کے ساتھ تفتیش کی اور ٹھوس ثبوتوں کے ساتھ ملزم کو عدالت میں چالان کیا، پولیس کی مربوط اور مکمل تفتیش و ٹھوس شواہد کی بنیاد پر انسداد دہشت گردی کی عدالت کے جج شوکت کمال ڈار نے مجرم کو سزا سنا دی۔

راولپنڈی: پنڈی میں واقع بے نظیر بھٹو اسپتال کے نرسنگ ہاسٹل میں لرزہ خیز واردات کے باعث نرسز خوف و ہراس کا شکار ہو گئی ہیں۔

تفصیلات کے مطابق بے نظیر بھٹو اسپتال میں گزشتہ رات ایک شخص نرسنگ ہاسٹل کے گیٹ کی جالیاں اسٹیل کٹر سے کاٹ کر اندر جا گھسا تھا اور ایک مڈ وائف کو اغوا کی کوشش کی لیکن ناکام رہا۔

اے آر وائی نیوز کے مطابق ملزم جس کا نام حماد بتایا گیا ہے، رات کے وقت بے نظیر بھٹو اسپتال کے نرسنگ ہاسٹل میں داخل ہوا اور نرسز کے رومز میں پھرتا رہا، کمروں کے دروازے کھٹکھٹائے، اور پھر سعدیہ نامی مڈ وائف کو اغوا کرنے کی کوشش کی لیکن مزاحمت پر اس کی کلائی کاٹ کر اسے شدید زخمی کر دیا۔

بعد ازاں، ‏گارڈز نے نرسنگ ہاسٹل میں گھسنے والے ملزم حماد کو پکڑ کر پولیس حوالے کر دیا، پولیس کا کہنا تھا کہ ملزم ذہنی مریض ہو سکتا ہے، تاہم ہاسٹل کی نرسز کا کہنا تھا کہ ملزم ذہنی مریض نہیں ہو سکتا بلکہ کسی منظم گینگ کا حصہ لگتا ہے، وہ رات کی تاریکی میں سیکورٹی کو چکمہ دے کر نرسز کے رومز میں گھسا تھا اور تمام لڑکیوں کے کمروں کو کھٹکھٹاتا رہا تھا۔

اس واقعے کے بعد ‏ہاسٹل میں قیام پذیر نرسز میں شدید خوف و ہراس پایا جاتا ہے، ‏سیکریٹری ہیلتھ نے بھی واقعے کا نوٹس لے لیا ہے، پولیس نے موقع پر پہنچ کر ملزم کو گرفتار کر کے تفتیش شروع کر دی ہے۔

راولپنڈی: پولیس ٹریننگ اسکول روات کے پرنسپل ایس ایس پی ابرار حسین نیکوکارہ کی نماز جنازہ پولیس لائنز میں ادا کر دی گئی۔

تفصیلات کے مطابق پولیس ٹریننگ اسکول کے پرنسپل نیکوکارہ کی نماز جنازہ میں پولیس آر پی او، سی پی او اور سینٹر پولیس افسران اور اہل کاروں کی بڑی تعداد نے شرکت کی۔

ترجمان پولیس کے مطابق راولپنڈی پولیس کے چاق و چوبند دستے نے سلامی بھی پیش کی، ایس ایس پی ابرار حسین نیکوکارہ کے جسد خاکی کو مکمل اعزاز کے ساتھ تدفین کے لیے آبائی علاقہ کے لیے روانہ کر دیا گیا ہے۔

پرنسپل ابرار حسین نیکوکارہ نے گزشتہ روز اپنے کمرے میں خود کشی کر لی تھی، پولیس حکام نے ان کی خود کشی اور تحریری رقعہ ملنے کی بھی تصدیق کی تھی۔ ابرار نیکوکارہ سی ٹی او فیصل آباد بھی تعینات رہے، وہ چنیوٹ کے علاقے ہرسہ شیخ کے رہایشی تھے۔

ٹریننگ کالج روات کے پرنسپل نے خودکشی کر لی

سی پی او راولپنڈی کا واقعے کے بعد کہنا تھا کہ کرائم سین کو پراسیس کر لیا گیا ہے، بہ ظاہر خود کشی پستول کے ذریعے کی گئی ہے، خود کشی کا نوٹ بھی جائے وقوعہ سے ملا ہے، تاہم پوسٹ مارٹم کروایا جا رہا ہے جس کی رپورٹ کے بعد مزید تفصیلات سامنے آ سکیں گی۔

ذرایع کا کہنا ہے کہ ابرار نیکوکارہ ڈپریشن کا شکار تھے اور ایک ماہر نفسیات سے علاج بھی کروا رہے تھے، ان کی رہایش فیملی کے ساتھ سرکاری رہایش گاہ میں تھی، وہ انتہائی ملن سار اور خوش اخلاق طبیعت کے مالک سمجھے جاتے تھے، ذرایع نے یہ بھی بتایا کہ انھیں قابلیت کے برعکس اب تک کوئی اہم پوسٹ پر تعینات نہیں کیا گیا تھا۔

پوسٹ مارٹم رپورٹ آنے کے بعد پولیس حکام خود کشی کے نوٹ کو واضع کریں گے۔