Author: فائزہ شاہ

کراچی : سندھ بلڈنگ کنٹرول اتھارٹی میں سمندری طوفان بپرجوائے کے پیش نظر ایمرجنسی نافذ کرتے ہوئے عملے کی چھٹیاں منسوخ کردی گئیں۔

تفصیلات کے مطابق سمندری طوفان کے پیش نظر سندھ بلڈنگ کنٹرول اتھارٹی میں ایمرجنسی نافذ کردی گئی اور عملے کی چھٹیاں منسوخ کرکے نگرانی کیلئے سات فوکل پرسن تعینات کر دیے گئے۔

انتہائی مخدوش قرار دی گئی چالیس میں سے دس عمارتوں کو خالی کرا کر سیل کر دیا گیا جبکہشہر کے مختلف علاقوں میں ایس بی سی اے کی ٹیمیں مخدوشد عمارتوں کو سیل اور خالی کرانے میں مصروف عمل ہیں۔

یاد رہے کراچی میں سمندری طوفان کے پیش نظر ضلع جنوبی کے پچپن خاندانوں کو مخدوش عمارتوں سے محفوظ مقامات پر منتقل کردیا گیا۔

وزیر اعلیٰ سندھ مرادعلی شاہ کو مخدوش عمارتوں کے متعلق بتایا گیا تھا کہ آرام باغ سے اٹھائیس، لیاری سے چوبیس، گارڈن سے دو اور صدر سے ایک خاندان کو مخدوش عمارتوں سے نکالا گیا۔

وزیر اعلیٰ سندھ نے کمشنر کراچی، ایڈیشنل آئی جی پولیس سمیت ڈاکٹرز، ڈیزاسٹرمینجمنٹ اور دیگر اداروں کو چوکنا رہنے کی ہدایت کرتے ہوئے کہا تھا کہ عوام کی جان و مال کی حفاظت ہماری ذمہ داری ہے۔

کراچی : کراچی میئر کے الیکشن میں جماعت اسلامی نے 33 غیر حاضر ارکان کو پیش کرنے کا مطالبہ کردیا۔

تفصیلات کے مطابق کراچی میں میئر اور ڈپٹی میئر کے لیے انتخاب کا عمل جاری ہے ، جماعت اسلامی نے میئر کے انتخابی عمل پر اعتراض اٹھادیا۔

جماعت اسلامی نے 33 غیر حاضر ارکان کو پیش کرنے کا مطالبہ کردیا ، الیکشن کمیشن نےاعتراض نوٹ کرلیا۔

خیال رہے میئر کے لئے پیپلز پارٹی کے مرتضیٰ وہاب اور جماعت اسلامی کے حافظ نعیم الرحمان کے درمیان مقابلہ ہے جبکہ ڈپٹی میئر کیلئے پیپلزپارٹی کے سلمان عبداللہ مراد اور جماعت اسلامی کے سیف الدین ایڈووکیٹ میدان میں ہیں۔

دونوں جماعتیں اپنے اپنے امیدوار کی کامیابی کیلئے پُرامید ہیں، انتخاب شو آف ہینڈز سے ہوگا۔

آرٹس کونسل کراچی آڈیٹوریم کو پولنگ اسٹیشن قرار دیا گیا ہے اورسیکیورٹی کے سخت انتظامات کیے گئے ہیں۔

ووٹ کاسٹ کرنے کیلئے تین سو بتیس ارکان وقت پر پہنچ گئے جبکہ چونتیس ارکان غیرحاضرہیں۔۔ کے ایم سی کے تین سو چھیاسٹھ ارکان کو ووٹ کاسٹ کرنا تھا۔

سٹی کونسل میں پیپلزپارٹی کے 155 اور جماعت اسلامی کے ارکان کی تعداد133 ہے، پی ٹی آئی باسٹھ ، مسلم لیگ نون چودہ ، جے یو آئی چار اور تحریک لبیک کی ایک نشست ہے۔

میئرکے انتخاب کے لیے پیپلز پارٹی کو مسلم لیگ نون اور جمعیت علمائے اسلام ف کی حمایت حاصل ہے جبکہ ووٹنگ میں حصہ لینے کیلئے فردوس شمیم نقوی سمیت پی ٹی آئی کے تین ارکان کو بکتربند میں آرٹس کونسل پہنچادیا گیا ہے۔

کراچی : امیر جماعت اسلامی کراچی حافظ نعیم الرحمان نے کل کراچی میں شارع قائدین پر ‘تحفظ کراچی مارچ’ کا اعلان کردیا۔

تفصیلات کے مطابق امیر جماعت اسلامی کراچی حافظ نعیم الرحمان نے میئر کے عہدے کیلئے کاغذات نامزدگی جمع کرادیے ، اس موقع پرمنتخب یوسی چیئرمین کی بڑی تعدادموجودتھی

اس موقع پر حافظ نعیم الرحمان نے میڈیا سے گفتگو کرتے ہوئے کہا کہ میئرکراچی کےلیےکاغذات نامزدگی جمع کرائے ہیں، میئرانتخاب کا جو طریقہ رکھا گیا ہے اسے ہائی کورٹ میں چیلنج کیاہے۔

امیر جماعت اسلامی کراچی کا کہنا تھا کہ پی ٹی آئی کے 5 چیئرمین گرفتارہیں، الیکشن کمیشن کی ہدایت کےمطابق رہا نہیں کیا گیا اور آج رات کی تاریکی میں مزید2چیئرمینزکولاپتہ کردیا ہے، جس نے ووٹ ڈالنا ہے اس کو ہی اٹھالیا جائے تو پھر یہ الیکشن کیسے؟

انھوں نے کہا کہ پیپلزپارٹی والے جمہوریت کے چیمپئن بنتے ہیں، کل ملک بھرمیں یوم احتجاج منایا جائے گا، کل کراچی میں شارع قائدین پر تحفظ کراچی مارچ کیا جائے گا۔

پشاور : وزیراعظم محمد شہباز شریف آج ریڈیو پاکستان پشاور کا دورہ کریں گے ، جہاں انھیں ریڈیوپاکستان کی عمارت کو نقصان اوربحالی کےکاموں پر بریفنگ دی جائے گی۔

تفصیلات کے مطابق وزیراعظم محمد شہباز شریف پشاور پہنچ گئے، دورہ پشاور کے دوران شہبازشریف ریڈیو پاکستان کا دورہ کریں گے ،جہاں انھیں ریڈیو پاکستان کی عمارت کونقصان اوربحالی کے کاموں پر بریفنگ دی جائے گی۔

وزیراعظم گورنر ہاؤس بھی جائیں گے ، جہاں ان کوامن و امان کے حوالے سے بریفنگ دی جائے گی جبکہ خیبر پختونخوا کی سیاسی قیادت بھی وزیرِ اعظم سے ملاقات کرے گی۔

گذشتہ روز وزیر اعظم شہباز شریف نے عظمت شہدا کنونشن سے خطاب کرتے ہوئے کہا تھا کہ نو مئی کو ملک میں ریڈ لائن کراس کی گئی،ذمہ داروں کو معافی نہیں ملے گی اور گناہ گار کو چھوڑیں گے نہیں۔

شہباز شریف کا کہنا تھا کہ عمران خان نے اپنے کارکنوں کو شرپسندی کی تربیت دی، اکسانے والوں کو قانون کے کٹہرے میں کھڑا کریں گے، کوئی کوتاہی کروں گا،نہ برداشت کروں گا۔

انھوں نے مزید کہا تھا کہ شہدا کی تکریم پر آنچ نہیں آنے دیں گے ،پاکستان کی بقا شہدا کی قربانیوں کی بدولت ہے،شہدا نے اپنے بچوں کو یتیم چھوڑ دیا لیکن ہمارےبچوں کو یتیم ہونےسے بچالیا۔

یاد رہے کہ 10 مئی کے روز سابق وزیراعظم عمران خان کی اسلام آباد ہائیکورٹ سے گرفتاری کے بعد ملک کے مختلف شہروں میں پرتشدد احتجاج اور جلاؤ گھیراؤ کیا گیا، اس دوران فوجی املاک، شہدا یادگاروں سمیت کئی عوامی سرکاری عمارات کو بھی نقصان پہنچایا گیا تھا۔

شرپسندوں نے ریڈیو پاکستان کی عمارت پر حملہ کیا اور پانچ منزلہ عمارت کو بھی نذر آتش کردیا تھا، ڈائریکٹر جنرل طاہر حسن کا کہنا تھا کہ سینکڑوں کی تعداد میں شرپسندوں نے اچانک دھاوا بول دیا، شرپسند ریڈیو پاکستان پشاور کا گیٹ توڑ کر اندر داخل ہوئے اور گھس کر نیوز روم اور مختلف سیکشنز میں تباہی مچا دی تھی۔

کراچی : کمرشل بینکنگ سرکل اسلام آباد نے حوالہ ہنڈی میں ملوث ملزم کو گرفتار کرکے 2 ہزار511 امریکی ڈالر، 10 ہزار 545 سعودی ریال اور 11 ہزار 750 یو اے ای درہم برآمد کر لئے۔

تفصیلات کے مطابق وفاقی تحقیقاتی ادارے (ایف آئی اے ) کی ملک بھر میں کارروائیاں جاری ہے، کمرشل بینکنگ سرکل اسلام آبادنےحوالہ ہنڈی میں ملوث ملزم گرفتارکرلیا۔

ایف آئی اے ترجمان نے بتایا کہ ملزم کے قبضے سے 2511 امریکی ڈالر، 10545 سعودی ریال اور 11750 یو اے ای درہم برآمد کر لئے گئے۔

ایف آئی اے کا کہنا ہے کہ کمرشل بینکنگ سرکل لاہور نے شہری کے اکاونٹ سے لاکھوں روپے خوردبرد کرنے والے ملزم کو گرفتار کر لیا۔

اس کے علاوہ اینٹی کرپشن سرکل کوئٹہ نے بجلی چوری میں ملوث 2 ملزمان کو گرفتار کر لیا جبکہ انسداد سمگلنگ سیل گوادر اور چمن نے غیر قانونی طریقے سے بارڈر پار کرنے والے 16 ملزمان کو گرفتار کیا، گرفتار ملزمان میں 2 کا تعلق ایران اور 8 کا تعلق افغانستان سے ہے۔

کارروائیوں کے دوران مطلوب 3 اشتہاریوں کو بھی گرفتار کیا گیا، ملزمان کو گرفتار کر کے تحقیقات کا آغاز کر دیا گیا ہے۔

اسلام آباد : اپوزیشن لیڈر راجہ ریاض نے پی ٹی آئی چیئرمین عمران خان پر تنقید کرتے ہوئے کہا کہ پاکستان کو توڑنے والوں نے وہ کام کیا ہے، جس سے قوم کا سرشرم سے جھک گیا ہے ،اس شخص کو سرعام پھانسی دینی چاہیے تھی۔

تفصیلات کے مطابق اپوزیشن لیڈر راجہ ریاض نے قومی اسمبلی اجلاس میں اظہار خیال کرتے ہوئے عمران خان پر کڑی تنقید کی۔

راجہ ریاض کا کہنا تھا کہ عمران خان فتنہ اور انتشار ہے ، اس کی گرفتاری کے بعد ٹرینڈ لوگ افغانستان سے آئےہوئےتھے، انہوں نے جناح ہاؤس کو جلایا، پولیس پر پیٹرول بم پھینکے۔

اپوزیشن لیڈر نے کہ میانوالی میں اربوں ڈالر کےاثاثےہیں،ان جہازوں کوجلانےکی کوشش کی ، انھوں نے پشاور میں ریڈیو اسٹیشن کو آگ لگادی وہ کچھ کیا جو بھارت نہ کرسکا۔

9 اور 10 مئی کے واقعات کے حوالے سے ان کا مزید کہنا تھا کہ جو آج تک طالبان نہ کرسکے اس انتشار اور یہودی ایجنٹ نے کردیا، پاکستان کو توڑنے والوں نے وہ کام کیا ہے جس سےقوم کاسرشرم سے جھک گیا، آج پوراہاؤس اور قوم شرمندہ ہے ، اس شخص کو سرعام پھانسی دینی چاہیے تھی۔