اسلام آباد : پی ٹی آئی رہنما اور وکیل حسان نیازی کو اے ٹی سی کے باہر سے گرفتار کرلیا گیا۔
تفصیلات کے مطابق اسلام آباد پولیس کا پی ٹی آئی کے کیخلاف کریک ڈاؤن جاری ہے ، پولیس نے پی ٹی آئی رہنما اور وکیل حسان نیازی کوجوڈیشل کمپلیکس کےباہر سے گرفتار کر لیا۔
پولیس حکام کا کہنا ہے حسان نیازی کوپولیس ناکہ پرمزاحمت کرنے پر گرفتار کیا گیا۔
وکیل نعیم حیدر نے بتایا کہ حسان خان نیازی عدالت سے میرے ساتھ نکلے،ان کی ضمانت ہو گئی ہے ، ایس پی نوشیروان پولیس کے ساتھ انہیں گاڑی میں بیٹھا کر رمنا تھانہ لے گئے۔
اس حوالے سے پی ٹی آئی رہنما افتخار درانی نے کہا کہ ضمانت ہونے کے باوجود ایس پی نوشیروان نےعدالت کے باہر سے حسان نیازی کواغواکر لیا، اسلام آباد پولیس رانا ثنا کے اشاروں پر ناچتے ہوئے بےشرمی کی انتہاپارکررہی ہے، یہ عدلیہ کی سر عام توہین ہے۔
پی ٹی آئی رہنما فرخ حبیب نے بھی حسان نیازی کی گرفتاری کی مذمت کرتے ہوئے کہا کہ ضمانت کےباوجودایس پی نوشیروان نےعدالت کےباہرسےحسان نیازی کواغواکرلیا، ملک بھرکےوکلاکوفوری سڑکوں پراحتجاج کےلئے نکلنا چاہیے۔
ماہر قانون ابوذر سلمان نیازی نے اے آر وائی نیوز سے خصوصی گفتگو میں کہا ہے کہ عدالت سے ضمانت ملنے کے بعد گرفتاری توہین عدالت ہوتی ہے جبکہ بیرسٹراحمد پنسوٹا کا کہنا تھا کہ یہ ظلم اور بربریت ہے، چیف جسٹس کو اس گرفتاری پر نوٹس لیناچاہیے۔
