Author: بابر ملک

راولپنڈی: نیب نے توشہ خانہ ریفرنس میں بانی پی ٹی آئی اور بشریٰ بی بی کی گرفتاری ڈال دی۔

اے آر وائی نیوز کے مطابق ذرائع کا بتانا ہے کہ ڈپٹی ڈائریکٹر محسن ہارون کی سربراہی میں نیب ٹیم نے بانی پی ٹی آئی اور اہلیہ بشریٰ بی بی کو گرفتار کیا۔

نیب نے نئے توشہ خانہ ریفرنس میں بانی پی ٹی آئی، بشریٰ بی بی کی گرفتاری ڈالی گئی ہے۔

واضح رہے کہ اسلام آباد کی عدالت نے بانی پی ٹی آئی اور بشریٰ بی بی کے خلاف دوران عدت نکاح کیس میں سزا کے خلاف اپیلیں منظور کرتے ہوئے انہیں بری کرنے کا حکم دیا تھا۔

اسلام آباد کی سیشن عدالت نے بانی پی ٹی آئی کی عدت کیس میں رہائی کی روبکار تو جاری کردیے تھے تاہم 5 دیگر کیسز میں روبکار جاری نہ ہونے کے سبب بانی پی ٹی آئی کی رہائی ممکن نہیں تھی۔

ذرائع کے مطابق عمران خان 9 مئی کے راولپنڈی میں درج 12 کیسز میں ضمانت پر ہیں، ان کی راولپنڈی میں درج 5 مقدمات میں ابھی تک روبکار جاری نہیں ہوئیں۔

ذرائع کا کہنا تھا کہ اڈیالہ جیل انتطامیہ کو بانی پی ٹی آئی کی سائفرکیس میں بھی روبکار موصول نہیں ہوئی ہے۔

محکمہ داخلہ پنجاب سے راولپنڈی کی اڈیالہ جیل میں قید پاکستان تحریک انصاف کے بانی سے ملاقاتوں پر پابندی عائد کر دی ہے۔

اے آر وائی نیوز کے مطابق اڈیالہ جیل میں قید پاکستان تحریک انصاف کے بانی کی ملاقاتوں پر پابندی عائد کر دی گئی ہے۔ ذرائع نے بتایا ہے کہ بانی پی ٹی آئی سے ملاقاتوں پر پابندی کا فیصلہ محکمہ داخلہ پنجاب کی جانب سے کیا گیا ہے اور اس کا اطلاق دو ہفتوں کے لیے کیا گیا ہے۔

ذرائع کے مطابق محکمہ داخلہ کے احکامات کے بعد جیل انتظامیہ نے صحافیوں پر بھی پابندی عائد کر دی ہے اور اب وہ جیل کے گیٹ نمبر 5 یا اس کے قریب بھی نہیں جا سکتے اور نہ ہی کوئی کوریج کر سکتے ہیں۔

اس حوالے سے متعلقہ حکام کا کہنا ہے کہ بانی پی ٹی آئی سے ملاقاتوں پر پابندی کا فیصلہ گزشتہ دنوں اڈیالہ جیل پر ہونے والے دہشتگردی کے ناکام حملے جس میں تین دہشتگردوں کو گرفتار کیا گیا تھا، اس واقعے کے بعد سیکیورٹی اقدامات کے تحت کیا گیا ہے۔

واضح رہے کہ عدالتی احکامات پرجیل انتظامیہ نے منگل اور جمعرات کا دن بانی پی ٹی آئی سے ملاقاتوں کیلیے مختص کر رکھا تھا۔