ARYNews.tv | Urdu – Har Lamha Bakhabar

Author: فائزہ شاہ

  • چیرمین سینٹ کا متحدہ عرب امارات کاسرکاری دورہ منسوخ کرنے کا فیصلہ

    چیرمین سینٹ کا متحدہ عرب امارات کاسرکاری دورہ منسوخ کرنے کا فیصلہ

    اسلام آباد : چیرمین سینٹ محمد صادق سنجرانی نے کشمیرپرظلم ڈھانےوالے مودی کوایوارڈ سے نواز نے پر متحدہ عرب امارات کاسرکاری دورہ منسوخ کرنے کا فیصلہ۔ کرلیا اور کشمیر بنےگا پاکستان کے نعرے بھی لگائے۔

    تفصیلات کے مطابق چیرمین سینٹ محمد صادق سنجرانی نے متحدہ عرب امارات کا پہلے سے طے شدہ سرکاری دورہ منسوخ کرنے کا فیصلہ کرلیا ، یہ دورہ بھارتی وزیر اعظم کے حالیہ دورے کے پس منظر کو مدنظر رکھتے ہوئے منسوخ کیا۔

    صادق سنجرانی نے کہا کشمیری عوام پردن رات ظلم وجبرڈھانے والے مودی کو یو اے ای نے ایوارڈ سے نوازا، دورہ منسوخ کرنے کا مقصد دنیا کو پیغام دینا ہے کہ ہم کشمیری بھائیوں کے ساتھ ہیں۔

    چیرمین سینٹ کا کہنا تھا کہ سینیٹ آف پاکستان اوراس کاہر رکن کشمیریوں کے ساتھ ہے، ان کی ہرطرح سے مدد کریں گے، پاکستانی افواج اور شہری کشمیری بھائیوں کے لئے تادم حیات لڑتی رہےگی۔

    انھوں نے مزید کہا جب تک کشمیرآزاد نہیں ہوجاتا پاک فوج لڑتی رہےگی، پاکستان زندہ باد، کشمیر بنے گا پاکستان۔

  • کرتارپور راہداری کا افتتاح 11 نومبر کو پر وقار تقریب میں کیا جائے گا، ذرائع

    کرتارپور راہداری کا افتتاح 11 نومبر کو پر وقار تقریب میں کیا جائے گا، ذرائع

    اسلام آباد : پاکستان نے کرتارپورراہداری کو پاک بھارت تناؤ کی نذر نہیں ہونے دیا، کرتارپورراہداری پر جاری کام 31 اگست تک مکمل کرلیا جائےگا جبکہ افتتاح11 نومبرکوپروقارتقریب میں کیا جائے گا۔

    تفصیلات کے مطابق مقبوضہ کشمیرمیں بھارتی مظالم پر پاکستان کا امن پسندی اور بڑے دل کا مظاہرہ کرتے ہوئے کہا ہے کہ کرتارپورراہداری پرجاری کام آخری مراحل میں داخل ہوگیا ہے ، کرتارپورراہداری پرجاری کام31 اگست تک مکمل کرلیاجائے گا۔

    ذرائع کا کہنا ہے کہ دفترخارجہ نےکرتارپورکھولنےسےمتعلق اپناہوم ورک تیزکردیا، کرتارپورراہداری کاافتتاح11 نومبرکوپروقارتقریب میں کیاجائے گا ، تقریب سکھ برادری کے بانی باباگرونانک کی سالگرہ سےمتعلق ہوگی۔

    ذرائع کے مطابق وزیراعظم عمران خان راہداری کی افتتاحی تقریب میں شرکت کریں گے جبکہ وزیر خارجہ اوردیگروزرابھی افتتاحی تقریب میں شریک ہوں گے۔

    کرتارپورراہداری کے افتتاح کے بعد سکھ یاتری بغیر ویزا دربار پر حاضری دینے آسکیں گے۔

    یاد رہے ترجمان دفتر خارجہ ڈاکٹر فیصل نے کہا تھا ہماری خواہش اور کوشش ہےکہ کرتاپورراہداری وقت پرکھل جائے، امید ہے کرتارپور راہداری پر جلد میٹنگ ہوگی۔

    واضح رہے 28 نومبر 2018 کو وزیراعظم عمران خان نے شکرگڑھ میں کرتارپورراہداری کا سنگ بنیاد رکھا تھا اور دنیا کو پیغام دیاکہ پاکستان نفرت کا جواب بھی محبت سے دیتا ہے۔

    خیال رہے جنوری2019میں پاکستان نے معاہدے کا مسودہ بھارت سےشیئرکیا تھا، کرتارپور میں نارووال سے7 گنا بڑا شہرآباد کیا جارہا ہے، نارووال شہر 130 ایکڑ سے 150 ایکڑ اراضی پرمحیط ہے، پاکستان گوردوارہ صاحب سے سرحد تک اپنی حدود میں کرتارپور کوریڈور فیز ون میں ساڑھے 4 کلو میٹر سڑک تعمیر کررہا ہے، اسی طرح بھارت بھی اپنی حدود میں سرحد تک راہداری بنائے گا۔

  • ملک میں سیلابوں کی بڑی وجہ پلاسٹک بیگز بھی ہیں

    ملک میں سیلابوں کی بڑی وجہ پلاسٹک بیگز بھی ہیں

    اسلام آباد : مشیرماحولیات ملک امین اسلم نے کہا ملک میں سیلابوں کی بڑی وجہ پلاسٹک بیگزبھی ہیں ، اسلام آباد سے پلاسٹک بیگز کے استعمال کو روک دیا ہے، ایسے پلاسٹک بیگز متعارف کرائیں گے جو ری سائیکل ہوسکیں۔

    تفصیلات کے مطابق اسلام آباد میں مشیرماحولیات ملک امین اسلم نے نیوز کانفرنس کرتے ہوئے کہا بھارت کااصل چہرہ دنیاکےسامنے بے نقاب ہوچکا ہے ، بھارت نے مقبوضہ وادی میں کرفیو لگا کر کشمیریوں کو محصور کردیا ہے اور کشمیریوں سے تمام بنیادی حقوق چھین لیے ہیں۔

    مشیرماحولیات کا کہنا تھا کہ پاکستان دو قومی نظریے کی بنیاد پر قائم کیاگیا، سفارتی کوششوں سے مسئلہ کشمیر 50سال بعد سلامتی کونسل میں اٹھا۔

    ملک امین اسلم نے کہا ماحول کی بہتری کے لئے 10ارب درخت لگانے کا فیصلہ کیا ہے، منصوبے سے ملک میں ہریالی اور ماحول میں بہتری آئےگی اور گرین پاکستان منصوبے سے روزگار کے مواقع پیدا ہوں گے۔

    ان کا کہنا تھا کہ ملک میں سیلابوں کی بڑی وجہ پلاسٹک بیگزبھی ہیں، 14اگست سے اسلام آباد سے پلاسٹک بیگز کے استعمال کوروک دیا، ایسے پلاسٹک بیگز متعارف کرائیں گے جو ری سائیکل ہوسکیں۔

    مشیرماحولیات نے مزید کہا آئندہ چند سالوں میں ملک میں الیکٹرک گاڑیاں چلائی جائیں گی، الیکٹرک گاڑیوں سے ایندھن کے استعمال اور ماحولیاتی آلودگی میں کمی آئےگی۔

  • موسمِ برسات کے روایتی اور لذیذ پکوان

    موسمِ برسات کے روایتی اور لذیذ پکوان

    پاکستان میں مون سون بارشوں کا آغاز ہوچکا ہے اور بارشوں میں کھانے پینے کا بھی الگ ہی مزہ ہے اور لوگ طرح طرح کے اہتمام کرتے ہیں، جب مٹی کی سوندھی مہک اٹھتی ہے تو اس زمین سے اپنائیت کا احساس اور بڑھ جاتا ہے۔​

    برسات کے موسم کے اپنے رسم و رواج اور اپنے روایتی اور لذیذ پکوان ہوتے ہیں، ان میں بیسن کی روٹی اور سرسوں کا ساگ ، انکی تراکیب ہم آپ کے ساتھ شیئر کررہے ہیں۔

    سرسوں کا ساگ

     

    اجزاء

    سرسوں کا ساگ ایک گڈی

    پالک ایک گڈی

    میتھی کا ساگ ایک گڈی

    پانی آدھا کپ​

    گڑ ایک چائے کا چمچ​

    موٹی ہری مرچ پانچ سے سات عدد​

    نمک حسب ذائقہ​

    ادرک ایک انچ کا ٹکڑا​

    مکئی کا آٹا دو کھانے کے چمچ، ایک چوتھائی پانی میں حل کرلیں​

    مکھن حسب ضرورت

    گارنش کے لئے دو بڑے پیاز باریک کٹے ہوئے اور ایک چائے کا چمچ لہسن کو ایک چوتھائی کپ تیل میں فرائی کرلیں۔

    sarso

    ترکیب​

    ایک بڑی دیگچی میں آدھا کپ پانی ڈال کر سرسوں کے پتے پندرہ سے بیس منٹ تک پکائیں، اب اس میں تمام دیگر اجزاء شامل کر کے پندرہ سے بیس منٹ مزید پکائیں پھر بلینڈر میں ڈال کر تھوڑا بلینڈ کریں، اب اس میں مکئی اور پانی کا محلول ڈال کر چند منٹ مزید پکائیں، اوپر سے گارنش کر کے پیش کریں۔

    ​بیسن کی روٹی

     

    اجزاء​

    بیسن دو کپ​

    آٹا ایک کپ​

    نمک آدھا چائے کا چمچ​

    کُٹی لال مرچ آدھا چائے کا چمچ​

    زیرہ آدھا چائے کا چمچ​

    کُٹا ہوا دھنیا آدھا چائے کا چمچ​

    کٹی ہری مرچ دو عدد​

    کٹی ہری پیاز ایک عدد​

    کٹا ہرا دھنیا ایک کھانے کا چمچ​

    زیتون کا تیل چار کھانے کے چمچ​

    roti

    ترکیب​

    ایک پیالے میں بیسن، آٹا، نمک، کُٹی لال مرچ، زیرہ، کُٹا ہوا دھنیا، کٹی ہری مرچ، کٹی ہری پیاز، کٹا ہرا دھنیا اور زیتون کو تیل ڈال کر مکس کریں، اب اسے نیم گرم پانی کے ساتھ درمیانہ نرم گوندھ لیں اور پھراسے تیس منٹ کے لیے ڈھک کر رکھ دیں۔​

    آخر میں اس کی روٹیاں بیل کر توے پر دونوں جانب سے سینک لیں۔

    ​آلو کے پراٹھے

     

    اجزا:

    آلو ایک کلو

    ہری مرچ باریک کٹی ہوئی 2 سے 3 عدد

    پسی ہوئی لال مرچ ایک چمچہ

    نمک حسب ذائقہ

    بھنا ہوا زیرہ 2 چمچے

    ہرا دھنیا باریک کٹا ہوا 6 سے 7 ڈنڈیاں

    لیموں کا رس 2 چائے چمچ

    آٹا حسب ضرورت روٹیاں بنانے کے لئے

    تیل پراٹھوں کے لئے

    allu

    ترکیب:

    سب سے پہلے ایک پتیلی میں آلو ابالیں، پھر آلوؤں کے چھلکے اتاریں اور اس میں ہری مرچ، لال مرچ، نمک، زیرہ ، ہرا دھنیا اور لیموں کا رس ڈال کر اچھی طرح مکس کرلیں۔

    ایک تسلے میں آٹا گوندھ کر پیڑے بنا کر الگ رکھ دیں اب آٹے کا پیٹرا رکھیں اس پر آلو کا مصالحہ پچھائیں اور دوسرا پیٹرا رکھ کر روٹی کی طرح بیل دیں۔ توے پر تیل ڈال کر سینک لیں۔

    پلیٹ میں نکالیں اور مکھن کے ساتھ مزے سے پراٹھوں کا لطف اٹھائیں۔

    پالک اور پیاز کے پکوڑے

     

    اجزاء

    پالک کے پکوڑے

    پالک آدھی گڈی

    بیسن ایک کپ

    پیاز 2 درمیانہ سائز، کٹی ہوئی

    ہری مرچ 2 باریک کٹی ہوئی

    ہرا دھنیا آدھا کپ

    سفید زیرہ آدھا چائے چمچ

    ہلدی چوتھائی چائے چمچ

    لال مرچ کٹی ہوئی آدھا چائے چمچ

    بیکنگ پاؤڈر آدھا چائے چمچ

    تیل تلنے کیلئے

    نمک حسبِ ذائقہ

    pakoray

    ترکیب

    بیسن چھان لیں اور پالک باریک کاٹ لیں دھو کر اور بیسن میں شامل کر دیں تیل کہ علاوہ سب کچھ ڈال دیں اور مکس کر کے 15 منٹ رکھ دیں پھر تیل گرم کریں اور ڈیپ فرائی کرلیں۔

  • مہنگائی اورٹیکسوں کےخلاف ہڑتال : تاجربرادری 2دھڑوں میں تقسیم

    مہنگائی اورٹیکسوں کےخلاف ہڑتال : تاجربرادری 2دھڑوں میں تقسیم

    کراچی : ملک بھر میں ٹیکسوں میں اضافے اور مہنگائی کیخلاف ہڑتال پرملک بھر میں تاجر دو دھڑوں میں تقسیم ہوگئے، مختلف شہروں میں جزوی ہڑتال ہے۔

    تفصیلات کے مطابق حکومت کی جانب سے ٹیکسوں میں اضافے اور مہنگائی کیخلاف ہڑتال کے معاملے کراچی ، لاہور ، راولپنڈی سمیت دیگر شہروں میں تاجربرادری دو دھڑوں میں تقسیم ہوگئی ہیں۔

    کراچی میں آل پاکستان انجمن تاجران کی اپیل پر ٹیکس نظام کے خلاف ہڑتال کی جارہی ہے جبکہ تاجرایکشن کمیٹی نے ہڑتال سے لاتعلقی کا اعلان کیا ہے۔

    رہنماتاجرایکشن کمیٹی جمیل پراچہ کا کہنا ہے آج کی ہڑتال سے ہمارا کوئی تعلق نہیں ، حکومت نے ہمارے 11 مطالبات میں سے 10 مطالبات مانے ہیں، آج  ہڑتال کرنے والے ایک سیاسی جماعت کے ایما پر ہڑتال کررہے ہیں۔

    لاہور کے تاجر بھی ہڑتال کےمعاملے پرایک نہ ہوسکے، انجمن تاجران اور پاکستان ٹریڈرز الائنس نے علیحدہ علیحدہ دھڑے بنا لیے ہیں ، بیڈن روڈ، اچھرہ ،فیروزپور روڈ،صرافہ مارکیٹ، جیل روڈ پر دکانیں بند ہیں جبکہ انارکلی، بادامی باغ، منٹگمری روڈ، میکلوڈ روڈپر جزوی ہڑتال ہے۔

    ملتان، فیصل آباد، سیالکوٹ، پیرمحل،منڈی بہاؤالدین میں تاجروں نے مکمل ہڑتال کر رکھی ہے جبکہ ظفروال، عارف والا سمیت چھوٹے شہروں میں بھی تاجر بٹ گئے ہیں۔

    راولپنڈی میں بھی اندرون شہراورگردونواح میں دکانیں کھل گئیں جبکہ سٹی صدر روڈ اور کینٹ کے بڑے کاروباری مراکز بند ہیں۔

    خیبرپختونخوا کے مختلف شہروں میں بھی تاجروں نے ہڑتال کررکھی ہے جبکہ بعض شہروں میں کاروبارمعمول کے مطابق کُھلا ہے، مردان میں بجٹ کےخلاف ضلع بھرمیں تاجروں کی شٹرڈاون ہے، شہر کے تمام چھوٹے بڑے تجارتی اور کاروباری مراکزبند ہے۔

    یاد رہے بجٹ میں سیلز ٹیکس میں اضافے کے خلاف  آل پاکستان انجمن تاجران نے بھی 13 جولائی سے ملک بھر میں شٹر ڈاؤن ہڑتال کا اعلان کیا تھا۔

  • نیب اپنے کام سپریم کورٹ سے کیوں کرانا چاہتا ہے؟ چیف جسٹس

    نیب اپنے کام سپریم کورٹ سے کیوں کرانا چاہتا ہے؟ چیف جسٹس

    اسلام آباد : چیف جسٹس آصف کھوسہ نے ایڈیشنل کلکٹرانکم ٹیکس لاہور کی بریت پرنیب کی اپیل مسترد کرتے ہوئے ریمارکس دیئے نیب اپنے کام سپریم کورٹ سے کیوں کرانا چاہتا ہے، ہم نے پہلے بھی کہا آپ کےکام نہیں آئیں گے۔

    تفصیلات کے مطابق سپریم کورٹ میں چیف جسٹس آصف کھوسہ کی سربراہی میں تین رکنی بنچ نے ایڈیشنل کلکٹر انکم ٹیکس لاہور محمد اقبال کی بریت پر نیب اپیل پر سماعت کی۔

    نیب پراسیکوٹرنے عدالت عظمی کوبتایا کہ محمد اقبال احمد نے آٹھ غیر قانونی اور بے نامی جائیدادیں خریدکر آگے فروخت کر دیں، چیف جسٹس نے نیب پراسیکوٹر سے کہا کہ الزام ثابت کرناآپ کاکام ہے، نیب اپنے کام سپریم کورٹ سے کیوں کرانا چاہتا ہے،چیف جسٹس

    چیف جسٹس نے کہا آپ کی اپنی حکومت ہے اپنے کام خود کریں، ہم نےپہلے بھی کہا آپ کےکام نہیں آئیں گے، اگر مالک اور بے نامی دار خود کہہ رہے ہیں کہ جائیداد ہماری نہیں تو آپ کے پاس کیا ثبوت ہے؟ آپ کی غلطی کی ہے کہ 342 کے درست سوالات عدالت میں پیش نہیں کیے۔

    عدالت نے ایڈیشنل کلکٹر انکم ٹیکس لاہور محمد اقبال احمد کی بریت کیخلاف نیب کی اپیل مسترد کر دی اور کہا استغاثہ الزام ثابت کرنے میں ناکام رہا، ملزم کیخلاف اورکوئی مقدمہ ہوتو نیب تحقیقات جاری رکھے۔

    خیال رہے ٹرائل کورٹ نے محمد اقبال احمد کو 2006 میں 10 سال قید اور ایک کروڑ روپے جرمانہ کیا جبکہ ہائی کورٹ نے ملزم کو بری کر دیا تھا۔

    بعد ازاں ملزم کی بریت کےخلاف نیب نےسپریم کورٹ سے رجوع کیا تھا۔

    یاد رہے چیف جسٹس آصف کھوسہ نے ایک کیس کا فیصلہ سناتے ہوئے نیب کو گائیڈ لائن دے دی اور کہا ملزم خاموش بھی رہےتو جرم کو نیب نے ثابت کرنا ہے، شک وشبہ سے بالاتر کیس کو ثابت کرنا نیب کا کام ہے۔

  • قومی ہیرو ایم ایم عالم کا 84 واں یوم پیدائش

    قومی ہیرو ایم ایم عالم کا 84 واں یوم پیدائش

    کراچی : پیسنٹھ کی جنگ دشمن کے دانت کھٹے کرنے والے اور شجاعت اور بہادری کی عظیم مثال قائم کرنے والے پاک فضائیہ کے لیجنڈ پائلٹ ایم ایم عالم کا چورسیواں یوم پیدائش آج منایا جا رہا ہے۔

    تفصیلات کے مطابق پاک بھارت 1965 کی جنگ کے ہیرو ایم ایم عالم کا آج 84واں یوم پیدائش منایا جارہا ہے ، ایم ایم عالم 6 جولائی 1935 کو کلکتہ کے ایک خوشحال اورتعلیم یافتہ گھرانے میں پیدا ہوئے۔

    ثانوی تعلیم 1951 میں سندھ گورنمنٹ ہائی اسکول ڈھاکہ (سابقہ مشرقی پاکستان ) سے مکمل کی، 1952 میں فضائیہ میں آئے اور 2 اکتوبر 1953 کو کمیشنڈ عہدے پرفائز ہوئے، ان کے بھائی ایم شاہد عالم نارتھ ایسٹرن یونیورسٹی میں معاشیات کے پروفیسرتھے اور ایک اور بھائی ایم سجاد عالم البانی میں طبعیات دان تھے۔

    پاک فضائیہ کی تاریخ کا درخشندہ ستارہ محمد محمود عالم المعروف ایم ایم عالم نے 1965 کی پاک بھارت جنگ میں ایسی تاریخ رقم کی جو ہمیشہ یادرکھی جائے گی، بطور پائلٹ ایم ایم عالم نے دشمن کے پانچ طیاروں کوچشم زدن میں زمیں بوس کردیا، انہوں نے مجموعی طور پر نو بھارتی طیاروں کوگرایا، ان کا یہ کارنامہ نہ صرف پاک فضائیہ بلکہ جنگی ہوا بازی کی تاریخ کا بھی ایک معجزہ تصور کیا جاتا ہے۔

    پاک بھارت کی جنگ کے بعد 1967 میں آپ کا تبادلہ بطوراسکواڈرن کمانڈر برائے اسکواڈرن اول کے طور پر ڈسالٹ میراج سوئم لڑاکا طیارہ کے لیے ہوا جو کہ پاکستان ایئرفورس نے بنایا تھا، 1969 میں ان کو اسٹاف کالج کے عہدے سے ہٹا دیا گیا۔

    سن 1972 میں انہوں نے 26ویں اسکواڈرن کی قیادت دو مہینے کے لیے کی اور 1982 میں ریٹائر ہو کرکراچی میں قیام پذیرہوئے۔

    اسکوارڈن لیڈر محمد محمودعالم کو یہ اعزازحاصل ہے کہ انہوں نے 1965 کی پاک بھارت جنگ میں سرگودھا کے محاذ پرپانچ بھارتی ہنٹر جنگی طیاروں کوایک منٹ کے اندراندر مار گرایا تھا ، جن میں سے چار ابتدائی تیس سیکنڈ کے اندر مارگرائے گئے تھے اوریہ ایک عالمی ریکارڈ تھا۔

    وطن کے اس عظیم ہیرو کو ان کے تاریخ ساز کارنامے پر ستارہ جرأت سے نوازا گیا جبکہ لاہور کے علاقہ گلبرگ میں ایک اہم سڑک کا نام ایم ایم عالم روڈ رکھا گیا۔

    قوم کے یہ قابل فخر سپوت اٹھارہ مارچ دو ہزار تیرہ کو 78 برس کی عمر میں دنیائے فانی سے کوچ کرگئے۔

  • قانون سےکوئی بالا نہیں،چیخیں تو سنائی دیں گی، فردوس عاشق اعوان

    قانون سےکوئی بالا نہیں،چیخیں تو سنائی دیں گی، فردوس عاشق اعوان

    اسلام آباد : معاون خصوصی برائے اطلاعات فردوس عاشق اعوان نے کہا قانون اپنےتابع بنانےوالوں کو پہلی بار آزاد قانون کا سامنا ہے،چیخیں تو سنائی دیں گی ، ن لیگی قیادت فسطائی ذہنیت کی بات کرےتوماڈل ٹاؤن میں معصوم لوگوں پربرستی گولیاں یاد آجاتی ہیں۔

    تفصیلات کے مطابق معاون خصوصی برائے اطلاعات فردوس عاشق اعوان نے سماجی رابطے کی ویب سائٹ ٹوئٹر پر اپنے پیغام میں کہا ن لیگی قیادت فسطائی ذہنیت کی بات کرتی ہے تو مجھےماڈل ٹاؤن میں معصوم لوگوں پربرستی گولیاں یاد آجاتی ہیں، خواتین اور ضعیفوں پر بے بہیمانہ تشدد فسطائی رویہ تھا، سیاست کےگلوبٹ کس منہ سےلیکچردے رہےہیں۔

    ایک اور ٹوئٹ میں فردوس عاشق اعوان کا کہنا تھا نیا پاکستان آئین اور قانون کی حکمرانی کا نام ہے، قانون اپنے تابع بنانے والوں کو پہلی بارآزاد قانون کا سامنا ہے، قانون سےکوئی بالا نہیں،چیخیں تو سنائی دیں گی۔

    گذشتہ روز  فردوس عاشق اعوان نے تقریب سے خطاب کرتے ہوئے کہا  تھا کہ مسلم لیگ ن اور پیپلزپارٹی نے ملک کو قرضوں میں جکڑ دیا، ملک کی چوتھی نسل گروی رکھ دی گئی ہے۔

    ان کا کہنا تھا  پاکستان بدل چکا ہے، وزیراعظم عمران خان غریب، محنت کش طبقے کے لیے امید کی کرن ہیں، وزیراعظم نے اسٹیٹس کو کو چیلنج کیا ہے،  محنت  کشوں کے حقوق کا تحفظ حکومت کی اولین ترجیح ہے۔

    معاون خصوصی نے کہا تھا کہ  عمران خان کسی کو کرپشن نہیں کرنے دیں گے، احساس پروگرام وزیراعظم کے ریاست مدینہ کے وژن کا مظہر ہے، احساس پروگرام کا بنیادی مقصد محنت کش طبقے کا سماجی تحفظ ہے۔

  • آئی ایم ایف قرض پروگرام منظوری کے مثبت اثرات نظر آنے لگے

    آئی ایم ایف قرض پروگرام منظوری کے مثبت اثرات نظر آنے لگے

    اسلام آباد : آئی ایم ایف کے پاکستان کے لئے قرض پروگرام منظوری کے مثبت اثرات نظر آنے لگے، کرنسی مارکیٹ میں روپیہ مستحکم اور ڈالر مزید سستا ہوگیا۔

    تفصیلات کےمطابق عالمی مالیاتی ادارے کی جانب سےقرض پروگرام کی منظوری سے کرنسی مارکیٹ میں روپےکی قدرمیں اضافہ دیکھنے میں آیا ، انٹربینک میں ڈالر سستا اور روپے کی قدر میں اضافہ ہوا ہے۔

    فاریکس ڈیلزکےمطابق انٹربینک میں ڈالرایک روپےگیارہ پیسے سستاہوا، انٹربینک میں ڈالرایک سوستاون روپےاکسٹھ پیسے سے کم ہو کر ایک سو چھپن روپے پچاس پیسے ہوگیا ہے۔

    اوپن مارکیٹ میں بھی ڈالر کی قیمت ایک سو ستاون روپے پر آگئی۔

    مزید پڑھیں : آئی ایم ایف نے پاکستان کے لیے 6 ارب 20 کروڑ ڈالر پیکج کی منظوری دے دی

    یاد رہے گذشتہ روز آئی ایم ایف نے پاکستان کوتین برس کےدوران چھ ارب ڈالرکاقرض دینےکی منظوری دی تھی ، قرض پروگرام کےتحت فوری طورپر پاکستان کوایک ارب ڈالرملیں گے۔

    آئی ایم ایف کے اعلامیہ میں کہا گیا پروگرام پاکستان کوجامع معاشی اصلاحات میں کرنے میں مدد دے گا، ان اصلاحات میں روپےکی قدر، قرضوں میں کمی اور ریونیوکے شعبےمیں اصلاحات شامل ہیں۔

    آئی ایم ایف کاکہنا ہےکہ پاکستان معاشی مسائل سے دو چار ہے اور پروگرام پاکستان کومالی اورمالیاتی مسائل سےنمٹنےمیں مدد دے گا۔

    خیال رہے پاکستان پرآئی ایم ایف کے پانچ ارب نوے کروڑ ڈالر واجب الادا ہیں، جس میں سے پچھتر کروڑ ڈالر کی ادائیگی رواں مالی سال ہی کرنی ہے اور آئی ایم ایف سے قرضہ ملنے کے بعد دیگر مالیاتی اداروں اور عالمی بانڈز مارکیٹ سے بھی قرضہ ملنے کی راہ ہموار ہوجائے گی۔

  • اقوام متحدہ میں پاکستانی امن دستوں کو خراج تحسین پیش

    اقوام متحدہ میں پاکستانی امن دستوں کو خراج تحسین پیش

    نیویارک : اقوام متحدہ میں پاکستانی امن دستوں کو خراج تحسین پیش کیا گیا، پاکستان کی مستقل مندوب ملیحہ لودھی نے کہا پاکستان نے ریکارڈ مدت میں خواتین پیس کیپرز کی تعیناتی کا ہدف حاصل کیا۔

    اقوام متحدہ میں پاکستانی امن دستوں کو خراج تحسین پیش کرنے کیلئےتصویری نمائش کا انعقاد کیا گیا، تصویری نمائش کا افتتاح اقوام متحدہ میں پاکستان کی مستقل مندوب ملیحہ لودھی نے کیا۔

    نمائش میں انڈر سیکرٹری جنرل برائے امن مشنز جان لاکرا، سفرا ، مندوبین اور اقوام متحدہ کے اہلکاروں کی بڑی تعداد نےشرکت کی۔

    اقوام متحدہ میں پاکستان کی مستقل مندوب ملیحہ لودھی کاکہناتھا 6 دہائیوں سے پاکستانی دستوں نے امن مشنز میں پیشہ ورانہ خدمات انجام دی ہیں ، پاکستان نے ریکارڈ مدت میں خواتین پیس کیپرز کی تعیناتی کا ہدف حاصل کیا۔

    مزید پڑھیں : پاک فوج 6 دہائیوں سے امن مشنز میں حصہ ڈال رہی ہے، ملیحہ لودھی

    یاد رہے پاکستانی سفیرڈاکٹرملیحہ لودھی نے سلامتی کونسل میں امن مشنز میں تربیت اور مہارت کو فروغ دینے پرمباحثے سے خطاب کرتے ہوئے کہا تھا کہ پاکستان کا کلیدی کردارعالمی امن کے لیے ہماری کوششوں کا ثبوت ہے، چیلنجز کے باوجود پاکستان 6 دہایوں سے اپنی افواج، تکنیکی سامان سے امن مشنز میں حصہ ڈال رہا ہے۔

    پاکستانی سفیر کا کہنا تھا کہ امن مشنزمیں فوجی دستے بھیجنے والے ممالک میں پاکستان ہمیشہ سر فہرست رہا ہے، پاکستان نے باقی ممالک کے فوجی دستوں کو تربیت دینے کی پیشکش کے ہے، اقوام متحدہ میں پاکستان دستے بھیجنے والے ممالک کے گروپ کا چئیرمین بھی ہے۔

    خیال رہے اپریل میں پاکستان نےامن مشنزمیں خواتین دستوں کی تعیناتی کاہدف حاصل کرلیا تھا ، جس پر ملیحہ لودھی کا کہنا تھا پاکستانی خواتین نےعالمی امن کیلئےگراں قدر خدمات سرانجام دی ہیں ، پاکستان نے ہمیشہ فروغ امن کاوشوں میں خواتین کےکردارکی حمایت کی۔