اسلام آباد / لاہور/ کراچی : کنٹونمنٹ کے انتخابات کی پولنگ کا وقت ختم ہوگیا، صرف پولنگ اسٹیشن میں موجود لوگ ہی اپنا ووٹ کاسٹ کر سکیں گے۔.
تفصیلات کے مطابق ملک بھر میں ہونے والے کنٹونمنٹ کے سترہ سال بعد ہونے والے الیکشن کی پولنگ کا وقت اختتام پذیرہوگیا ہے۔.
اس کے بعد ووٹوں کی گنتی کا عمل شروع کیا گیا ہے، بیالیس کنٹونمنٹ بورڈز میں بلدیاتی انتخابات کا دنگل ختم ہوگیا ، کنٹونمنٹ کے انتخابات سترہ سال بعد جماعتی بنیاد پر ہورہے ہیں۔.
مبصرین کا اندازہ ہے ٹرن آؤٹ ساٹھ فیصد سے زیادہ رہ سکتا ہے۔
لاہور : پنجاب کابینہ نے تشدد کا نشانہ بننے والی خواتین کے تحفظ کے بل کی مشروط منظوری دیدی۔ وزیر اعلٰی نے کابینہ کمیٹی کو ہدایت کی ہے کہ 7 روز میں جائزہ لے کر دوبارہ حتمی بل کابینہ اجلاس میں پیش کیا جائے۔
تفصیلات کے مطابق وزیراعلیٰ شہباز شریف کی زیر صدارت پنجاب کابینہ کا اجلاس ہوا، جس میں تشدد کا نشانہ بننے والی خواتین کے تحفظ کے بل 2015ء کی مشروط منظوری دی گئی۔
وزیراعلٰی نے کابینہ کمیٹی کو ہدایت کی کہ وہ 7 روز میں جائزہ لے کر دوبارہ حتمی بل کابینہ اجلاس میں پیش کرے۔ اجلاس میں پنجاب لیبر پالیسی کے مسودے کی بھی منظوری دی گئی۔
وزیر اعلیٰ شہباز شریف کا کہنا تھا کہ لاہور اورنج لائن میٹرو ٹرین پروجیکٹ 27 کلو میٹر طویل ہو گا اور 27 ماہ میں مکمل کیا جائے گا۔
انہوں نے کہا کہ پنجاب حکومت نے چینی کمپنیوں کے ساتھ گفت وشنید کر کے 100 ارب روپے کے قومی وسائل بچائے ہیں۔ وزیر اعلٰی شہباز شریف نے کہا کہ پنجاب میں چینی سرمایہ کاری سے 4.5 ارب ڈالر کے منصوبوں پر عملدرآمد ہو گا، جبکہ سندھ میں 9 ارب ڈالر کی مالیت کے منصوبے لگیں گے۔
ان کا کہنا تھا کہ چینی تعاون سے متعدد منصوبے 2017ء تک کام شروع کر دیں گے، چین کا تاریخ ساز اقتصادی پیکیج پاکستان کے لئے عظیم تحفہ ہے۔
وزیر اعلیٰ پنجاب نے کہا کہ پنجاب میں گیس سے بجلی پیدا کرنے کی بھی منصوبہ بندی کی گئی ہے، پنجاب حکومت اپنے وسائل سے گیس سے 1200 میگاواٹ بجلی پیدا کرنے کا منصوبہ بھی لگائے گی۔
انہوں نے کہا کہ پنجاب کابینہ کے اراکین ،چیف سیکرٹری،انسپکٹر جنرل پولیس، سیکرٹریز، کمشنرز، ڈی سی اوز،آرپی اوز اور ڈی پی اوز ایک ایک سرکاری سکول کو اپنائیں گے، جس سے معیار تعلیم میں بہتری آئے گی۔
وزیر اعلٰی نے ہدایت کی کہ بھٹوں پر چائلڈ لیبر کے خاتمے کا جامع پلان اگلے کابینہ اجلاس میں پیش کیا جائے۔
اسلام آباد : وزیرپانی و بجلی خواجہ آصف کا کہنا ہےکہ بجلی کی قیمتوں میں صارفین کوزیادہ سےزیادہ ریلیف فراہم کررہے ہیں۔
وزیر برائے پانی و بجلی خواجہ آصف نے میڈیا سے بات کرتے ہوئے کہا نیپرا کی جانب سے بجلی کی قیمت میں تیس فیصد کمی کی منظوری دی گئی جو کہ بڑی بات ہے۔
خواجہ آصف کا کہنا تھا کہ بارشوں کی وجہ سےپانی کی زرعی ضرورتوں میں کمی آئی اورہائیڈل پیداوار میں کمی کا سامنا رہا۔
خواجہ آصف نے بتایا کہ گزشتہ سال کے مقابلے میں بجلی کی پیداوار میں ڈیڑھ ہزار میگاواٹ اضافہ ہوا ہے۔
انھوں نے مزید کہا کہ تمام صوبوں میں بجلی کے منصوبے شروع کئے جارہے ہیں، جبکہ پاور پلانٹس کو بلاتعطل فرنس آئل فراہم کیا جارہا ہے۔
روم : اٹلی میں اٹھارہ افراد کو القاعدہ کے ساتھ رابطہ رکھنے کے شبے میں گرفتار کر لیا گیا ہے۔گرفتار افراد میں پشاور مینا بازار حملے کے بعض ملزمان بھی شامل ہیں۔
اطالوی حکام کے مطابق زیادہ تر گرفتاریاں سارڈینیا کے علاقے سے ہوئیں جہاں ان مشتبہ افراد نے انسانی اسمگلنگ کا نیٹ ورک بنایا ہوا تھا۔گرفتار شدگان میں القاعدہ کے مقتول رہنما اسامہ بن لادن کے دو سابق گارڈ بھی شامل ہیں۔
جبکہ کچھ گرفتار افراد کے بارے میں شبہ ہے کہ وہ اکتوبر2009میں پشاور مینا بازار حملے میں ملوث تھے۔اطالوی حکام نے اس آپریشن کو سیکورٹی ایجنسیوں کی بڑی کامیابی قرار دیا ہے۔
کوئٹہ : وزیراعلیٰ بلوچستان نے کہا ہے کہ بلوچستان کا مسئلہ حل کرنے کے لئے حکومت اور عسکری قیادت مذاکرات کے لئے ہمہ وقت تیار ہے۔
کوئٹہ میں بلوچستان اسمبلی کے اجلاس کے بعد صحافیوں سے گفتگو کرتے ہوئے وزیر اعلیٰ بلوچستان کا کہنا تھا کہ صوبے میں خون خرابہ روکنے کے لئے ہر ایک پاس جانا چاہتے ہیں۔
پرامن بلوچستان سب سے بڑی خواہش ہے، انہوں نے کہا کہ خواہشات کی تکمیل کے لئے سب کو ملکر صوبے میں امن وامان کی خاطر کردار ادا کرنا چاہئے۔
ڈاکٹر عبدالمالک کا کہنا تھا کہ تربت میں بیس مزدوروں کے قتل کے واقعے کی تحقیقاتی رپورٹ جلد منظر عام پر لائی جائے گی۔
کراچی : کاؤنٹر ٹیریرزم ڈپارٹمنٹ نے کراچی سےٹارگٹ کلنگ میں ملوث سرکاری ملازم کو گرفتار کرلیا ہے۔
ایس پی عثمان باجوہ کے مطابق سرجانی کے علاقے سے ٹارگٹ کلر سید بابر حسین جعفری عرف ڈپٹی کو گرفتار کیا ہے۔
ملزم نیو کراچی ڈی ایم سی کاملازم ہے اورچودہ سال سےسرکاری ملازمت کررہا ہے، ملزم ٹارگٹ کلنگ کی بیس وارداتوں میں ملوث ہے اور اس کا تعلق سیاسی جماعت سے ہے۔
ملزم بابر حسین جعفری نے تین پولیس اہلکاروں کو بھی ٹارگٹ کلنگ میں شہید کیا ہے، ملزم کو گرفتار کیا گیا تو اس نے بتایا کہ گرفتار نہ ہوتا تو ایک اور ٹارگٹ کلنگ کی منصوبہ بندی کررکھی تھی۔
لندن : وزیراعظم میاں نواز شریف نے کہا ہے کہ چینی صدر کا دورہ دھرنوں کی وجہ سے لیٹ ہوا، سعود ی عرب نے خواہشات کی کوئی فہرست نہیں دی،سعودی عرب کی خود مختاری کی حفاظت کریں گے۔
ان خیالات اظہار انہوں نے لندن میں میڈیا سے بات کرتے ہوئے کیا، وزیر اعظم نے کہا کہ دورہ سعودی عرب میں سعودی حکومت نے پاکستان سے کوئی خواہش یا مطالبہ نہیں کیا ۔
انہوں نے کہا کہ سعودی عرب برادر ملک ہے جس کی حفاظت کیلئے ہر وقت تیار ہیں۔ چینی صدر کے دورے کے حوالے سے وزیراعظم نے کہا کہ چین کے صدر نے تاریخی منصوبوں کا اعلان کیا۔
ان کا دورہ دھرنوں کی وجہ سے لیٹ ہوا۔وزیراعظم نوازشریف نے کہا کہ برطانیہ قریبی دوست ہےاورہمارےبہترین تعلقات ہیں، پاکستان میں تعلیم کےشعبےمیں برطانیہ کاتعاون لائق تحسین ہے۔
کراچی : ممتاز سماجی رہنما اور معروف این جی او کی ڈائریکٹر سبین محمود کو کراچی میں نامعلوم افراد نے فائرنگ کرکے ہلاک کردیا۔
تفصیلات کے مطابق این جی او دی سیکنڈ فلور (ٹی ٹو ایف) کی ڈائریکٹر سبین محمود اپنی والدہ کے ساتھ رات نو بجے ڈیفنس فیز ٹو میں اپنے دفتر سے گھر جانے کے لئے نکلی تھیں کہ راستے میں نامعلوم افراد نے ان پر فائرنگ کردی۔
سبین محمود کو زخمی حالت میں اسپتال لے جایا جا رہا تھا تاہم انہوں نے زخموں کی تاب نہ لاتے ہوئے راستے میں ہی دم توڑ دیا۔
فائرنگ کے واقعے میں سبین کی والدہ بھی زخمی ہوئی ہیں جنہیں نیشنل میڈیکل سینٹر میں طبی امداد دی جارہی ہے۔ ذرائع کے مطابق سبین کی والدہ کی حالت بھی نازک ہے۔
اسلام آباد : نادرا نے عمران خان کی جانب سے ڈی جی نادرا مظفر علی کو عہدے سے ہٹانے کے مطالبے کو مسترد کرتے ہوئے عمران خان سے ڈی جی نادرا کیخلاف ثبوت مانگ لئے۔
تفصیلات کے مطابق نادرانےعمران خان کی طرف سےلکھےگئےخط کاجواب دیدیا۔ نادرا نے ڈی جی مظفرعلی کو عہدے سے ہٹانے سے انکار کردیا۔
ترجمان نادرا کا کہنا ہے کہ غیرمصدقہ الزامات پرایکشن نہیں لیاجاسکتا۔ عمران خان سے مظفرعلی کے خلاف ثبوت مانگے ہیں۔ انہوں نے کہا کہ ثبوت کےبغیرکارروائی انصاف کےتقاضوں کےخلاف ہوگی۔
واضح رہے کہ عمران خان نے چیئرمین نادرا عثمان یوسف مبین کو خط میں ڈی جی نادرا کو عہدے سے ہٹانے کا مطالبہ کیا تھا۔ عمران خان نے این اے ایک سو بائیس میں ووٹروں کےانگوٹھوں کی تصدیق کے عمل کی نگرانی کرنے والے نادرا کےڈائریکٹر جنرل ڈیٹامظفرعلی پرعدم اعتماد کا اظہارکیا تھا۔
عمران خان کا کہنا تھا کہ مظفر علی پر اسپیکر قومی اسمبلی کا دباؤ ہے انہیں تبدیل کیا جائے۔ عمران خان کا کہنا تھا کہ ایاز صادق کے حلقے کی انگھوٹوں کی تصدیق مظفر علی سے نہ کروائی جائے۔
چیئرمین پی ٹی آئی کا مطالبہ تھا کہ ایاز صادق کے حلقے میں ووٹوں کی تصدیق کیلئے غیر جانبدار افسر مقرر کیا جائے۔
کراچی : وزیراعلیٰ سندھ سیدقائم علی شاہ نے ایم کیوایم کے قائد الطاف حسین کوفون کرکے انہیں قومی اسمبلی کے حلقہ این اے 246 کے ضمنی انتخاب میں ایم کیوایم کی شاندار کامیابی پر مبارکباد پیش کی ۔
تفصیلات کے مطابق وزیراعلیٰ سندھ سیدقائم علی شاہ نے الطاف حسین سے گفتگوکرتے ہوئے کہاکہ ضمنی انتخاب میں بھاری اکثریت سے کامیابی خوش آئند ہے جو ایم کیوایم پرعوام کے اعتمادکی مظہرہے۔
انہوں نے اس کامیابی پر سابق صدرآصف زرداری کی جانب سے ایم کیوایم کی قیادت اور کارکنوں کومبارکبادپیش کی ۔ الطاف حسین نے وزیراعلیٰ سندھ سیدقائم علی شاہ کا شکریہ ادا کیا اور انہیں بھی مبارکبادپیش کی۔
اس موقع پر دونوں رہنماؤں نے ایک دوسرے کی خیریت بھی دریافت کی۔