Author: اعجاز الامین

کراچی میں جاری ٹارگیٹڈ آپریشن کے دوران دس ہزار سے زائد ملزمان کی گرفتاری کادعویٰ کیا گیا ہے۔ مگر چند ہائی پروفائل ٹارگٹ کلنگ میں ملوث ملزمان تاحال قانون کی گرفت سے باہر ہیں۔

شہر قائد میں پولیس اور رینجرز جرائم کے خاتمے کیلئے پرعزم تو لگتی ہے،کامیاب نہیں،کیونکہ سینکڑوں چھاپوں میں جن درجنوں ملزمان کو گرفتار کیاگیا ان میں بڑی تعداد ایسے افراد کی ہے جو معمولی نوعیت کے جرائم میں ملوث ہیں یا صرف شک کی بنیاد پر دھر لئے گئے ہیں جبکہ ٹارگٹ کلنگ کے کئی اہم کیسز اب بھی پولیس کے سر کا درد بنے ہوئے ہیں۔

مجلس وحدت المسلمین کے رہنما علامہ دیدارجلبانی کو محافظ سمیت یونیورسٹی روڈ پر نامعلوم ملزمان نے نشانہ بنایا اور اسی روز نارتھ ناظم آباد میں2مراکشی علما سمیت تبلیغی جماعت کے 3اراکین بے دوردی سے قتل کردیئے گئے،قاتل کون تھے کئی روز گزر جانے کے باوجود ملزمان کی گرفتاری کیوں عمل میں نہیں آسکی سوال اپنی جگہ قائم ہے۔  کئی ماہ گزر گئے۔ نیوٹاون میں ٹارگٹ کلنگ کا نشانہ بننے والے شیخ الحدیث مولانا اسلم شیخوپوری کے قاتلوں کا بھی سراغ نہ مل سکا۔ ڈیفنس میں قتل کی جانے والی تحریک انصاف کی رہنما زہرہ شاہد کے قاتل بھی تاحال نامعلوم ہیں۔

شہر میں سیکورٹی اداروں کے متحرک ہوتے ہی دہشتگردی وقتی طور پر تھم جاتی ہے مگر اچانک قاتل موت بانٹنا شروع کردیتے ہیں۔ رواں سال لیاری سے تعلق رکھنے والے ظفر بلوچ اور کئی سیاسی و مذہبی جماعتوں کے کارکنان کو سرعام قتل کیا گیا مگر تفتیش میں پیشرفت اور اہم ملزمان کی گرفتاری صفر بٹا صفرہے۔

شیخ سیّد ابو الحسن علی ہجویری رحمتہ اللہ علیہ المعروف داتا گنج بخش کا نو سو سترواں عرس لاہور میں شروع ہو گیا۔ عرس تین دن جاری رہے گا۔ شہر کا موسم شدید سرد،مگرعقیدت مندوں نے ماحول گرما رکھا ہے۔

لاہور میں حضرت داتا گنج بخش رحمتہ اللہ علیہ کے عرس کی تقریبات کا آغاز وزریرخزانہ اسحاق ڈار نے مزار پر چادر چڑھاکر کیا۔ جس کے بعد دودھ کی سبیل کا افتتاح کیا گیا۔ عرس کے باقاعدہ آغاز سے پہلے قرآن خوانی اور فاتحہ خوانی کی گئی۔

عرس مبارک کیلئے سکیورٹی کے انتہائی سخت انتظامات کیے گئے ہیں۔ اور سی سی ٹی وی کیمروں سے مانیٹرنگ کی جا رہی ہے۔ افتتاحی تقریب میں وزیر مذہبی اوقاف عطا محمد مانیکا سمیت مختلف مذہبی رہنما اور علمائے کرام سمیت عمائدین شہر موجود تھے۔ عرس میں اندرون اور بیرون ممالک سے ہزاروں کی تعداد میں زائرین شریک ہو رہے ہیں۔ جس کیلئے محکمہ اوقاف و مذہبی امور نے تمام تیاریوں کو حتمی شکل دی ہے۔

عرس کے دوران قومی محفل قرات۔ قومی محافل نعت اور سماع ہال داتا دربار کمپلیکس میں محافل ہوں گی۔ لاہور کا موسم سرد ہے لیکن عقیدت مندوں کے جذبوں کی حرارت نے داتا دربار کا ماحول گرما رکھا ہے۔ لوگ چادریں اٹھائے مزارپرپہنچ رہے ہیں۔ دعائیں اور منتیں مانگ رہے ہیں۔

حضرت امام حسین اور شہدائے کربلا کے چہلم کے موقع پر کراچی سے خیبر تک سیکورٹی کے سخت انتطامات کیے جا رہے ہیں۔ کئی شہروں میں موبائل فون سروس بند رہے گی۔ حضرت امام حسین کے چہلم کے موقع پر ملک بھر میں سیکورٹی پلان تیار اہم شہروں میں موبائل فون رہیں گے خاموش اور کئی شہروں میں موٹرسائیکل کی ڈبل سواری پر پابندی ہوگی۔

وفاقی دارالحکومت اسلام آباد میں تین ہزار سیکیورٹی اہلکار ڈیوٹی دیں گے اورفوج کو الرٹ رکھا جائے گا۔ شہر کی دو حساس امام بارگاہوں پر کمانڈوز بھی تعینات کر دیے گئے۔ پہلی بار جڑواں شہروں کی پولیس مشترکہ گشت کرے گی۔ لاہور اور راولپنڈی سمیت پنجاب کے کئی شہروں میں موبائل فون بند رہیں گے۔ ملتان میں مرکزی جلوس کی گزرگاہوں پر سی سی ٹی وی کیمرے نصب کر دیے گئے ہیں۔

ڈی آئی جی آپریشنز لاہور نے کہا ہے کہ ہربنس پورہ کے علاقے سے دہشت گرد گروہ کی گرفتاری کے بعد چہلم امام حسین پر دہشت گردی کے خدشات کو رد نہیں کیا جا سکتا۔ سندھ میں کراچی ، حیدرآباد، میر پور خاص ، خیرپور اور سکھر میں جلوس کے اوقات میں موبائل فون سروس بند جبکہ تیئس اور چوبیس دسمبر کو کراچی، حیدرآباد، میرپورخاص، خیرپور ، سکھر اور لاڑکانہ میں موٹرسائیکل کی ڈبل سواری پر پابندی ہوگی۔ صوبے بھر میں چہلم امام حسین کے موقع پر اسلحہ کی نمائش پر پابندی عائد کرتے ہوئے خصوصی اجازت نامے بھی منسوخ کر دیے گئے۔

ملک بھر میں جلوسوں کے آنے سے پہلے روٹس کی مکمل سیکیورٹی سرچنگ کرکے پولیس پیٹرولنگ کرائی جائے گی۔پشاور اور کوئٹہ میں بھی چہلم کےموقع پر سخت سیکورٹی انتظامات کیے جا رہے ہیں ۔ پارا چنار میں چہلم کے حوالے سے سیکیورٹی پلان مکمل کر لیا گیا۔
    

شہداء فاونڈیشن نےعبدالرشید غازی قتل کیس میں سابق چیف کمشنر خالد پرویز سابق آئی جی چو ہدری افتخار سمیت دیگر افسران کے نام واپس لینے کا فیصلہ کر لیا ہے۔

شہداء فاونڈیشن کے مطابق عبدالرشید غازی قتل کیس میں سات افسران کے نام واپس لینے کا فیصلہ کیا گیا ہے۔ جس کے لیے پولیس کو تحریری درخواست آج دی جائے گی۔

افسران میں سابق چیف کمشنر اسلام آباد خالد پرویز،سابق آئی جی پولیس اسلام آ باد چوہدری افتخار احمد سمیت وفاقی دارالحکومت کے چار اسسٹنٹ کمشنرز حسین بہادر، اجمل بخاری، ملک فرخ ندیم اور طارق رحیم حیدری شامل ہیں ۔