Author: بابر ملک

پاکستان تحریک انصاف کے بانی کی تینوں بہنوں کو پولیس نے حراست میں لے لیا۔

اڈیالہ روڈ پر پلازہ میں موجود پی ٹی آئی رہنماؤں کے خلاف پولیس نے کارروائی کی اور اس دوران عمران خان کی تینوں بہنوں کو حراست میں لیا گیا۔

اپوزیشن لیڈر عمر ایوب، نیاز اللہ نیازی، احمد بچھر، حامد رضا، زرتاج گل کو بھی حراست میں لیا گیا ہے۔

عمران خان کی بہنوں اور پی ٹی آئی رہنماؤں کو قیدی وین میں منتقل کردیا گیا ہے، پی ٹی آئی کی قیادت اڈیالہ روڈ پر زیر تعمیر پلازہ میں موجود تھی۔

واضح رہے کہ چند روز قبل بھی عمران خان کی تینوں بہنوں کو حراست میں لیا گیا تھا اور کچھ دیر کے بعد رہا کردیا گیا تھا۔

راولپنڈی: بانی پی ٹی آئی کی بہنیں دوبارہ اڈیالہ جیل ملاقات کے لیے جانے پر بضد ہیں۔

اے آر وائی نیوز کے مطابق عمران خان کی بہنوں سمیت 11 کارکنان نے خود گرفتاری دے دی، بانی پی ٹی آئی کی تینوں بہنیں اور کارکنان شادی ہال کے لان میں بیٹھ گئے۔

صاحبزادہ حامد رضا، عالیہ حمزہ، شفقت اعوان بھی ساتھ موجود ہیں، نیاز اللہ نیازی، راجہ یاسر حسنین، حامد خان بھی عمران خان کی بہنوں کے ساتھ موجود ہیں۔

ایس ایچ او صدر بیرونی اعزاز عظیم نے علیمہ خانم اور دیگر بہنوں کو گھر جانے کی پیشکش کی ہے تاہم علیمہ خان بضد ہیں اور کہہ رہی ہیں کہ ہماری بھائی سے ملاقات کروائی جائے نہیں تو ادھ رہی رہیں گے۔

ذرائع کا کہنا ہے کہ شادی ہال کے گیٹ پر پولیس کی بھاری نفری تعینات کردی گئی ہے۔

دوسری جانب صوبائی وزیر اطلاعات عظمیٰ بخاری کا کہنا ہے کہ پنجاب پولیس نے عمران خان کی بہنوں سمیت کسی خاتون کو گرفتار نہیں کیا، علیمہ خانم ودیگر نے پولیس گاڑی سے ’آن لائن کار سروس‘ حاصل کی، وہ اور ہمنوا خود ہی پولیس وین میں بیٹھیں اور خواجہ سروس اسٹیشن پر اتر گئیں۔

انہوں نے کہا کہ فوٹیج سے اس ڈرامہ بازی کی اصلیت دکھائی دے رہی ہے، عمران خان سے جھوٹی ہمدردیاں دکھانے کے لیے فلاپ شو کیا گیا ہے۔

عظمیٰ بخاری نے کہا کہ عمران خان شاہی انداز میں جیل کاٹ رہے ہیں، بشریٰ بی بی جیل میں بی کلاس ملنے کے باوجود بہترین سہولیات مانگ رہی ہیں۔

راولپنڈی: پاکستان تحریک انصاف (پی ٹی آئی) کے بانی کی تینوں بہنوں کو حراست میں لے لیا گیا۔

اے آر وائی نیوز کے مطابق بانی پی ٹی آئی کی تینوں بہنوں، پی ٹی آئی رہنما عالیہ حمزہ اور شفقت اعوان کو اڈیالہ جیل کے باہر سے حراست میں لیا گیا ہے۔

نیاز اللہ نیازی، راجہ یاسر حسنین، حامد خان کو بھی حراست میں لیا گیا ہے۔پی ٹی آئی رہنما، کارکنان اڈیالہ جیل کے باہر احتجاج کے لیے جمع ہوئے تھے۔

پولیس کی جانب سے اڈیالہ جیل کی جانب جانے والے راستے پولیس کی جانب سے سیل کیے گئے ہیں، پولیس کی جانب سے انہیں وارننگ دی گئی کہ وہاں سے ہٹ جائیں، وہاں کسی قسم کے احتجاج اور دھرنے کی اجازت نہیں ہے۔

گورکھپور ناکہ کے قریب سے چار پی ٹی آئی کارکنان کو تحویل میں لیا گیا ہے۔

اس سے قبل علیمہ خانم نے میڈیا سے گفتگو کرتے ہوئے کہا تھا کہ اگر عمران خان سے ملاقات نہیں کرنے دیں گے تو ہم یہیں بیٹھیں گے۔

چیئرمین پی ٹی آئی بیرسٹر گوہر کی مذمت

چیئرمین پی ٹی آئی بیرسٹر گوہر نے کہا کہ علیمہ خانم کو حراست میں لینے کی مذمت کرتا ہوں، عدالتی حکم ہے کہ عمران خان سے فیملی کی ملاقات ہونی چاہییے۔

انہوں نے کہا عمران خان کی بہنوں کو حراست میں لینا غیرقانونی اور غیر آئینی ہے، جیل انتظامیہ کی شرائط پر ملاقات کا کوئی آرڈر نہیں۔

انہوں نے کہا کہ ہماری جانب سے کوئی پتھراؤ نہیں کیا گیا، ہم نے دھرنے کی کوئی کال نہیں دی، ہم صرف عمران خان کی بہنوں کی حمایت میں یہاں آئے تھے۔