سابق گورنر سندھ اور پیپلز پارٹی کے رہنما کمال اظفرکی کتاب کی لاہور میں تقریب رونمائی کا انعقاد کیا گیا۔ مقامی ہوٹل میں تقریب سے خطاب کرتے ہوئے بیگم عابدہ حسین، خورشید محمود قصوری، کمال اظفر اور دیگر نے کہا کہ کتاب "دی واٹرز آف لاہور" تاریخ پاکستان پر لکھی جانے والی ایک نادر کتاب ہے۔
نوجوانوں کو یہ کتاب پڑھنی چاہے تاکہ انہیں اندازہ ہو یہ ملک کتنی قربانیاں دے کر حاصل کیا گیا ہے۔ کتاب کے مصنف نے کہا کہ وہ پاکستان کے بارے میں اسٹیٹ کے تاثر سے متفق نہیں۔ آنے والی صدی ایشیا کی صدی کہلائے گی۔
رواں مالی سال کے پہلے پانچ ماہ میں خدمات کے تجارتی خسارے کا حجم ایک ارب ڈالر سے زائد رہا۔خدمات کی برآمدات کی حجم میں خاطر خواہ کمی کے باعث خسارے میں اضافہ ریکارڈ کیا گیا۔
اسٹیٹ بینک کے مطابق رواں مالی سال کے پہلے پانچ ماہ میں خدمات کی برآمدات کا حجم چھپین کروڑ تیس لاکھ ڈالررہا جو کہ گزشتہ مالی سال کے اسی عرصے میں ایک ارب نو کروڑستر لاکھ ڈالر تھا ۔
معاشی تجزیہ کاروں کے مطابق گزشتہ سال کے مقابلے میں رواں مالی سال جولائی تا نومبر کےدوران کوئلیشن سپورٹ فنڈ کی مد میں ملنےوالے رقم میں کمی کے باعث خدمات کی برآمدات میں کمی ریکارڈ کی گئی ہے۔
رواں سال نومبر2013ء کے دوران ٹریکٹروں کی پیداوار اور فروخت میں نمایاں اضافہ ریکارڈ کیا گیا، پاکستان ایسوسی ایشن آف آٹو موٹو پارٹس اینڈ مینوفیکچرز کے اعدادوشمارکے مطابق ٹریکٹرتیارکرنے والی دو بڑی کمپنیوں کی نومبر2013ء کے دوران پیداوار بالترتیب 3 ہزار720 اور 4 ہزار 319 یونٹس رہی، جوگزشتہ سال کے اسی عرصے کے دوران 3 ہزار 210 اور 3 ہزار 292 یونٹس تھی، حکام کے مطابق نومبر 2013ء کے دوران ٹریکٹروں کی فروخت دو ہزار 58 یونٹس ریکارڈ کی گئی۔
فیڈریشن آف پاکستان چیمبرآف کامرس اینڈ انڈسٹری(ایف پی سی سی آئی )نے ایف بی آر کے ویب سسٹم کی وجہ سے برآمدات میں تاخیرپرتشویش کا اظہار کرتے ہوئے مطالبہ کیا ہے کہ ایف بی آر برآمد کنندگان کے لیے آئی ڈی اور پاس ورڈ حاصل کرنے کے لئے سیلزٹیکس رجسٹریشن نمبرکی شرط ختم کرے۔
ایف پی سی سی آئی کے سینئررہنما اظہرسعید بٹ نے اپنے ایک بیان میں کہا کہ اس شرط کی وجہ سے نہ صرف برامدات تاخیر کا شکار ہورہی ہیں بلکہ کئی تاجروں کے برآمدی آرڈرزبھی منسوخ ہورہے ہیں اورچھوٹے تاجروں کی حوصلہ شکنی ہورہی ہے۔
انہوں نے کہا کہ کاٹیج انڈسٹری سے وابستہ تاجروں کے لیے اس شرط کوختم کیا جائے، انہوں نے مزید کہا کہ حکومت صرف مخصوص شعبوں کی برآمدات پر توجہ دینے کی بجائے دستکاری، سافٹ ویئرڈیزائن اوردیگراہم شعبوں کی برآمدات میں بھی اضافہ کرے۔
رواں مالی سال 2013-14ء کے پہلے چار ماہ (جولائی تا اکتوبر 2013ء )کے دوران ٹیکسٹائل مصنوعات کی برآمدات میں 7 فیصد اضافہ ریکارڈ کیا گیا۔
پاکستان ادارہ شماریات (پی بی ایس)کے جاری کردہ اعداد و شمار کے مطابق جولائی سے اکتوبر 2013ء کے دوران 4 ارب 69 کروڑ ڈالر مالیت کی ٹیکسٹائل مصنوعات برآمد کی گئی جبکہ گزشتہ سال کی اسی مدت کے دوران چار ارب 30 کروڑ ڈالرمالیت کی مصنوعات برآمد کی گئی تھی۔
اس عرصہ کے دوران خام کپاس اور دھاگے کی برآمدات میں نمایاں اضافہ ریکارڈ کیا گیا جبکہ تولئے اوربیڈ ویئرکی برآمدات میں بھی بتدریج تیزی آئی ۔
ٹی بلزاور پی آئی بیز کی فروخت، اسٹاک مارکیٹ کے ذریعہ حکومت نے ٹی بلز اور پی آئی بیز اسٹاک مارکیٹ کے ذریعے فروخت کرنے کا ارادہ رکھتی ہے۔
وزارت خزانہ کی جانب سے جاری بیان کے مطابق حکومت پاکستان انویسٹ منٹ بانڈز اور ٹریژری بلز کی فروخت اسٹاک مارکیٹ کے ذریعے کرنا چاہتی ہے اور اس ضمن میں ریگیولیٹرز کو حکمت عملی اور فریم ورک تیار کرنے کی ہدایات بھی جاری کر دی گئی ہیں ۔
وزارت خزانہ کے مطابق حکومتی بانڈز کی سیٹلمنٹ سی ڈی سی کے ذریعے کی جائے گی۔
وفاق ہائے ایوان صنعت و تجارت (ایف پی سی سی آئی )کے صدرزبیراحمد ملک نے کہا ہے کہ پاکستان اور بنگلہ دیش کشیدگی کا خاتمہ کرکے اپنی توجہ اصل معاملات پرمبذول کریں، دونوں ملک اپنی توانائیاں امن کو یقینی بنانے اور غربت، جہالت، بے روزگاری و توانائی بحران ختم کرنے میں صرف کریں نہ کہ ایک دوسرے کو الزامات دینے میں۔
کاروباری برادری کے ایک وفد سے خطاب کرتے ہوئے انھوں نے کہا کہ بنگلہ دیش کے معاملہ پر حکومت نے درست موقف اختیار کیا ہے اور کاروباری برادری اس کی بھرپورتائید کرتی ہے۔
انھوں نے کہا کہ پاکستان سے سرمائے اور صنعتوں کئے بنگلہ دیش فرار کی بڑی وجہ جی ایس پی پلس کا اسٹیٹس تھا جو اب پاکستان کوبھی مل چکا ہے اور حکومت اسکی کامیابی کے لئے اقدامات کررہی ہے۔
انھوں نے پاکستانی کاروباری برادری کو مشورہ دیا کہ وہ دوبارہ اپنے ملک منتقل ہونے کا سوچیں جہاں کے لوگ و قوانین انکے لئے اجنبی نہیں اور نہ حکومت و عوام انھیں اپنا حریف سمجھتے ہیں۔
پاکستان اکانومی واچ کے صدر ڈاکٹرمرتضیٰ مغل نے کہا ہے کہ بنگلہ دیش بھارت کا دوست اور پاکستان کا دشمن بن چکا ہے جبکہ بھارت نوازحسینہ واجد خطہ کے امن کے لئے خطرہ بن گئیں ہیں۔.
اپنے ایک بیان میں انہوں نے کہا کہ بنگلہ دیش بھارت کی وزیراعظم خوشنودی اورالیکشن جیتنے کے لئے ہر حد تک گرنے کی صلاحیت رکھتی ہیں، بنگلہ دیش میں پاکستانیوں کی جان اورمال اورمستقبل محفوظ نہیں۔.
سرمایہ کاراپنا سرمایہ نکال کر پاکستان واپس آجائیں اورملک و قوم کی ترقی میں اپنا کردارادا کریں، جبکہ پاکستان میں غیرقانونی طورپرمقیم لاکھوں بنگالیوں کوفوراً ملک سے نکال دیا جائے۔
ڈاکٹرمرتضیٰ مغل نے کہا کہ سرمایہ بنگلہ دیش منتقل کرنے والوں کی وجہ سے پاکستان میں بے روزگاری اور حکومت کی آمدنی میں کمی ہوئی جبکہ زرمبادلہ کے ذرائع بھی گھٹ گئے ہیں۔،
متحدہ قومی موومنٹ کے قائد الطاف حسین نے حضرت امام حسین کے چہلم کے موقع پراورنگی ٹاؤن نمبر 10اور سی بریزپلازہ کے قریب ریموٹ کنٹرول بم دھماکوں کی سخت ترین الفاظ میں مذمت کی ہے اور بم دھماکوں کے نتیجے میں متعدد افراد کے شہید اورمتعدد کے زخمی ہونے پر گہرے دکھ اور افسوس کااظہارکیا ہے۔
ایک بیان میں انہوں نے کہاکہ حضرت امام حسین کے چہلم کے جلوسوں کی گزرگاہوں پر دہشت گردوں نے ریمورٹ کنٹرول بم دھماکے کرکے ثابت کردیا ہے کہ وہ فرقہ وارانہ فسادات کراکر ملک و قوم کو غیر مستحکم کرنا چاہتے ہیں۔ انہوں نے کہاکہ ملک نازک ترین صورتحال سے گزررہا ہے ۔
دہشت گرد ملک کی سالمیت کے درپے ہیں اور ایسی صورتحال میں کسی بھی دہشت گردی کے واقعہ پر تمام مکاتب فکر کے علمائے کرام اور عوام اپنے درمیان اتحاد و بھائی چارے کی فضا برقرار رکھیں ، افواہوں پر کان نہ دھریں اور آپس میں دست وگریباں ہونے کے بجائے دہشت گردوں اور انکے مذموم عزائم کا متحد و منظم ہوکر مقابلہ کریں ۔
انہوں نے بم دھماکوں نتیجے میں شہید افراد کے لواحقین سے دلی تعزیت وہمدردی کااظہار کرتے ہوئے ان کے بلند درجات اور زخمیوں کی جلد ومکمل صحت یابی کیلئے دعا بھی کی۔
الطاف حسین نے وزیراعظم نواز شریف ، وفاقی وزیر داخلہ چودھری نثار اور وزیراعلیٰ سندھ سید قائم علی شاہ سے مطالبہ کیا کہ اورنگی ٹاؤن نمبر 10اور سی بیریز پلازہ کے قریب حضرت امام حسین کے جلوس کی گزرگاہوں پر ریمورٹ کنٹرول بم دھماکوں کا سختی سے نوٹس لیاجائے اور اس میں ملوث دہشت گردوں کو فی الفور گرفتار کرکے قرار واقعی سزا دی جائے۔
تحریک انصاف کے مرکزی رہنماءاعظم سواتی نے کہا ہے کہ مولانا فضل الرحمن قوم کو اپنی آمدنی کے ذرائع ،مہنگی گاڑیوں اور شاہانہ زندگی کا راز بتائیں ،فضل الرحمن کو غلط کام کرتے نہیں دیکھا لیکن انکے بھائی کرپٹ ہیں۔
لاہور میں کرسمس اور بابائے قوم کی سالگرہ کا کیک کاٹنے کی تقریب کے موقع پر میڈیا سے گفتگو کرتے ہوئے اعظم سواتی نے کہاکہ انکے لیے مولانا فضل الرحمن کے بجائے عمران خان کے ساتھ چلنا آسان ہے ۔انہوں نے کہاکہ سینٹ کے ٹکٹ کے لیے مولانا فضل الرحمن کو پیسے نہیں دیئے تھے البتہ پارٹی کے لیے فنڈز دیتا تھا ۔
اعظم سواتی نے کہا کہ نواز شریف نے قومی خزانہ لوٹ کر دولت بنائی ہے، اس کے باوجود وہ نواز شریف کے مقابلے میں زیادہ ٹیکس دیتے ہیں ۔انہوں نے کہاکہ خیبر پختونخوا کا امن امریکہ اور نواز شریف کے ہاتھ میں ہے جب امریکہ نواز شریف اور فوج نے چاہا کے پی کے میں امن ہو جائے گا ۔
اعظم سواتی نے کہاکہ مولانا فضل الرحمن کی شاہانہ زندگی دیکھ کر کہتا ہوں ان کی آمدنی اور شاہانہ زندگی میں توازن کی وجہ کیا ہے ۔ انہوں نے کہاکہ مولانا فضل الرحمن کے بھائی کرپٹ ہیں ۔ اس موقع پر انہوں نے تحریک انصاف وویمن ونگ کی جانب سے کرسمس اور بابائے قوم کی سالگرہ کا کیک بھی کاٹا۔