Author: فائزہ شاہ

اسلام آباد : پارلیمنٹ کا مشترکہ اجلاس آج ہوگا ، جس میں سویڈن میں قرآن پاک کی بے حرمتی کے خلاف متفقہ قرارداد منظور کی جائے گی۔

تفصیلات کے مطابق اسلام آباد میں پارلیمنٹ کا مشترکہ اجلاس آج سہہ پہر 3بجے ہو گا ، اجلاس کا ایجنڈا جاری کردیا گیا ہے۔

جس کے تحت اجلاس میں سویڈن واقعے پر قومی لائحہ عمل مرتب کیا جائے گا اور قرآن پاک کی بے حرمتی کے خلاف تحریک پیش کی جائے گی، وفاقی وزیر پارلیمانی امور مرتضیٰ جاوید عباسی تحریک پیش کریں گے۔

پارلیمنٹ کے مشترکہ اجلاس میں سویڈن میں قرآن پاک کی بے حرمتی کے خلاف متفقہ قرارداد منظور کی جائے گی۔

گذشتہ روز سویڈن میں قرآن پاک کی بے حرمتی کے مذموم عمل پر پاکستان نے سویڈن کے ناظم الامور کو دفترخارجہ طلب کرکے دل خراش واقعے پر شدید احتجاج ریکارڈ کرایا تھا۔

یاد رہے دو روز قبل وزیر اعظم شہباز شریف نے سویڈن میں قرآن پاک کی ہونے والی بے حرمتی کے خلاف 7 جولائی کو ’یوم تقدس قرآن‘ منانے کا اعلان کیا تھا۔

وزیر اعظم شہباز شریف نے کہا تھا کہ جمعہ کو سویڈن واقعے کے خلاف ملک گیر احتجاج ہوگا، تمام جماعتوں اور عوام کو احتجاج میں شرکت کی اپیل ہے۔

ان کا کہنا تھا کہ پوری قوم ایک زبان ہو کر شیطانی ذہنوں کو پیغام دے گی، جمعہ کو سویڈن واقعے کی مذمت میں ملک گیر احتجاجی ریلیاں نکالیں۔

خیال رہے سوئیڈن میں قرآن پاک کی بے حرمتی کے خلاف دنیا بھر میں احتجاج اورمظاہروں کاسلسلہ جاری ہے، مسلمان ریاستوں اورعوام کی جانب سےشدید غم وغصےکا اظہارکیاجارہا ہے۔

اسلام آباد : وزیرخزانہ اسحاق ڈار نے اوپن مارکیٹ میں ڈالر کی قیمت میں 18 سے 20 روپے کمی کا دعویٰ کردیا اور کہا ڈالر 270 سے 272 روپے میں فروخت ہورہا ہے۔

تفصیلات کے مطابق وزیر خزانہ اسحاق ڈار نے سماجی رابطے کی ویب سائٹ ٹوئٹر پر اپنے بیان میں کہا کہ ملک میں مہنگائی کی شرح 29.4 فیصد پر ہے جبکہ مئی 2023 میں یہ مہنگائی کی شرح 38 فیصد پر تھی۔

اسحاق ڈار نے بتایا کہ ایک بجے تک 100 انڈیکس میں 2334پوائنٹس کا اضافہ ہوا جبکہ اوپن مارکیٹ میں ڈالر کے مقابلے روپے کی قدر 270 اور272روپے پر آ گئی۔

راولپنڈی : ڈی جی آئی ایس پی آر میجر جنرل احمد شریف چوہدری کا کہنا ہے کہ ہیومن رائٹس واویلے کے پیچھے 9 مئی کے سہولت کار اور منصوبہ ساز نہیں چھپ سکتے۔

تفصیلات کے مطابق ڈی جی آئی ایس پی آر میجر جنرل احمد شریف چوہدری نے بیرون ملک انسانی حقوق کی خلاف ورزیوں سے متعلق پراپیگنڈے کے حوالے سے سوال پر جواب دیتے ہوئے کہا کہ ہیومن رائٹس خلاف ورزی کا بیانیہ پاکستان کیخلاف بنایا جاتا رہا ہے، جب بھی ایسا بیانیہ بنایا جاتا ہے اس میں اصل آواز بیرون ملک سےاٹھتی ہے۔

میجر جنرل احمد شریف چوہدری نے بتایا کہ انسانی حقوق کی خلاف ورزی کو مختلف طریقوں سے چلایا جارہا ہے، سوشل میڈیاپربیٹھ کرپرانی ویڈیوز اور تصاویرڈالی جاتی ہیں، تاکہ لوگوں میں تاثر پھیلے ریاست پاکستان دیکھو کیا کر رہی ہے۔

ڈی جی آئی ایس پی آر کا کہنا تھا کہ پوشیدہ روابط یا پیسےکی بنیادپرباہربیٹھےمخصوص لوگ یا باہر بیٹھی ایجنسیز،این جی اوزسے بیانات دلائے جاتے ہیں، حکومت بخوبی آگاہ ہے غیرملکی سفارت خانے اور ذرائع ابلاغ کو بریف بھی کیا جاتا ہے۔

میجر جنرل احمد شریف چوہدری نے کہا کہ ہیومن رائٹس وائلیشن کا واویلا مچایا جا رہا ہے، جن ممالک میں جاکرکہاجارہاہےخلاف ورزی ہورہی ہے ان کے ماضی پر نظر ڈالیں، ان جیسےبلوائیوں اورشرپسندوں سے وہ ممالک کیسے نمٹتے ہیں، ہیومن رائٹس واویلے کے پیچھے 9مئی کے سہولت کار،منصوبہ ساز نہیں چھپ سکتے۔

ان کا کہنا تھا کہ اب وقت آگیاکہ ہمیں چاہئے جھوٹ کی کرنسی کوختم کریں، سچ چاہے جتنا بھی کڑواہوہضم کرنےکی صلاحیت پیداکریں۔

اسلام آباد: پاکستان اور آئی ایم ایف کے درمیان سالانہ ایک لاکھ ڈالر پاکستان لانے کی اسکیم پر ڈیڈلاک برقرار ہے، آئی ایم ایف پاکستان کے مؤقف سے مطمئن نہ ہوسکا۔

تفصیلات کے مطابق عالمی مالیاتی ادارے (آئی ایم ایف) کو منانے کیلئے پاکستانی معاشی ٹیم کی سرتوڑ کوششیں جاری ہے، پاکستان اور آئی ایم ایف کے درمیان طویل ورچوئل میٹنگ ہوئی۔

ذرائع نے بتایا کہ پاکستان اور آئی ایم ایف کے درمیان سالانہ ایک لاکھ ڈالرپاکستان لانے کی اسکیم پر ڈیڈلاک برقرار ہے، آئی ایم ایف تاحال اسکیم پر پاکستانی مؤقف سے مطمئن نہ ہوا۔

پاکستان کی معاشی ٹیم نے آئی ایم ایف کو بجٹ کی منظوری اور ترامیم سے آگاہ کرتے ہوئے بریفنگ میں بتایا کہ ٹیکس آمدن مزید 215 ارب روپےبڑھاکر 9415 ارب روپے کردی گئی۔

آئی ایم ایف کو نان ٹیکس آمدن بڑھانے کےلیے لیوی بڑھانے ، نئے ٹیکسز، بجٹ منظوری اور شرائط پر عملدرآمد سے متعلق آگاہ کیا۔

معاشی ٹیم نے آئی ایم ایف حکام کو اسٹاف لیول معاہدے کی درخواست کرتے ہوئے کہا کہ سخت معاشی پالیسیوں جیسے اقدامات پرعملدرآمد کیا ، جس پر آئی ایم ایف نے کوششوں کو سراہا۔

ایک لاکھ ڈالر کی اسکیم پر بجٹ میں بات نہ ہونے پر آئی ایم ایف نے وضاحت مانگ لی، معاشی ٹیم آج کےورچوئل مذاکرات میں ایک لاکھ ڈالرکی اسکیم پر وضاحت دے گی، باہمی مشاورت سےآئی ایم ایف سے آج بھی ورچوئل مذاکرات جاری رہیں گے۔

معاون خصوصی خزانہ طارق باجوہ ، سیکرٹری خزانہ امداد بوسال سمیت چیئرمین ایف بی آر عاصم احمد اور ان کی ٹیم نے ورچوئل میٹنگ میں شرکت کی۔

ذرائع نے بتایا کہ ایکسٹرنل فنانسنگ پربھی آئی ایم ایف کے ساتھ رعایت کی بات چیت کی گئی، آج کی ورچوئل میٹنگ میں بات چیت مثبت رہی تو معاہدےکی طرف بڑھ سکتے ہیں۔