اکاؤنٹنٹ جنرل طاہر محمود نے اپنی برطرفی کو اسلام آباد ہائی کورٹ میں چیلنج کر دیا۔
درخواست میں سیکرٹری خزانہ ، اسٹیبلشمنٹ ڈویژن اور دیگر کو فریق بنایا گیا ہے جبکہ آج ہی کیس کی سماعت کی استدعا بھی کی گئی ہے، ایک دوسرے مقدمے میں اسلام آباد ہائی کورٹ نے چیئرمین پیمرا کی درخواست پر قائمقام چیئرمین سمیت دیگر فریقین کو نوٹس جاری کر دیا۔
درخواست گزار کے وکیل وسیم سجاد نے موقف اختیارکیا کہ عدالتی حکم کی مسلسل خلاف ورزی کی جا رہی ہے، قائمقام چیئرمین ہائی کورٹ کے حکم کو ماننے سے انکاری ہیں۔
دفترخارجہ نے کہا ہے کہ بنگلہ دیش کو ماضی کو بھول کر آگے بڑھنا چاہیئے، عراق میں ہونے والے بس حملے میں کوئی پاکستانی ہلاک نہیں ہوا۔
ہفتہ وار پریس بریفنگ کے دوران ترجمان دفتر خارجہ تسنیم اسلم نے کہا کہ امید ہے بنگلہ دیش انیس سو چوہترکے معاہدے کے تحت مفاہمت کی پالیسی اپنائے گا، پاکستان کی پارلیمنٹ میں ایک خود مختار ادارہ ہے، پارلیمنٹ میں بنگلہ دیش میں جماعت اسلامی کے لیڈر کو پھانسی دیئے جانے کی مذمتی قرارداد یہ جذبہ ظاہر کرتا ہے کہ بنگلہ دیش کو ماضی کو بھول کر آگے بڑھنا چاہیے۔
پاکستان کی امداد کو نیٹو سپلائی سے مشروط کرنے پر میڈیا کی رپورٹ سے متعلق ترجمان نے کہا کہ امریکا نے اس بارے میں آگاہ نہیں کیا، پاکستان کسی قسم کی شرائط قبول نہیں کرے گا، پاکستان نے بے پناہ قربانیاں دی ہیں اور پاکستان کی نیت پر شک نہیں کیا جانا چاہیے، ترجمان نے کہا کہ عراق میں ہونے والے بس حملے میں کوئی پاکستانی ہلاک نہیں ہوا۔
ترجمان کا کہنا تھا پاک بھارت ڈی جی ایم اوز 24 دسمبر کو ملاقات کرینگے، پاکستان نے تجویز دی تھی کہ ملاقات میں دفتر خارجہ کے حکام بھی شامل ہوں لیکن انہوں نے یہ تجویز نہیں مانی۔
وزارت داخلہ کی جانب سے سینیٹ میں لاپتا افراد کیسز کے حوالے سے تحریری جواب جمع کرا دیا گیا ہے، وزارت داخلہ کے مطابق ملک میں لاپتہ افراد کیسز کی تعداد چودہ سو اٹھائیس ہے۔
لاپتہ افراد سے متعلق وزارت داخلہ سینیٹ میں جمع کرائے گئے تحریری جواب کے مطابق ملک میں لاپتہ افراد کیسز کی تعداد چودہ سو اٹھائیس ہے، سپریم کورٹ میں ان کیسز کی تعداد تین سو چار ہے جبکہ لاہور ہائی کورٹ میں لاپتہ افراد کیسز کی تعداد چودہ ہے۔
سندھ ہائی کورٹ میں ان کیسز کی تعداد ایک سو چوہتر ہے، وزارت داخلہ کے اعداد و شمار کے مطابق پشاور ہائی کورٹ میں ایک سو ایک لاپتہ افراد کے کیسز ہیں جبکہ بلوچستان ہائیکورٹ میں کیسز کی تعداد بائیس ہے۔
وزارت داخلہ کے تحریری جواب کے مطابق انکوائری کمیشن میں لاپتہ افراد کی تعداد آٹھ سو تیرہ ہے، خیبر پختونخوا میں سب سے زیادہ افراد لاپتہ ہیں، جن کی تعداد تین سو انسٹھ ہے، سندھ میں لاپتا افراد کی تعداد ایک سو انہتر ہے جبکہ پنجاب میں ایک سو پینسٹھ افراد لاپتہ ہیں۔
انکوائری کمیشن کے مطابق اسلام آباد سے سترہ افراد لاپتہ ہیں میں کے بلوچستان میں لاپتہ افراد کی تعداد اکہتر ہے جبکہ فاٹا اکیس اور آزاد کشمیر میں دس افراد لاپتہ ہیں گلگت بلتستان میں بھی لاپتہ افراد کا ایک کیس ہے، وزارت داخلہ کے مطابق دو ہزارایک سے اب تک اسلام آباد سے بارہ مسخ شدہ لاشیں بھی برآمد ہوئیں۔
کراچی کے علاقے گارڈن اور گڈاپ میں قانون نافذ کرنے والے اداروں کی کاروائی کے دوران سنگین جرائم میں ملوث تین ملزمان کو حراست میں لے لیا۔
کراچی میں جرائم کے خاتمے کے لئے قانون نافذ کرنے والے اداروں کی کاروائیاں جاری ہیں، گڈاپ کےعلاقے اللہ داد گوٹھ میں رینجرز نے چھاپہ مار کاروائیوں کے دوران سنگین جرائم میں ملوث دو ملزمان کو حراست میں لے لیا۔
ترجمان رینجرز کے مطابق ملزمان کے قبضے سے اسلحہ اور منشیات برآمد کر لی گئی، دوسری جانب رات گئے پولیس نے گارڈن میں جرائم پیشہ افراد کی موجودگی پر چھاپا مارا، کاروائی کے دوران پولیس اور جرائم پیشہ افراد کے درمیان فائرنگ کا تبادلہ بھی ہوا۔
پولیس نے مقابلے کے بعد ایک ملزم کو گرفتار کرلیا تاہم ملزم کے دو ساتھی بچ نکلنے میں کامیاب ہوگئے، پولیس کے مطابق ملزم نے ابتدائی تفتیش کے دوران ٹارگٹ کلنگ سمیت متعدد وارداتوں کا اعتراف کیا ہے۔
الیکشن کمیشن نے پنجاب میں ہونے والے بلدیاتی انتخابات کے لئے ضابطہ اخلاق جاری کردیا، جس کے تحت کوئی منتخب نمائندہ یا سرکاری اہلکار الیکشن پر اثر انداز نہیں ہوسکتا ہے۔
پنجاب بھر میں تیس جنوری دو ہزار چودہ کو ہونے والے انتخابات کا ضابطہ اخلاق جاری کردیا ہے، جس کے تحت بلدیاتی انتخابات کی مہم کے دوران ترقیاتی منصوبوں کےاعلان پر پابندی ہوگی، اس کے علاوہ انتخابی حلقوں میں وزیراعظم، وزیراعلٰی کے علاوہ اسپیکر، ڈپٹی اسپیکر پنجاب اسمبلی، صوبائی، وفاقی وزرا کے دورے پر بھی پابندی عائد ہوگی۔
الیکشن کمیشن نے مختلف بلدیاتی امیدواروں کے لئے انتخابی مہم کے اخراجات کی حد بھی مقرر کردی ہے، میٹرو پولیٹن کارپوریشن اور میونسپل کارپوریشن کے میئر اور ڈپٹی میئر کے امیدوارانتخابی مہم پر دو لاکھ روپے خرچ کرسکیں گے، یونین کونسل کے چیرمین اور وائس چیرمین انتخابی مہم پر ایک لاکھ روپے خرچ کرسکیں گے۔
ڈسٹرکٹ کونسل کے چیرمین اور وائس چیرمین کے امیدوار کی انتخابی مہم کے لئے پچاس ہزار روپے اخراجات کی حد مقرر کی گئی ہے، اس کے علاوہ یونین کونسل کے جنرل کونسلرز تیس ہزار روپے تک انتخابی مہم پر خرچ کرسکیں گے اور یونین کونسل، ڈسٹرکٹ کونسل، میونسپل کارپوریشن اورمیٹروپولیٹن کارپوریشن کی مخصوص نشستوں کے امیدوار زیادہ سے زیادہ بیس ہزار روپے خرچ کرسکیں گے۔
اسلام آباد کی انسداد دہشت گردی عدالت نے ججز نظر بندی کیس میں وزارت داخلہ کو پرویز مشرف کی سکیورٹی سے متعلق مفصل رپورٹ جمع کرانے کی ہدایت کردی۔
ججز نظر بندی کیس کی سماعت انسداد دہشت گردی کی عدالت کے جج عتیق الرحمٰن نے کی، دوران سماعت پرویز مشرف کی سکیورٹی کے حوالے سے رپورٹ جمع کروائی گئی۔
عدالت نے رپورٹ پر آئی جی اسلام آباد کے دستخط نہ ہونے پر رپورٹ دوبارہ جمع کروانے کی ہدایت کر دی جبکہ پرویز مشرف کے ضامن کو بھی طلب کرلیا۔
ضامن نے عدالت کو بتایا کہ پرویز مشرف کو سکیورٹی دینا حکومت کا کام ہے، سیکیورٹی دے دی گئی تو پرویز مشرف عدالت میں پیش ہو جائیں گے، عدالت نے سکیورٹی کے حوالے سے سیکرٹری داخلہ کو طلب کرلیا ہے۔
جس پر وزارت داخلہ کی جانب سے طارق لودھی پیش ہوئے اور استدعا کی کہ انھیں رپورٹ جمع کروانے کیلئے مہلت دی جائے، جس پرعدالت نے نو جنوری تک رپورٹ جمع کروانے کی مہلت دیتے ہوئے سماعت ملتوی کردی۔
وزیر دفاع خواجہ آصف کا کہنا ہے کہ سکیورٹی فورسز پر حملے برداشت نہیں، شمالی وزیرستان میں غیر ملکی دہشت گردوں کیخلاف کوئی رعائیت نہیں برتی جائے گی۔
وزیر دفاع خواجہ آصف نے کہا ہے کہ سکیورٹی فورسز پر حملے برداشت نہیں کئے جائیں، وزیرستان میں سکیورٹی فورسز کے قافلوں کو نشانہ بنایا گیا جس کے نتیجے میں سکیورٹی فورسز کے کئی اہلکار شہید ہوئے، حملوں میں غیر ملکی دہشت گردوں کے ملوث ہونے کے شواہد ملے ہیں ۔
وزیر دفاع نے کہا کہ سکیورٹی فورسز کو دہشت گردوں کے خلاف جوابی کاروائی کا مکمل حق حاصل ہے اور اس حق سے دستبردار نہیں ہوں گے، ۔ انھوں نے کہا شمالی وزیرستان میں غیر ملکی شدت پسندوں کیخلاف کاروائی سکیورٹی فورسز پر حملوں کا نتیجہ ہے۔
وزیراعظم نوازشریف نے کہا ہے کہ پاکستان اور افغانستان اور انڈیا کے پاس اچھا دوست بننے کے علاوہ کوئی اور آپشن نہیں ہے، پڑوسی تبدیل نہیں ہو سکتے ہم سب نے اکٹھے ہی رہنا ہے۔
ترک ٹیلی ویژن کو انٹرویو دیتے ہوئے وزیراعظم نوازشریف نے پاکستان کے افغانستان سمیت پڑوسی ملکوں سے تعلقات پر کہا ہے کہ وہ اور حامد کرزئی اس بات پر متفق ہیں ایک دوسرے کے خلاف اپنی سرزمین استعمال نہیں ہوگی۔
نوازشریف کا کہنا تھا کہ ہمسائے تبدیل نہیں ہوسکتے، انھوں نے کہا کہ پاکستان، افغانستان اور بھارت کے پاس ایک ہی آپشن ہے کہ وہ اچھے دوست بن جائیں۔
وزیراعظم نوازشریف نے کہا کہ خطے میں امن اور خوشحالی کیلئے ضروری ہے کہ پاکستان افغانستان اور انڈیا تعلقات بہتر کریں اور ایک دوسرے کے خلاف اپنی سرزمین استعمال نہ ہونے دیں۔
نوازشریف نے کہا کہ افغان صدراس پر متفق ہیں کہ انتہا پسندی کے خاتمے کیلئے پاک افغان تعلقات معمول پر آنا اور دہشت گردوں کو مشترکہ دشمن تصور کیا جانے ضروری ہے۔
مولانا فضل الرحمٰن نے وزیراعظم نوازشریف سے شمالی وزیرستان میں آپریشن بند کرنے کا مطالبہ کر دیا، جے یو آئی کے سربراہ آج بھارتی وزیراعظم سے ملاقات بھی کریں گے، مولانا فضل الرحمان ان دنوں بھارت کے دورے پر ہیں۔
مولانا فضل الرحمٰن نے نئی دہلی سے وزیراعظم نوازشریف کو ٹیلی فون کیا اور شمالی وزیرستان میں آپریشن بند کرنے کا مطالبہ کردیا، مولانا فضل الرحمان کا کہنا ہے کہ شمالی وزیرستان میں آپریشن بند کرکے وہاں پر زخمیوں کو اسپتالوں میں منتقل کیا جائے۔
انکا کہنا تھا کہ حکومت قیام امن کے لئے بات چیت کرے، جے یو آئی کے سربراہ کا مطالبہ ایسے وقت سامنے آیا ہے، جب شمالی وزیرستان میں فورسز پر حملے کے بعد آپریشن شروع کر دیا گیا ہے، عسکری حکام کے مطابق خود کش دھماکے میں زخمی جوانوں کو واپس لے جانے والے سیکورٹی فورسز کے قافلے پر حملہ کیا گیا تھا۔
فورسزکی موثر کاروائی میں تینتیس شدت پسند مارے گئے، مارے جانے والوں کی اکثریت ازبک نژاد ہے، سیکورٹی فورسز اردگرد کےعلاقوں میں سرچ آپریشن کررہی ہیں۔
ملک کے مختلف شہروں میں سردی کا راج ہے، آئندہ چند روز تک ملک کے بیشتر میدانی علاقوں میں دھند کا سلسلہ جاری رہے گا جبکہ ملک کے بیشتر علاقوں میں موسم سرد اور خشک رہنے کا امکان ہے۔
موسم سرما کی یخ بستہ ہواؤں نے ملک کے مختلف شہروں کا رخ کرلیا ہے، گرم کپڑے اور کمبل سب باہر نکل آئے، تھر تھر کرتی سردی نے گرما گرم قہوے ، چائے اور سوپ کا مزہ دوبالہ کردیا ہے۔
محکمہ موسمیات کے مطابق پنجاب کے بیشترعلاقوں لاہور، گوجرانوالہ، فیصل آباد، ساہیوال، ملتان اور بہاولپور ڈویژن سمیت پشاور اور سکھر میں دھند کا راج رہے گا جبکہ آئندہ چند روز میں دھند کی شدت میں کمی آنے کا امکان ہے۔
رواں ہفتے ملک کے بیشتر علاقوں میں موسم سرد اور خشک رہے گا تاہم اسلام آباد، راولپنڈی، گوجرانوالہ اور کشمیر میں سورج بادلوں کی اوٹ میں چھپا رہے گا اور پہاڑوں پر برفباری بھی ہوسکتی ہے، کوئٹہ سمیت بلوچستان کے بالائی علاقے شدید سردی کی لپیٹ میں ہیں۔
سرد علاقوں میں سوئی گیس ہیٹر کے استعمال میں اضافہ ہوگیا ہے، گیس پریشر میں کمی سے لوگوں کو سخت پریشانی کا سامنا ہے، ملک میں سب سے کم درجہ حرارت قلات میں منفی آٹھ ڈگری سینٹی گریڈ ریکارڈ کیا گیا۔