راولپنڈی: بانی پی ٹی آئی نے ریاست مخالفت پوسٹ کے معاملے پر ایف آئی اے ٹیم کو وکلا کی موجودگی میں جواب دے دیا۔
اے آر وائی نیوز کے مطابق بانی پی ٹی آئی کے ایکس اکاؤنٹ سے ریاست مخالف پوسٹ شیئر ہونے کے معاملے پر ایف آئی اے ٹیم تفتیش کے لیے اڈیالہ جیل پہنچی تھی۔
3 رکنی ٹیم میں اسسٹنٹ ڈائریکٹر ایاز خان، سب انسپکٹر منیب احمد اور انیس شامل تھے۔
بانی پی ٹی آئی سے ایکس اکاؤنٹ سے متعلق سوالات کیے گئے، انہوں نے اپنے وکلا کی موجودگی میں ایف آئی اے ٹیم کو جواب دیے۔
انہوں نے کہا کہ میری میڈیا سے گفتگو کو ایکس اکاؤنٹ پر پوسٹ کیا جاتا ہے، میرا مقصد کسی ایک ادارے یا ایک شخصیت سے متعلق بات کرنا نہیں تھا۔
بانی پی ٹی آئی کا کہنا تھا کہ میرا مقصد اشرافیہ کے بارے میں بات کرنا تھا۔
ذرائع کے مطابق ایف آئی اے کی تین رکنی خصوصی ٹیم تفتیش کے بعد جیل سے روانہ ہوگئی، تفتیش مکمل ہونے پر ٹیم مقدمات درج کرے گی۔
ذرائع کے مطابق ایف آئی اے ٹیم کل رات بھی بانی پی ٹی آئی سے تفتیش کے لیے اڈیالہ جیل پہنچی تھی لیکن انہوں نے تفتیشی ٹیم سے ملنے سے انکار کردیا تھا۔
بانی پی ٹی آئی نے وکلا کی موجودگی میں شامل تفتیش ہونے کا کہا تھا۔
بانی پی ٹی آئی کے ایکس اکاؤنٹ سے پروپیگنڈا ویڈیو
یاد رہے کہ مئی میں بانی پی ٹی آئی کے ایکس اکاؤنٹ سے ایک پروپیگنڈا ویڈیو اپ لوڈ کی گئی تھی جس کی تحقیقات میں انہوں نے ایف آئی اے ٹیم کو کسی سوال کا جواب دینے انکار کر دیا تھا۔
بانی پی ٹی آئی نے ایف آئی اے ٹیم کے کسی بھی سوال کا جواب دینے سے انکار کرتے ہوئے کہا تھا کہ کسی بھی سوال کا جواب وکلا کی موجودگی میں دوں گا۔ ایف آئی اے ٹیم نے ملزم کا مؤقف تحریری طور پر حاصل کیا تھا۔
سابق وزیر اعظم کے اکاؤنٹ سے 26 مئی کو شیخ مجیب الرحمان پر ویڈیو ٹوئٹ کی گئی تھی۔
