راولپنڈی: ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ قومی استحکام کے لیے سیاسی قیادت اور عوام کو اداروں کے ساتھ کھڑا ہونا ہوگا۔
تفصیلات کے مطابق ڈی جی آئی ایس پی آر لیفٹیننٹ جنرل احمد شریف نے کی صحافیوں سے گفتگو کرتے ہوئے کہا ہے کہ بھارت نے پراکسیز اور سہولت کاروں کی مدد سے پاک فوج کو بدنام کرنے کی منصوبہ بندی کی، تاہم اس کا یہ منصوبہ بری طرح ناکام ہو گیا۔
لیفٹیننٹ جنرل احمد شریف نے پریس بریفنگ میں کہا کہ بھارت یہ سمجھ رہا تھا کہ حملوں کے بعد پاکستانی فوج کو آسانی سے ڈس کریڈٹ کر دیا جائے گا، مگر بھرپور اور مؤثر جواب نے دشمن کو خود ہی بے نقاب اور بدنام کر دیا۔
ترجمان کا کہنا تھا کہ پاکستان اور پاک فوج کی جانب سے جرات مندانہ ردعمل کے نتیجے میں بھارتی پراکسیز بھی ناکام ہوئیں اور خود بھارت بھی ڈس کریڈٹ ہوا۔
ڈی جی آئی ایس پی آر نے کہا کہ بھارت کی اربوں ڈالر مالیت کی عسکری مشین پاکستانی حوصلے اور عزم کے آگے بے بس ثابت ہوئیم فتنہ الخوارج اور فتنہ ہند کے ذریعے بیک وقت کارروائی کی کوشش کی گئی، لیکن پاکستان نے بیرونی حملہ آوروں اور اندرونی دہشت گرد نیٹ ورکس کا بہادری سے مقابلہ کیا۔
ان کا کہنا تھا کہ پاکستان کی دو محاذوں پر بیک وقت لڑنے کی صلاحیت نے دشمن کو حیران کر دیا، 2014 میں تمام سیاسی جماعتوں نے غیر قانونی اسپیکٹرم کے خاتمے پر اتفاق کیا تھا مگر آج تک مکمل عملدرآمد نہیں ہو سکا۔
لیفٹیننٹ جنرل احمد شریف نے کہا کہ غیر قانونی مقیم افغان باشندے جرائم میں ملوث ہیں، جب ان کے خلاف کارروائی کی جاتی ہے تو چند سیاسی اور کرمنل عناصر کو مسئلہ ہوتا ہے تایم نیشنل ایکشن پلان کے تمام 14 نکات پر مکمل عمل درآمد قومی سلامتی کے لیے ناگزیر ہے۔
ترجمان کا مزید کہنا تھا کہ گورننس کے خلا کو سیکیورٹی ادارے اپنی جانیں قربان کر کے پورا کر رہے ہیںم، فوج، پولیس اور قانون نافذ کرنے والے ادارے مسلسل قربانیاں دے کر ریاستی رٹ قائم رکھے ہوئے ہیں۔
انہوں نے نوجوانوں کو ملک کا قیمتی سرمایہ قرار دیتے ہوئے کہا کہ قومی استحکام کے لیے سیاسی قیادت اور عوام کو اداروں کے ساتھ کھڑا ہونا ہوگا۔
ڈی جی آئی ایس پی آر نے دو ٹوک پیغام دیا کہ پاکستان ہر محاذ پر دفاع کے لیے پوری طرح تیار اور یکسو ہے۔
