Author: فائزہ شاہ

اسلام آباد : وفاقی پولیس نے پی ٹی آئی کی جانب سے احتجاج کی کال پر خبردار کیا ہے کہ اسلام آباد میں ہنگامہ آرائی کی کسی کو اجازت نہیں دی جائے گی۔

تفصیلات کے مطابق پاکستان تحریک انصاف کی جانب سے آج ملک بھر میں احتجاج کی کال کے پیش نظر اسلام آباد پولیس کے ترجمان نے کہا ہے کہ اسلام آبادمیں ہنگامہ آرائی کی کسی کواجازت نہیں دی جائےگی۔

ترجمان کا کہنا تھا کہ عوامی معلوماتی پلیٹ فارمز سے دفعہ144 کے نافذالعمل ہونے سےمتعلق آگاہ کیاجاچکاہے، دفعہ 144 کی خلاف ورزی پر سخت قانونی کارروائی عمل میں لائی جائے گی۔

اسلام آبادپولیس نے درخواست کی کہ خواتین،بچےایف نائن پارک اور ایف سکس کی طرف دوپہرایک بجے جانے سے گریزکریں۔

یاد رہے کہ گذشتہ روز اسلام آباد انتظامیہ نے پی ٹی آئی کو احتجاج کی اجازت دینے سے انکار کرتے ہوئے کہا تھا شہر میں دفعہ ایک سو چوالیس نافذ ہے۔۔ احتجاج یا ریلی کی اجازت نہیں دے سکتے۔

خیال رہے پاکستان تحریک انصاف کی طرف سے آج ملک بھر میں احتجاج کی کال دے رکھی ہے اور انتخابات میں مبینہ دھاندلی کے خلاف عوام سے باہر نکل کر اپنا احتجاج ریکارڈ کرنے کی درخواست کی ہے۔

شمالی پنجاب میں راولپنڈی کے علاقے ایف نائن پارک، جہلم کے الیکشن کمیشن آفس، اور میانوالی میں بھی پی ٹی آئی ورکرز کی جانب سے احتجاج کیا جائے گا جبکہ ملتان، بہالپور میں آج احتجاج کی کال دی گئی ہے ۔

کورکمیٹی اجلاس کےاعلامیے میں مطالبہ کیا تھا کہ چیف الیکشن کمشنرمستعفی ہوں، چیف الیکشن کمشنراورالیکشن کمیشن کےمجرمانہ کردارپرسب آوازیں اٹھارہےہیں۔ عوام ووٹ کی حرمت کیلئے پُرامن صدائے احتجاج بلند کریں۔

کراچی : پاک بحریہ کی چھٹی ہنگور کلاس آبدوز کی تیاری کا آغاز کردیا گیا ، ہنگورکلاس آبدوزیں جدیدترین ٹیکنالوجی اورہتھیاروں سےلیس کی جائیں گی۔

تفصیلات کے مطابق ترجمان پاک بحریہ کی جانب سے بیان میں کہا گیا ہے پاک بحریہ کی چھٹی ہنگورکلاس آبدوز کی تیاری کا آغاز کردیا گیا ، تقریب کا انعقاد کراچی شپ یارڈاینڈاانجینئرنگ ورکس میں ہوا۔

چیف آف دی نیول اسٹاف ایڈمرل نوید اشرف تقریب کےمہمان خصوصی تھے، ہنگورکلاس آبدوزیں جدیدترین ٹیکنالوجی اورہتھیاروں سے لیس کی جائیں گی۔

اس موقع پر چیف آف دی نیول اسٹاف ایڈمرل نویداشرف نے آبدوزتیاری میں چائنہ شپ بلڈنگ کمپنی کے تعاون کا شکریہ ادا کیا۔

قومی جہاز اورآبدوزسازی کی صنعت کو تقویت دینا نیول ہیڈکوارٹرز کی اولین ترجیح قرار دیتے ہوئے کہا گیا کہ جدیدآبدوزکی تیاری میں وزارت دفاعی پیداوار،پاک بحریہ اور کراچی شپ یارڈ کی کاوشیں لائق تحسین ہیں

ہنگورکلاس آبدوزوں کی پاکستان میں تیاری سے پاک بحریہ کی خود انحصاری کو فروغ ملے گا۔

اسلام آباد : نیشنل ڈیٹا بیس اینڈ رجسٹریشن اتھارٹی (نادرا) نے پاک آئی ڈی موبائل ایپ متعارف کرادی ، جس سے گھر بیٹھے شناختی کارڈ اور فیملی رجسٹریشن سرٹیفکیٹ کی سہولت ہوگی۔

تفصیلات کے مطابق شہریوں کو قطار اور انتظار سے بچانے کیلئے نیشنل ڈیٹا بیس اینڈ رجسٹریشن اتھارٹی (نادرا) نے جدید سہولت فراہم کردی۔

نادرا نے پاک آئی ڈی موبائل ایپ متعارف کرادی ، جس سے تصویر اپ لوڈ ، فنگرپرنٹس اور آن لائن پے منٹ آسان ہوگئی۔

نادرا کا کہنا تھا کہ گھر بیٹھے شناختی دستاویزات ،فیملی رجسٹریشن سرٹیفکیٹ کی سہولت ہوگی ، نادرا میگا دفاتر میں موجود خصوصی معلوماتی کاؤنٹرز پر رابطہ کریں۔

گھر بیٹھے ہر کام ہو سکتا ہے تو نادرا سنٹر کیوں جائیں!

(Pak ID app)
پاک آئی ڈی موبائل ایپ

شہریوں کو قطار اور انتظار کی زحمت سے بچانے کے لئے نادرا کی جدید ترین سہولت

خودکار نظام کی بدولت، تصویر اپ لوڈ کرنے، فنگرپرنٹس اور آن لائن پے منٹ انتہائی آسان

-قومی شناختی کارڈ (این… pic.twitter.com/Al7safwkSG

— NADRA (@NadraPak) January 10, 2024

نادرا کے ترجمان کا کہنا تھا کہ قومی شناختی کارڈ (این آئی سی) ،بیرون ملک پاکستانیوں کے لئے شناختی کارڈ (نائکوپ) اور فیملی رجسٹریشن سرٹیفکیٹ (ایف آر سی)اب گھر بیٹھے اس ایپ کے ذریعے بنوائی جاسکتی ہے۔

کراچی : محکمہ موسمیات نے ملک میں رواں برس سردیوں کا دورانیہ طویل ہونے کی پیشگوئی کردی ہے۔

تفصیلات کے مطابق ملک بھرمیں جاڑے نے دھوم مچادی۔۔ پہاڑوں پر برف کا راج ہے، تو کہیں یخ بستہ ہوائوں سے شہری ٹھٹھرنے لگے ہیں۔

محکمہ موسمیات نے رواں برس سردیوں کا دورانیہ طویل ہونے کی پیشگوئی کردی ہے۔

کراچی میں سائبیرین ہواؤں نے سردی کی شدت میں اضافہ کردیا، گزشتہ رات رواں موسم سرما کی سرد ترین رات تھی۔

گزشتہ رات شہرقائد کا کم سے کم درجہ حرارت گیارہ ڈگری سینٹی گریڈ ریکارڈ کیا گیا، اس سےقبل کم سے کم درجہ حرارت ماہ دسمبرمیں ریکارڈ کیا گیا تھا، جو گیارہ اعشاریہ پانچ ڈگری سینٹی گریڈ تھا۔

گزشتہ سال کی سرد ترین رات کا کم سےکم درجہ حرارت چھ ڈگری سینٹی گریڈریکارڈ کیاگیا تھا تاہم محکمہ موسمیات کےمطابق کراچی میں موسم سرد اور رات میں سردی بڑھنے کا امکان ظاہر کیا ہ

ملک میں سب سے زیادہ سردی اسکردو میں ہے جہاں پارہ منفی دس سے بس کرنے کو تیار نہیں جبکہ قلات میں درجہ حرارت نقطہ انجماد سے چھ ڈگری نیچے آگیا ہے اور کوئٹہ میں درجہ حرارت منفی تین ریکارڈکیا گیا۔

محکمہ موسمیات کے مطابق آئندہ 24گھںٹوں کےدوران ان اضلاع میں موسم شدید سرد رہنے اورشمالی اضلاع میں بارش اورپہاڑوں پر برفباری کا امکان ہے۔

اسلام آباد : پاکستان میں گیس کے نئے ذخائر دریافت کرلئے گئے، شمالی وزیرستان میں شیوا 2 کنویں سے 0.607 ملین کیوبک فٹ یومیہ گیس حاصل ہوگی۔

تفصیلات کے مطابق ماڑی پٹرولیم نے شمالی وزیرستان سے گیس دریافت کرلی ، کمپنی کی جانب سے اعلامیے میں کہا گیا کہ شیوا 2 کنویں سے 0.607 ملین کیوبک فٹ یومیہ گیس حاصل ہوگی۔

اعلامیے میں کہنا تھا کہ گیس وزیرستان میں شیوا 2 کنویں کی کھدائی کے دوران دریافت ہوئی ، شیوا 2 کنویں کی کھدائی 2 جون 2023 کو شروع کی گئی تھی، کنویں کی 4577 میٹر تک کھدائی کی گئی۔

ماڑی پٹرولیم نے کہا کہ نئی دریافت سے ملکی گیس ذخائر میں بہتری آئے گی، اس علاقےمیں ماری پٹرولیم کے 55 فیصد شیئرز ہیں جبکہ او جی ڈی سی ایل کے35 فیصد اور او پی آئی کے10 فیصد شیئر زہیں۔

اسلام آباد: حکومتِ پاکستان اور سعودی حکومت کے درمیان پاکستانی حجاج کو سہولیات کی فراہمی کے حوالے سے متعدد حج معاہدوں پر دستخط ہوگئے۔

تفصیلات کے مطابق نگران وزیر مذہبی امور انیق احمد کی سربراہی میں پاکستانی وفد کے دورہ سعودی عرب کے دوران حکومتِ پاکستان اور سعودی حکومت کے مابین متعدد حج معاہدات پر دستخط ہوگئے۔

سعودی عرب کے ساحلی شہر جدہ میں منعقدہ عالمی حج ایکسپو کے موقع پر پاکستانی حکومت اور سعودی حکام کے مابین متعدد حج معاہدات پر دستخط ہوئے۔

حج ایکسپو میں پاکستانی وفد کی موجودگی میں ڈی جی حج عبدالوہاب سومرو نے حکومتِ پاکستان کی جانب سے معاہدات پر دستخط کیے۔

اس کے علاوہ پاکستانی حجاج کو مختلف سہولیات کی فراہمی سے متعلق باہمی مفاہمت کی یاداشت پر دستخط کیے گئے۔

دستخط کی تقریب میں وزیر مذہبی امور انیق احمد ، سیکرٹری مذہبی امور ڈاکٹر سید عطاءالرحمن ، جوائنٹ سیکرٹری حج سجاد یلدرم جبکہ جدہ میں قائم دفتر امور حجاج پاکستان کے ڈائریکٹر ز ضیاءالرحمن ، فہیم آفریدی اور ضیغم نواز بھی موجود تھے۔

اس موقع پر وزیر مذہبی امور انیق احمد نے کہا کہ آئندہ حج کے دوران منیٰ عرفات میں پہلے سے بہتر جگہ فراہم کی جائے گی۔

انہوں نے اس عزم کا اعادہ کیا کہ حج 2024 کے دوران عمومی سہولیات گذشتہ سال کی نسبت بہتر ہوں گی، حجاج کرام کو بہتر سہولیات کے فراہمی کیلئے وزارت کے حکام انتھک محنت کر رہے ہیں۔

تقریب کے اختتام پر سعودی حکام نے پاکستانی وفد کو غلافِ کعبہ کا سوینئر پیش کیا۔