Author: اعجاز الامین

پاکستان اور سری لنکا کے درمیان ون ڈے سیریز اب ایک ایک سے برابر ہوچکی ہے۔ سیریز کا تیسرا میچ آج شارجہ میں کھیلا جائیگا۔ دو میچوں میں پاکستانی بلے بازوں نے پرفارم کیا مگر بولرز جلد وکٹیں حاصل نہ کرسکے۔

متحدہ عرب امارات میں جاری سیریز کے دوسرے ون ڈے میں سری لنکا نے کامیابی حاصل کرکے قومی ٹیم کی برتری کا خاتمہ کردیا ہے۔ ابتدائی دو میچوں میں کانٹے کے مقابلے دیکھنے کو ملے۔ پاکستان نے پہلا میچ بڑی مشکل سے بچایا تھا مگر دوسرے مقابلے میں لنکن لائنز کے ٹیل اینڈرز بھی آخری دم تک ڈٹے رہے اور میچ جیت کے سیریز برابر کرڈالی۔

پاکستانی بلے بازوں نے کنڈیشنز کا فائدہ اٹھانا اب شروع کردیا ہے۔ مگر بولرز سری لنکن ٹیل اینڈرز کے سامنے بھی بے بس ہورہے ہیں جو کہ حیران کن بات ہے۔ تیسرے مقابلے کیلئے پاکستانی ٹیم کو ہوم ورک کرنا ہوگا۔

بیٹسمینو ں کو بڑا اسکور کرنے کی ضرورت ہے جبکہ بولرز کو کم رنز دیکر جلد وکٹیں حاصل کرنا ہونگی۔ شائقین کو بھی معلوم ہے کہ سری لنکا کے خلاف فتح سمیٹنا قومی ٹیم کے لئے اتنا آسان نہیں ہوگا۔

لیکن گرین شرٹس کو بھی منصوبہ بندی اور جارحانہ حکمت عملی کے ساتھ میدان میں اترنا ہوگا۔

نارویجن اسکائراکسیل سوئنڈال نے الپائن سکائی ورلڈ کپ میں چوبیس ویں کامیابی حاصل کرلی، ویل گارڈینا میں کھیلے جانے والے الپائن اسکائی ورلڈ کپ میں دن کے اختتام پر فرانس کے ایڈرین تیوکس نے تیسری پوزیشن حاصل کی ۔

جبکہ اسکائر وال تورن نے جمعرات اور بدھ کی مایوس کن کارکردگی کے بعد اچھے کھیل کا مظاہرہ کرتے ہوئے پہلی صف میں جگہ بنائی تاہم انہیں مقابلے میں اکسیل سوئنڈال نے پیچھے چھوڑ دیا۔

اسکائنگ کے کھیل میں اسپیشلسٹ کے نام سے مشہور اکسیل سوئنڈال نے بھرپور طاقت اور تیز رفتاری کے ساتھ اسکائنگ کے جوہر دکھاتے ہوئے چوبیسویں کامیابی اپنے نام کرلی۔

ہیملٹن ٹیسٹ میں ویسٹ انڈیز کی ٹیم نے دوسری اننگز میں ہتھیار ڈال دیئے۔ مہمان ٹیم نے نیوزی لینڈ کو جیت کے لئے صرف ایک سو بائیس رنز کا ہدف دے دیا۔

ہیملٹن میں کھیلے جانے والے ٹیسٹ کے تیسرے روز نیوزی لینڈ کی ٹیم پہلی اننگز میں تین سو انچاس رنز بناکر آؤٹ ہوگئی۔

سنیل نرائن نے چھ شکار کئے۔ اٹھارہ رنز کی برتری کے ساتھ ویسٹ انڈیز نے دوسری اننگز شروع کی تو مہمان بیٹنگ لائن کیوی بولرز کے سامنے ریت کی دیوار ثابت ہوئی اور پوری ٹیم صرف ایک سو تین رنز پر ڈھیر ہوگئی۔

ویسٹ انڈیز کے ایک سو بائیس رنز کے ہدف کے تعاقب میں نیوزی لینڈ نے بغیر کسی نقصان کے چھ رنز بنالئے ہیں۔ اور انہیں کامیابی کے لئے مزید ایک سو سولہ رنز کی ضرورت ہے۔

پاکستان ٹیم کے کپتان مصباح کا کہنا ہے کہ ٹیم نے اچھی کارکردگھی دکھائی اگر فیلڈنگ میں رن روک لیتے تو میچ میں کامیابی مل سکتی تھی، دوسری جانب سری لنکن کپتان کا کہنا ہے کہ وہ ٹیم کی پرفارمنس سے بہت خوش ہیں۔

دبئی میں دوسرے ون ڈے میں شکست کے بعد پاکستان ٹیم کے کپتان کے مصباح الحق کا کہنا تھا کہ بلے بازوں نے بہتر کارکردگی دکھائی، بولنگ میں ایک سے دو اوورز خراب گئے جس وجہ سے نتیجہ یمارے حق میں نہیں گیا.

تیسرے میچ میں کم بیک کریں گے، سری لنکن کپتان ایجلو میتھوز کا کہنا تھا کہ کامیابی ٹیم ورک کا نتیجہ ہے،سنگاکارا اور چندی مل نے جیت کی بنیاد رکھی۔ اچھی وکٹ پر پاکستان کو تین سو سے کم پر محدود کرنے میں بولر نے اہم کردارادا کیا –

بہترین کارکردگی پر میتھیوز کو میچ کا بہترین کھلاڑی قراردیا گیا۔ پانچ میچوں کی سیریز کا تیسرا میچ اتوار کو شارجہ میں کھیلاجائے گا۔