Author: بابر ملک

راولپنڈی: سابق وزیر اعلیٰ پنجاب چوہدری پرویز الہٰی کی جیل میں طبیعت خراب ہوگئی۔

تفصیلات کے مطابق اڈیالہ جیل میں قید سابق وزیر اعلیٰ پنجاب چوہدری پرویز الہٰی کی طبیعت خراب ہوگئی جس پر انہیں جیل سے اسپتال منتقل کیا گیا ہے۔

جیل ذرائع کا کہنا ہے کہ پرویزالٰہی کو اڈیالہ سے راولپنڈی انسٹیٹیوٹ آف کارڈیالوجی منتقل کر دیا گیا انہیں دل میں تکلیف اور سینے میں انفیکشن کی شکایت تھی۔

جیل ذرائع کا کہنا  تھا کہ چوہدری پرویز الٰہی کا طبی معائنہ جیل اسپتال میں کیا گیا، طبیعت زیادہ خراب ہونے کی وجہ سے انہیں آر آئی سی منتقل کیا ہے جہاں ان کا طبی معائنہ کیا جائے گا اور ضروری ٹیسٹ کرائے جائے گے۔

دو سال قبل پیش آنے والے سانحہ مری جیسے واقعات سے بچنے کے لیے مری میں موسم سرما کی برفباری سے قبل فرضی ہنگامی مشقیں کی گئیں۔

اے آر وائی نیوز کے مطابق پولیس اور ریسکیو سمیت دیگر اداروں کی جانب سے مری میں موسم سرما کی برفباری سے قبل فرضی ہنگامی مشقیں کی ہیں جس کا مقصد دو سال قبل ہونے والے سانحہ مری جیسے واقعات سے بچاؤ کے لیے پیشگی اقدام ہے۔

ایڈیشنل ڈپٹی کمشنر مری کا کہنا ہے کہ فرضی ہنگامی مشقوں میں برفباری کے دوران سیاحوں کو ٹریس کرنا اور ان تک پہنچنے کی مشقیں کی گئیں جب کہ پیشگی اقدامات کے لیے اضافی مشینری مری پہنچا دی گئی ہے۔

اے ڈی سی کے مطابق مری، گلیات، کلڈنہ سمیت 13 مقامات پر سیاحوں کیلیے سہولت مرکز قائم کر دیے گئے ہیں جب کہ برفباری کے دوران مشکلات میں پھنسے سیاحوں کو بچانے کی منصوبہ بندی مکمل کر لی گئی ہے۔

ان کا کہنا تھا کہ سہولت مراکز پر کھانا، پانی، ابتدائی طبی امداد اور ہیٹنگ کا بندوبست کیا گیا ہے جب کہ سیاحوں کی رہنمائی کے لیے سوشل میڈیا پیجز پر بھی ٹریول ایڈوائزری سے متعلق مسلسل اپ ڈیٹ کیا جا رہا ہے۔

اے ڈی سی مری نے بتایا کہ برفباری کے دوران کنٹرول روام قائم کیا گیا ہے جو 24 گھنٹے کام کرے گا۔

واضح رہے کہ لگ بھگ دو سال قبل مری میں ہونے والی شدید برفباری کے باعث سینکڑوں سیاح وہاں پھنس گئے تھے جب کہ 20 سے زائد افراد جاں بحق ہوئے تھے جن میں سے ایک ہی خاندان کے کئی افراد بھی شامل تھے۔

راولپنڈی:  7 سال سے لاپتہ پولیس اہلکار کو پولیس نے راولپنڈی سے بازیاب کروالیا گیا۔

اے آر وائی نیوز کے مطابق راولپنڈی میں پولیس نے بھکاری گینگ کے ہاتھوں 7 سال قبل اغوا ہونے والے پولیس اہلکار کو بازیاب کرواکے تین رکنی اغوا کار گینگ کو گرفتار کرلیا ہے۔

پولیس کا بتانا ہے کہ پولیس اہلکار مستقیم خالد نے بتایا کہ اس کا ذہنی توازن خراب ہوگیا تھا۔

تفتیشی حکام کا کہنا ہے کہ اغوا کاروں نے اہلکار کا پاؤں توڑ دیا تھا اور اس سے مختلف مقامات پر بھیک منگواتے تھے۔

پولیس کا کہنا ہے کہ اہلکار کے گھر والوں کو بازیابی سے مطلع کردیا گیا ہے۔

ذرائع کا بتانا ہے کہ پولیس نے دو خواتین کو گرفتار کیا ہے اس گینگ کا نیٹ ورک صرف راولپنڈی اسلام آباد میں نہیں دیگر شہروں میں بھی پھیلا ہوا ہے اور وہاں لوگوں کو اغوا کرکے بھیک منگواتے ہیں۔

پولیس کا کہنا ہے کہ گینگ کے مزید ملزمان کی گرفتاریوں کے لیے چھاپے مارے جارہے ہیں۔

راولپنڈی: بینظیر بھٹو اسپتال کےچلڈرن وارڈ میں مبینہ طور پر آکسیجن نہ ملنے پر بچی انتقال کر گئی۔

لواحقین نے الزام عائد کیا ہے کہ آکسیجن کی عدم دستیابی کے باعث 10ماہ کی بچی انتقال کر گئی۔ کمسن علیزہ کو گزشتہ روز واہ کینٹ سے اسپتال منتقل کیا گیا تھا۔

بینظیربھٹو اسپتال میں کمسن علیزہ کے جاں بحق ہونے پر لواحقین غم سے نڈہال ہیں۔ ہولی فیملی اسپتال کی بندش کے باعث چلڈرن وارڈ میں بچوں کی تعدادبڑھ چکی ہے۔

ایم ایس طاہررضوی کا کہنا ہے کہ چلڈرن وارڈ میں آکسیجن کا کوئی مسئلہ نہیں ہے ہمارے پاس مریض بچے گنجائش سےزیادہ ہیں، ہولی فیملی اسپتال میں تعمیراتی کام کی وجہ سے ورک لوڈ زیادہ ہے چلڈرن وارڈمیں ہمارے پاس 280 بیڈز موجود ہیں، اوورلوڈ کی وجہ سے مریضوں کی تعداد 315 سے زائد ہے۔

چلڈرن وارڈ میں آکسیجن کی کمی کا بیان دینے والے ڈاکٹر کے خلاف اسپتال انتظامیہ نے 3 رکنی انکوائری کمیٹی تشکیل دیدی۔ کمیٹی میں ڈاکٹر اسدشبیر، اےایم ایس ڈاکٹر عنایت اور ڈاکٹر عابدحسن شامل ہیں۔ کمیٹی 24 گھنٹے میں ڈاکٹر کیخلاف انکوائری رپورٹ اسپتال انتظامیہ کو پیش کرےگی۔

راولپنڈی  میں کھیلتے ہوئے ٹرنک میں بند ہونے سے تین کمسن بچے جاں بحق ہوگئے۔

اے آر وائی نیوز کے مطابق افسوسناک واقعہ راولپنڈی کے علاقے شاہ خالد خالونی میں پیش آیا جہاں تین کمسن بہن بھائی ٹرنک میں بند ہونے سے جاں بحق ہوگئے۔

پولیس کے مطابق جاں بحق ہونے والوں میں دو بچیاں اور ایک دو سالہ بچہ شامل ہیں، تینوں بچوں کی میتیں اسپتال منتقل کردی گئی ہیں۔

ترجمان ریسکیو کے مطابق جاں بحق ہونے والے تینوں بچے بہن بھائی ہیں جن میں 2 سالہ زوہان، 6 سالہ سائرہ اور 7 سالہ فاریہ شامل ہیں۔

اہلخانہ کا بتانا ہے کہ تینوں بچے کھیلتے ہوئے ٹرنک میں بند ہوگئے تھے۔

حکام کے مطابق ابتدائی معلومات کے مطابق تینوں بچوں کی موت دم گھٹنے سے ہوئی۔