Author: فائزہ شاہ

اسلام آباد : پاکستان اور آذربائیجان کے درمیان 2 ارب ڈالر کی سرمایہ کاری کے معاہدوں کا امکان ہے، دونوں ممالک کے درمیان اقتصادی تعلقات میں اضافہ خوش آئند ہے۔

تفصیلات کے مطابق آذربائیجان کیساتھ سرمایہ کاری کے شعبے میں تعاون بڑھانے کیلئے ایس آئی ایف سی کا اہم کردار ہے۔

پاکستان اور آذربائیجان کےدرمیان 2ارب ڈالرکی سرمایہ کاری کےمعاہدوں پربات چیت جاری ہے اور دونوں ممالک کے درمیان توانائی، انفراسٹرکچراورنجکاری کے منصوبوں پر سرمایہ کاری کے معاہدے متوقع ہیں۔

دونوں ممالک کے درمیان وسطی ایشیائی ریاستوں تک تجارت اورمواصلاتی رابطوں کے فروغ پر تبادلہ خیال کیا گیا۔

آذربائیجان پاکستان کے موٹر وے اور دیگر انفراسٹرکچر منصوبوں میں سرمایہ کاری کا خواہاں ہے تاہم دونوں ممالک کےدرمیان عمومی توانائی،قابل تجدید توانائی اورتوانائی کی بچت کے منصوبوں پر بات چیت جاری ہے۔

پاکستان کےنجکاری پروگرام میں آذربائیجان نے دلچسپی کا اظہار کیا ، ایس آئی ایف سی کے تعاون سےدونوں ممالک کے درمیان اقتصادی تعلقات میں اضافہ خوش آئند ہے۔

اسلام آباد : سول سرونٹس کی دہری شہریت پر پابندی کا بل کثرت رائے سے منظور کرلیا گیا، سعدیہ عباسی نے بل کی مخالفت کی۔

تفصیلات کے مطابق قائمہ کمیٹی برائے کابینہ سیکریٹریٹ کا اجلاس ہوا ، جس میں سول سرونٹس کی دہری شہریت پر پابندی کا بل کثرت رائے سے منظور کرلیا گیا۔

اسلام آباد:بل سینیٹرافنان اللہ کی جانب سےمتعارف کرایا گیا ہے، خصوصی سیکریٹری اسٹیبلشمنٹ ڈویژن نے بتایا کہ 8 کسٹمز افسران دہری شہریت کے حامل ہیں، کابینہ ڈویژن میں ایک افسر دہری شہریت کاحامل ہے۔

سارہ سعید نے کہا کہ 10 اداروں نے سول سرونٹس کی دہری شہریت سےمتعلق جوابات جمع کرادیے، جس پر افنان اللہ کا کہنا تھا کہ عداد و شمار بتا دیں، بل اگلے اجلاس تک مؤخر کر دیتے ہیں۔

ایمل ولی خان نے سوال اٹھایا کہ یہ پالیسی کا معاملہ ہے، اعداد وشمار سے کیا فرق پڑے گا؟ سب اداروں کیلئے بھی یہی قانون ہونا چاہیے۔

چیئرمین کمیٹی کا سینیٹر افنان اللہ کے بل پر ووٹنگ کرانے کا فیصلہ کیا تاہم سعدیہ عباسی نے سول سرونٹس کی دہری شہریت پرپابندی کے بل کی مخالفت کی۔

کراچی : تھر ڈیزرٹ ٹرین سفاری کا آغاز کر دیا گیا، یہ ٹرین کراچی، حیدر آباد اور میر پور خاص سے ہوتی ہوئی پاک بھارت سرحدی علاقے کھوکھراپار جائے گی۔

تفصیلات کے مطابق سندھ حکومت کی جانب سے سیاحت کے فروغ کیلیے تھر ڈیزرٹ ٹرین سفاری کا آغاز کر دیا گیا۔

ٹرین سفاری کراچی، حیدر آباد اور میر پور خاص سے ہوتی ہوئی پاک بھارت سرحدی علاقے کھوکھراپار جائے گی۔

ٹرین کا افتتاح محکمہ ثقافت وسیاحت صوبائی وزیرسید ذوالفقارعلی شاہ کیا، اس موقع پر وزیر سیاحت نے کہا کہ سیاح تھر ڈیزرٹ ٹرین سفاری سے کراچی، حیدرآباد، میرپورخاص، چھور اور کھوکھراپار تک سیاحت و ثقافت کے رنگ دیکھیں گے۔

ان کا کہنا تھا کہ پورے سندھ کو ایک اچھا میسج جائے گا، پیپلزپارٹی چاہتی ہےکہ ثقافت کوفروغ دیا جائے۔

گذشتہ روز بھی صوبائی وزیر نے کہا تھا کہ منصوبہ سندھ کے قدرتی حسن، لوک موسیقی، روایتی دستکاریوں اور تھر کے منفرد طرزِ زندگی کو دنیا کے سامنے اجاگر کرنے کے لیے تیار کیا گیا۔

تھر ڈیزرٹ سفاری ایکسپریس” سندھ کے سیاحتی شعبے کو نئی بلندیاں دے گی ، یہ سندھ کی ثقافتی روح کو چھونے کا نادر موقع ہے۔

لاہور : وزیر تعلیم پنجاب رانا سکندر حیات نے لیپ ٹاپ اسکیم میں رجسٹریشن کرانے والے طلبا کو خبر دار کردیا۔

تفصیلات کے مطابق وزیر تعلیم پنجاب رانا سکندر حیات نے لیپ ٹاپ اسکیم کے حوالے سے بیان میں کہا کہ اسکیم کے حوالے سے گردش کرنیوالے تمام لنکس جعلی ہیں، نوجوان محتاط رہیں، غیر مستند لنکس مت کھولیں۔

یہ لنک صارفین کو ایک ویب سائٹ پر لے جاتا ہے جہاں ان سے ذاتی تفصیلات فراہم کرنے کو کہا جاتا ہے، بشمول ان کا نام، تعلیمی پس منظر وغیرہ۔

ان کا کہنا تھا کہ مستند لنکس و معلومات کیلئے صرف ایچ ای ڈی کی ویب سائٹ یا پیج کو وزٹ کریں۔

مزید پڑھیں : مفت لیپ ٹاپ حاصل کرنے کا طریقہ کار سامنے آگیا

خیال رہے مطابق وزیراعلیٰ پنجاب مریم نواز نے چند ماہ قبل اعلان کیا تھا کہ لیپ ٹاپ اسکیم 2025 کے تحت اعلیٰ کارکردگی کا مظاہرہ کرنے والے طلباء میں مفت لیپ ٹاپ تقسیم کیے جائیں گے۔

حکومت ہونہار طلباء میں 50,000 جدید ترین لیپ ٹاپ تقسیم کرنے کا منصوبہ رکھتی ہے۔

چیف منسٹر کے لیپ ٹاپ پروگرام کے تحت طلباء کو 13ویں جنریشن کے کور 7 آئی لیپ ٹاپ ملیں گے، اقلیتی طلبہ اور سیکنڈری اور ہائر سیکنڈری اسکول کے امتحانات میں بہترین کارکردگی دکھانے والوں کو بھی لیپ ٹاپ سے نوازا جائے گا۔

اسلام آباد : پاکستان تحریک انصاف کے رہنما فیصل چوہدری کا کہنا ہے کہ مینار پاکستان پر جلسے کی اجازت نہیں بھی دی جاتی تو بھی کریں گے۔

تفصیلات کے مطابق پاکستان تحریک انصاف کے رہنما فیصل چوہدری نے اے آر وائی نیوز کے پروگرام ‘الیونتھ آور’ میں کرتے ہوئے بتایا کہ کل سے ہی ہمارے لوگوں کو گرفتار کرنا شروع کر دیا گیا ہے، مینارپاکستان پرجلسے کی اجازت نہیں بھی دی جاتی تو بھی کریں گے۔

رہنما پی ٹی آئی کا کہنا تھا کہ محسن نقوی کہتے ہیں پی ٹی آئی کا جلسہ ہوا تو وہی کریں گے جو 26 نومبر کو کیا لیکن صوابی میں پاکستان تحریک انصاف کا جلسہ ویسے ہی ہونے جا رہا ہے۔

انھوں نے بتایا کہ کل رات متفقہ اعلامیہ جاری کیا گیا، مولانا فضل الرحمان موجود تھے، شاہدخاقان عباسی نے مولانا فضل الرحمان کے اتفاق سے اعلامیہ پڑھا۔

فیصل چوہدری نے کہا کہ ظاہر ہے ہرجماعت کا اپنا نظریہ اور اصول ہوتے ہیں، اپوزیشن جماعتیں آئین و قانون کی بالادستی کیلئے کھڑی ہوئی ہیں۔

جے یو آئی سے متعلق سوال پر ان کا کہنا تھا کہ مولانا فضل الرحمان کیساتھ تعلقات میں جوشدت تھی پہلے بھی کم کی، مولانا فضل الرحمان کیساتھ آئندہ بھی بیٹھ کر مسائل حل کریں گے۔

رہنما پی ٹی آئی نے بتایا کہ مشترکہ اعلامیے میں حکومت سے مستعفی اور الیکشن کا مطالبہ کیا گیا، اپوزیشن جماعتیں اس حکومت کے مینڈیٹ کو تسلیم نہیں کرتی، کیونکہ حکومت نے مینڈیٹ چرایا ہے اسی لیے آزاد الیکشن کمیشن کا مطالبہ کیا گیا۔

ان کا مزید کہنا تھا کہ پیپلزپارٹی اور ن لیگ نے الیکشن کے نتائج نہیں مانے اور فارم 47 کا سہارا لیا، پیپلز پارٹی اورن لیگ اس وقت بی ٹیم بنی ہوئی ہے، دونوں جماعتیں فارم 47 کی پیداوار ہیں جسے عوام تسلیم نہیں کرتے۔

پشاور : سال 2025 کا پہلا ایم پاکس سے متاثرہ شخص صحت یاب ہو گیا، متاثرہ شخص کو ائیر پورٹ سے پولیس سروسز ہسپتال لایا گیا تھا۔

تفصیلات کے مطابق منکی پاکس سے متاثرہ شخص صحت یاب ہو گیا ہے ،مشیر صحت کے پی احتشام علی نے بتایا کہ پبلک ہیلتھ ریفرنس لیب نےمریض کے صحت یاب ہونےکی تصدیق کی ہے۔

مشیر صحت کے پی کا کہنا تھا کہ یہ 2025 کا پہلا کیس تھا جو صحت یاب ہوکر گھر چلاگیا، متاثرہ شخص کو ائیر پورٹ سے پولیس سروسز ہسپتال لایا گیا تھا، متاثرہ شخص نے آئسولیشن وارڈ میں دس دن گُزارے۔

ان کا کہنا تھا کہ پختونخوا میں فی الوقت ایم پاکس کا ایک ایکٹیو کیس ہے، کنٹیکٹ ٹریسنگ کے دوران ابھی تک کوئی شخص متاثرہ ثابت نہیں ہوا۔

کراچی : وزیر اعلیٰ سندھ مرادعلی شاہ نے قومی انسداد پولیو مہم کا افتتاح کرتے ہوئے والدین سے پولیو ورکرز کے ساتھ تعاون کی درخواست ‌‌‌کردی۔

تفصیلات کے مطابق وزیراعلیٰ سندھ مرادعلی شاہ نےقومی انسدادپولیومہم کاافتتاح کردیا ، مراد علی شاہ نےوزیراعلیٰ ہاؤس میں بچوں کوپولیوسے بچاؤ کے قطرے پلا کر مہم کا آغاز کیا۔

اس موقع پر وزیراعلیٰ سندھ نے کہا انسداد پولیو مہم 3 تا 9 فروری تک جاری رہے گی ، اس دوران صوبے میں ایک کروڑ 6 لاکھ بچوں کو پولیو سے بچاؤ کے قطرے پلائے جائیں گے۔

ان کا کہنا تھا کہ پاکستان دنیا کے صرف دو ممالک میں شامل ہے جہاں پولیو وائرس موجود ہے۔

پولیو ٹیموں کے کام میں رکاوٹ ڈالنے والوں کیخلاف کارروائی کی جائے گی، پولیو ورکرز بچوں کے مستقبل کے محافظ ہیں، ان کی عزت کی جائے۔

وزیر اعلیٰ سندھ نے والدین سے پولیو ورکرز کے ساتھ تعاون کی درخواست کرتے ہوئے کہا کہ پولیو ویکسین محفوظ، مؤثر اور مفت ہے، بار بار خوراک دینے سے ہی بچے کی قوت مدافعت مضبوط بنتی ہے۔

انھوں نے درخواست کی علمائے کرام، اساتذہ، اور کمیونٹی رہنما عوام کو پولیو مہم میں شرکت پر آمادہ کریں۔